ອຸມົງໃຕ້ດິນ ກູ໋ຈີ ຖືກສ້າງຂຶ້ນໃນໄລຍະຕໍ່ຕ້ານ ຄືໃນປີ 1948

    ລະບົບອຸມົງໃຕ້ດິນ ກູ໋ຈີ ຖືກສ້າງຂຶ້ນໃນໄລຍະຕໍ່ຕ້ານ ຄືໃນປີ 1948 ໃນບໍລິເວນສອງຕາແສງ ເຕິນຝູຈຸງ ແລະ ເຟືອກວິ້ງອານ. ລະບົບອຸມົງໃຕ້ດິນ ກູ໋ຈີ ມີລາວຍາວທັງໝົດ 250 ກິໂລແມັດ ຖືກແບ່ງເປັນສາມຊັ້ນຢູ່ໃຕ້ດິນ. ຊັ້ນສູງສຸດນອນຫ່າງຈາກໜ້າດິນ 3ແມັດ, ຊັ້ນກາງຫ່າງຈາກໜ້າດິນ 6 ແມັດ ແລະ ຊັ້ນເລິກກວ່າໝູ່ແມ່ນຫ່າງຈາກໜ້າດິນ 12 ແມັດ. ອ້າຍ ເຈືອງວັນກຸ໊ຍ ຜູ້ນຳທ່ຽວຢູ່ເຂດຮ່ອງຮອຍສະຖານປະຫວັດສາດອຸມົງໃຕ້ດິນ ກູ໋ຈີ ໃຫ້ຮູ້ວ່າ:

   “ຢູ່ໃຕ້ດິນກໍ່ມີຫຼາຍກິດຈະກຳແຕກຕ່າງກັນ ຈາກຫ້ອງປະຊຸມ, ເຮືອນຄົວ ບ່ອນກິນເຂົ້າ. ຢູ່ບ່ອນເລິກຈາກໜ້າດິນມີບ່ອນປິ່ນປົວພະຍາດ, ບ່ອນພັກຜ່ອນ ແລະ ສະຖານທີ່ປະຊຸມຂອງທະຫານເຂດ ໄຊງ່ອນ - ຢາດິ້ງ”.

  ດ້ວຍການໃຊ້ເຄື່ອງມືປະຖົມປະຖານຄືຈົກ ແລະ ຊວ້ານເຮັດດ້ວຍໄມ້ໄຜ່, ກອງທັບ ແລະ ປະຊາຊົນ ກູ໋ຈີ ໄດ້ສ້າງກິດຈະກຳທີ່ໃຫຍ່ໂຕຂຶ້ນ ດ້ວຍທາງອຸມົງລວມຄວາມຍາວນັບຮ້ອຍ ກິໂລແມັດ. ລະບົບອຸມົງໃຕ້ດິນຢູ່ສະຖານທີ່ແຫ່ງນີ້ ລວມມີທາງຄົດງໍເຊື່ອມຕໍ່ກັນຕາມພູມມີສັນຖານ. ເຖິງວ່າຖືກກໍ່ສ້າງຢູ່ໃຕ້ດິນກໍ່ຕາມ ແຕ່ລະບົບອຸມົງໃຕ້ດິນມີຄວາມສາມາດຕ້ານຢັນກັບລຸກປືນໃຫຍ່ ແລະ ນ້ຳໜັກຂອງລົດຖັງ, ລົດຫຸ້ມເກາະ ແລະ ຢູ່ບາງບ່ອນເລິກກໍ່ສາມາດຕ້ານຢັນກັບລູກລະເບີດຂະໜາດນ້ອຍໄດ້. ໃນລະບົບອຸມົງໃຕ້ດິນ ກູ໋ຈີ ກໍ່ມີບາງຈຸດຂວາງກັ້ນສັດຕູ ຫຼື ທາດເຄມີເມື່ອຖືກສັດຕູສີດເຂົ້າ, ພັນເອກ ນັກສືບ ຫງວຽນວັນເຕົ່າ ປີນີ້ອາຍຸ 98 ປີ ເຊິ່ງແມ່ນນັກວິລະຊົນກຳລັງປະກອບອາວຸດປະຊາຊົນ ເປັນຜູ້ໄດ້ຕໍ່ສູ່ຢູ່ອຸມົງ ກູ໋ຈີ ໃນໄລຍະ 10 ປີ ແຕ່ປີ 1962 – 1971 ໃຫ້ຮູ້ວ່າ:

    “ກຳລັງທະຫານ ອາເມລິກາ ໃຊ້ເຮືອບິນ B52, B57, ກຳປັ່ນຮົບ, ໃຊ້ທາດເຄມີ, ແກັສນ້ຳຕາ ເພື່ອບຸກໂຈມຕີທຳລາຍລະບົບອຸມົງໃຕ້ດິນ. ຕົ້ນໄມ້ໃບຫຍ້າຖືກສູນເສຍ ແຕ່ກຳລັງພວກຂ້າພະເຈົ້າກໍ່ບໍ່ສັ່ນສະເທືອນ ບັນດາເສັ້ນທາງໃນອຸມົງໃຕ້ດິນ ກູ໋ຈີ ກໍ່ເປັນໜ້າຈາລຶກເຂົ້າໜ້າປະຫວັດສາດ   

      ປັດຈຸບັນເຂດຮ່ອງຮອຍສະຖານປະຫວັດສາດອຸມົງໃຕ້ດິນ ກູ໋ຈີ ໄດ້ຮັບການຮັບຮອງແມ່ນສະຖານທີ່ປະຫວັດສາດລະດັບຊາດພິເສດນັບແຕ່ປີ 2015. ປັດຈຸບັນນະຄອນ ໂຮ່ຈີມິນ ພວມປະກອບເອກະສານໃຫ້ສຳເລັດ ເພື່ອຍື່ນສະເໜີຕໍ່ອົງການ Unesco ຮັບຮອງອຸມົງໃຕ້ດິນ ກູ໋ຈີ ແມ່ນມໍລະດົກໂລກໃນປີ 2027. ທ່ານ ຫງວຽນມິງເຕິມ ຮອງຫົວໜ້າຄະນະຄຸ້ມຄອງເຂດຮ່ອງຮອຍສະຖານປະຫວັດສາດອຸມົງໃຕ້ດິນ ກູ໋ຈີ ໃຫ້ຮູ້ວ່າ:

  “ນີ້ແມ່ນສັນຍານທີ່ດີ. ຖ້າຫາກອຸມົງໃຕ້ດິນ ກູ໋ຈີ ໄດ້ຮັບການຮັບຮອງແມ່ນມໍລະດົກໂລກ ກໍ່ຈະແມ່ນໂອກາດເພື່ອໃຫ້ສະຖານທີ່ແຫ່ງນີ້ ໄດ້ຕ້ອນຮັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດຫຼາຍຂຶ້ນໃນໄລຍະທີ່ຈະມາເຖິງ ເພື່ອໃຫ້ໂລກຮູ້ຈັກເຖິງຄວາມສະຫຼາດສະຫຼຽວ ແລະ ນ້ຳໃຈຮັກຊາດຂອງຊາວ ຫວຽດນາມ”.