ສະຖານທີ່ດຳເນີນຊີວິດດ້ານສາສະຫນາ ຢູ່ຕາແສງ ອີອາ ບັງ.(ພາບ:Ngọc Anh/VOV5)

ຕາແສງ ອີອາ ບັງ ມີ 1.656 ຄອບຄົວດຳລົງຊີວິດ ດ້ວຍພົນລະເມືອງ 6.565 ຄົນ, ລວມມີບັນດາຊົນເຜົ່າຄື: ກິງ, ເມື່ອງ, ຜູ້ໄທ, ມົ້ງ, ຢາຣາຍ, ບານາ.. ຊີວິດການເປັນຢູ່ຂອງພໍ່ແມ່ປະຊາຊົນຢູ່ທີ່ນີ້ ສ່ວນຫລາຍແມ່ນເຮັດກະສິກຳ, ປູກກາເຟ, ປູກເຂົ້າ ແລະ ຢາງພາລາ... ອຳນາດການປົກຄອງທ້ອງຖິ່ນ ໄດ້ສ້າງທຸກເງື່ອນໄຂສະດວກເພື່ອໃຫ້ພໍ່ແມ່ປະຊາຊົນເຄື່ອນໄຫວດ້ານສາສະຫນາ, ການເຊື່ອຖືສາສະຫນາ. ທ່ານ ກະປາ ຮານ, ຮອງປະທານຄະນະກຳມະການປະຊາຊົນຕາແສງ ອີອາ ບັງ ໃຫ້ຮູ້ວ່າ:

“ເບິ່ງລວມແລ້ວ, ຊີວິດການເປັນຢູ່ຂອງບັນດາສາສະນິກະຊົນສ່ວນຫລາຍແມ່ນດີ. ບັນດາສາສະນິກະຊົນເຄື່ອນໄຫວຕາມໂຄງການທີ່ໄດ້ຈົດທະບຽນແຕ່ຕົ້ນປີ ແລະ ປະຕິບັດບັນດາແຜນນະໂຍບາຍ, ແນວທາງຂອງພັກ, ນະໂຍບາຍກົດໝາຍຂອງລັດເປັນຢ່າງດີ. ບັນດາສາສະນິກະຊົນສ່ວນຫລາຍເຄື່ອນໄຫວດ້ານສາສະຫນາໃນຕອນເຊົ້າວັນອາທິດ. ຈຸດປະສົງແມ່ນເພື່ອມຸ່ງໄປເຖິງການຢູ່ໃນສິນກິນໃນທຳ ພ້ອມທັງຮັກສາສີສັນວັດທະນະທຳຊົນເຜົ່າສ່ວນຫນ້ອຍ. ພວກຂ້າພະເຈົ້າຍາມໃດກໍ່ສ້າງເງື່ອນໄຂສະດວກໃຫ້ແກ່ບັນດາສາສະນິກະຊົນດຳເນີນຊີວິດດ້ານສາສະຫນາ, ພິເສດ ແມ່ນກຸ່ມສາສະຫນາໂດຍລັດອະນຸຍາດໃຫ້ເຄື່ອນໄຫວ”.

ຄຸນພໍ່ ບາໂຕໂລເມໂອ ຫງວຽນດິ່ງເຟືອກ, ຮັບຜິດຊອບເຂດຊາວຄຼິດ ຟູໝີ້ ໃຫ້ຮູ້ວ່າ:

“ປະຈຸບັນ ຢູ່ເຂດຊາວຄຼິດໃນຕາແສງ ມີ ໂບດນ້ອຍໆ 2 ແຫ່ງ ແລະ ໂບດໃຫຍ່ 1 ແຫ່ງ, ພໍ່ແມ່ປະຊາຊົນດຳເນີນຊີວິດດ້ານສາສະຫນາຢ່າງສະດວກ, ອາດສາມາດເຕົ້າໂຮມຢູ່ບ່ອນໃກ້ກັບບ້ານຕົນເພື່ອດຳເນີນຊີວິດດ້ານສາສະຫນາ. ກ່ອນນີ້ ຕ້ອງໄປໂບດຢູ່ໄກ, ຜູ້ເຖົ້າຜູ້ແກ່ບໍ່ສາມາດໄປໄດ້. ພວກຂ້າພະເຈົ້າ ມີບ່ອນເຄື່ອນໄຫວ 2 ແຫ່ງຍັງບໍ່ທັນເປັນດິນແດນຂອງສາສະຫນາ ແຕ່ທຸກຄົນລ້ວນແຕ່ມີເງື່ອນໄຂໄດ້ມານີ້ເພື່ອເຂົ້າຮ່ວມງານບຸນ, ດຳເນີນຊີວິດການເຫລື້ອມໃສສາສະຫນາຂອງຕົນ. ພວກຂ້າພະເຈົ້າພະຍາຍາມສອນຄຳສອນ ແລະ ກົດໝາຍ. ພວກຂ້າພະເຈົ້າຮູ້ສຶກສະດວກສະບາຍໃນການເຄື່ອນໄຫວດ້ານສາສະຫນາ ແລະ ພໍ່ແມ່ປະຊາຊົນກໍ່ມີຄວາມປິຕິຊົມຊື່ນເມື່ອເຂົ້າຮ່ວມການດຳເນີນຊີວິດດ້ານສາສະຫນາ”.

ການເຄື່ອນໄຫວດ້ານສາສະຫນາໃນແຕ່ລະຄັ້ງ, ພໍ່ແມ່ປະຊາຊົນພ້ອມກັນຮ້ອງບົດເພງສວດ, ຮັບຟັງຄຸນພໍ່ເຜີຍແຜ່ພະຄຳພີ. ດຳລົງຊີວິດໃນຄວາມຮັກແພງກັນ, ອຸ້ມຊູຊ່ວຍເຫລືອເຊິ່ງກັນ ແລະ ກັນ. ພາຍຫລັງເຂົ້າຮ່ວມການເຄື່ອນໄຫວດ້ານສາສະຫນາແລ້ວ, ປະຊາຊົນຊາວຄຼິດແຕ່ລະຄົນຮູ້ສຶກຈິດໃຈສະຫວາດສະເຫວີຍ, ປະເອີບໃຈ, ຈາກນັ້ນ ກໍ່ອອກແຮງງານ, ເຮັດວຽກຢ່າງດຸໝັ່ນ, ພັດທະນາເສດຖະກິດ. ນ້ອງ ກະປາ ຈວຽນ, ນັກຮຽນຍິງຊາວເຜົ່າ ຢາຣາຍ ຢູ່ ຕາແສງ ອີອາ ບັງ ໃຫ້ຮູ້ວ່າ:

“ຢູ່ທີ່ນີ້ ມີບັນດາສາສະຫນາທີີ່ແຕກຕ່າງກັນ, ນ້ອງເຊື່ອຖືສາສະຫນາກາໂຕລິກ. ໂຮງຮຽນ ສ້າງເງື່ອນໄຂສະດວກໃຫ້ພວກນ້ອງໄດ້ດຳເນີນຊີວິດດ້ານສາສະຫນາ. ຄຸນພໍ່ສັ່ງສອນໃຫ້ພວກນ້ອງ ຕ້ອງດຳລົງຊີວິດດ້ວຍຄວາມຮັກແພງກັນ, ເມື່ອພົບຜູ້ເຖົ້າຜູ້ແກ່ຕ້ອງຊ່ວຍເຫລືອ, ປະຕິບັດຕາມຄຳສັ່ງສອນຂອງພໍ່ແມ່, ຮັກແພງໝູ່ເພື່ອນ... ພວກເຮົາຕ້ອງສາມັກຄີກັນ, ບໍ່ໃຫ້ແບ່ງແຍກກັນ, ຕ້ອງຮັກແພງ, ເຄົາລົບເຊິ່ງກັນ ແລະ ກັນ ເພື່ອສາມາດນຳມາເຊິ່ງຄວາມເບີກບານມ່ວນຊື່ນໃຫ້ກັນ”.

ຊາວຊົນເຜົ່າໃນມື້ດຳເນີນຊິວິດດ້ານສາສະຫນາ. (ພາບ: Ngọc Anh/VOV5)

ບໍ່ພຽງແຕ່ເອົາໃຈໃສ່ຊີວິດທາງດ້ານຈິດໃຈໃຫ້ແກ່ປະຊາຊົນ, ອຳນາດການປົກຄອງທ້ອງຖິ່ນ ຍັງເອົາໃຈໃສ່ເຖິງການພັດທະນາເສດຖະກິດຢູ່ເຂດຊາວຊົນເຜົ່າສ່ວນຫນ້ອຍ. ຄະນະກຳມະການປະຊາຊົນ ຕາແສງ ອີອາ ບັງ ໄດ້ສະຫນອງງົວພັນໃຫ້ແຕ່ລະຄອບຄົວທຸກຍາກ; ເບີກຈ່າຍ 44 ລ້ານດົ່ງຊ່ວຍຄອບຄົວທຸກຍາກປຸກສ້າງເຮືອນຢູ່, ຈັດຕັ້ງການແນະນຳວຽກເຮັດງານທຳໃຫ້ແກ່ປະຊາຊົນ. ຍ້ອນເຫດນັ້ນ ປະຊາຊົນຍິ່ງສະຫນິດຕິດພັນ ແລະ ເຊື່ອໝັ້ນຕໍ່ອຳນາດການປົກຄອງ. ທ່ານ ເຣີລານ ທິກ, ຊາວເຜ່ົາ ຢາຣາຍ ຢູ່ ຕາແສງ ອີອາ ບັງ ໃຫ້ຮູ້ວ່າ:

“ອຳນາດການປົກຄອງເອົາໃຈໃສ່, ສ້າງເງື່ອນໄຂສະດວກໃຫ້ແກ່ປະຊາຊົນຊາວຄຼິດ ແລະ ກຸ່ມດຳເນີນຊີວິດດ້ານສາສະຫນາ. ທຸກປີ ເມ່ືອໂອກາດງານບຸນ Easter (ວັນອິສເຕີ - ວັນສະເຫຼີມສະຫຼອງການຟື້ນຄືນຊີບຂອງພະເຢຊູ),  ຄຼິດມາດ, ບຸນປີໃຫມ່ປະຈຳຊາດ... ອຳນາດການປົກຄອງທ້ອງຖິ່ນ ໄດ້ລົງຢື້ຢາມຖາມຂ່າວ, ມອບຂອງຂວັນ, ໃຫ້ກຳລັງໃຈພໍ່ແມ່ປະຊາຊົນຊາວຄຼິດ, ແນະນຳໃຫ້ບັນດາສາສະນິກກະຊົນປະຕິບັດໃຫ້ຖືກຕ້ອງກັບກົດໝາຍຂອງລັດ. ອຳນາດການປົກຄອງກໍ່ແນະນຳໃຫ້ພໍ່ແມ່ປະຊາຊົນ ເກັບກ່ຽວເຂົ້າ, ຜະລິດຕະພັນກະເສດເຂົ້າຮ່ວມການຈະລາຈອນຢ່າງປອດໄພ, ຮັບປະກັນຄວາມເປັນລະບຽບຮຽບຮ້ອຍທາງສັງຄົມ”.

ບັນດາສາສະຫນາຢູ່ ຕາແສງ ອີອາ ບັງ ມີຄວາມສາມັກຄີກັນ, ສາສະນິກກະຊົນບໍ່ຟັງຄຳຂອງພວກບໍ່ດີ, ຍຸແຍ່ແກ່ດຶງ. ຜູ້ມີຍົດສັກຕຳແຫນ່ງດຳລົງຊີວິດເປັນແບບຢ່າງ, ຕັ້ງຫນ້າໂຄສະນາໃຫ້ແກ່ພໍ່ແມ່ປະຊາຊົນຊາວຄຼິດ ຕ້ອງມີສະຕິ, ມີຄວາມຮັບຜິດຊອບ, ເຮັດຫລ້ອນຫນ້າທີ່ຂອງພົນລະເມືອງ, ສ້າງປະຊາຄົມສາມັກຄີ, ອຸ້ມຊູຊ່ວຍເຫລືອເຊິ່ງກັນ ແລະ ກັນ, ຕັ້ງຫນ້າກໍ່ສ້າງຊົນນະບົດໃຫມ່. ຊາວຄຼິດ ຢູ່ ຕາແສງ ອີອາ ບັງ ໄດ້ ແລະ ພວມເຮັດຫລ້ອນຫນ້າທີ່ຂອງພົນລະເມືອງ, ສາມັກຄີ, ພ້ອມກັນສ້າງສາບ້ານເກີດເມືອງນອນໃຫ້ສວຍງາມສະຫງົບສຸກ.