ການຫັນປ່ຽນຢ່າງຕັ້ງໜ້ນໃນສະຕິຄວາມຮັບຮູ້
ຢູ່ປ້ອມປ້ອງກັນຊາຍແດນ ຊາຮວິ່ງ, ແຂວງ ກວາງຫງ້າຍ, ຮູບແບບ “ສຽງລຳໂພງໂຄສະນາເຜີຍແຜ່ການຕ້ານການຂຸດຄົ້ນ IUU” ໄດ້ສ້າງໃຫ້ມີການຫັນປ່ຽນທີ່ຕັ້ງໜ້າໃນການປະຕິບັດຕາມຂໍ້ກຳນົດການຂຸດຄົ້ນສິນທະເລຂອງຊາວປະມົງ.
 (ກຳປັ່ນຫາປາຢູ່ທ່າກຳປັ່ນ ຕິ້ງຮ່ວາ, ແຂວງ ກວາງງ້າຍ) |
ປ້າ ຫວໍທິຮົ່ງຫາຍ, ຕາແສງ ດຶກໂຝ, ແຂວາງ ກວາງຫງ້າຍ ໄດ້ຈົດຈຳແຕ່ລະຄຳສັບໃນບັນດາຂໍ້ກຳນົດຂອງກົດໝາຍກ່ຽວກັບການຕ້ານການຂຸດຄົ້ນ IUU ທີ່ໄດ້ກະຈາຍອອກຈາກລຳໂພງຂອງປ້ອມປ້ອງກັນຊາຍແດນ. ແຕ່ລະເທື່ອທີ່ເຮັດວຽກຢູ່ທ່າກຳປັ່ນແລ້ວກັບເມືອບ້ານ, ປ້າກໍ່ບອກໃຫ້ຜົວຮູ້ຕື່ມ. ດັ່ງນັ້ນ, ເຮືອຫາປາຂອງຄອບຄົວປ້າ ຫາຍ ຍາມໃດກໍ່ເປັນແບບຢ່າງ, ປະຕິບັດບັນດາຂໍ້ກຳນົດຂຸດຄົ້ນສິນທະເລຢູ່ທະເລຢ່າງເຂັ້ມງວດ:
ເຮົາໄດ້ຟັງຕະຫຼອດ ແລ້ວກໍ່ບອກໃຫ້ຜົວຮູ້, ບໍ່ໃຫ້ຫາປາແບບຜິດກົດໝາຍຢູ່ເຂດທະເລຂອງຕ່າງປະເທດ. ໄປມາກໍ່ຕ້ອງມີໜັງສືອະນຸຍາດ, ຮັບປະກັນການຕິດຕໍ່ພົວພັນ, ຕິດຕາມກວດກາໃນວິວັດການໄປມາ.
ພ້ອມກັບຮູບແບບລຳໂພງໂຄສະນາຄືຢູ່ປ້ອມປ້ອງກັນຊາຍແດນ ຊາຮວິ່ງ, ແຂວງ ກວາງຫງ້າຍ, ກຳລັງປ້ອງກັນຊາຍແດນຢູ່ບັນດາແຂວງ, ນະຄອນໃນທົ່ວປະເທດຍັງໄດ້ຈັດບັນດາຖ້ຽວການລາດຕະເວນ ສົມທົບກັບການແຈກຢາຍໃບປິວ, ອະທິບາຍໂດຍກົງໃຫ້ຊາວປະມົງເຂົ້າໃຈກ່ຽວກັບເລື່ອງບໍ່ບັນທຶກວິວັດການໄປມາ ຫຼືຂ້າມໄປກາຍເຂດຊາຍແດນທະເລ ບໍ່ພຽງແຕ່ໄດ້ກໍ່ຜົນເສຍຫາຍໃຫ້ແກ່ຕົນເອງເທົ່ານັ້ນ, ຫາກຍັງກໍ່ຜົນສະທ້ອນຕໍ່ທົ່ວຂະແໜງສິນໃນນ້ຳ ແລະ ອິດທິພົນຊື່ສຽງຂອງປະເທດຊາດອີກດ້ວຍ. ຖ້າຫາກວ່າ ກ່ອນນີ້, ຊາວປະມົງສວນໜຶ່ງຍັງຖືວ່າ: ການບັນທຶກວິວັດການໄປມາ ຫຼືເປີດເຄື່ອງອຸປະກອນຕິດຕາມກວດກາວິວັດການໄປມາ ແມ່ນລະບຽບການທີ່ສັບສົນ, ແຕ່ປະຈຸບັນ, ເຂົາເຈົ້າໄດ້ເຂົ້າໃຈແຈ້ງຄວາມໝາຍ ແລະ ຄວາມຮັບຜິດຊອບຂອງຕົນ:
ປະຈຸບັນ ຊາວປະມົງໄປຫາປາຢູ່ນອກຝັ່ງຕ້ອງມີໜັງສືກວດເຕັກນິກ, ໜັງສືອະນຸຍາດການຂຸດຄົ້ນ, ຕິດຕາມກວດກາວິວັດການໄປມາ, ພິກັດກຳປັ່ນຫາປາ, ຂໍ້ມູນຂ່າວເສັ້ນທາງໄປມາ… ຕ້ອງຮັບປະກັນໃຫ້ລຸລ່ວງ. ປະຈຸບັນ ຊາວປະມົງໄປຫາປາຕ້ອງມີຄວາມຮັບຜິດຊອບ, ຕ້ອງຕິດຕັ້ງປະກອບບັນດາເຄື່ອງອຸປະກອນຢ່າງຄົບຖ້ວນ ກໍ່ຄືມີລະດັບຄວາມຮູ້, ບໍ່ຄືເມື່ອກ່ອນ.
ຊາວປະມົງພວກຂ້າພະເຈົ້າເຮັດອາຊີບຫາປາຢູ່ທະເລ ຕ້ອງປະຕິບັດຕາມບັນດາຂໍ້ກຳນົດຂອງລັດ. ເມື່ອຫາສິນທະເລຕ້ອງປະຕິບັດຕາມຄຳກ່າວເຕືອນ, ພຽງແຕ່ຫາປາໃນເຂດທະເລທີ່ໄດ້ກຳນົດ, ບໍ່ໄປກາຍເຂດຊາຍແດນທາງທະເລ. ລັດໄດ້ສ້າງເງື່ອນໄຂເອື້ອອຳນວຍ, ຊາວປະມົງພວກຂ້າພະເຈົ້າກໍ່ພະຍາຍາມອອກໄປນອກຝັ່ງ, ຕີດພັນກັບທະເລ, ປະກອບສ່ວນຮັກສາອະທິປະໄຕເຂດທະເລໝູ່ເກາະຂອງ ຫວຽດນາມ.
 (ປະຊາຊົນເຮັດລະບຽບການເພື່ອໃຫ້ກຳປັ່ນເຂົ້າປ້ອມກວດກາປ້ອງກັນຊາຍແດກ ຊາກີ) |
ນັບແຕ່ຕົ້ນປີມາຮອດປະຈຸບັນ, ບັນດາປ້ອມປ້ອງກັນຊາຍແດນທາງທະເລ ໄດ້ພ້ອມກັນເປີດບັ້ນຈຸດສຸມກວດກາ, ຮັດແໜ້ນການຄຸ້ມຄອງກຳປັ່ນຫາປາ, ຜັນຂະຫຍາຍຫຼາຍມາດຕະການຕ້ານການຂຸດຄົ້ນຕາມຂໍ້ກຳນົດ IUU. ທ່ານພັນຕີ ຫວຽນກັວກຫຽບ ກຳມະການການເມືອງປ້ອມປ້ອງກັນຊາຍແດນ ເຍີນຫຼີ, ກອງບັນຊາການທະຫານປ້ອງກັນຊາຍແດນ ຢາລາຍ ໃຫ້ຮູ້ວ່າ:
ພວກຂ້າພະເຈົ້າໄດ້ຂົນຂວາຍ ປຊຊ, ພິເສດແມ່ນເຈົ້າຂອງພາຫະນະ, ກັບຕັນ ຕ້ອງເຊັນຄຳໝັ້ນສັນຍາ. ສຳລັບພາຫະນະທີ່ບໍ່ຮັບປະກັນ, ພວກຂ້າພະເຈົ້າຈະບໍ່ເຮັດລະບຽບການໃຫ້ອອກຈາກທ່າກຳປັ່ນຢ່າງເດັດຂາດ. ດັ່ງນັ້ນ, ໃນໄລຍະຜ່ານມາ, ເຂດຊານແດນທາງທະເລຢູ່ບໍລະເວນພວກຂ້າພະເຈົ້າຄຸ້ມຄອງແມ່ນບໍ່ມີກໍລະນີໃດລະເມີດການຕ້ານການຂຸດຄົ້ນ IUU.
ໄປຄຽງຄູ່ກັບການເຂົ້າຮ່ວມຢ່າງຂ້ຽວຂາດຂອງບັນດາກຳລັງທີ່ມີໜ້າທີ່ຮັບຜິດຊອບນັ້ນ, ຊາວປະມົງເອງກໍ່ໄດ້ເສີມຂະຫຍາຍຈິດໃຈມີສະຕິຕື່ນຕົວພ້ອມກັນຕິດຕາມກວດກາການປະຕິບັດຂໍ້ກຳນົດ. ອ້າຍ ຮວິ່ງມິນກ່ຽມ, ຊາວປະມົງຕາແສງ ເດຢີ, ຢາລາຍ ພ້ອມກັບຊາວປະມົງຄົນອື່ນໃນຕາແສງ ໄດ້ເຂົ້າຮ່ວມບັນດາໜ່ວຍເຮືອສາມັກຄີບົນທະເລ, ບອກເຕືອນກັນຮັກສາອາຊີບຫາປາໃຫ້ພັດທະນາແບບຍືນຍົງ:
ບໍ່ຫາປາໄປກາຍເຂດຊາຍແດນ, ຕ້ອງປະຕິບັດຂໍ້ກຳນົດຢ່າງເຂັ້ມງວດ, ບໍ່ໃຫ້ຫາປາແບບຜິດກົດໝາຍ. ແຫຼ່ງສິນທະເລທີ່ຫາໄດ້ຢູ່ເຂດຊາຍແດນຕ່າງປະເທດບໍ່ສາມາດສົ່ງອອກໄດ້, ຈະເຮັດໃຫ້ເສຍອິດທິພົນຊື່ສຽງທີ່ສຸດ. ຂ້າພະເຈົ້າເອງ ແລະ ຊາວປະມົງຢູ່ທີ່ນີ້ ກໍ່ໄດ້ປະຕິບັດຂໍ້ກຳນົດການຕ້ານການຂຸດຄົ້ນ IUU ເປັນຢ່າງດີທີ່ສຸດ, ບໍ່ກ້າອອກໄປຫາໄປຢູ່ເຂດທະເລຂອງຕ່າງປະເທດ.
 (ກຳລັງປ້ອງກັນຊາຍແດນ ຢາລາຍ ໂຄສະນາການຕ້ານການຂຸດຄົ້ນ IUU) |
ຈາກສະຕິຄວາມຮັບຮູ້ ໄປສູ່ການກະທຳ, ບັນດາການປ່ຽນແປງອັນຕັ້ງໜ້າຂອງຊາວປະມົງ ພວມກາຍເປັນພື້ນຖານສຳຄັນ ປະກອບສ່ວນເຂົ້າໃນເປົ້າໝາຍລວມ: ຕັດສິນໃຈແກ້ບັດເຫຼືອງຂອງຄະນະກຳມະການ ເອີລົບ (EC), ສ້າງອາຊີບຫາປາທີ່ມີຄວາມຮັບຜິດຊອບ, ທັນສະໄໝ ແລະ ຍືນຍົງ.
ການຫັນປ່ຽນຢ່າງຈະແຈ້ງໃນຄວາມຮັບຮູ້ຂອງຊາວປະມົງກ່ຽວກັບການຕ້ານການຂຸດຄົ້ນ IUU ໃນໄລຍະຜ່ານມາ ແມ່ນມີການປະກອບສ່ວນຢ່າງໃຫຍ່ຫຼວງຈາກບັນດາກຳລັງທີ່ຮັບຜິດຊອບໜ້າທີ່ປ້ອງກັນຊາດ, ກອງທັບເຮືອ, ຕຳຫຼວດທະເລ, ທະຫານຊາຍແດນ, ຕະຫຼອດຮອດກຳລັງກວດກາການປະມົງ. ເພື່ອມີຄວາມເຂົ້າໃຈຕື່ມອີກກ່ຽວກັບວຽກງານດັ່ງກ່າວ, ພວກຂ້າພະເຈົ້າໄດ້ແລກປ່ຽນກັບ ທ່ານພັນເອກ ດ່າວບາຫວຽດ, ຮອງເສນາທິການໃຫຍ່ຕຳຫຼວດທະເລ ຫວຽດນາມ.
ນັກຂ່າວ: ຂໍຮຽນທ່ານພັນເອກ ດ່າວບາຫວຽດ, ຮອງເສນາທິການໃຫຍ່ຕຳຫຼວດທະເລ ຫວຽດນາມ! ໜຶ່ງໃນບັນດາປັດໄຈສຳຄັນເພື່ອແກ້ໄຂບັນຫາ IUU ນັ້ນແມ່ນການປ່ຽນແປງຄວາມຮັບຮູ້ຂອງຊາວປະມົງ. ສະນັ້ນ, ກຳລັງຕຳຫຼວດທະເລ ໄດ້ຜັນຂະຫຍາຍວຽກງານໂຄສະນາຍົກສູງຄວາມຮັບຮູ້ຂອງຊາວປະມົງຄືແນວໃດ?
 ພັນເອກ ດ່າວບາຫວຽດ, ຮອງເສນາທິການໃຫຍ່ຕຳຫຼວດທະເລ ຫວຽດນາມ(ພາບ: baohatinh.vn)
|
ພັນເອກ ດ່າວບາຫວຽດ: ດ້ວຍບົດບາດເປັນກຳລັງແກ່ນສານໃນວຽກງານປ້ອງກັນ, ຕ້ານການຂຸດຄົ້ນ IUU ທາງທະເລ, ພວກຂ້າພະເຈົ້າໄດ້ພ້ອມກັບບັນດາອົງການ, ຫົວໜ່ວຍທີ່ກ່ຽວຂ້ອງໃນທົ່ວກອງທັບ ຈັດຕັ້ງການປະຕິບັດບັນດາຄຳສັ່ງ, ມະຕິ, ເອກະສານແນະນຳຂອງນາຍົກລັດຖະມົນຕີ, ກະຊວງປ້ອງກັນປະເທດ, ກອງບັນຊາການຕຳຫຼວດທະເລຢ່າງເຂັ້ມງວດ, ຍູ້ແຮງການປະຕິບັດຂໍ້ກຳນົດສົມທົບກັນລະຫວ່າງຕຳຫຼວດທະເລ ຫວຽດນາມ ກັບບັນດາກຳລັງອື່ນໆ. ພ້ອມທັງສົມທົບກັບບັນດາທ້ອງຖິ່ນ, ອົງການສື່ມວນຊົນຢ່າງແໜ້ນແຟ້ນ ເພື່ອເພີ່ມທະວີວຽກງານໂຄສະນາເຜີຍແຜ່ສຶກສາດ້ານກົດໝາຍກ່ຽວກັບເຂດຂຸດຄົ້ນແບບຖືກກົດໝາຍ, ບັນດາຂໍ້ກຳນົດກ່ຽວກັບການປ້ອງກັນ, ຕ້ານການຂຸດຄົ້ນ IUU, ບັນດາຂໍ້ກຳນົດຂອງກົດໝາຍທີ່ກ່ຽວຂ້ອງເຖິງລະດັບການປັບໄໝສຳລັບບັນດາການກະທຳລະເມີດ IUU ອື່ນໆໃຫ້ແກ່ປະຊາຊົນ, ພິເສດແມ່ນວົງຄະນະຍາດຊາວປະມົງຢູ່ເຂດແຄມທະເລ. ຜ່ານນັ້ນ, ກໍ່ຍົກສູງຄວາມຮັບຮູ້ດ້ານກົດໝາຍໃຫ້ແກ່ຊາວປະມົງ.
ນັກຂ່າວ: ຫວຽດນາມ ໄດ້ ແລະ ພວມມານະພະຍາຍາມໃຫ້ແກ່ການຍົກເລີກບັດເຫຼືອງ IUU, ກະກຽມໃຫ້ແກ່ການກວດກາຂອງຄະນະກຳມະການ ເອີລົບ (ອີຊີ - EC) ທີ່ຈະມາເຖິງ. ສະນັ້ນ, ໃນໄລຍະຜ່ານມາ ກຳລັງຕຳຫຼວດທະເລ ຫວຽດນາມ ໄດ້ຜັນຂະຫຍາຍໜ້າທີ່ດັ່ງກ່າວຄືແນວໃດ?
ພັນເອກ ດ່າວບາຫວຽດ: ການກວດກາຂອງ ອີຊີ ຄັ້ງນີ້ໄດ້ຮັບຖືວ່າແມ່ນເວລາທອງຕັດສິນການການຍົກເລີກບັດເຫຼືອງໃຫ້ແກ່ຂະແໜງສິນໃນນ້ຳຂອງ ຫວຽດນາມ. ໃນໄລຍະຜ່ານມາ, ຫວຽດນາມ ມີຄວາມມານະພະຍາຍາມຫຼາຍຢ່າງໃນການປະຕິບັດຄຳກ່າວເຕືອນ, ຂໍ້ສະເໜີແນະຂອງ ອີຊີ ໃນການປັບປຸງຂອບນິຕິກຳກ່ຽວກັບການຂຸດຄົ້ນສິນໃນນ້ຳໃຫ້ສົມບູນແບບ, ປະຕິບັດບັນດາມາດຕະການທີ່ເຂັ້ມແຂງ, ເດັດດ່ຽວສະດັດກັ້ນ ບໍ່ປະໃຫ້ເກີດສະພາບກຳປັ່ນຫາປາຂຸດຄົ້ນສິນທະເລແບບຜິດກົດໝາຍຢູ່ເຂດທະເລຕ່າງປະເທດ, ປະຕິບັດການຕິດຕາມ, ຕົ້ນກຳເນີດຂອງສິນທະເລທີ່ຂຸດຄົ້ນໄດ້, ສຸມໃສ່ແກ້ໄຂບັນດາການກະທຳລະເມີດການຂຸດຄົ້ນ IUU, ເພີ່ມທະວີວຽກງານໂຄສະນາ, ຍົກສູງຄວາມຮັບຮູ້, ປະສິດທິຜົນຂອງການສົມທົບກັນລະຫວ່າງບັນດາກຳລັງ….
ພ້ອມກັບທົ່ວລະບົບການເມືອງ, ຕຳຫຼວດທະເລ ຫວຽດນາມ ສືບຕໍ່ເສີມຂະຫຍາຍບົດບາດແກ່ນສານ, ຄວາມຮັບຜິດຊອບ ແລະ ມີຄວາມຕັດສິນໃຈໃນການປ້ອງກັນ, ຕ້ານການຂຸດຄົ້ນ IUU. ພວກຂ້າພະເຈົ້າໄດ້ຜັນຂະຫຍາຍຫຼາຍມາດຕະການແກ້ໄຂຢ່າງຄົບຊຸດ, ມີປະສິດທິຜົນ.
ທີໜຶ່ງ, ເພີ່ມທະວີການສົມທົບວຽກງານໂຄສະນາ, ສຶກສາດ້ານກົດໝາຍ, ຍົກສູງຄວາມຮັບຮູ້ຂອງປະຊາຊົນ, ພິເສດແມ່ນຊາວປະມົງ ກ່ຽວກັບຜົນຮ້າຍຂອງການຂຸດຄົ້ນ IUU ແລະ ຜົນປະໂຫຍດຂອງການຕ້ານການຂຸດຄົ້ນ IUU, ບັນດາຂໍ້ກຳນົດກ່ຽວກັບການປັບໄໝຕໍ່ການກະທຳລະເມີດການຂຸດຄົ້ນ IUU.
ທີສອງ, ຍົກສູງຄວາມສາມາດ, ຄວາມຮັບຜິດຊອບຕໍ່ວຽກງານສົມທົບກັບຂອງກຳລັງຮັບຜິດຊອບໜ້າທີ່, ອຳນາດການປົກຄອງທ້ອງຖິ່ນ, ບັນດາອົງການສື່ມວນຊົນກວ່າອີກ, ສ້າງເປັນວົງຈອນປິດໃນວຽກງານຄຸ້ມຄອງ, ຕິດຕາມກວດກາ, ປັບໄໝກຳປັ່ນຫາປາ ຈາກເຂດຝັ່ງແຄມທະເລຕະຫຼອດຮອດເຂດນອກຝັ່ງທະເລ, ຮັບປະກັນວ່າ ກຳປັ່ນຫາປາທີ່ເຄື່ອນໄຫວຢູ່ທະເລ ໄດ້ຮັບການຕິດຕາມ 100%.
ນັກຂ່າວ: ຕຳຫຼວດທະເລ ຫວຽດນາມ ໄດ້ນຳໃຊ້ເຕັກໂນໂລຊີໃດເພື່ອສາມາດຕິດຕາມກຳປັ່ນຫາປາ ແລະ ສະກັດກັ້ນການກະທຳລະເມີດການຂຸດຄົ້ນ IUU?
ພັນເອກ ດ່າວບາຫວຽດ: ປະຈຸບັນ, ດ້ວຍການພັດທະນາຂອງວິທະຍາສາດເຕັກໂນໂລຊີ, ຕຳຫຼວດທະເລ ຫວຽດນາມ ໄດ້ນຳໃຊ້ບັນດາເຕັກໂນໂລຊີຕິດຕາມທີ່ທັນສະໄໝ, ໄຈ້ແຍກຂໍ້ມູນແບບອັດສະລິຍະ ແລະ ໄດ້ປະກອບເອຸປະກອນພື້ນຖານໃນກຳປັ່ນຕຳຫຼວດທະເລ, ກໍຄືຫົວໜ່ວຍຕ່າງໆ, ເພື່ອຕິດຕາມກວດກາ, ສະກັດກັ້ນບັນດາການກະທຳລະເມີດການຂຸດຄົ້ນ IUU ຢ່າງທັນການ.
ຢູ່ບັນດາສຳນັກບັນຊາການຂອງຕຳຫຼວດທະເລ ຫວຽດນາມ ໄດ້ປະມວນຫຼາຍແຫຼ່ງຂໍ້ມູນທີ່ແຕກຕ່າງກັນ, ດຳເນີນການໄຈ້ແຍກ, ປຽບທຽບ, ຂີດແບ່ງເຂດບັນດາກຸ່ມກຳປັ່ນທີ່ມີສັນຍານລະເມີດ, ກໍຄືມີຄວາມສ່ຽງລະເມີດສູງ. ຜ່ານຜົນການໄຈ້ແຍກດັ່ງກ່າວ, ພວກຂ້າພະເຈົ້າໄດ້ຊີ້ິ້ນຳບັນດາສູນບັນຊາການ ສົ່ງຂໍ້ມູນກ່ຽວກັບກຳປັ່ນຫາປາ ໃຫ້ບັນດາກຳລັງລາດຕະເວນ ຢູ່ທະເລເພື່ອກວດກາ, ຢັ້ງຢືນ ແລະ ແກ້ໄຂໂດຍກົງຢ່າງທັນການ.
ຍົກເລີກບັດເຫຼືອງ IUU ຢ່າງເດັດຂາດເພື່ອພັດທະນາອາຊີບຫາປາແບບຍືນຍົງ
ຢູ່ບັນດາທ່າກຳປັ່ນຫາປາໃຫຍ່ໃນທົ່ວປະເທດຄື: ກຸຍເຍີນ, ກ່າເມົາ, ຝູອຽນ, ກຽນຢາງ… ວຽກງານຄວບຄຸມກຳປັ່ນເຂົ້າອອກທຽບທ່າ, ການບັນທຶກປະຈຳວັນ, ຕິດຕັ້ງອຸປະກອນຕິດຕາມ, ໃບອະນຸຍາດການຂຸດຄົ້ນ, ວິວັດການຄວບຄຸມຕົ້ນກຳເນີດຂອງສິນໃນນ້ຳ: ການຄົ້ນຫາຕົ້ນກຳເນີດ, ຕິດສະແຕມ, ຢັ້ງຢືນປະລິມານ… ທຸກການເຄື່ອນໄຫວລ້ວນແຕ່ໄດ້ດຳເນີນຢ່າງເປັນລະບົບ ແລະ ມີປະສິດທິຜົນ.
 ການນຳທະຫານປ້ອງກັນຊາຍແດນແຂວງ ຊອກຈັງລົງຢ້ຽມຢາມໂຄສະນາເຜີຍແຜ່ໃຫ້ແກ່ຊາວປະມົງປະຕິບັດ ການຕ້ານ IUU (ພາບ: VOV) |
ໄລ່ລວມໃນທົ່ວປະເທດ, ມາຮອດປັດຈຸບັນ, ກຸ່ມກຳປັ່ນຫາປາໄດ້ຈົດທະບຽນ, ອັບເດດເຂົ້າຖານຂໍ້ມູນອາຊີບຫາປາແຫ່ງຊາດ ບັນລຸປະມານ 99,8% - 99,9% ໃນຍອດຈຳນວນກຳປັ່ນເກືອບ 80.000 ລຳ. ມີຫຼາຍແຂວງໄດ້ປະຕິບັດສຳເລັດ 100% ການໝາຍກຳປັ່ນຫາປາ, ອອກໃບອະນຸຍາດການຂຸດຄົ້ນ. ນີ້ແມ່ນຄວາມມານະພະຍາຍາມຢ່າງໃຫຍ່ຫຼວງຂອງທົ່ວລະບົບການເມືອງ, ໃນນັ້ນ ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ແມ່ນຜູ້ຊີ້ນຳໂດຍກົງ ແລະ ເປັນປະທານກອງປະຊຸມປະຈຳອາທິດ ກັບບັນດາກະຊວງ, ຂະແໜງການ. ຢູ່ກອງປະຊຸມທີ່ໄດ້ດຳເນີນໃນວັນທີ 13 ພະຈິກ, ທ່ານນາຍົກລັດຖະມົນຕີ ເນັ້ນໜັກເຖິງຄວາມຮຽກຮ້ອງຕ້ອງການວ່າ:
“ຜູ້ນຳບັນດາກະຊວງ, ຂະແໜງການ, ທ້ອງຖິ່ນແມ່ນຜູ້ຮັບຜິດຊອບໂດຍກົງຮອບດ້ານຕໍ່ລັດຖະບານ, ນາຍົກລັດຖະມົນຕີ ຖ້າຫາກປະໃຫ້ເກີດກໍລະນີກຳປັ່ນຫາປາລະເມີດອີກ, ເຮັດໃຫ້ວິວັດການປະຕິບັດການຍົກເລີກບັດເຫຼືອງ IUU ຊັກຊ້າລົງ. ຕ້ອງສຸມກຳລັງໃນການຊີ້ນຳຢູ່ລະດັບສູງ, ນຳພາປະຕິບັດເດືອນຈຸດສຸມການຕ້ານການຂຸດຄົ້ນ IUU ຢ່າງຂ້ຽວຂາດ, ຢຸດຕິສະພາບການຫາປາແບບຜິດກົດໝາຍດ້ວຍທຸກວິທີ, ສ້າງການຫາປາທີ່ມີຄວາມຮັບຜິດຊອບ, ມີການຄົ້ນຫາຕົ້ນກຳເນີດເພື່ອການພັດທະນາແບບຍືນຍົງຂອງຂະແໜງສິນໃນນ້ຳ ຫວຽດນາມ, ເພື່ອກຽດສັກສິດຂອງປະເທດຊາດ, ເພື່ອຜົນປະໂຫຍດຂອງປະຊາຊົນ”
 ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ (ພາບ: VOV) |
ໄປຄຽງຄູ່ກັບການຊີ້ນຳຈາກລັດຖະບານ, ການໝູນໃຊ້ເຕັກໂນໂລຢີ ແລະ ການຫັນເປັນດີຈີຕອນ ໄດ້ຊ່ວຍຍົກສູງປະສິດທິຜົນໃນການຄວບຄຸມ IUU. ກຸ່ມບໍລິສັດອຸດສາຫະກຳ - ໂທລະຄົມມະນາຄົມກອງທັບ Viettel ໄດ້ເຂົ້າຮ່ວມຢ່າງແຮງ, ຜັນຂະຫຍາຍລະບົບຕິດຕາມກຳປັ່ນຫາປາ, ວິທີກຳນົດທີ່ຕັ້ງ, ເຊື່ອມຕໍ່ຂໍ້ມູນລະຫວ່າງຂັ້ນທ້ອງຖິ່ນໄປຮອດສູນກາງ. ທ່ານພົນຕີ ເລກວາງດ້າວ ຮອງເສນາທິການໃຫຍ່ ກອງທັບປະຊາຊົນ ຫວຽດນາມ ໃຫ້ຮູ້ວ່າ:
“ກຸ່ມບໍລິສັດໂທລະຄົມມະນາຄົມກອງທັບ Viettel ເຮັດວຽກກັບທະຫານປ້ອງກັນຊາຍແດນ ແລະ ກະຊວງກະສິກຳ ແລະ ສິ່ງແວດລ້ອມ ໄດ້ຫັນທຸກຂໍ້ມູນຂອງບັນດາກຳປັ່ນທີ່ມີຢູ່ແລ້ວໃນປັດຈຸບັນໃຫ້ເປັນດີຈີຕອນ. ພ້ອມທັງ, ພວມເຮັດວຽກກັບກະຊວງຕຳຫຼວດສືບຕໍ່ຫັນຂໍ້ມູນ VneID ເປັນດີຈີຕອນ ເພື່ອອາດສາມາດຄວບຄຸມການເຂົ້າອອກທ່າກຳປັ່ນໄດ້ຢ່າງສົມບູນໂດຍຜ່ານການແຈ້ງທາງເອເລັກໂຕນິກ ຢູ່ບັນດາທ່າກຳປັ່ນໃນໄລຍະຈະມາເຖິງ”
 ທ່ານພົນຕີ ເລກວາງດ້າວ ຮອງເສນາທິການໃຫຍ່ ກອງທັບປະຊາຊົນ ຫວຽດນາມ (ພາບ: VOV) |
ຜ່ານວິວັດການຫັນຂໍ້ມູນເປັນດີຈີຕອນຂອງ Viettel ໄດ້ຊ່ວຍຫັນການຄຸ້ມຄອງອາຊີບຫາປາເປັນທັນສະໄໝ, ພ້ອມທັງສ້າງທ່າເປັນເຈົ້າການເພື່ອໃຫ້ ຫວຽດນາມ ຍົກສູງຄວາມສາມາດໃນການຕິດຕາມກວດກາ, ຕອບສະໜອງບັນດາຂໍ້ສະເໜີແນະຂອງ EC ໃນການຕ້ານການຂຸດຄົ້ນ IUU ເທື່ອລະກ້າວ. ດ້ວຍກຳລັງປະຕິບັດຢູ່ທະເລ, ໂຄງການ “ຕຳຫຼວດທະເລຮ່ວມເດີນທາງກັບ ຊາວປະມົງ” ມາຮອດປັດຈຸບັນ ໃກ້ຈະກ້າວເຂົ້າສູ່ປີທີ 9, ໄດ້ນຳມາເຊິ່ງ ປະສິດທິຜົນທີ່ຈະແຈ້ງ. ທ່ານພົນໂທ ທ້າຍດ້າຍງອກ, ຮອງເສນາທິການໃຫຍ່ ກອງທັບປະຊາຊົນ ຫວຽດນາມ, ຫົວໜ້າຄະນະຊີ້ນຳກະຊວງປ້ອງກັນປະເທດ ກ່ຽວກັບການຕ້ານການຂຸດຄົ້ນ IUU ຢັ້ງຢືນວ່າ:
“ກອງທັບໄດ້ສົມທົບກັບບັນດາທ້ອງຖິ່ນ, ກຳລັງທີ່ມີໜ້າທີ່ຮັບຜິດຊອບເພີ່ມທະວີວຽກງານໂຄສະນາ, ເຜີຍແຜ່ການສຶກສາກົດໝາຍເພື່ອໃຫ້ເຈົ້າຂອງກຳປັ່ນ, ກັບຕັນ, ຊາວປະມົງ… ຍົກສູງສະຕິຄວາມຮັບຮູ້ໃນການປະຕິບັດໃຫ້ຖືກຕ້ອງຕາມແຜນນະໂຍບາຍ, ນະໂຍບາຍຂອງພັກ, ກົດໝາຍຂອງລັດ.
ເພື່ອພ້ອມກັບທົ່ວປະເທດ ບັນລຸໄດ້ເປົ້າໝາຍຍົກເລີກບັດເຫຼືອງ EC, ບັນດາທ້ອງຖິ່ນ ທີ່ມີທະເລ ກໍ່ຕ້ອງເປັນເຈົ້າການໃນການຜັນຂະຫຍາຍບັນດາມາດຕະການ, ຄື: ມີນະໂຍບາຍຫັນປ່ຽນອາຊີບ ແລະ ຖອນກຳປັ່ນຫາປາທີ່ບໍ່ມີຄວາມຕ້ອງການຂຸດຄົ້ນ; ປະກາດໃຊ້ນະໂຍບາຍໜູນຊ່ວຍຊາວປະມົງທີ່ກຳມະສິດກຳປັ່ນຫາປາທີ່ບໍ່ມີຄວາມຕ້ອງການຂຸດຄົ້ນ ຫຼື ບໍ່ມີເງື່ອນໄຂສືບຕໍ່ເຄື່ອນໄຫວຂຸດຄົ້ນຢ່າງພຽງພໍ ເພື່ອດຳເນີນການຫັນປ່ຽນອາຊີບ…
IUU ບໍ່ພຽງແຕ່ແມ່ນເລື່ອງລາວກ່ຽວກັບອາຊີບປາຫາເທົ່ານັ້ນ ຫາກຍັງມີສ່ວນກ່ຽວຂ້ອງໂດຍກົງເຖິງຄວາມໝັ້ນຄົງທາງທະເລ, ອິດທິພົນຊື່ສຽງຂອງປະເທດຊາດ ແລະ ສິດຜົນປະໂຫຍດຂອງປະຊາຊົນອີກດ້ວຍ. ການຕ້ານ IUU ແມ່ນຄວາມຮັບຜິດຊອບລວມຂອງທົ່ວລະບົບການເມືອງ, ໃນນັ້ນ ກອງທັບແມ່ນກຳລັງຫຼັກແຫຼ່ງຮັບປະກັນຄວາມໝັ້ນຄົງ, ຄວາມປອດໄພ, ອະທິປະໄຕ ແລະ ລະບຽບວິໄນຢູ່ທະເລ. ການເຂົ້າຮ່ວມຂອງກອງທັບໄດ້ຊ່ວຍຫຼຸດຜ່ອນສະພາບການລະເມີດ, ປະກອບສ່ວນປົກປ້ອງອະທິປະໄຕ, ຮັກສາສະຖຽນລະພາບໃນການຫາປາ, ສ້າງສະພາບແວດລ້ອມແຫ່ງຄວາມປອດໄພ, ຍືນຍົງໃຫ້ແກ່ຊາວປະມົງໃນການຂຸດຄົ້ນທີ່ຍາວນານ.