ການນຳເຂົ້າສົ່ງອອກ ຂອງຫວຽດນາມ ໃນປີ 2024 ບັນລຸ  786,29 ຕື້ USD.(ພາບປະກອບ: VOV)

 ໃນສະພາບການເສດຖະກິດທົ່ວໂລກ ຍັງຄົງເຕີບໂຕອ່ອນແອ, ຄວາມສ່ຽງໄພເງິນເຟີ້ສູງ, ການເຕີບໂຕຂອງການເຄື່ອນໄຫວການສົ່ງອອກນຳເຂົ້າໄດ້ຫນູນຊ່ວຍຫລາຍໃຫ້ແກ່ພື້ນຖານເສດຖະກິດ. ເປັນຫນ້າສົນໃຈ, ການສົ່ງອອກໄດ້ຢັ້ງຢືນຕົວເລກສະຖິຕິ ແມ່ນ 403 ຕື້ USD, ເພີ່ມຂຶ້ນ  13,6% ເມື່ອທຽບໃສ່ກັບປີ 2023. ການເຕີບໂຕໄດ້ສ້າງບາດກ້າວບຸກທະລຸຢູ່ທຸກບັນດາຕະຫລາດ, ແລະ ສ່ວນຫລາຍຢູ່ທຸກຂົງເຂດ, ອົງປະກອບການສົ່ງອອກຫັນປ່ຽນຢ່າງແຮງຈາກວັດຖຸດິບໄປຍັງການປຸງແຕ່ງ, ຢັ້ງຢືນການເຂົ້າຮ່ວມຢ່າງເລິກເຊິ່ງກວ່າຂອງ ຫວຽດນາມ ໃນລະບົບການຜະລິດ ແລະ ການສະຫນອງທົ່ວໂລກ.    

ຢູ່ຕະຫລາດ ອາຊີ, ອາຟະລິກາ ຮັກສາທີ່ຕັ້ງຍຸດທະສາດ, ກວມອັດຕາ 66,3% ຍອດວົງເງິນສົ່ງອອກນຳເຂົ້າຂອງ ຫວຽດນາມ ກັບໂລກ. ໃນຂະນະນັ້ນ ການສົ່ງອອກໄປຍັງ ເອີລົບ, ທະວີບອາເມລິກາ ກໍ່ເພີ່ມຂຶ້ນກວ່າ 20% ເມື່ອທຽບໃສ່ປີກ່ອນ ແລະ ດຸນການຄ້າ ສຳລັບສອງຕະຫລາດດັ່ງກ່າວເປັນຄັ້ງທຳອິດລື່ນກາຍລະດັບ 150 ຕື້ USD. ທ່ານ ເດົາແອງຕວນ, ຮອງເລຂາທິການສະຫະພັນອຸດສາຫະກຳ ແລະ ການຄ້າ ຫວຽດນາມ (VCCI), ຢືນຢັນ:

 “ປີ 2024 ຕົວເລກຍອດວົງເງິນນຳເຂົ້າສ່ົງອອກ ຂອງຫວຽດນາມ ແມ່ນສູງສຸດໃນປະຫວັດສາດນັບແຕ່ກ່ອນມາຮອດປະຈຸບັນ. ສິ່ງນີ້ສະແດງໃຫ້ເຫັນຂອບຂະຫນາດ, ຜົນສະທ້ອນຂອງພື້ນຖານເສດຖະກິດ ຫວຽດນາມ ໃນພື້ນຖານເສດຖະກິດທົ່ວໂລກ. ຫວຽດນາມ ນອນໃນບັນດາປະເທດມີການກະທົບ, ມີຜົນສະທ້ອນຢ່າງເລິກເຊິ່ງກວ້າງຂວາງໃນຕະຫລາດໂລກ”.         ກະສິກຳ ແມ່ນຂົງເຂດພົ້ນເດັ່ນ ເພາະໃນຍອດມູນຄ່າເກືອບ 25 ຕື້ USD ການສົ່ງອອກເກີນດຸນໃນປີຜ່ານມາ, ຂະແຫນງກະສິກຳ ໄດ້ປະກອບສ່ວນປະມານ 75%. ທ່ານຜູ້ຊ່ຽວຊານດ້ານເສດຖະກິດ ປອ ເລຢູຍບິ່ງ ຜູ້ອຳນວຍການຝ່າຍບໍລິຫານ Econmica ຫວຽດນາມ ຢັ້ງຢືນວ່າ:

“ ມູນຄ່າເພີ່ມຂອງຂະແຫນງກະສິກຳໃນການສົ່ງອອກ ໄດ້ນຳມາເຊິ່ງໝາກຜົນໃຫຍ່ທີ່ສຸດໃຫ້ພື້ນຖານເສດຖະກິດ ຫວຽດນາມ. ການປະກອບສ່ວນຂອງຂະແຫນງກະສິກຳ ພໍ່ພຽງແຕ່ດ້ານນຳເຂົ້າສົ່ງອອກເທົ່ານັ້ນ ຫາກຍັງປະກອບສ່ວນກ່ຽວກັບການຍົກສູງທີ່ຕັ້ງບົດບາດຂອງພື້ນຖານເສດຖະກິດ ຫວຽດນາມ, ໃຫ້ແກ່ຄວາມສະຖຽນລະພາບເສດຖະກິດມະຫາພາກອີກດ້ວຍ”.

ທ່ານ ຫງວຽນຮົ່ງຢຽນ ລັດຖະມົນຕີກະຊວງອຸດສາຫະກຳ ການຄ້າ. (ພາບ:VOV)

           ຂະແຫນງຕ່ຳແຜ່ນຕັດຫຍິບ ກໍ່ໄດ້ສ້າງຂີດໝາຍບຸກທະລຸຢ່າງແຮງດ້ວຍວົງເງິນການສົ່ງອອກບັນລຸສອງຕົວເລກ, ນຳ ຫວຽດນາມ ຢືນອັນດັບທີ 2 ຂອງໂລກກ່ຽວກັບການສົ່ງອອກເຄື່ອງຕ່ຳແຜ່ນຕັດຫຍິບ, ຖັດຈາກຈີນ ແລະ ລື່ນກາຍ ບັງກະລາເທດ.

ບົນພື້ນຖານຂອງການເຕີບໂຕນຳເຂົ້າສົ່ງອອກໃນປີຜ່ານມາ, ເລື່ອງວາງຄາດໝາຍຍອດວົງເງິນສົ່ງອອກນຳເຂົ້າປີນີ້ ເພີ່ມຂຶ້ນປະມານ 12%, ບັນລຸລະດັບ 1000 ຕື້ USD, ຕາມບັນດາຜູ້ຊ່ຽວຊານແລ້ວ ແມ່ນມີຄວາມເປັນໄປໄດ້.         

ເຖິງວ່າໝາກຜົນການນຳເຂົ້າສົ່ງອອກປີຜ່ານມາ ບັນລຸໝາກຜົນຫນ້າປະທັບໃຈ, ແຕ່ກະຊວງອຸດສາຫະກຳ ການຄ້າ ໄດ້ໃຫ້ຂໍ້ສັງເກດວ່າ ຍັງບໍ່ທັນໝັ້ນຄົງ ແລະ ຍັງຖືືກຜົນສະທ້ອນຫລາຍຈາກບັນດາປັດໄຈພາຍນອກທີ່ຍາກຈະຄາດຄະເນໄດ້. ໂດຍແມ່ນພື້ນຖານເສດຖະກິດມີລະດັບເປີດທີ່ໃຫຍ່, ຄຽງຄູ່ກັບການເພີ່ມທະວີກຳລັງຄວາມສາມາດໃນການປະຕິບັດສັນຍາການຄ້າເສລີ (FTA), ຫລີກລ້ຽງຄວາມສ່ຽງກ່ຽວກັບປົກປ້ອງການຄ້າ, ຄວາມກົມກຽວດຸນການຄ້າ, ດ້ານອື່ນ ຫວຽດນາມ ຕ້ອງຕັ້ງຫນ້າຂຸດຄົ້ນບັນດາຕະຫລາດໃຫມ່ ເພື່ອຍູ້ແຮງການສົ່ງອອກ, ເພີ່ມປະລິມານ ແລະ ມູນຄ່າ. ທ່ານ ລັດຖະມົນຕີກະຊວງອຸດສາຫະກຳ ການຄ້າ ຫວຽດນາມ ຫງວຽນຮົ່ງຢຽນ ຢັ້ງຢືນວ່າ:

 “ສືບຕໍ່ເສີມຂະຫຍາຍບົດບາດຂອງລະບົບບັນດາອົງການການຄ້າ ຫວຽດນາມ ຢູ່ ຕ່າງປະເທດ ເປັນຢ່າງດີໃນວຽກງານຫນູນຊ່ວຍບັນດາທ້ອງຖິ່ນ, ວິສາຫະກິດ, ຂຸດຄົ້ນຢ່າງມີປະສິດທິຜົນບັນດາສັນຍາ FTA ຊື່ງ ຫວຽດນາມ ແມ່ນສະມາຊິກ ເພື່ອຫັນຕະຫລາດ, ລະບົບສະຫນອງເປັນຫລາຍຮູບແບບ ແລະ ຍູ້ແຮງການສົ່ງອອກ. ຕັ້ງຫນ້າເປັນເສນາທິການໃຫ້ການເຈລະຈາ, ການເຊັນສັນຍາໃຫມ່, ຍົກລະດັບບັນດາສັນຍາ FTA ສຳລັບບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນ, ສ້າງກຳລັງຫນູນ, ເພີ່ມທະວີການຮ່ວມມືດ້ານການຄ້າ ແລະ ການລົງທຶນ, ເພີ່ມທະວີການຫນູນຊ່ວຍວິສາຫະກິດຜະລິດ, ສົ່ງອອກທາງການ ຕິດພັນກັບການສ້າງເຄື່ອງໝາຍການຄ້າ, ຊຸກຍູ້ການສົ່ງອອກແບບຍືນຍົງ”.

          ເພື່ອປະຕິບັດຄາດໝາຍການພັດທະນາການນຳເຂົ້າສົ່ງອອກສິນຄ້າ ຕິດພັນກັບການລົງທຶນພັດທະນາພື້ນຖານໂຄງລ່າງເສດຖະກິດ - ເຕັກນິກ, ວິທະຍາສາດ - ເຕັກໂນໂລຊີ, ການຫັນເປັນດິຈິຕອນ, ພັດທະນາເສດຖະກິດດິຈິຕອນ, ພັດທະນາພື້ນຖານການຜະລິດສີຂຽວ, ຍືນຍົງ, ຮອບວຽນ, ຍົກສູງຄຸນນະພາບນະວັດຕະກຳໃນການຜະລິດສົ່ງອອກ, ຫວຽດນາມ ກໍ່ເອົາໃຈໃສ່ເປັນພິເສດເຖິງການຊຸກຍູ້ການນຳເຂົ້າເຕັກໂນໂລຊີ, ດຶງດູດທຶນ FDI ທີ່ມີຄຸນນະພາບສູງຈາກບັນດາຕະຫລາດທີ່ມີເຕັກໂນໂລຊີພັດທະນາ.