ນະຄອນ ມອງກາຍ ໃຈກາງຂອງເຂດເສດຖະກິດດ່ານຊາຍແດນ ມອງກາຍ.(ພາບ: Trường Giang/VOV)

ປະຈຸບັນ, ແຂວງ ກວ໋າງນິງ ມີ 3 ເຂດເສດຖະກິດດ່ານຊາຍແດນ ດ້ວຍຍອດເນື້ອທີ່ກວ່າ 144 ເຮັກຕາ, ລວມມີ: ມອງກາຍ, ແຮວ່ງໂມ ດົ່ງວັນ ແລະ ບັກຟອງຊິງ. ບັນດາເຂດເສດຖະກິດດ່ານຊາຍແດນຢູ່ ແຂວງ ກວ໋າງນິງ ພວມໄດ້ຮັບການຂຸດຄົ້ນຢ່າງເໝາະສົມ, ເສີມຂະຫຍາຍບັນດາຄວາມສາມາດບົ່ມຊ້ອນ, ທ່າແຮງຂອງແຕ່ລະເຂດ. ແຂວງ ໄດ້ຊີ້ນຳໃຫ້ບັນດາຂະແຫນງການກ່ຽວຂ້ອງ, ທ້ອງຖິ່ນ ຮັກສາ, ເປີດກວ້າງ ແລະ ຍົກສູງປະສິດທິຜົນວຽກງານການຕ່າງປະເທດ, ການທູດ ຮ່ວມມືເສດຖະກິດກັບຈີນ. ພ້ອມກັນນັ້ນ ກໍ່ຍູ້ແຮງການລົງທຶນ, ກໍ່ສ້າງພື້ນຖານໂຄງລ່າງສຳຮອງຢູ່ ດ່ານຊາຍແດນ, ພັດທະນາພື້ນຖານໂຄງລ່າງຄົມມະນາຄົມເພື່ອສ້າງເງື່ອນໄຂສະດວກໃຫ້ແກ່ການເຄື່ອນໄຫວພົວພັນແລກປ່ຽນ, ພັດທະນາເສດຖະກິດຜ່ານເຂດເສດຖະກິດດ່ານຊາຍແດນ.

ທ່ານ ຈິ້ງວັນຍ້ວນ, ຮອງຫົວຫນ້າກົມພາສີ ແຂວງ ກວ໋າງນິງ ໃຫ້ຮູ້ວ່າ: ຍອດງົບປະມານຈາກການເຄື່ອນໄຫວນຳເຂົ້າສົ່ງອອກຢູ່ບໍລິເວນ ໄລ່ຮອດວັນທີ 15 ທັນວາ 2024 ນີ້ ບັນລຸກວ່າ 67,5 ລ້ານ USD, ເພີ່ມຂຶ້ນກວ່າ 4% ເມ່ືອທຽບໃສ່ໄລຍະດຽວກັນຂອງປີ 2023. ຈຳນວນວິສາຫະກິດເຮັດລະບຽບການພາສີ ຜ່ານບໍລິເວນແມ່ນເພີ່ມຂຶ້ນສູງດ້ວຍ 2.046 ວິສາຫະກິດ, ເພີ່ມຂຶ້ນ 30% ເມື່ອທຽບໃສ່ປີ 2023.

 “ປີ 2024 ຈຳນວນວິສາຫະກິດນຳເຂົ້າສົ່ງອອກຜ່ານບໍລິເວນເພີ່ມຂຶ້ນຫລາຍເມ່ືອທຽບໃສ່ປີ 2023. ພວກຂ້າພະເຈົ້າຜັນຂະຫຍາຍຊອບແວຕິດຕາມ ຕີລາຄາຄຸນນະພາບການບໍລິການຂອງພະນັກງານ, ລັດຖະກອນ. ມີປະມານ 98-99% ມີຄວາມເພິ່ງພໍໃຈຕໍ່ກັບຄຸນນະພາບການຮັບໃຊ້ຂອງກຳລັງພາສີ. ນີ້ແມ່ນປັດໄຈຕັດສິນພາໄປເຖິງການດຶງດູດວິສາຫະກິດເຂົ້າມາລົງທຶນຢູ່ບໍລິເວນ, ປະກອບສ່ວນຊ່ວຍໃຫ້ວົງເງິນການຄ້າ, ຈຳນວນວິສາຫະກິດມາເຮັດລະບຽບການເພີ່ມຂຶ້ນ”.

ພ້ອມກັບບັນດາຂະແຫນງການກ່ຽວຂ້ອງ, ທ້ອງຖິ່ນ ມີເຂດເສດຖະກິດດ່ານຊາຍແດນ ກໍ່ມີຄວາມເປັນເຈົ້າການໃນການຂຸດຄົ້ນປະສິດທິຜົນ, ທ່າໄດ້ປຽບຂອງບັນດາເຂດເສດຖະກິດນີ້. ເຂດເສດຖະກິດດ່ານຊາຍແດນ ມອງກາຍ ໄດ້ຍາດແຍ່ງທ່າໄດ້ປຽບ, ທີ່ຕັ້ງເປັນຢ່າງດີ, ດ້ວຍຫລາຍວິທີການເຊື່ອມຕໍ່ກັບຕະຫລາດຈີນ ຜ່ານລະບົບດ່ານຊາຍແດນ, ຂົວຂ້າມແມ່ນນ້ຳ, ທ່າກຳປັ່ນ, ການຄ້າຊາຍແດນ. ມາຮອດປະຈຸບັນ ເຂດເສດຖະກິດດ່ານຊາຍແດນ ມອງກາຍ ໄດ້ດຶງດູດກວ່າ 120 ໂຄງການ ດ້ວຍຍອດຈຳນວນເງິນລົງທຶນເກືອບ 2 ຕື້ USD ແລະ ເກືອບ 24.000 ຕື້ ດົ່ງ, ປະຈຸບັນ ການເກັບລາຍຮັບງົບປະມານແຫ່ງລັດແມ່ນຳຫນ້າຂອງແຂວງ ກວ໋າງນິງ, ຄາດວ່າ ທັງປີ 2024 ບັນລຸກວ່າ 19,6 ລ້ານ USD.

ດ່ານຊາຍແດນ ບັກລວນ2. (ພາບ:Quỳnh Nga/Báo Đầu tư)

ທ່ານ ຮວ່າງບານາມ, ເລຂາຄະນະພັກ ນະຄອນ ມອງກາຍ ໃຫ້ຮູ້ວ່າ: ທ້ອງຖິ່ນ ໄດ້ສູ້ຊົນກໍ່ສ້າງ, ພັດທະນາເຂດເສດຖະກິດດ່ານຊາຍແດນ ມອງກາຍ ໃຫ້ກາຍເປັນ ເຂດເສດຖະກິດ ດ່ານຊາຍແດນ ຈຸດສຸມແຫ່ງຊາດ, ສູນກາງເສດຖະກິດການຄ້າດ່ານຊາຍແດນ, ອຸດສາຫະກຳ, ທ່າກຳປັ່ນ logistics, ການບໍລິການສັງລວມຂອງແຂວງ ກວ໋າງນິງ ແລະ ເຂດເສດຖະກິດຈຸດສຸມຂອງພາກເຫນືອ ຫວຽດນາມ.

 “ໄລຍະຜ່ານມາ, ພວກຂ້າພະເຈົ້າໄດ້ສຸມໃສ່ສ້າງສຳເລັດບັນດາການວາງແຜນຜັງ ພິເສດ ແມ່ນການວາງແຜນກຳນົດຍຸດທະສາດເຂດເສດຖະກິດດ່ານຊາຍແດນ ມອງກາຍ, ບັນດາການວາງແຜນຜັງຈັດແບ່ງເຂດ ແລະ ລະອຽດ, ຈາກນັ້ນ ກໍ່ກຳນົດ 3 ເສົາຄ້ຳໃນການພັດທະນາເສດຖະກິດ, ຖືເສດຖະກິດດ່ານຊາຍແດນ, ການບໍລິການດ້ານການຄ້າ, ການບໍລິການ, ທ່າກຳປັ່ນທະເລ logistics ແມ່ນເສົາຄ້ຳເພື່ອຄອບງຳບັນດາຂະແຫນງເສດຖະກິດອື່ນ. ພວກຂ້າພະເຈົ້າກໍ່ສຸມໃສ່ດຶງດູດບັນດານັກລົງທຶນດ້ວຍແຜນນະໂຍບາຍແມ່ນຖືການລົງທຶນພາກລັດນຳພາການລົງທຶນພາກເອກະຊົນ, ນຳໃຊ້ງົບປະມານເພື່ອລົງທຶນບັນດາພື້ນຖານໂຄງລ່າງຫລັກແຫລ່ງ, ພື້ນຖານໂຄງລ່າງຍຸດທະສາດ”.

ດ້ວຍບັນດາມາດຕະການຄົບຊຸດ, ຍອດວົງເງິນນຳເຂົ້າສົ່ງອອກຜ່ານບໍລິເວນແຂວງ ກວ໋າງນິງ ປີ 2024 ແມ່ນບັນລຸກວ່າ 18 ຕື້ USD (ເພິ່ມຂຶ້ນ 17% ເມື່ອທຽບໃສ່ປີ 2023). ບັນດາເຂດເສດຖະກິດດ່ານຊາຍແດນຢູ່ບໍລິເວນແຂວງ ກວ໋າງນິງ ນັບມື້ນັບຢືນຢັນໄດ້ບົດບາດແມ່ນເຂດເສດຖະກິດກຳລັງຫນູນ, ປະກອບສ່ວນເຂົ້າໃນການພັດທະນາເສດຖະກິດ ສັງຄົມຂອງທ້ອງຖິ່ນ, ຊຸກຍູ້ການພົວພັນແລກປ່ຽນການຄ້າສິນຄ້າລະຫວ່າງ ຫວຽດນາມ ແລະ ຈີນ.