ຂະບວນການ ອິດສະລາມ ຮາມາດສ ໄດ້ອອກຖະແຫຼງກ່າວກ່າວຫາ ອິດສະຣາແອັນ “ລະເມີດຂໍ້ຕົກລົງຢຸດຍິງຢູ່ເຂດ ກາຊາ ຢ່າງຮ້າຍແຮງ” ເມື່ອໂຈະການກະທຳປ່ອຍອິດສະຫຼະນັກໂທດ ປາແລັດສະຕິນນັບຮ້ອຍຄົນຕາມແຜນການໃນວັນທີ 22 ກຸມພາ ເພື່ອແລກເອົາຕົວປະກັນ ອິດສະຣາແອັນ 6 ຄົນ. ຖະແຫຼງການດັ່ງກ່າວໄດ້ຄັດສະເໜີຄຳປາໄສຂອງໂຄສົກ ຮາມາດສ ທ່ານ Abdel Latif Al-Qanou ເນັ້ນໜັກເລື່ອງ ອິດສະຣາແອັນ “ບໍ່ປະຕິບັດແຜນການປະຕິບັດການປ່ອຍຕົວນັກໂທດຄັ້ງທີ 7 ຕາມຂໍ້ຕົກລົງແລກປ່ຽນໃນຈຸດເວລາທີ່ໄດ້ເອກະພາບກັນນັ້ນ ແມ່ນການລະເມີດຂໍ້ຕົກລົງນີ້ຢ່າງຮ້າຍແຮງ, ພ້ອມທັງຕຳໜິຕິຕຽນທ່ານນາຍົກລັດຖະມົນຕີ ອິດສະຣາແອັນ Benjamin Netanyahu ທີ່ປະຕິບັດ “ຍຸດທະວິທີໂຈະ ແລະ ກີດຂວາງ”.
ກ່ອນໜ້ານັ້ນ, ລັດຖະບານ ອິດສະຣາແອັນ ໄດ້ໂຈະແຜນການປ່ອຍຕົວເປັນອິດສະຫຼະໃຫ້ແກ່ນັກໂທດ ປາແລັດສະຕິນ 602 ຄົນ ທີ່ໄດ້ເອກະພາບກັນໃນຂອບເຂດການແລກປ່ຽນຕົວປະກັນ ແລະ ນັກໂທດຄັ້ງຫຼ້າສຸດ.
