ວັນທີ 17 ເມສາ, ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ສິ້ນສຸດການຢ້ຽມຢາມທາງລັດຖະກິດ ຢູ່ ສປ. ຈີນ ແຕ່ວັນທີ 14 – 17 ເມສາ ຕາມຄຳເຊື້ອເຊີນຂອງທ່ານ ສີຈີ້ນຜິງ ເລຂາທິການໃຫຍ່, ປະທານປະເທດ ຈີນ ຢ່າງຈົບງາມ. ໝາກຜົນຂອງການຢ້ຽມຢາມ ໄດ້ປະກອບສ່ວນເຮັດໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ເລິກເຊິ່ງກວ່າອີກ, ສະແດງໃຫ້ເຫັນຄວາມເຄົາລົບນັບຖື ແລະ ຄວາມຕັດສິນໃຈສູງຂອງສອງປະເທດໃນການຍົກລະດັບຫຸ້ນສ່ວນຍຸດທະສາດ.
ໃນການຢ້ຽມຢາມທາງລັດຖະກິດຢູ່ ຈີນ ຂອງທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລິມ, ສອງຝ່າຍໄດ້ອອກຖະແຫຼງການຮ່ວມ; ເຊັນເອກະສານຮ່ວມມືໃນບັນດາຊ່ອງທາງຄື: ພັກ, ຕຳຫຼວດ, ຍຸຕິທຳ, ເສດຖະກິດ, ລະບົບຜະລິດ, ລະບົບສະໜອງ, ການຮ່ວມມືດ້ານພາສີ, ວິທະຍາສາດເຕັກໂນໂລຢີ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ, ຂຸດຄົ້ນແຫຼ່ງຊັບພະຍາກອນມະນຸດ, ສື່ມວນຊົນ ແລະ ທ້ອງຖິ່ນ. ເລີ່ມເຄື່ອນໄຫວ “ປີຮ່ວມມືດ້ານການທ່ອງທ່ຽວ ຫວຽດນາມ - ຈີນ 2026 - 2027”….
ເຫັນດີເປັນເອກະພາບຮັກສາ ແລະ ເພີ່ມທະວີສາຍພົວພັນ ຫວຽດນາມ - ຈີນ
ໃນຂອບເຂດການຢ້ຽມຢາມ, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ພົບປະ ແລະ ເຂົ້າຢ້ຽມຂ່ຳນັບບັນດາການນຳສູງສຸດຂອງ ຈີນ, ລວມມີ: ທ່ານເລຂາທິການໃຫຍ່, ປະທານປະເທດ ສີຈີ້ນຜິງ; ທ່ານນາຍົກລັດຖະມົນຕີ ຫຼີຊຽນ ແລະ ທ່ານກຳມະການສະພາປະຊາຊົນແຫ່ງຊາດຈີນ ຈ້າວຫຼີຈຽນ.
ສອງຝ່າຍເຫັນດີເປັນເອກະພາບຮັກສາ ແລະ ເພີ່ມທະວີມູນເຊື້ອອັນດີງາມຂອງການພົວພັນແລກປ່ຽນຂັ້ນສູງລະຫວ່າງສອງພັກ, ສອງລັດ, ມີການແລກປ່ຽນຄຳເຫັນຢ່າງທັນການກ່ຽວກັບບັນດາບັນຫາສຳຄັນໃນສາຍພົວພັນສອງຝ່າຍ ກໍ່ຄືສະພາບການສາກົນ, ພາກພື້ນ, ກຳນົດທິດ ແລະ ຊີ້ນຳສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ໃນຍຸກສະໄໝໃໝ່ໃຫ້ພັດທະນາຢ່າງປອດໃສ, ມີສະຖຽນລະພາບຈາກຍຸດທະສາດລະດັບສູງ ແລະ ວິໄສທັດຍາວນານ.
ສອງຝ່າຍເຫັນດີເພີ່ມທະວີການພົວພັນແລກປ່ຽນຂັ້ນສູງ ແລະ ທຸກຂັ້ນລະຫວ່າງກອງທັບສອງປະເທດ; ເສີມຂະຫຍາຍບົດບາດຂອງກົນໄກລາດຕະເວນປະສົມຢູ່ເຂດທະເລອ່າວຕົງກິນ, ຜັນຂະຫຍາຍບັນດາການເຄື່ອນໄຫວລາດຕະເວນປະສົມຢູ່ທະເລອ່າວຕົງກິນໃຫ້ເປັນຢ່າງດີ. ເຮັດໃຫ້ການຮ່ວມມືດ້ານຄວາມໝັ້ນຄົງຫຼາຍຝ່າຍເລິກເຊິ່ງກວ່າອີກ, ພ້ອມກັນຊຸກຍູ້ສັນຕິພາບ ແລະ ສະຖຽນລະພາບຢູ່ພາກພື້ນ.
ຫວຽດນາມ ແລະ ຈີນ ກໍຕົກລົງເຫັນດີຕໍ່ເລື່ອງຕັ້ງໜ້າຜັນຂະຫຍາຍການຮ່ວມມືໃນຂົງເຂດພະລັງງານໃໝ່, ເພີ່ມທະວີການເຊື່ອມຕໍ່ລະບົບສະໜອງ ແລະ ການຮ່ວມມືພັດທະນາເຕັກໂນໂລຢີພະລັງງານທົດແທນ. ເພີ່ມທະວີການຮ່ວມມືໃນບັນດາຂົງເຂດທີ່ຫາກໍ່ພົ້ນເດັ່ນ, ເຊັ່ນ: ເສດຖະກິດດີຈີຕອນ, ການພັດທະນາສີຂຽວ… ທ່ານ ສຈ. ກຸຍໂຊຈຸນ, ມະຫາວິທະຍາໄລປະຊາຊົນ ຈີນ, ຖືວ່າ:
“ຈີນ ມີທ່າແຮງໃນບັນດາຂະແໜງຍຸດທະສາດທີ່ຫາກໍພົ້ນເດັ່ນເຊັ່ນ: ພະລັງງານໃໝ່, ແສງໄຟຟ້າ, ການເກັບພະລັງງານ, ການກະຈາຍໄຟຟ້າ…; ໃນຂະນະທີ່ ຫວຽດນາມ ພວມຢູ່ໃນໄລຍະຍູ້ແຮງວິວັດທະນາການຫັນເປັນອຸດສາຫະກຳ. ເພາະສະນັ້ນ, ການຮ່ວມມືໃນຂົງເຂດພະລັງງານຈະແມ່ນສ່ວນໜຶ່ງທີ່ສຳຄັນໃນການຮ່ວມມື ຈີນ - ຫວຽດນາມ”.
ສອງຝ່າຍເຫັນດີພ້ອມກັນຮັກສາການຄ້າການລົງທຶນເສລີ, ເປີດອົກເປີດໃຈ, ສ້າງລະບົບຜະລິດ, ລະບົບສະໜອງທີ່ປອດໄພ, ມີສະຖຽນລະພາບ, ສ້າງກຸ່ມປະຕິບັດງານການຮ່ວມມືກ່ຽວກັບລະບົບຜະລິດ, ລະບົບສະໜອງ, ຊຸກຍູ້ການເພີ່ມທະວີການຮ່ວມມືໃນລະບົບສະໜອງ, ລະບົບຜະລິດ. ສົ່ງເສີມ, ສະໜັບສະໜູນວິສາຫະກິດທີ່ມີຄວາມສາມາດຢ່າງແທ້ຈິງ, ມີອິດທິພົນຊື່ສຽງຂອງສອງປະເທດໄປລົງທຶນຢູ່ປະເທດຂອງກັນ. ສ້າງສະພາບແວດລ້ອມດຳເນີນທຸລະກິດທີ່ຍຸຕິທຳ, ສະດວກ, ໂປ່ງໃສໃຫ້ແກ່ບັນດາວິສາຫະກິດ. ຄົ້ນຄວ້າຊຸກຍູ້ການພັດທະນາຄຸນນະພາບສູງຢູ່ບັນດາເຂດຮ່ວມມືເສດຖະກິດ - ການຄ້າ.
ສານກຳນົດທິດທາງອະນາຄົດ
ຫວຽດນາມ ແລະ ຈີນ ໄດ້ເປັນເອກະສັນນຳການຮ່ວມມືທາງລົດໄຟກາຍເປັນຈຸດພົ້ນເດັ່ນໃໝ່ໃນການຮ່ວມມືຍຸດທະສາດລະຫວ່າງສອງປະເທດ. ຕາມນັ້ນແລ້ວ, ຈີນ ພ້ອມແລ້ວທີ່ຈະຜັນຂະຫຍາຍການຮ່ວມມືກັບ ຫວຽດນາມ ກ່ຽວກັບການກູ້ຢືມທຶນ, ເຕັກໂນໂລຢີ, ການບຳລຸງສ້າງ, ຄວາມສາມາດດ້ານອຸດສາຫະກຳໃນຂົງເຂດເສັ້ນທາງລົດໄຟ, ຊີ້ນຳວິສາຫະກິດທີ່ມີຄວາມສາມາດຢ່າງແທ້ຈິງເຂົ້າຮ່ວມການສ້າງເສັ້ນທາງລົດໄຟ. ຫວຽດນາມ ແລະ ຈີນ ພັດທະນາການໂດຍສານ ແລະ ຂົນສົ່ງສິນຄ້າສາກົນດ້ວຍເສັ້ນທາງລົດໄຟ, ສ້າງເງື່ອນໄຂສະດວກກ່ຽວກັບລະບຽບການເຂົ້າອອກ - ເມືອງ ສຳລັບຜູ້ໂດຍສານ.
ເນື່ອງໃນໂອກາດນີ້, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ລົງຕົວຈິງຂີ່ລົດໄຟຄວາມໄວສູງ ຈີນ ຈາກ ປັກກິ່ງ ໄປຍັງເຂດ ຫົງອານ ໃໝ່ ແລະ ລົງສຳຫຼວດເຂດ ຫົງອານ ໃໝ່ - “ນະຄອນແຫ່ງອະນາຄົດ” ໂດຍກົງ. ສິ່ງດັ່ງກ່າວໄດ້ຊີ້ໃຫ້ເຫັນຄວາມສົນໃຈຂອງ ຫວຽດນາມ ຕໍ່ກັບເຕັກໂນໂລຢີ, ມາດຕະຖານເຕັກນິກ ແລະ ຫວຽດນາມ ເປັນເຈົ້າການຊອກຫາບັນດາມາດຕະການດີທີ່ສຸດເພື່ອແກ້ໄຂບັນຫາທີ່ເກີນຂອບຂະໜາດບັນຈຸຢູ່ຕົວເມືອງໃຫຍ່ຂອງ ຫວຽດນາມ.
ຈຸດເນັ້ນໜັກເປັນພິເສດໃນໂຄງການດຳເນີນງານຂອງທ່ານເລຂາທິການໃຫຍ່, ປະທານປະເທດ ໂຕເລິມ ຄັ້ງນີ້ ແມ່ນການຢ້ຽມຢາມມະຫາວິທະຍາໄລ ຊິງຮວາ, ອູ່ບຳລຸງສ້າງຜູ້ເກັ່ງກ້າສາມາດແຖວໜ້າໃນໂລກ. ນະທີ່ນີ້, ສານກ່ຽວກັບການຮ່ວມມືດ້ານການສຶກສາບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ ແລະ ການຫັນເປັນດີຈີຕອນ ໄດ້ຮັບການເນັ້ນໜັກຄືດັ່ງບຸລິມະສິດແຖວໜ້າ. ເລື່ອງຊຸກຍູ້ການຮ່ວມມືກັບບັນດາອົງການການສຶກສາທີ່ມີອິດທິພົນຊື່ສຽງຂອງ ຈີນ ແມ່ນບາດກ້າວເດີນທີ່ແທດຈິງ ແນໃສ່ຫຼຸດຜ່ອນໄລຍະຫ່າງກ່ຽວກັບລະດັບຄວາມຮູ້ພູມປັນຍາ, ຮັບເອົາບັນດາສິ່ງຍອດຍິ່ງໃນການບໍລິຫານ ແລະ ຄົ້ນຄວ້າວິທະຍາສາດ, ພ້ອມທັງສ້າງຖັນແຖວສືບທອດທີ່ມີກຳລັງແຮງຢ່າງພຽງພໍ ນຳ ຫວຽດນາມ ບຸກທະລຸໃນລະບົບຄຸນຄ່າທົ່ວໂລກ.
ການຢ້ຽມຢາມທາງລັດຖະກິດຢູ່ ຈີນ ຂອງທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລິມ ຄັ້ງນີ້ ໄດ້ສ້າງຂີດໝາຍຈຸດເລີ່ມຕົ້ນໃໝ່ໃນສາຍພົວພັນສອງຝ່າຍ. ໝາກຜົນຂອງການຢ້ຽມຢາມໄດ້ສະແດງໃຫ້ເຫັນການຖືເປັນສຳຄັນແຖວໜ້າ ແລະ ຄວາມຕັດສິນໃຈສູງຂອງທັງສອງຝ່າຍ ຕໍ່ກັບການພັດທະນາສາຍພົວພັນ “ທັງເປັນມິດສະຫາຍ, ທັງເປັນອ້າຍນ້ອງ” ໃຫ້ນັບມື້ນັບໝັ້ນແກ່ນກວ່າ, ມີສະຖຽນລະພາບ, ແທດຈິງກວ່າໃນໄລຍະຈະມາເຖິງ.”./.
