ໃນທ່າມກາງບັນຍາກາດທີ່ສັກສິດຂອງດິນແດນແຫ່ງບັນພະບູລຸດ, ຂັບ ຊວານ ບໍ່ພຽງແຕ່ແມ່ນປະເພດສິລະປະພື້ນເມືອງເທົ່ານັ້ນ ຫາກຍັງແມ່ນພິທີກຳຕິດພັນກັບການເຫຼື້ອມໃສໄຫວ້ບູຊາເຈົ້າຊີວິດ ຮຸ່ງ. ແບ່ງປັນກ່ຽວກັບປະຫວັດຄວາມເປັນມາຂອງຂັບ ຊວານ, ນັກສິລະປະການປະຊາຊົນຂັບ ຊວານ ຫງວຽນທິຫຼິກ ຫົວໜ້າກອງສິລະປະກອນຂັບ ຊວານ ອານຖາຍ ຕາແສງ ອານຖາຍ ແຂວງ ຝູເຖາະ ໃຫ້ຮູ້ວ່າ:
“ຂັບຊວານ ຝູເຖາະ ມີມາແຕ່ສະໄໝລາດຊະວົງ ຮຸ່ງ. ເມື່ອເຈົ້າຊີວິດນຳພາກອງທັບໄປຕີສັດຕູ ແລະ ເມື່ອຮັບໄຊຊະນະກັບຄືນບ້ານ, ເຈົ້າຊີວິດໄດ້ພາກອງທະຫານໄປທ່ຽວຫຼິ້ນຍາມລະດູບານໃໝ່. ເມື່ອຮອດໝູ່ບ້ານ ອານຖາຍ, ພະມະເຫສີ ບັງເອີນເກີດເຫດທ້ອງລັ່ນ ແລະ ເຈັບທ້ອງນານ ແຕ່ບໍ່ສາມາດປະສູດລູກໄດ້. ມີຄົນໃຊ້ຜູ້ໜື່ງໄດ້ລາຍງານວ່າ ໃນໝູ່ບ້ານນີ້ກໍ່ມີຜູ້ສາວຄົນໜຶ່ງຊື່ ເກວ໊ຮວາ ສາມາດຟ້ອນງາມ ແລະ ຂັບຮ້ອງມ່ວນທີ່ສຸດ ດັ່ງນັ້ນເຈົ້າຊີວິດໄດ້ເຊີນ ເກວ໊ຮວາ ມາຟ້ອນ ແລະ ຂັບຮ້ອງ ເພື່ອສ້າງຄວາມມ່ວນຊື່ນໃຫ້ພະມະເຫສີ ທີ່ຈິ່ງແລ້ວ ເມື່ອ ເກວ໊ຮວາ ມາຂັບຮ້ອງ, ພະມະເຫສີໄດ້ເຊົາເຈັບ ແລະ ສາມາດປະສູດລາຊະທິດາ. ເມື່ອເຫັນເຫດການດັ່ງກ່າວ ເຈົ້າຊີວິດໄດ້ສັ່ງໃຫ້ປະຊາຊົນຝຶກແອບ ແລະ ພັດທະນາການຟ້ອນ ແລະ ຂັບຊວານ”.
ໃນຊຸມວັນນີ້ຢູ່ໝູ່ບ້ານຂັບ ຊວານບູຮານ ອານຖາຍ ນະຄອນ ຫວຽດຈີ່, ບັນຍາກາດຝຶກແອບຖືກດຳເນີນຢ່າງຟົດຟື້ນ ກ່ອນທີ່ຈະຮອດພິທີໄຫວ້ບູຊາເຈົ້າຊີວິດ ຮຸ່ງ. ທ່ານ ເຈິ່ນຮຸຍນາມ ສັງກັດກອງຂັບ ຊວານ ອານຖາຍ ຕາແສງ ເວິນຝູ ແຂວງ ຝູເຖາະ ໃຫ້ຮູ້ວ່າ:
“ພິທີໄຫວ້ບູຊາເຈົ້າຊີວິດ ຮຸ່ງ, ງານບຸນວິຫານ ຮຸ່ງ ໃນຄັ້ງນີ້ກໍ່ມີຫຼາຍລາຍການ, ຂັບ ຊວານ ແມ່ນໜຶ່ງໃນບັນດາລາຍການທີ່ສຳຄັນໃນງານບຸນປີນີ້. ໃນຊຸມວັນນີ້ ພວກຂ້າພະເຈົ້າໄດ້ຝຶກແອບຂັບ ຊວານ ເພື່ອຮັບໃຊ້ແຂກທ່ອງທ່ຽວ ທັງຢູ່ພາຍໃນ ແລະ ຕ່າງປະເທດ”.
ບໍ່ພຽງແຕ່ຢູ່ ອານຖາຍ ເທົ່ານັ້ນ ບັນດາກອງຂັບ ຊວານ ບູຮານອື່ນໆກໍ່ພວມຫ້າງຫາກະກຽມຝຶກແອບ. ທ່ານ ຫງວຽນຊັວນໂຮ້ຍ ຫົວໜ້າກອງຂຂັບຊວານ ຝູ່ດຶກ ວັນຝູ ແຂວງ ຝູເຖາະ ໃຫ້ຮູ້ວ່າ:
“ໝູ່ບ້ານຂັບ ຊວານ ຝູ່ດຶກ ໄດ້ຂຶ້ນຕາຕະລາງຝຶກແອບໃຫ້ແກ່ເອື້ອຍນ້ອງແມ່ຍິງໃນບ້ານ. ໃນໂອກາດພິທີໄຫວ້ບູຊາເຈົ້າຊີວິດ ຮຸ່ງ, ໝູ່ບ້ານແຕ່ລະແຫ່ງໄດ້ເລີ່ມຮັບໃຊ້ນັບແຕ່ວັນທີ 6 ຫາວັນທີ 10 ເດືອນ 3 ໄລ່ຕາມຈັນທະປະຕິທິນ
ບໍ່ພຽງແຕ່ຮັບໃຊ້ພິທີກຳງານບຸນເທົ່ານັ້ນ ຂັບ ຊວານ ໃນວັນນີ້ຍັງກາຍເປັນຜະລິດຕະພັນທ່ອງທ່ຽວວັດທະນະທຳທີ່ເປັນເອກະລັກ ຮັບໃຊ້ແຂກທ່ອງທ່ຽວມາຢ້ຽມຢາມແຂວງ ຝູເຖາະ ອີກດ້ວຍ. ນາງ ຮົ່ງມິງ ແຂກທ່ອງທ່ຽວມາຈາກນະຄອນ ຮ່າໂນ້ຍ ເປີດເຜີຍວ່າ:
“ຂ້າພະເຈົ້າກໍ່ໄດ້ຮັບຊົມລາຍການຂັບ ຊວານ ທາງໂທລະພາບກໍ່ຄືຮັບຊົມບັນດາຄຣິບວິດີໂອທາງຢູທູບ ແຕ່ໃນຕົວຈິງ ມື້ນີ້ຈຶ່ງໄດ້ຮັບຊົມໂດຍກົງ ແລະ ຮູ້ສຶກວ່າເປັນເອກະລັກທີ່ສຸດ”
ພິທີໄຫວ້ບູຊາເຈົ້າຊີວິດ ຮຸ່ງ ບໍ່ພຽງແຕ່ແມ່ນໂອກາດເພື່ອສະແດງຄວາມບຸນຄຸນຕໍ່ບັນພະບູລຸດເທົ່ານັ້ນ ຫາກຍັງແມ່ນຈຸດເວລາ ເພື່ອໃຫ້ບັນດາວັດທະນະທຳທີ່ມີມາແຕ່ດົນນານ ໄດ້ຮັບການຟື້ນຟູ. ຂັບ ຊວານ ດ້ວຍຈັງຫວະທຳນອງບູຮານ ແລະ ພະລັງຊີວິດທີ່ທົນທານຍັງຄົງສືບຕໍ່ກັງວານຂຶ້ນ ເຊື່ອມຕໍ່ລະຫວ່າງອະດີດຕະການກັບປັດຈຸບັນ ສາມາດຮັກສາວິນຍານຂອງຊາດໃນຊີວິດທຸກວັນນີ້.
