ບັນດາຜູ້ແທນເຂົ້າຮ່ວມກອງປະຊຸມສຳມະນາ
ພາບ:TTXVN
|
(vovworld)- ກອງປະຊຸມສຳມະນາກ່ຽວກັບຄວາມເຄັ່ງຕຶງຢູ່ທະເລຕາເວັນອອກແມ່ນເລີ່ມຈາກ ເລື່ອງຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈະເພາະ ແລະ ໄຫລ່ທະວີບຂອງຫວຽດນາມ ຫວ່າງແລ້ວນີ້ ໂດຍຄະນະກຳມະການ ອາຊີ ຂຶ້ນກັບສະພາພົວພັນກັບສາກົນ ອັກຊັງຕີນ ຈັດຂຶ້ນໃນວັນທີ 5/8 ຢູ່ ນະຄອນຫລວງ Buenos Aires. ເຂົ້າຮ່ວມກອງປະຊຸມ ມີບັນດານັກຄົ້ນຄ້ວາ ແລະ ນັກຮຽນຮູ້ ອັກຊັງຕີນ, ໃນນັ້ນ ມີບັນດາອະດີດເອກອັກຄະລັດຖະທູດຂອງປະເທດນີ້ ຢູ່ ພາກພື້ນ ອາຊີຕາເວັນອອກສ່ຽງໃຕ້. ທີ່ກອງປະຊຸມສຳມະນາ, ທ່ານ ຫງວຽນດີງຖາວ, ເອກອັກຄະລັດຖະທູດ ຫວຽດນາມ ປະຈຳ ອັກຊັງຕີນ ໄດ້ຊີ້ແຈ້ງວ່າ: ການກະທຳຂອງຈີນ ຢູ່ທະເລຕາເວັນອອກ ບໍ່ພຽງແຕ່ລະເມີດສົນທິສັນຍາ ສປຊ ກ່ຽວກັບກົດໝາຍທະເລ (UNCLOS) ປີ 1982 ເທົ່ານັ້ນ ຫາກໄປຝືນກັບຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ ຊື່ງຈີນ ໄດ້ລົງນາມກັບ ອາຊຽນ ໃນປີ 2002. ທ່ານນາງ Aquino, ເອກອັກຄະລັດຖະທູດ ຟິລີບປີນ ປະຈຳ ອັກຊັງຕີນ ກໍໄດ້ຕຳນິຕິຕຽນຄວາມມັກໃຫຍ່ໃຝ່ສູງຂອງຈີນ ຢາກທວງເອົາທະເລຕາເວັນອອກ. ທ່ານ Julio A Hang ຜູ້ອຳນວຍການສະຖາບັນປ້ອງກັນຄວາມສະຫງົບສາກົນ ແລະ ບັນດາບັນຫາຍຸດທະສາດຂອງສະພາ ພົວພັນກັບສາກົນ ອັກຊັງຕີນ ຢືນຢັນວ່າ: ເລື່ອງຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະຂອງຫວຽດນາມ ແມ່ນການກະທຳທີ່ຮ້າຍແຮງ ພ້ອມທັງຊີ້ແຈ້ງວ່າ ຄວາມມັກໃຫຍ່ໃຝ່ສູງທວງເອົາທະເລຕາເວັນອອກເກືອບທັງໝົດຂອງຈີນ, ໄດ້ກໍ່ຄວາມເຄັ່ງຕຶງກັບບັນດາປະເທດບ້ານໃກ້ເຮືອນຄຽງ, ໃນນັ້ນ ມີຫວຽດນາມ ແລະ ຟີລີບປີນ.