ກອງປະຊຸມສຳມະນາກ່ຽວກັບທະເລຕາເວັນອອກຢູ່ອິນເດຍ
ທ່ານເອກອັກຄະລັດຖະທູດຫວຽດນາມ ປະຈຳອີນເດຍ ຕົນຊິງແທ່ງ
ກ່າວຄຳເຫັນທີ່ກອງປະຊຸມສຳມະນາ
(ພາບ: vietnamplus.vn)
(vovworld) - ຕອນຄ່ຳວັນທີ 01/12, ຢູ່ສູນສາກົນອິນເດຍ (IIC), ໄດ້ດຳເນີນກອງປະຊຸມສຳມະນາ “ທະເລຕາເວັນອອກ: ກ່າວປາໄສຍຸດທະສາດ, ກົດໝາຍສາກົນ ແລະ ແງ່ມຸມເສດຖະກິດ”. ກອງປະຊຸມສຳມະນາໂດຍກຸ່ມປະຕິບັດວຽກງານກ່ຽວກັບບັນດາຍຸດທະສາດທົດແທນ (WGAS) ຈັດຕັ້ງ. ເຂົ້າຮ່ວມກອງປະຊຸມສຳມະນາມີບັນດານັກຮຽນຮູ້, ນັກຊ່ຽວຊານຄົ້ນຄວ້າດ້ານການເມືອງຍຸດທະສາດທີ່ມີຊື່ສຽງ ແລະ ວົງການສື່ສານອິນເດຍ, ຜູ້ຕາງໜ້າສະຖານທູດບາງປະເທດ… ກ່າວຄຳເຫັນທີ່ກອງປະຊຸມສຳມະນາ, ທ່ານເອກອັກຄະລັດຖະທູດຫວຽດນາມ ປະຈຳອີນເດຍ ຕົນຊິງແທ່ງ ໃຫ້ຮູ້ວ່າ, ຫວຽດນາມ ແມ່ນປະເທດເຂົ້າຮ່ວມສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ພ້ອມທັງຢືນຢັນວ່າ, ຫວຽດນາມ ມີສິດອະທິປະໄຕ ແລະ ສິດຕັດສິນສຳລັບເຂດເສດຖະກິດພິເສດຂອງຕົນ ແລະ ຮຽກຮ້ອງໃຫ້ປະເທດອື່ນຕ້ອງເຄົາລົດເຂດເສດຖະກິດພິເສດນີ້. ນອກຈາກນັ້ນ, ຫວຽດນາມ ກໍເຄົາລົບອະທິປະໄຕຂອງປະເທດອື່ນຕາມ UNCLOS. ທ່ານເອກອັກຄະລັດຖະທູດ ເນັ້ນໜັກວ່າ, ຫວຽດນາມ ມີພື້ນຖານດ້ານກົດໝາຍ ແລະ ພະຍານຫຼັກຖານປະຫວັດສາດຢ່າງພຽງພໍ ເພື່ອຢືນຢັນອະທິປະໄຕສຳລັບໝູ່ເກາະຮ່ວາງຊາ ແລະ ເຈື່ອງຊາ. ທ່ານເອກອັກຄະລັດຖະທູດ ຕົນຊິງແທ່ງ ສືບຕໍ່ຊີ້ແຈ້ງຫຼັກໝັ້ນຂອງຫວຽດນາມ ສຳລັບບັນດາການຂັດແຍ້ງກັນຢູ່ທະເລຕາເວັນອອກ ແມ່ນບັນດາຝ່າຍທີ່ກ່ຽວຂ້ອງຕ້ອງແກ້ໄຂບັນດາການຂັດແຍ້ງກັນໂດຍສັນຕິວິທີ, ອີ່ງຕາມກົດໝາຍສາກົນ, ໃນນັ້ນມີ UNCLOS, ພ້ອມທັງຖືວ່າ, ສິ່ງສຳຄັນທີ່ສຸດແມ່ນບັນດາຝ່າຍທີ່ກ່ຽວຂ້ອງຕ້ອງລະງັບໃຈ, ບໍ່ນຳໃຊ້ອາວຸດ ຫຼື ນາບຂູ່ນຳໃຊ້ອາວຸດ, ບໍ່ມີການກະທຳພຽງລຳພັງຝ່າຍດຽວ ແລະ ຫັນເປັນການທະຫານເພື່ອແກ້ໄຂບັນດາການຂັດແຍ້ງກັນນີ້… ທ່ານເອກອັກຄະລັດຖະທູດ ຕົນຊິງແທ່ງ ໃຫ້ຮູ້ວ່າ, ຫວຽດນາມ ຈະຊຸກຍູ້ຈີນ ແລະ ອາຊຽນ ຕ້ອງບັນລຸກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ ແລະ ຮຽກຮ້ອງໃຫ້ທຸກຝ່າຍຕ້ອງມີບັນດາການປະກອບສ່ວນສ້າງສາຕາມກົດໝາຍສາກົນ ເພື່ອຮັກສາສັນຕິພາບ, ສະຖຽນລະພາບ ແລະ ກົດໝາຍກ່ຽວກັບທະເລ ແລະ ມະຫາສະມຸດ.
ບົດກ່າວປາໄສຂອງທ່ານເອກອັກຄະລັດຖະທູດ ຕົນຊິງແທ່ງ ໄດ້ຮັບການຕີລາຄາສູງຈາກບັນດານັກຮຽນຮູ້ ແລະ ຜູ້ເຂົ້າຮ່ວມກອງປະຊຸມ ເມື່ອຊີ້ແຈ້ງທັດສະນະຂອງຫວຽດນາມ ກ່ຽວກັບບັນຫາທະເລຕາເວັນອອກ ກໍຄືກະຕຸກຊຸກຍູ້ສັນຕິພາບ, ສະຖຽນລະພາບຢູ່ພາກພື້ນ.