( vovworld ) – ກອງປະຊຸມຮອງລັດຖະມົນຕີການຕ່າງປະເທດຫວຽດນາມ - ລາວ - ໄທ ກ່ຽວກັບແລວເສດຖະກິດຕາເວັນອອກ - ຕາເວັນຕົກຈະໄຂຂຶ້ນໃນວັນທີ 18/5, ຢູ່ແຂວງກວາງຈິ້ ທາງພາກກາງ. ກອງປະຊຸມຈະສຸມໃສ່ສຳຫຼວດກວດຄືນສະພາບການຜັນຂະຫຍາຍການກໍ່ສ້າງແລວເສດຖະກິດຕາເວັນອອກ - ຕາເວັນຕົກຢູ່ແຕ່ລະປະເທດ, ປຶກສາຫາລືບັນດາມາດຕະການແກ້ໄຂຄວາມຫຍຸ້ງຍາກ, ຂໍ້ຕິດຂັດໃນການກໍ່ສ້າງແລວເສດຖະກິດຕາເວັນອອກ - ຕາເວັນຕົກ, ພ້ອມກັນນັ້ນ ກອງປະຊຸມຈະສ້າງກົນໄກເຈລະຈາຢ່າງຕັ້ງໜ້າ, ເປີດເຜີຍລະຫວ່າງລັດຖະບານ 3 ປະເທດ, ການນຳບັນດາທ້ອງຖິ່ນທີ່ລຽບຕາມແລວເສດຖະກິດ ແລະ ປະຊາຄົມວິສາຫະກິດ, ແກ້ໄຂຄວາມຫຍຸ້ງຍາກ ຂໍ້ຕິດຂັດເທື່ອລະກ້າວ ແລະ ຊຸກຍູ້ການລົງທຶນ, ດຳເນີນທຸລະກິດໃນແລວເສດຖະກິດ. ຕອນເຊົ້າວັນທີ 17/5, ຫົວໜ້າ SOM - ບັນດາເຈົ້າໜ້າທີຂັ້ນສູງ 3 ປະເທດ ຫວຽດນາມ, ລາວ ແລະ ໄທ ໄດ້ຈັດການປະຊຸມຮ່ວມ ລະຫວ່າງ 3 ຝ່າຍ ເພື່ອປຶກສາຫາລືກ່ຽວກັບແຜນການຊຸກຍູ້ການຮ່ວມມືພັດທະນາແລວເສດຖະກິດຕາເວັນອອກ - ຕາເວັນຕົກ. ຜູ້ຕາງໜ້າ 3 ຝ່າຍຫວຽດນາມ, ລາວ ແລະ ໄທ ໄດ້ສຸມໃສ່ປຶກສາຫາລືບາງບັນຫາທີ່ກ່ຽວຂ້ອງເຖິງການລົງທຶນກໍ່ສ້າງພື້ນຖານໂຄງລ່າງ, ລະບຽບບໍລິຫານ, ເວລາແຈ້ງພາສີລະຫວ່າງບັນດາຄູ່ດ່ານຊາຍແດນໃນແລວເສດຖະກິດຕາເວັນອອກ - ຕາເວັນຕົກ. ທ່ານ ທອງພັນ ສະຫວັນເພດ, ຫົວໜ້າກົມ, ຫົວໜ້າກຸ່ມ SOM ແຫ່ງສປປ ລາວ ສະເໜີວ່າ.
“ໃນຊຸມປີທີ່ຜ່ານມາ, ພວກເຮົາໄດ້ຮັບຄວາມເອົາໃຈໃສ່ຊ່ວຍເຫຼືອຈາກບັນດາຄູ່ຮ່ວມມືຄື ຍີ່ປຸ່ນ, ທະນາຄານໂລກ, ທະນາຄານພັດທະນາອາຊີ ເພື່ອລົງທຶນຍົກລະບົບສ້າງສຳເລັດພື້ນຖານໂຄງລ່າງແລວເສດຖະກິດຕາເວັນອອກ - ຕາເວັນຕົກ. ແຕ່ຍ້ອນການລົງທຶນບໍ່ຄົບຊຸດ, ໄພທຳມະຊາດທຳລາຍ, ການເຄື່ອນໄຫວໄປມາຂອງພາຫະນະຄົມມະນາຄົມແມ່ນເກີນລະດັບ, ແລວເສດຖະກິດຕາເວັນອອກ - ຕາເວັນຕົກຖືກເປເພ, ບໍ່ທັນຕອບສະໜອງຄວາມສາມາດຂົນສົ່ງ. ພວກຂ້າພະເຈົ້າສະເໜີໃຫ້ບັນດາຝ່າຍຄວນຊຸກຍູ້ການພົບປະ, ແກ້ໄຂຂໍ້ຕິດຂັດ ແລະ ສືບຕໍ່ຮຽກຮ້ອງຄູ່ຮ່ວມມືກວ່າອີກເພື່ອພັດທະນາແລວທາງບົກໃຫ້ກາຍເປັນແລວເສດຖະກິດ”.