ການນຳພັກ, ລັດ ຕ້ອນຮັບທ່ານນາຍົກ ລັດຖະມົນຕີຈີນ ຫຼີເຄີຊຽງ
ທ່ານເລຂາທິການໃຫຍ່ຫງວຽນຟຸຈ້ອງ
ຕ້ອນຮັບທ່ານນາຍົກລັດຖະມົນຕີຈີນ ຫຼີເຄີຊຽງ
(ພາບ: TTXVN)
(vovworld) - ຕອນເຊົ້າວັນທີ 14 ຕຸລາ, ຢູ້ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິການງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີຈີນ ຫຼີເຄີຊຽງ ເນື່ອງໃນໂອກາດທ່ານມາຢ້ຽມຢາມຫວຽດນາມ ຢ່າງເປັນທາງການ. ທີ່ການຕ້ອນຮັບ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ເນັ້ນໜັກວ່າ ການພົວພັນມິດຕະພາບລະຫວ່າງຫວຽດນາມ - ຈີນ ແມ່ນຊັບສົມບັດອັນລ້ຳຄ່າລວມຂອງປະຊາຊົນ 2 ປະເທດ, 2 ຝ່າຍຄວນຮັບຜິດຊອບ ຮ່ວມແຮງຮ່ວມໃຈຮັກສາ ແລະ ພັດທະນາການພົວພັນນັ້ນຢ່າງບໍ່ຢຸດຢັ້ງ. ພັກ, ລັດ ແລະ ປະຊາຊົນຫວຽດນາມ ຖືເປັນສຳຄັນການພັດທະນາການພົວພັນຖານບ້ານໄກ້ເຮືອນຄຽງມິດຕະພາບ ແລະ ການພົວພັນຄູ່ຮ່ວມມື ຮ່ວມມືຍຸດທະສາດຮອບດ້ານກັບ ຈີນ. ທ່ານເລຂາທິການໃຫຍ່ ຫງວຽນຟຸຈ້ອງ ປາດຖະໜາວ່າ ໃນໄລຍະຈະມາເຖິງ, 2 ຝ່າຍຄວນເພີ່ມທະວີການພົບປະ, ແລກປ່ຽນຄະນະຜູ້ແທນຂັ້ນສູງ, ລົງເລິກເຂົ້າໃນການຮ່ວມມືໃນທຸກຂົງເຂດຢ່າງມີປະສິດທິຜົນ, ຊອກຫາບັນດາມາດຕະການລະອຽດເພື່ອແກ້ໄຂບັນດາບັນຫາຍັງຄົງຂ້າງຢ່າງເໝາະສົມ ຜ່ານການເຈລະຈາສັນຕິພາບ ບົນພື້ນຖານບັນດາຂໍ້ຕົກລົງທີ່ບັນລຸໄດ້ລະຫວ່າງການນຳຂັ້ນສູງ 2 ປະເທດ.
ສ່ວນທ່ານນາຍົກລັດຖະມົນຕີຈີນ ຫຼີເຄີຊຽງ ຢືນຢັນວ່າ ຍາມໃດພັກ, ລັດຖະບານຈີນ ກໍ່ຖືເປັນສຳຄັນການພັດທະນາການພົວພັນຄູ່ຮ່ວມມືຍຸດທະສາດຮອບດ້ານກັບຫວຽດນາມ; ໝັ້ນໝາຍ ຈະພ້ອມກັບພັກ, ລັດ ແລະ ປະຊາຊົນຫວຽດນາມ ເຮັດຈົນສຸດຄວາມສາມາດຂອງຕົນ ເພື່ອສືບຕໍ່ປັບປຸງ ແລະ ນຳການພົວພັນມິດຕະພາບ ແລະ ການຮ່ວມມືລະຫວ່າງຈີນ - ຫວຽດນາມ ໃຫ້ພັດທະນາຢ່າງຕັ້ງໜ້າ, ໝັ້ນຄົງໃນໄລຍະຈະມາເຖິງ.
ທ່ານປະທານປະເທດ ເຈືອງເຕີນຊາງ
ຕ້ອນຮັບທ່ານນາຍົກລັດຖະມົນຕີຈີນ ຫຼີເຄີຊຽງ
(ພາບ: TTXVN)
ແລະກໍ່ໃນຕອນເຊົ້າວັນທີ 14/10, ຢູ່ສຳນັກງານປະທານປະເທດ, ທ່ານປະທານປະເທດ ເຈືອງເຕິ໋ນຊາງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີຈີນ ຫຼີເຄີຊຽງ. ທ່ານປະທານປະເທດ ເຈືອງເຕິ໋ນຊາງ ເນັ້ນໜັກບາງມາດຕະການເຮັດໃຫ້ການພົວພັນຄູ່ຮ່ວມມື ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນໃນໄລຍະຈະມາເຖິງເລິກເຊິ່ງກວ່າອີກ, ພິເສດແມ່ນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງພັກ, ສອງລັດ, ດຳເນີນການຢ້ຽມຢາມ, ພົບປະລະຫວ່າງການນຳຂັ້ນສູງ ແລະ ກະຊວງ, ຂະແໜງການ, ທ້ອງຖີ່ນສອງປະເທດເປັນປະຈຳ, ສົມທົບກັນຜັນຂະຫຍາຍໂຄງການດຳເນີນງານກ່ຽວກັບການຜັນຂະຫຍາຍການພົວພັນຄູ່ຮ່ວມມື ຮ່ວມມືຍຸດທະສາດຢ່າງຮອບດ້ານລະຫວ່າງຫວຽດນາມ - ຈີນເປັນຢ່າງດີ. ກ່ຽວກັບບັນຫາບົນທະເລ, ທ່ານປະທານປະເທດ ເຈືອງເຕິ໋ນຊາງ ຊີ້ແຈ້ງວ່າ, ສອງຝ່າຍຄວນຄວບຄູມສະພາບການໃຫ້ດີ, ເດັດດຽວແກ້ໄຂຄວາມບໍ່ລົງລອຍກັນດ້ວຍສັນຕິວິທີບົນພື້ນຖານກົດໝາຍສາກົນ, ຊຸກຍູ້ການເຈລະຈາກ່ຽວກັບເຂດອ່າວພາກເໜືອ ເພື່ອບັນລຸຄວາມຄືບໜ້າໃນບັນຫາແບ່ງກຳນົດ ແລະ ຮ່ວມມືພ້ອມກັນພັດທະນາໃນເຂດນີ້. ຫວຽດນາມ ແລະ ຈີນຄວນຕັ້ງໜ້າຊອກຫາມາດຕະການແກ້ໄຂທີ່ມີລັກສະນະຂ້າມຜ່ານ ເຊິ່ງທັງສອງຝ່າຍສາມາດຮັບຮູ້ໄດ້ ແຕ່ບໍ່ສົ່ງຜົນສະທ້ອນເຖິງຫຼັກໝັ້ນຂອງແຕ່ລະຝ່າຍ. ສ່ວນນາຍົກລັດຖະມົນຕີຈີນ ຫຼີເຄີຊຽງ ກໍ່ຢືນຢັນວ່າ ພັກ, ລັດ ຈີນ ຖືເປັນສຳຄັນ ແລະ ປາຖະໜາຢາກພັດທະນາການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານກັບຫວຽດນາມ, ພ້ອມທັງນັ້ນໜັກວ່າ, ບັນດາເນື້ອໃນເຊິ່ງທັງສອງຝ່າຍບັນລຸໄດ້ໃນການຢ້ຽມຢາມຫວຽດນາມຄັ້ງນີ້ ຈະປະກອບສ່ວນນຳການພົວພັນຄູ່ຮ່ວມມື ຮ່ວມມືຍຸດທະສາດຮອບດ້ານຫວຽດນາມ - ຈີນ ພັດທະນາຢ່າງຈົບງາມ ແລະ ໝັ້ນຄົງ.
ຕອນບ່າຍຂອງວັນດຽວກັນ, ຢູ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ຫຼີເຄີຊຽງ. ທີ່ການຕ້ອນຮັບ, ທ່ານປະທານສະພາແຫ່ງຊາດ ຫງວຽນຊິງຮຸ່ງຢືນຢັນວ່າ, ສະພາແຫ່ງຊາດຈະເຮັດຈົນສຸດຄວາມສາມາດຂອງຕົນ ເພື່ອພ້ອມກັບພັກ, ລັດຖະບານຫວຽດນາມປັບປຸງ ແລະ ພັດທະນາການພົວພັນຄູ່ຮ່ວມມື ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ປາຖະໜາວ່າ, ໃນໄລຍະຈະມາເຖິງ, ສະພາແຫ່ງຊາດສອງປະເທດຈະສືບຕໍ່ຍູ້ແຮງການແລກປ່ຽນຄະນະຜູ້ແທນ, ແລກປ່ຽນຂໍ້ມູນ ແລະ ບົດຮຽນຢ່າງແທດຈິງ ແລະ ມີປະສິດທິຜົນ ກໍ່ຄືເພີ່ມທະວີການສົບທົບກັນໃນເວທີປາໄສສະພາແຫ່ງຊາດຂອງພາກພື້ນ ແລະ ສາກົນ, ປະກອບສ່ວນຊຸກຍູ້ການຮ່ວມມືລະຫວ່າງລັດຖະບານ ແລະ ບັນດາກະຊວງ, ຂະແໜງການຂອງສອງປະເທດຢ່າງມີປະສິດທິຜົນ.