(vovworld) - ດ້ວຍຫົວຂໍ້ “ເພື່ອນມິດເພື່ອສັນຕິພາບ - ຄູ່ຮ່ວມມືເພື່ອຄວາມວັດທະນາຖາວອນ”, ກອງປະຊຸມສຸດຍອດອາຊີ - ເອີລົບ (ASEM) ຄັ້ງທີ 9 ໄດ້ຖືກໄຂຂຶ້ຶນຢ່າງເປັນທາງການໃນວັນທີ 5/11 ຢູ່ນະຄອນຫຼວງວຽງຈັນ. ເຂົ້າຮ່ວມກອງປະຊຸມສຸດຍອດ ASEM 9, ຄະນະຜູ້ແທນຫວຽດນາມ ໂດຍທ່ານນາຍົກລັດຖະມົນຕີ Nguyen Tan Dung ນຳໜ້າ ພ້ອມກັບປະມູກລັດ, ຜູ້ນຳລັດຖະບານບັນດາປະເທດສະມາຊິກ, ຄະນະກຳມະການເອີລົບ ແລະ ຄະນະເລຂາອາຊຽນ ໄດ້ດຳເນີນການໂອ້ລົມສົນທະນາ, ເຈລະຈາ, ໄຈ້ແຍກ, ກຳນົດທິດ ແລະ ເປັນເອກະພາບນຳກັນຕໍ່ມາດຕະການທີມີລັກສະນະຍຸດທະສາດ ເພື່ອແນໃສ່ແກ້ໄຂບັນດາບັນຫາທີ່ພວມພົ້ນເດັ່ນຂຶ້ນ, ໂດຍສະເພາະແມ່ນຄວາມມານະພະຍາຍາມຟື້ນຟູເສດຖະກິດ, ຮັບມືກັບບັນດາສິ່ງທ້າທາຍທົ່ວໂລກ, ຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມື ແລະ ພັດທະນາຂອງ ASEM ໃນອະນາຄົດ.
ໃນວັນດຽວກັນ, ຢູ່ນອກກອງປະຊຸມຂັ້ນສູງ ASEM 9 ພວມດຳເນີນໄປຢູ່ນະຄອນຫລວງວຽງຈັນ, ທ່ານນາຍົກລັດຖະມົນຕີ ຫວຽດນາມ Nguyen Tan Dung ໄດ້ມີການພົບປະກັບບັນດາການນຳປະເທດສະມາຊິກ ASEM ທີ່ພວມເຂົ້າຮ່ວມກອງປະຊຸມ. ໃນການພົບປະກັບປະທານາທິບໍດີ ຝລັ່ງ Francois Hollande ການນຳສອງປະເທດໄດ້ເຫັນດີຍູ້ໄວບັນດາໂຄງການຮ່ວມມືຈຸດສຸມ. ທ່ານນາຍົກລັດຖະມົນຕີ Nguyen Tan Dung ກໍໄດ້ພົບປະແລກປ່ຽນຄຳຄິດຄຳເຫັນກັບປະທານາທິບໍດີ Bulgari, Rosen Plevneliev. ທ່ານປະທານາທິບໍດີ Rosen Plevneliev ປາດຖະຫນາຢາກຊຸກຍູ້ການພົວພັນລະຫວ່າງສອງປະເທດໃຫ້ພັດທະນາກວ່າອີກ ພິເສດໃນຂົງເຂດຮ່ວມມືເສດຖະກິດ ການລົງທຶນ ການຄ້າ, ພະລັງງານ, ການສຶກສາບຳລຸງສ້າງ, ສາທາລະນະສຸກ… ປະທານາທິບໍດີ Rosen Plevneliev ໃຫ້ຮູ້ວ່າ ຈະມາຢ້ຽມຢາມຫວຽດນາມຢ່າງເປັນທາງການໃນຕົ້ນປີຈະມາເຖິງ.
ໃນການພົບປະລະຫວ່າງທ່ານນາຍົກລັດຖະມົນຕີ Nguyen Tan Dung ແລະ ປະທານາທິບໍດີ ອິນໂດເນເຊຍ Susilo Bambang Yudhoyono, ການນຳສອງທ່ານໄດ້ຢືນຢັນຈະສືບຕໍ່ຮັກສາບັນດາການຢ້ຽມຢາມ, ການແລກປ່ຽນ ແລະ ພົບປະຂອງການນຳຂັ້ນສູງ, ຜ່ານນັ້ນ ຊຸກຍູ້ທ່າພັດທະນາອັນດີງາມປະຈຸບັນ.
ທີ່ການພົບປະລະຫວ່າງທ່ານນາຍົກລັດຖະມົນຕີ Nguyen Tan Dung ແລະ ນາຍົກລັດຖະມົນຕີ ອີຕາລີ Mario Monti, ການນຳສອງທ່ານໄດ້ເປັນເອກະພາບຊີ້ນຳບັນດາກະຊວງ, ຂະແຫນງການ ແລະ ທ້ອງຖິ່ນສົມທົບກັນຢ່າງແຫນ້ນແຟ້ນເພື່ອຈັດຕັ້ງການສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດຢ່າງແທດຈິງ, ມີປະສິດທິຜົນ, ປັບປຸງພື້ນຖານເພື່ອຍົກການພົວພັນລະຫວ່າງສອງປະເທດຂຶ້ນສູ່ລະດັບສູງໃຫມ່.
ກ່ອນໜ້ານັ້ນ, ໃນຕອນບ່າຍວັນທີ 4/11, ທ່ານນາຍົກລັດຖະມົນຕີ NguyenTan Dung ໄດ້ມີການພົບປະເຈລະຈາກັບທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ທີ່ສຳນັກງານປະທານປະເທດ. ນະທີ່ນີ້, ທ່ານນາຍົກລັດຖະມົນຕີ Nguyen Tan Dung ແລະ ທ່ານເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ໄດ້ຢືນຢັນຄວາມສຳຄັນຂອງສາຍພົວພັນແບບພິເສດຫວຽດນາມ - ລາວ. ເພື່ອຊຸກຍູ້ການພົວພັນດ້ານເສດຖະກິດ, ປັບປຸງພື້ນຖານໃຫ້ແກ່ການພົວພັນລະຫວ່າງຫວຽດນາມ - ລາວ ໃນໄລຍະຈະມາເຖິງຢ່າງແໜ້ນແຟ້ນ, ທ່ານນາຍົດລັດຖະມົນຕີ Nguyen Tan Dung ໃຫ້ຮູ້ວ່າ ຈະຊີ້ນຳບັນດາແຂວງ, ນະຄອນ, ບັນດາກຸ່ມບໍລິສັດ ແລະ ລັດວິສາຫະກິດ ເພີ່ມທະວີບັນດາການເຄື່ອນໄຫວຮ່ວມມືດ້ານເສດຖະກິດ, ການຄ້າ ແລະ ການລົງທຶນກັບລາວຫຼາຍກວ່າອີກ. ສ່ວນທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນໄດ້ຢືນຢັນວ່າ ລາວ ຈະສືບຕໍ່ສ້າງເງື່ອນໄຂສະດວກເພື່ອຊຸກຍູ້ລະດັບຄວາມຄືບໜ້າ, ຮັບປະກັນຄຸນນະພາບ, ປະສິດທິຜົນຂອງບັນດາໂຄງການເຊິ່ງໄດ້ຮັບການຕົກລົງລະຫວ່າງຫວຽດນາມ - ລາວ.