(ພາບ:baodientu.chinhphu.vn)
(vovworld)- ສະເຫຼີມສະຫຼອງ 66 ປີແຫ່ງວັນທະຫານເສຍອົງຄະ, ນັກຮົບເສຍສະຫຼະ ຊີວິດເພື່ອຊາດ (27/7/1947-27/7/2013), ຕອນເຊົ້າວັນທີ 27/7, ຄະນະຜູ້ແທນພັກ, ລັດຫວຽດນາມ ໄດ້ໄປວາງພວງມາລາ, ຖະຫວາຍທູບທຽນຢູ່ອະນຸສາວະລີບັນດານັກວິລະຊົນ, ນັກຮົບເສຍສະຫຼະຊີວິດເພື່ອຊາດ ທີ່ຖະໜົນບັກເຊີນ ແລະ ວາງພວງມາລາ, ເຂົ້າຢ້ຽມຂ່ຳນັບສຸສານປະທານໂຮ່ຈິມິນ, ການນຳທີ່ແສນເຄົາລົບຮັກຂອງຊາດຫວຽດນາມ.
ໃນວັນດຽວກັນ, ຄະນະຜູ້ແທນອົງຄະນະພັກກອງທັບສູນກາງ ແລະ ກະຊວງປ້ອງກັນປະເທດ, ອົງຄະນະພັກຕຳຫຼວດສູນກາງ ແລະ ກະຊວງຕຳຫຼວດຫວຽດນາມ, ຄະນະຜູ້ແທນກະຊວງແຮງງານ ທະຫານເສຍອົງຄະ ແລະ ສັງຄົມ, ຄະນະຜູ້ແທນອົງຄະນະພັກ, ສະພາປະຊາຊົນ, ຄະນະກຳມະການ ປຊຊ ນະຄອນຮ່າໂນ້ຍ ແລະ ປຊຊ ທຸກຊັ້ນວັນນະເປັນຈຳນວນຫຼວງຫຼາຍໄດ້ມາອາໄລຫາບັນດານັກວິລະຊົນ, ນັກຮົບເສຍສະຫຼະຊີວິດເພື່ອຊາດ ແລະ ເຂົ້າຢ້ຽມຂ່ຳນັບສຸສານປະທານໂຮ່ຈິມິນ.
ໃນໂອກາດນີ້, ທ້ອງຖິ່ນຕ່າງໆໃນທົ່ວປະເທດໄດ້ຈັດບັນດາຄະນະໄປຢ້ຽມຢາມ, ມອບຂອງຂວັນໃຫ້ບັນດາຄອບຄົວທະຫານເສຍອົງຄະ, ຄອບຄົວນະໂຍບາຍ, ຜູ້ມີຄຸນງານຄວາມດີຕໍ່ການປະຕິວັດ ແລະ ໃຕ້ທຽນສະແດງຄວາມຮູ້ບຸນຄຸນຢູ່ເຂດສຸສານນັກຮົບເສຍສະຫຼະຊີວິດເພື່ອຊາດ. ຕ່ອນຄ່ຳວັນທີ 26/7, ກ່າວຄຳເຫັນທີ່ພິທີໃຕ້ທຽນສະແດງຄວາມຮູ້ບຸນຄຸນຕໍ່ບັນດານັກຮົບເສຍສະຫຼະຊີວິດເພື່ອຊາດຢູ່ເຂດສຸສານເມືອງດ້ຽນບ່ານ ແຂວງກວາງນາມ, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ເນັ້ນໜັກວ່າ:
“ເນື່ອງໃນໂອກາດນີ້, ຂ້າພະເຈົ້າຂໍເວົ້າກັບບັນດາເພື່ອນລຸ່ນໜຸ່ມໃນປະຈຸບັນນີ້ວ່າ: ການຕອບບຸນແທນຄຸນລຸ່ນກ່ອນທີ່ໄດ້ເສຍສະຫລະຊີວິດເພື່ອປະເທດຊາດ, ເພື່ອຄວາມຜາສຸກຂອງ ປຊຊ ແມ່ນມູນເຊື້ອອັນດີງາມຂອງຊາດຫວຽດນາມ ແລະ ພວກເຮົາຕ້ອງສະແດງໃຫ້ເຫັນອາລົມຈິດດັ່ງກ່າວດ້ວຍການເຄື່ອນໄຫວທີ່ແທດຈິງ. ພວກເພື່ອນຈົ່ງເສີມຂະຫຍາຍພູມປັນຍາ, ກຳລັງແຮງໜຸ່ມຫວຽດນາມ ເພື່ອປະກອບສ່ວນນຳປະເທດຫວຽດນາມ ນັບມື້ນັບພັດທະນາ ແລະ ວັດທະນະຖາວອນ“
ໃນຕອນຄ່ຳຂອງວັນທີ 26/7, ວິທະຍຸກະຈາຍສຽງຫວຽດນາມ ໄດ້ຈັດລາຍການ ສະແດງສີລະປະ ”ບົດເພງກ່ຽວກັບບັນດານາງສາວເປີດທາງ” ເພື່ອແນໃສ່ສະແດງຄວາມຮູ້ບຸນຄຸນຕໍ່ກຳລັງຊາວໜຸ່ມຕະລຸມບ່ອນລຸ່ນຕ່າງໆ. ທ່ານນາງໂງທິມິງ ຮອງປະທານກຳມາທິການວັດທະນະທຳ ສຶກສາຊາວໜຸ່ມ ແລະ ເຍົາວະຊົນ ສະພາແຫ່ງຊາດຫວຽດນາມ ເນັ້ນໜັກວ່າ:
”ພວກຂ້າພະເຈົ້າມີຄວາມເຄົາລົບ ແລະ ຕື້ນຕັນໃຈທີ່ສຸດຕໍ່ການເສຍສະຫຼະຂອງອະດີດຊາວໜຸ່ມຕະລຸມບ່ອນເພື່ອປົກປັກຮັກສາປະເທດຊາດ. ບັນດາບົດເພງນີ້ຈະຊຸກຍູ້ລຸ່ນໜຸ່ມ ຕ້ອງເຫັນໄດ້ຄວາມຮັບຜິດຊອບ, ມີຄວາມເອົາໃຈໃສ່ຕໍ່ອະດີດຊາວໜຸ່ມຕະລຸມບ່ອນຫຼາຍກ່ວາອີກ ຊື່ງແມ່ນຜູ້ໄດ້ປະກອບສ່ວນຫຼາຍຢ່າງໃຫ້ແກ່ປະເທດຊາດ. ການເຄືອ່ນໄຫວນີ້ຕ້ອງເພີ່ມທະວີຄູນໃນທົ່ວສັງຄົມ”.