ພາບປະກອບ
(vovworld) - ວັນທີ 1/12, ຢູ່ຮ່າໂນ້ຍ, ສະມາຄົມອິນເຕີແນດ ຫວຽດນາມ ສົມທົບກັບກະຊວງຖະແຫຼງຂ່າວ ແລະ ສື່ສານ ໄດ້ຈັດຕັ້ງພິທີສະເຫຼີມສະຫຼອງ 15 ປີ ແຫ່ງວັນນຳໃຊ້ອິນເຕີແນດຢູ່ຫວຽດນາມ. ພາຍຫຼັງ 15 ປີ ແຫ່ງການພັດທະນາ, ອິນເຕີແນດຢູ່ຫວຽດນາມ ໄດ້ມີການຫັນປ່ຽນຢ່າງແຮງ ແລະ ບັນລຸລະດັບເຕີບໂຕສູງ. ນັບແຕ່ປີ 1997 – 2003, ຫວຽດນາມ ມີປະມານ 1,8 ລ້ານຄົນນຳໃຊ້ອິນເຕີແນດ. ມາຮອດປະຈຸບັນ, ຫວຽດນາມມີວິສາຫະກິດ 19 ແຫ່ງສະໜອງການບໍລິການອິນເຕີແນດ, ອັນຕາສ່ວນ ແລະ ຈຳນວນຜູ້ນຳໃຊ້ອິນເຕີແນດ ໄດ້ເພີ່ມຂຶ້ນທົບ 10 ເທົ່າ, ຈາກ 3,1 ລ້ານຄົນນຳໃຊ້ອິນເຕີແນດໃນປີ 2003, ໄດ້ຂຶ້ນເຖິງ 31,1 ລ້ານຄົນນຳໃຊ້ໃນເດືອນ 9/2012. ພັນທະພາບໂທລະຄົມສາກົນຕີລາຄາວ່າ, ຫວຽດນາມແມ່ນປະເທດທີ່ມີອັດຕາເຕີບໂຕອິນເຕີແນດໄວກວ່າໝູ່ໃນພາກພື້ນ ແລະ ກໍ່ແມ່ນໜຶ່ງໃນບັນດາປະເທດທີ່ມີອັດຕາເຕີບໂຕສູງສຸດຢູ່ໃນໂລກ.