ທ່ານປະທານປະເທດ ເຈີນດ້າຍກວາງຕ້ອນຮັບ ກຳມະການ
ລັດຖະບານຈີນ ຢາງເຈຍຊື້
|
(vovworld)- ຕອນບ່າຍວັນທີ 27/6, ທີ່ການຕ້ອນຮັບ ກຳມະການລັດຖະບານຈີນ ຢາງເຈຍຊື້ ເນື່ອງໃນໂອກາດມາຢ້ຽມຢາມຫວຽດນາມ ແລະ ເປັນປະທານກອງປະຊຸມຄັ້ງທີ 9 ຄະນະກຳມະການຊີ້ນຳການຮ່ວມມືສອງຝ່າຍ ຫວຽດນາມ - ຈີນ, ທ່ານປະທານປະເທດ ເຈີນດ້າຍກວາງ ໄດ້ຢືນຢັນ: ພັກ, ລັດ ແລະ ປະຊາຊົນຫວຽດນາມ ຖືການປັບປຸງ ແລະ ເພີ່ມທະວີການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານກັບພັກ, ລັດຖະບານ ແລະ ປະຊາຊົນຈີນ ເປັນສຳຄັນ ແລະ ຖືວ່າ ນີ້ແມ່ນຫນຶ່ງໃນບັນດາການບຸລິມະສິດຕົ້ນຕໍໃນນະໂຍບາຍການຕ່າງປະເທດຂອງຫວຽດນາມ. ທ່ານປະທານປະເທດ ສະເຫນີໃນໄລຍະຈະມາເຖິງ, ສອງຝ່າຍຄວນປະຕິບັດບັນດາຂໍ້ຕົກລົງ ແລະ ຄວາມຮັບຮູ້ລວມຂັ້ນສູງຢ່າງເຂັ້ມງວດ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງຜ່ານການຮັກສາພົບປະຂັ້ນສູງ ແລະ ພົບປະມິດຕະພາບຂັ້ນຕ່າງໆ, ຍູ້ແຮງການສຶກສາ ແລະ ໂຄສະນາກ່ຽວກັບນ້ຳໃຈມິດຕະພາບ, ການຮ່ວມມືຕ່າງຝ່າຍຕ່າງມີຜົນປະໂຫຍດລະຫວ່າງສອງຝ່າຍ. ພ້ອມທັງຜັນຂະຫຍາຍບັນດາຂໍ້ຕົກລົງທີ່ບັນລຸໄດ້ກ່ຽວກັບດ້ານເສດຖະກິດ ການຄ້າ ແລະ ການລົງທຶນ, ປະຕິບັດບັນດາມາດຕະການມີປະສິດທິຜົນເພື່ອເຮັດໃຫ້ການຮ່ວມມືດ້ານການຄ້າສອງຝ່າຍພັດທະນາຕາມທິດດຸ່ນດ່ຽງ, ໝັ້ນຄົງກວ່າ, ຊົມເຊີຍຈີນ ເພີ່ມທະວີການລົງທຶນເຂົ້າບັນດາໂຄງການໃຫຍ່.
ກ່ຽວກັບບັນຫາບົນທະເລ, ທ່ານປະທານປະເທດສະເຫນີ ສອງຝ່າຍປະຕິບັດຢ່າງເຂັ້ມງວດບັນດາຂໍ້ຕົກລົງ ແລະ ຮັບຮູ້ລວມຂອງການນຳຂັ້ນສູງ, ໃນນັ້ນ ມີ “ຂໍ້ຕົກລົງກ່ຽວກັບບັນດາຫລັກການພື້ນຖານຊີ້ນຳການແກ້ໄຂບັນດາບັນຫາບົນທະເລ ຫວຽດນາມ - ຈີນ”, ກວດກາຄວາມບໍ່ລົງລອຍກັນເປັນຢ່າງດີ, ບໍ່ມີການກະທຳເຮັດໃຫ້ສະພາບການສັບສົນຂຶ້ນຕື່ມ, ເປີດກວ້າງການຂັດແຍ້ງກັນ, ຊຸກຍູ້ບັນດາກົນໄກເຈລະຈາກ່ຽວກັບບັນຫາບົນທະເລລະຫວ່າງສອງປະເທດໃຫ້ບັນລຸໝາກຜົນແທດຈິງ, ຄົ້ນຄ້ວາສ້າງກົນໄກຊອກຫາກູ້ໄພກູ້ຊີບຢູ່ອ່າວພາກເຫນືອ. ພ້ອມທັງປະຕິບັດ “ຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC)ຢ່າງຄົບຖ້ວນ ແລະ ມີປະສິດທິຜົນ, ສ້າງ “ປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ” (COC)ໂດບໄວ, ແກ້ໄຂບັນດາຄວາມຂັດແຍ້ງກັນໂດຍສັນຕິວິທີ, ສອດຄອ່ງກັບກົດໝາຍສາກົນ.
ສ່ວນທ່ານ ຢາງເຈຍຊື້, ຄະນະກຳມະການລັດຖະບານ ໄດ້ຢືນຢັນວ່າ: ພັກ ແລະ ລັດຖະບານ ຈີນ ຍາມໃດກໍຢືດໝັ້ນພັດທະນາການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຕ່າງຝ່າຍຕ່າງມີຜົນປະໂຫຍດກັບຫວຽດນາມ ພ້ອມແລ້ວພ້ອມກັບຫວຽດນາມປະຕິບັດຄວາມຮັບຮູ້ລວມສຳຄັນຂອງການນຳຂັ້ນສູງສອງພັກ, ສອງລັດເປັນຢ່າງດີ. ທ່ານຢາງເຈຍຊື້ ສະເຫນີສອງຝ່າຍສືບຕໍ່ຮັກສາການພົບປະແລກປ່ຽນ, ພົບປະຂັ້ນສູງ, ຊູກຍູ້ການຮ່ວມມືຢ່າງແທດຈິງໃນບັນດາຂົງເຂດ, ຍູ້ແຮງການພົບປະແລກປ່ຽນ, ການຮ່ວມມືລະຫວ່າງບັນດາກະຊວງ, ຂະແຫນງການ, ທ້ອງຖິ່ນສອງປະເທດ, ແກ້ໄຂຄວາມບໍ່ລົງລອຍກັນບົນທະເລຢ່າງສົມເຫດສົມຜົນ, ຊຸກຍູ້ການພວົພັນລະຫວ່າສອງປະເທດໃຫ້ພັດທະນາເປັນປົກກະຕິ, ປອດໃສ, ໝັ້ນຄົງເຂັ້ມແຂງ.