(ທ່ານເລຂາທິການໃຫຍ່ ໂຕເລິມ, ກ່າວຄຳເຫັນທີ່ການພົບປະ)

        ປະຊາຄົມຊາວ ຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ບໍ່ສາມາດຕັດແຍກອອກຈາກປະຊາຄົມຊາວ ຫວຽດນາມ ໄດ້, ແມ່ນແຫຼ່ງກຳລັງສຳຄັນພິເສດຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດໃນສັງກາດພັດທະນາໃໝ່. ນີ້ແມ່ນຄຳຢືນຢັນຂອງທ່ານ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ທີ່ການພົບປະກັບຄະນະຜູ້ແທນພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດດີເດັ່ນ ທີ່ເຂົ້າຮ່ວມລາຍການ “ລະດູບານໃໝ່ແຫ່ງບ້ານເກີດເມືອງນອນ 2026” ທີ່ຈັດຂຶ້ນໃນຕອນບ່າຍວັນທີ 08 ກຸມພາ, ຢູ່ສຳນັກງານສູນກາງພັກ, ທີ່ ຮ່າໂນ້ຍ.

          ທ່ານເລຂາທິການໃຫຍ່ໃຫ້ຮູ້ວ່າ ໃນໄລຍະຜ່ານມາ, ພັກ, ລັດ ຍາມໃດກໍ່ເອົາໃຈໃສ່ເຖິງການປົກປ້ອງສິດຜົນປະໂຫຍດອັນຊອບທຳຂອງປະຊາຄົມຊາວ ຫວຽດນາມ ອາໄສຢູ່ຕ່າງປະເທດ, ປະກອບສ່ວນໜູນຊ່ວຍພໍ່ແມ່ປະຊາຊົນຮັບປະກັນຊີວິດການເປັນຢູ່ໃຫ້ເປັນປົກກະຕິ, ເຊື່ອມໂຍງເຂົ້າກັບປະເທດປະຈຳຖິ່ນ, ເສີມຂະຫຍາຍມູນເຊື້ອຂອງຊາດ ຫວຽດນາມ ຢ່າງເລິກເຊິ່ງກວ້າງຂວາງ. ພ້ອມກັນນັ້ນ, ຍາມໃດກໍ່ຮັບຟັງ, ຮັບເອົາຄຳເຫັນປະກອບຂອງປະຊາຄົມຊາວ ຫວຽດນາມ ອາໄສຢູ່ຕ່າງປະເທດ ໃນວິວັດການສ້າງແຜນກຳນົດນະໂຍບາຍຂອງປະເທດຊາດ, ພິເສດແມ່ນບັນດານະໂຍບາຍສຳລັບຊາວ ຫວຽດນາມ ອາໄສຢູ່ຕ່າງປະເທດ.

          “ຂ້າພະເຈົ້າກໍ່ຢືນຢັນວ່າ ພັກ, ລັດ ຍາມໃດກໍ່ຊົມເຊີຍ ແລະ ສ້າງເງື່ອນໄຂສະດວກເພື່ອໃຫ້ບັນດານັກຊ່ຽວຊານ, ນັກປັນຍາຊົນ, ນັກວິທະຍາສາດ, ນັກທຸລະກິດຊາວ ຫວຽດນາມ ອາໄສຢູ່ຕ່າງປະເທດ ປະກອບສ່ວນໃຫ້ແກ່ການພັດທະນາປະເທດຊາດຫຼາຍກວ່າອີກ, ໂດຍສະເພາະແມ່ນໃນບັນດາຂົງເຂດຫຼັກແຫຼ່ງສຳລັບໄລຍະພັດທະນາໃໝ່ຂອງປະເທດຊາດ. ພັກ, ລັດ ຈະສືບຕໍ່ສ້າງບັນດານະໂຍບາຍສຳລັບຊາວ ຫວຽດນາມ ອາໄສຢູ່ຕ່າງປະເທດ ໃຫ້ສຳເລັດສົມບູນ, ພ້ອມກັນນັ້ນ, ກເພີ່ມທະວີການສົມທົບກັບສາກົນເພື່ອປົກປ້ອງສິດ, ຜົນປະໂຫຍດອັນຊອບທຳຂອງພໍ່ແມ່ປະຊາຊົນ, ຊ່ວຍໃຫ້ພໍ່ແມ່ປະຊາຊົນມີຄວາມອຸ່ນອຽນໃຈດຳລົງຊີວິດ, ເຮັດວຽກ, ພັດທະນາຢູ່ປະເທດປະຈຳຖິ່ນ”.