ທ່ານເລຂາທິການພັກກອມມູນິດຫວຽດນາມ ຫງວຽນຟູ໋ຈ້ອງ ໃຫ້ການຕ້ອນຮັບເລຂາທິການໃຫຍ່,
ປະທານປະເທດຈູມມະລີ ໄຊຍະສອນ
(ພາບ: Trí Dũng/TTXVN)
(vovworld) – ໃນໂອກາດມາໄຫວ້ອາໄລພົນເອກ ຫວໍງວຽນຢາບ, ວັນທີ 12/10, ທ່ານເລຂາທິການພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບຄະນະຜູ້ແທນພັກ, ລັດລາວ ໂດຍທ່ານ ຈູມມະລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ສປປ ລາວ.
ທ່ານເລຂາທິການໃຫຍ່, ປະທານປະເທດຈູມມະລີ ໄຊຍະສອນ ໄດ້ສົ່ງຄຳແບ່ງເບົາຄວາມເສົ້າສະຫຼົດໃຈຢ່າງເລິກເຊິ່ງ, ຄວາມທຸກເສົ້າຢ່າງໃຫຍ່ຫຼວງຂອງພັກ, ລັດ, ກອງທັບ ແລະ ປຊຊ ລາວ ເຖິງ ພັກ, ລັດ, ກອງທັບ ແລະ ປຊຊ ຫວຽດນາມ ອ້າຍນ້ອງຕໍ່ການມໍລະນະກຳຂອງພົນເອກ ຫວໍງວຽນຢາບ, ທ່ານໄດ້ຕີລາຄາສູງຄຸນງາມຄວາມດີອັນໃຫຍ່ຫຼວງຂອງພົນເອກ ຫວໍງວຽນຢາບ ທີ່ມີຕໍ່ພາລະກິດຕໍ່ສູ້ປະຕິວັດປົດປ່ອຍຊາດ ກໍ່ຄື ໃນພາລະກິດສ້າງສາ ແລະ ປົກປັກຮັກສາປະເທດຊາດຂອງຫວຽດນາມ ແລະ ລາວ. ທ່ານຢືນຢັນວ່າ ພົນເອກແມ່ນເພື່ອຜູ້ຍິ່ງໃຫຍ່, ມີຄວາມສະໜິດສະໜົມ ແລະ ໃກ້ຊິດຂອງພັກ, ລັດ, ກອງທັບ ແລະ ປະຊາຊົນລາວ. ພົນເອກ ໄດ້ມີການປະສ່ວນຢ່າງຕັ້ງໜ້າ ແລະ ໃຫຍ່ຫຼວງເຂົ້າໃນການກໍ່ສ້າງ, ເພີ່ມພູນຄູນສ້າງ ແລະ ພັດທະນາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດຫວຽດນາມ - ລາວ.
ທ່ານເລຂາທິການໃຫຍ່, ປະທານປະເທດຈູມມະລີ ໄຊຍະສອນ ຢືນຢັນວ່າ, ພັກ, ລັດ ແລະ ປຊຊລາວຈະຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ ໃຫ້ເກີດດອກອອກຜົນຕະຫຼອດໄປ.
ໃນໂອກາດນີ້, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ໋ຈ້ອງ ກໍ່ໃຫ້ການຕ້ອນຮັບຄະນະຜູ້ແທນຂັ້ນສູງ ລາຊະອານາຈັກ ກຳປູເຈຍ, ໂດຍທ່ານ Xam dec Heng Xom rin, ປະທານກິຕິມາສັກພັກ ປຊຊ ກຳປູເຈຍ, ປະທານສະພາແຫ່ງຊາດ ກຳປູເຈຍ ນຳໜ້າມາເຂົ້າຮ່ວມພິທີໄຫວ້ອາໄລພົນເອກ ຫວໍງວຽນຢາບ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ໋ຈ້ອງຂອງອົກຂອບໃຈພະມະຫາກະສັດ ໂນໂຮດົມ ຊີຮາໂມນີ ແລະ ບັນດາການນຳ ກຳປູເຈຍໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈເຖິງການນຳຫວຽດນາມກ່ຽວກັບການມໍລະນະກຳຂອງພົນເອກ ຫວໍງວຽນຢາບ. ທ່ານຢືນຢັນວ່າ, ຫວຽດນາມ ຍາມໃດກໍ່ຖືເປັນສຳຄັນ ແລະ ໃຫ້ບຸລິມາສິດອັນດັບໜຶ່ງໃຫ້ແກ່ການປັບປຸງ ແລະ ພັດທະນາສາຍພົວພັນຖານບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງ, ຍາວນານລະຫວ່າງ ຫວຽດນາມ - ກຳປູເຈຍ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ການຮ່ວມມື ແລະ ພັດທະນາຢູ່ພາກພືນ ແລະ ໃນໂລກ.