ບັນດາຜູ້ຕາງໜ້າປະຈຳອາຊຽນ ແລະ  ຜູ້ຕາງໜ້າ3 ປະເທດ ຈີນ, ຍີ່ປຸ່ນ ແລະ ສ.ເກົາຫຼີ (ພາບ: TTXVN)

ນີ້ແມ່ນກອງປະຊຸມຄັ້ງທຳອິດໃນປີປະທານອາຊຽນ 2020 ຂອງ ຫວຽດນາມ ດ້ວຍເປົ້າໝາຍສຳຫຼວດກວດ ຄືນບັນດາການເຄື່ອນໄຫວຮ່ວມມືໃນຂອບເຂດ ອາຊຽນ +3. ທ່ານເຈິ່ນດຶກບິ່ງ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ອາຊຽນ, ເປັນປະທານຮ່ວມກອງປະຊຸມ ກັບທ່ານ Lim Sungnam ເອກອັກຄະລັດຖະທູດ ສ.ເກົາຫຼີ ປະຈຳ ອາຊຽນ - ໂດຍແມ່ນຜູ້ຕາງໜ້າໃຫ້ແກ່  3 ປະເທດ ຈີນ, ຍີ່ປຸ່ນ ແລະ ສ.ເກົາຫຼີ.

ທີ່ກອງປະຊຸມ, ບັນດາປະເທດໄດ້ຢັ້ງຢືນເຖິງຄວາມສຳຄັນຂອງການຮ່ວມມືອາຊຽນ + 3 ສຳລັບສັນຕິພາບ, ຄວາມໝັ້ນຄົງ ແລະ ການພັດທະນາ ຢູ່ພາກພື້ນ ອາຊີຕາເວັນອອກ. ບັນດາປະເທດ ຄື ຈີນ, ຍີ່ປຸ່ນ ແລະ ສ.ເກົາຫຼີ ໃຫ້ຄຳໝັ້ນສັນຍາບຸລິມະສິດແຫຼ່ງກຳລັງສະໜັບສະໜູນອາຊຽນສ້າງປະຊາຄົມ, ຮັດແຄບໄລຍະຫ່າງການພັດທະນາຜ່ານການຜັນຂະຫຍາຍຂໍ້ລິເລີ່ມເຊື່ອມໂຍງອາຊຽນ ແລະ ແຜນການສັງລວມກ່ຽວກັບການເຊື່ອມຕໍ່ອາຊຽນ 2025, ຊຸກຍູ້ການລົງນາມໃນສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ໃຫ້ສຳເລັດໂດຍໄວ, ພັດທະນາບັນດາຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME), ເພີ່ມທະວີການຮ່ວມມືດ້ານການເງິນ, ພັດທະນາ ແບບຍືນຍົງ, ຍູ້ແຮງການຮ່ວມມືດ້ານການສຶກສາ, ສາທາລະນະສຸກວົງຄະນະຍາດ, ການປ່ຽນແປງຂອງດິນຟ້າອາກາດ, ແກ້ໄຂບັນຫາຂີ້ເຫຍື້ອຢູ່ທະເລ, ຮ່ວມມືກັນຮັບປະກັນຄວາມໝັ້ນຄົງດ້ານສະບຽງອາຫານ ແລະ ພະລັງງານ.