ທ່ານປະທານ Kim Yong Nam ໄດ້ຮັບການຕ້ອນຮັບຈາກ ທ່ານເລຂາ ທິການໃຫຍ່ພັກກອມມູນິດຫວຽດນາມ Nguyen Phu Trong ຢ່າງສະໜິດສະໜົມ
|
Vovworld- ວັນທີ 7/8 ທ່ານ Kim Yong Nam ປະທານຄະນະປະຈຳສະພາແຫ່ງຊາດ ສປປເກົາຫຼີ ໄດ້ເດີນທາງອອກຈາກຮ່າໂນ້ຍ, ສິ້ນສຸດການຢ້ຽມຢາມສັນຖະວະໄມຕີຫວຽດນາມເປັນທາງການຢ່າງດີງາມ. ໃນຂອບເຂດການຢ້ຽມຢາມ, ທ່ານປະທານ Kim Yong Nam ໄດ້ມີການເຈລະຈາກັບທ່ານປະທານປະເທດຫວຽດນາມ Truong Tan Sang , ພົບປະກັບທ່ານເລຂາທິການໃຫຍ່ພັກກອມມູນິດຫວຽດນາມ Nguyen Phu Trong, ທ່ານນາຍົກລັດຖະມົນຕີ Nguyen Tan Dung ; ໄປວາງພວງມາລາຢູ່ອະນຸສາວະລີບັນດານັກຮົບວິລະຊົນທີ່ໄດ້ເສຍສະຫຼະຊີວິດເພື່ອຊາດ ແລະ ເຂົ້າຄຳນັບສຸສານປະທານ ໂຮ່ຈິມິນ.
ທີ່ການພົບປະຕ່າງໆ, ທ່ານປະທານ Kim Yong Nam ພ້ອມກັບບັນດາການນຳພັກ, ລັດຫວຽດນາມ ໄດ້ຢືນຢັນຄວາມຫວັງຢາກປັບປຸງ ແລະ ພັດທະນາການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດ ເພືອ່ຕອບສະໜອງຄວາມມຸ່ງມາດປາດທະໜາ ແລະ ຜົນປະໂຫຍດຂອງປະຊາຊົນຂອງ 2 ປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ. 2 ຝ່າຍໄດ້ເຫັນດີສືບຕໍ່ດຳເນີນການຢ້ຽມຢາມ ແລະ ພົບປະຂັ້ນສູງ, ແລກປ່ຽນຄະນະຜູ້ແທນ, ຂະແໜງການຂັ້ນຕ່າງໆ ແລະ ທ້ອງຖິ່ນ; ເພີ່ມທະວີການຮ່ວມມືເສດຖະກິດບົນຫຼັກການຕ່າງຝ່າຍຕ່າງມີຜົນປະໂຫຍດ; ເລັ່ງໃສ່ແລກປ່ຽນມາດຕະການແກ້ໄຂຮົ້ວກິດຂວາງກ່ຽວກັບກົນໄກນະໂຍບາຍ, ເພີ່ມທະວີການແລກປ່ຽນຂໍ້ມູນຂ່າວສານກ່ຽວກັບການຮ່ວມມືດ້ານເສດຖະກິດ. ການນຳ 2 ປະເທດໄດ້ເຫັນດີເປັນເອກະສັນເພີ່ມທະວີການຮ່ວມມືໃນຂົງເຂດກະສີກຳ, ວັດທະ ນະທຳ, ສິລະປະ, ກິລາກາຍຍະກຳ, ສຶກສາບຳລຸງສ້າງ ແລະ ການພົວພັນແລກ ປ່ຽນລະຫວ່າງປະຊາຊົນ 2 ປະເທດ. ກ່ຽວກັບບັນດາບັນຫາສາກົນ ແລະ ພາກພື້ນ, 2 ຝ່າຍໄດ້ເຫັນດີສືບຕໍ່ປະສານສົມທົບຢ່າງແໜ້ນແຟ້ນໃນບັນດາເວທີປາໄສສາກົນ ແລະ ພາກພື້ນ, ເພີ່ມທະວີການແລກປ່ຽນບັນດາບັນຫາທີ່ 2 ຝ່າຍຕ່າງມີຄວາມສົນໃຈ. ກ່ຽວກັບບັນຫາໃນແຫຼມເກົາຫຼີ, ຫວຽດນາມມີທັດສະນະຢ່າງສະເໝີຕົ້ນສະເໝີປາຍສະໜັບສະໜູນການສ້າງແຫຼມເກົາຫຼີແຫ່ງສັນຕິພາບ, ສະຖຽນລະພາບ ແລະ ປອດນິວເຄຼຍ ແລະ ປາດທະໜາວ່າ ບັນດາຝ່າຍທີ່ກ່ຽວຂ້ອງຈົ່ງມານະພະຍາຍາມຊຸກຍູ້ການສົນທະນາ ແລະ ມີການກະທຳທີ່ແທດຈິງ ແນໃສ່ຊຸກຍູ້ວິວັດທະນາການສ້າງແຫຼມເກົາຫຼີປອດນິວເຄຼຍ; ສະໜັບ ສະໜູນການສົນທະນາ, ໄກ່ເກັ່ຍ, ຮ່ວມມື, ສັນຕິພາບເອກະພາບລະຫວ່າງ 2 ພາກເກົາຫຼີ; ບໍ່ສະໜັບສະໜູນການນຳໃຊ້ ຫຼື ນາບຂູ່ນຳໃຊ້ກຳລັງອາວຸດ. ກ່ຽວກັບບັນຫາທະເລຕາເວັນອອກ, ທ່ານປະທານ Kim Yong Nam ໄດ້ສະແດງການສະໜັບສະໜູນຕໍ່ການແກ້ໄຂການພິພາດ ແລະ ບັນດາບັນຫາເກີດໃໝ່ໂດຍຜ່ານສັນຕິວິທີ ແນໃສ່ເພີ່ມທະວີການພົວພັນມິດຕະພາບລະຫວ່າງບັນດາປະເທດ ແລະ ຮັບປະກັນສັນຕິພາບ, ສະຖຽນລະພາບໃນພາກພື້ນ.