ປະທານສະພາແຫ່ງຊາດຫວຽດນາມ Nguyen Sinh Hung ໃຫ້ການຕ້ອນຮັບປະທານ Raul Castro Ruz
ທ່ານປະທານສະພາແຫ່ງຊາດຫວຽດນາມ Nguyen Sinh Hung
ຕ້ອນຮັບທ່ານພົນເອກ Raul Castro Ruz
( ພາບ:nguyensinhhung.net )
( vovworld ) – ຕອນເຊົ້າວັນທີ 9/7, ຢູ່ຮ່າໂນ້ຍ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ໄດ້ໃຫ້ການຕ້ອນຮັບທ່ານພົນເອກ Raul Castro Ruz, ເລຂາທີ 1 ຄະນະບໍລິຫານງານສູນກາງພັກກອມມູນິດ ກູຍບາ, ປະທານສະພາແຫ່ງລັດ ແລະ ສະພາລັດຖະມົນຕີ ສ.ກູຍບາ ພວມຢູ່ຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ. ທ່ານປະທານສະພາແຫ່ງຊາດຫວຽດນາມ Nguyen Sinh Hung ໄດ້ສະແດງໃຫ້ເຫັນຄວາມເຊື່ອໝັ້ນວ່າ, ການຢ້ຽມຢາມຫວຽດນາມ ຄັ້ງນີ້ຈະປະກອບສ່ວນເພີ່ມທະວີສາຍພົວພັນມິດຕະພາບອັນເປັນມູນເຊື້ອພິເສດລະຫວ່າງສອງຊາດ, ສອງປະເທດຫວຽດນາມ-ກູຍບາ. ທ່ານປະທານສະພາແຫ່ງຊາດຫວຽດນາມ Nguyen Sinh Hung ຢືນຢັນວ່າ, ຍາມໃດ, ພັກ, ລັດ ແລະ ປະຊາຊົນຫວຽດນາມ ກໍ່ສະໜັບສະໜູນພາລະກິດການປະຕິວັດຂອງກູຍບາ ແລະ ປາດຖະໜາຢາກໃຫ້ກູຍບາ ມີການພັດທະນາຢ່າງຮອບດ້ານ. ທ່ານປະທານສະພາແຫ່ງຊາດຫວຽດນາມ Nguyen Sinh Hung ໃຫ້ຮູ້ວ່າ, ສະພາແຫ່ງຊາດຫວຽດນາມ ໄດ້ສ້າງຕັ້ງກຸ່ມສະມາຊິກສະພາແຫ່ງຊາດມິດຕະພາບຫວຽດນາມ-ກູຍບາ ແລ້ວ. ສະພາແຫ່ງຊາດຫວຽດນາມ ຈະເຮັດຈົນສຸດຄວາມສາມາດຂອງຕົນ ເພື່ອພ້ອມກັບສະພາແຫ່ງຊາດກູຍບາ ເພີ່ມພູນຄູນສ້າງໃຫ້ນ້ຳໃຈມິດຕະພາບທີ່ເປັນມູນເຊື້ອໃຫ້ນັບມື້ນັບເລິກເຊິ່ງຂຶ້ນຕື່ມ, ເພື່ອແນໃສ່ນຳການພົວພັນຮ່ວມມືລະຫວ່າງສອງປະເທດນັບມື້ນັບພັດທະນາຂຶ້ນສູ່ລະດັບສູງໃໝ່.
ທ່ານປະທານ Raul Castro Ruz ໄດ້ແຈ້ງໃຫ້ທ່ານປະທານສະພາແຫ່ງຊາດຫວຽດນາມ Nguyen Sinh Hung ຊາບກ່ຽວກັບໝາກຜົນການເຈລະຈາກັບທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong, ບັນດາການພົບປະກັບທ່ານປະທານປະເທດ Truong Tan Sang ແລະ ທ່ານນາຍົກລັດຖະມົນຕີ Nguyen Tan Dung. ສອງຝ່າຍໄດ້ເຫັນດີເປັນເອກະພາບບັນດາການກຳນົດທິດທີ່ສຳຄັນ, ເພີ່ມທະວີການພົວພັນຮ່ວມມືລະຫວ່າງສອງພັກ, ສອງລັດໃນຫຼາຍຂົງເຂດເສດຖະກິດ-ສັງຄົມ. ສອງຝ່າຍກໍ່ໄດ້ແລກປ່ຽນບັນດາບັນຫາສາກົນຊື່ງຕ່າງຝ່າຍຕ່າງກໍ່ມີຄວາມສົນໃຈ ໂດຍສະເພາະແມ່ນບັນຫາວິກິດການ, ການຊຸດໂຊມເສດຖະກິດທົ່ວໂລກ.
( ປະທານປະເທດ Truong Tan Sang ແລະ ປະທານRaul Castro Ruz )
ກ່ອນໜ້ານັ້ນ, ທ່ານປະທານ Raul Castro Ruz ໄດ້ໄປວາງພວງມາລາ, ເຂົ້າຢ້ຽມຂ່ຳນັບສຸສານປະທານໂຮ່ຈິມິນ ແລະ ວາງພວງມາລາຢູ່ອະນຸສາວະລີບັນດາ ນັກວິລະຊົນ ນັກຮົບເສຍສະຫຼະຊີວິດເພື່ອຊາດ.