ລັດຖະມົນຕີກະຊວງຄົມມະນາຄົມຂົນສົ່ງໂອ້ລົມ ກັບຜູ້ຟັງຜ່ານວິທະຍຸກະຈາຍສຽງຫວຽດນາມ
ວັນທີ 10 ມັງກອນ, ທ່ານ ດິງລາທັງ ລັດຖະມົນຕີກະຊວງຄົມມະນາຄົມຂົນສົ່ງຫວຽດນາມໄດ້ມີການໂອ້ລົມສົນທະນາກັບຜູ້ຟັງຜ່ານລາຍການອອກອາກາດສົດຂອງວິທະຍຸກະຈາຍສຽງຫວຽດນາມ ກ່ຽວກັບຫຼາຍບັນຫາທີ່ປະຊາຊົນມີຄວາມສົນໃຈເປັນພິເສດ. ໃນນັ້ນ, ມີການເພີ່ມເຕີມຄ່າທຳນຽມຂອງການເຄື່ອນໄຫວຈໍລະຈອນ ສຳລັບຍານພາຫະນະສ່ວນຕົວຢູ່ຫວຽດນາມ ແລະ ຄ່າທຳນຽມຂອງລົດໂອໂຕເມື່ອ ແລ່ນຮອດໃຈກາງ ນະຄອນໃນຊົ່ວໂມງຍອດສູງ ຊຶ່ງທາງກະຊວງໄດ້ຍື່ນສະເໜີຕໍ່ ລັດຖະບານ. ນີ້ຖືກຖືວ່າ ແມ່ນໜຶ່ງໃນບັນດາ ມາດຕະການທີ່ຮີບດ່ວນ ເພື່ອແນໃສ່ ຈຳກັດ ແລະຫຼຸດຜ່ອນອຸບັດຕິເຫດທາງຄົມມະນາຄົມ ແລະ ສະກັດກັ້ນສະພາບ ລົດຕິດຢູ່ຕາມທ້ອງຖະໜົນ ໃນເຂດຕົວເມືອງໃຫຍ່. ທ່ານລັດຖະມົນຕີກະຊວງຄົມມະນາຄົມຂົນສົ່ງຫວຽດນາມ ດິງລາທັງ ໃຫ້ຮູ້ວ່າ :
“ ຄະນະກຳມະການກ່ຽວກັບຄວາມປອດໄພທາງດ້ານຄົມມະນາຄົມແຫ່ງຊາດໄດ້ ມີບົດສະຫຼຸບຢູ່ທີ່ກອງປະຊຸມກ່ຽວກັບຄວາມປອດໄພທາງດ້ານຄົມມະນາຄົມ ແຫ່ງ ຊາດປີ 2011. ນັ້ນແມ່ນຕ້ອງຮີບເຮັ່ງສ້າງ ແລະ ຍື່ນສະເໜີເພື່ອໃຫ້ສະພາແຫ່ງຊາດປະກາດໃຊ້ບັນດາວິທີການແກ້ໄຂຢ່າງຮີບດ່ວນ, ໃນນັ້ນມີ ມີການເພີ່ມເຕີມ ຄ່າທຳນຽມຂອງການເຄື່ອນໄຫວຈໍລະຈອນ ສຳລັບຍານພາຫະນະສ່ວນຕົວ ຢູ່ ຫວຽດນາມ ແລະ ຄ່າທຳນຽມຂອງລົດໂອໂຕເມື່ອ ແລ່ນຮອດໃຈກາງນະຄອນໃນ ຊົ່ວໂມງຍອດສູງ. ເພື່ອສ້າງເອກະສານຍື່ນສະເໜີເຊັ່ນນັ້ນ, ພວກຂ້າພະເຈົ້າພິຈາລະນາຢ່າງລະອຽດທີ່ສຸດກ່ຽວກັບບັນດາເອກະສານນິຕິກຳຂອງລັດ, ສະພາບການຕົວຈິງຂອງປະເທດຊາດ, ມີການທາບທາມກ່ຽວກັບບົດຮຽນ, ປະສົບການຈາກປະເທດຕ່າງໆໃນໂລກ ”
ທ່ານລັດຖະມົນຕີກະຊວງຄົມມະນາຄົມຂົນສົ່ງຫວຽດນາມ ດິງລາທັງຢືນຢັນວ່າ ວິທີການແກ້ໄຂດ້ວຍການເກັບຄ່າທຳນຽມນີ້ ພວມໄດ້ຮັບການພິຈາລະນາຈາກບັນດາອົງການທີ່ມີໜ້າທີ່ຮັບຜິດຊອບ, ກ່ອນທີ່ຈະມີຂໍ້ຄວາມຕັດສິນສຸດທ້າຍ ຍ້ອນວ່າການກຳນົດນີ້ ຕ້ອງໄດ້ຮັບການຕອບສະໜອງ ສະໜັບສະໜູນຈາກປະຊາຊົນ ທຸກທົ່ວໜ້າ .