ສຸມໃສ່ໄຈ້ແຍກໝາກຜົນ ແລະ ຂໍ້ຈຳກັດໃນວຽກງານປ້ອງກັນ, ຕ້ານໂລກລະບາດ
(VOVWORLD) -ຕອນບ່າຍວັນທີ 11 ສິງຫາ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເປັນປະທານກອງປະຊຸມລັດຖະບານ ກ່ຽວກັບວຽກງານປ້ອງກັນ, ຕ້ານໂລກລະບາດໂຄວິດ - 19; ສະພາບການເສດຖະກິດ - ສັງຄົມໃນເດືອນກໍລະກົດ ແລະ 7 ເດືອນຕົ້ນປີ 2021; ບັນດາໜ້າທີ່, ມາດຕະການຈຸດສຸມໃນການແກ້ໄຂຄວາມຫຍຸ້ງຍາກ, ພັດທະນາເສດຖະກິດ - ສັງຄົມໃນຊຸມເດືອນທ້າຍປີ 2021. ກອງປະຊຸມດັ່ງກ່າວຖືກຈັດຂຶ້ນແບບທາງໄກ.
 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ເປັນປະທານກອງປະຊຸມ (ພາບ: TTXVN) |
ກ່ຽວກັບສະພາບການພັດທະນາເສດຖະກິດ - ສັງຄົມ ໃນເດືອນກໍລະກົດ ແລະ 7 ເດືອນຕົ້ນປີ 2021, ທ່ານລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ຫງວຽນຈີ໊ຢຸງ ໃຫ້ຮູ້ວ່າ, ໄລຍະຜ່ານມາ, ເສດຖະກິດມະຫາພາກເປັນປົກກະຕິໂດຍພື້ນຖານ, ໄພເງິນເຟີ້ໄດ້ຮັບການຄວບຄຸມ, ບັນດາຄວາມດຸ່ນດ່ຽງໃຫຍ່ຂອງພື້ນຖານເສດຖະກິດສືບຕໍ່ໄດ້ຮັບການຮັບປະກັນ; ດັດຊະນີ CPI ສະເລ່ຍ 7 ເດືອນຕົ້ນປີ ເພີ່ມຂຶ້ນ 1,64%; ຕະຫຼາດເງິນຕາເປັນປົກກະຕິ; ການເຕີບໂຕສິນເຊື່ອມີສັນຍານຟື້ນຟູຢ່າງຕັ້ງໜ້າ, ໂດຍສະເພາະແມ່ນໃນເດືອນກໍລະກົດ. ໃນນັ້ນ, ການຜະລິດກະສິກຳເປັນປົກກະຕິໂດຍພື້ນຖານ; ຄວາມໝັ້ນຄົງດ້ານສະບຽງອາຫານໄດ້ຮັບປະກັນ. ດັດຊະນີການຜະລິດໃນທົ່ວຂະແໜງອຸດສາຫະກຳ (IIP) ໃນເດືອນກໍລະກົດ ເພີ່ມຂຶ້ນ 1,8% ເມື່ອທຽບໃສ່ເດືອນມິຖຸນາ ແລະ ເພີ່ມຂຶ້ນ 2,2% ເມື່ອທຽບໃສ່ໄລຍະດຽວກັນຂອງປີ 2020.
ກ່ຽວກັບສະພາບການໂລກລະບາດໂຄວິດ - 19, ທ່ານລັດຖະມົນຕີກະຊວງສາທາລະນະສຸກ ຫວຽດນາມ ຫງວຽນແທງລອງ ໃຫ້ຮູ້ວ່າ ໂລກລະບາດຍັງສືບຕໍ່ມີການຜັນແປຢ່າງສັບສົນ ແລະ ອາດຈະແກ່ຍາວ, ໂດຍສະເພາະແມ່ນຢູ່ນະຄອນ ໂຮ່ຈີມິນ ແລະ ທ້ອງຖິ່ນຕ່າງໆທາງພາກໃຕ້ ຫວຽດນາມ; ບາງແຂວງມີຄວາມສ່ຽງແຜ່ລະບາດຮອບໃໝ່ ອັນໄດ້ສົ່ງຜົນກະທົບຢ່າງໃຫຍ່ຫຼວງຕໍ່ການພັດທະນາເສດຖະກິດ - ສັງຄົມ.