ທະຫານເວນຍາມຢູ່ດ່ານກວດກາ ມານດາໄລ ຢູ່ມຽນມາ

ວັນທີ 10 ກຸມພາ, ໃນການເຈລະຈາທາງໂທລະສັບກັບທ່ານລັດຖະມົນຕີການຕ່າງປະເທດຍີປຸ່ນ Toshimitsu Motegi ແລະ ຄູ່ຕຳແໜ່ງອິນໂດເນເຊຍ ທ່ານ Retno Marsudim, 2 ຝ່າຍໄດ້ ສະແດງຄວາມວິຕົກກັງວົນຕໍ່ບັນດາການຜັນແປທີ່ຫຼ້າສຸດຢູ່ມຽນມາ. ທ່ານລັດຖະມົນຕີການຕ່າງປະເທດຍີປຸ່ນ Toshimitsu Motegi ໃຫ້ຮູ້ວ່າ ຍີປຸ່ນຈະຮຽກຮ້ອງໃຫ້ກອງທັບມຽນມາຈົ່ງສ້າງສະພາບການເປັນປົກກະຕິໂດຍໄວ ພ້ອມທັງປ່ອຍຕົວທ່ານນາງ Aung San Suu Kyi ທີ່ປຶກສາແຫ່ງລັດມຽນມາ ແລະ ບັນດາຜູ້ຖືກຈັບກຸມຄົນອື່ນໆ ໃຫ້ເປັນອິດສະຫຼະ ກໍຄືຟື້ນຟູລະບອບການເມືອງປະຊາທິປະໄຕຢູ່ປະເທດນີ້ໂດຍໄວ. ໃນຂະນະນັ້ນ, ທ່ານລັດຖະມົນຕີການຕ່າງປະເທດອິນໂດເນເຊຍ Retno Marsudim ໄດ້ເນັ້ນໜັກເຖິງຄວາມສຳຄັນຂອງການຮັກສາຄວາມສະຫງົບປອດໄພໃຫ້ແກ່ຊາວມຽນມາ ກໍຄືກັບຄືນສູ່ວິວັດທະນາການປະຊາທິປະໄຕ.