(vovworld) - ຕອນເຊົ້າວັນທີ 28 ສິງຫາ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ແລະ ຄະນະປະຕິບັດງານຂອງລັດຖະບານຫວຽດນາມ ໄດ້ເດີນທາງອອກຈາກນະຄອນຫຼວງເຊີອູນ ກັບເມື່ອປະເທດ, ສິ້ນສຸດການຢ້ຽມຢາມ ແລະ ເຮັດວຽກຢູ່ສ.ເກົາຫຼີ ໃນລະຫວ່າງວັນທີ 26 – 28 ສິງຫາ ຢ່າງຈົບງາມ, ຕາມຄຳເຊີນຂອງລັດຖະບານສ.ເກົາຫຼີ. ໃນການຢ້ຽມຢາມ, ທີ່ບັນດາການເຮັດວຽກກັບລັດຖະມົນຕີບາງກະຊວງ, ຂະແໜງການ, ກຸ່ມບໍລິສັດເສດຖະກິດຂອງສ.ເກົາຫຼີ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ໄດ້ສຸມໃສ່ແລກປ່ຽນບັນດາມາດຕະການເພື່ອແນໃສ່ປັບປຸງ ແລະ ຊຸກຍູ້ການພົວພັນຮ່ວມມືລະຫວ່າງຫວຽດນາມ - ສ.ເກົາຫຼີ ໃນບັນດາຂົງເຂດແຮງງານ, ວິທະຍາສາດ ແລະ ເຕັກໂນໂລຊີ. ເຊິ່ງຕາມນັ້ນແລ້ວ, 2 ຝ່າຍໄດ້ເຫັນດີຈະຕັ້ງໜ້າຮ່ວມມືເພື່ອແນໃສ່ຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດໃຫ້ພັດທະນາຢ່າງເຂັ້ມແຂງ ໃນໄລຍະຈະມາເຖິງ; ສົມທົບກັນຢ່າງແໜ້ນແຟ້ນ ເພື່ອກະກຽມໃຫ້ການຢ້ຽມຢາມຫວຽດນາມ ໃນເດືອນກັນຍາ ຈະມາເຖິງຂອງທ່ານນາງປະທານາທິບໍດີສ.ເກົາຫຼີ Pak Geun Hye ເປັນຢ່າງດີ. ຝ່າຍສ.ເກົາຫຼີ ໄດ້ຕີລາຄາສູງການຢ້ຽມຢາມສ.ເກົາຫຼີ ຂອງທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ແລະ ຖືວ່າ ນີ້ແມ່ນການກະກຽມອັນແທດຈິງໃຫ້ແກ່ບັນດາບາດກ້າວໃໝ່ໃນການພົວພັນລະຫວ່າງ 2 ປະເທດ, ໂດຍສະເພາະແມ່ນເນື່ອງໃນໂອກາດປະທານາທິບໍດີສ.ເກົາຫຼີ ມາຢ້ຽມຢາມຫວຽດນາມ.
ເນື່ອງໃນໂອກາດຢ້ຽມຢາມສ.ເກົາຫຼີ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ໄດ້ເຂົ້າຮ່ວມພິທີເປີດຫ້ອງການວິທະຍາສາດ ແລະ ເຕັກໂນໂລຊີຫວຽດນາມ ຢູ່ ສ.ເກົາຫຼີ; ເປັນສັກຂີພິຍານພິທີລົງນາມໃນຂໍ້ຕົກລົງຮ່ວມມືລະຫວ່າງໂຮງຮຽນວິທະຍາໄລວິຊາຊີບອຸດສາຫະກຳຮ່າໂນ້ຍ, ວິທະຍາໄລເຕັກໂນໂລຊີສູງຮ່າໂນ້ຍ ແລະ ວິທະຍາໄລເຕັກນິກ ເຕັກໂນໂລຊີນະຄອນໂຮ່ຈິມິນ ກັບມະຫາວິທະຍາໄລ Osan ຂອງສ.ເກົາຫຼີ.