(ພາບປະກອບ: VGP)

ວັນທີ 02 ກໍລະກົດ 2021, ເວທີປາໄສວິສາຫະກິດ ສິງກະໂປ (SBF) ໄດ້ຈັດຕັ້ງເຫດການ FYIstival The Asean Edition ດ້ວຍຫົວຂໍ້ “ໂອກາດ ແລະ ແງ່ຫວັງການເຕີບໂຕຂອງ ຫວຽດນາມ 2021” ພາຍໃຕ້ຮູບການທາງອອນລາຍ ເພື່ອແນໃສ່ສະໜອງຂໍ້ມູນພື້ນຖານກ່ຽວກັບສະພາບແວດລ້ອມແຫ່ງການລົງທຶນ ພ້ອມດ້ວຍບັນດານະໂຍບາຍບຸລິມະສິດ ເພື່ອດຶງດູດການລົງທຶນຕ່າງປະເທດຂອງ ຫວຽດນາມ ໃຫ້ແກ່ປະຊາຄົມວິສາຫະກິດ ສິງກະໂປ. ກ່າວຄຳເຫັນໃນເຫດການດັ່ງກ່າວ, ທ່ານນາງຮອງລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ຫງວຽນທິບິກງອກ ໄດ້ຊົມເຊີນ ແລະ ຕີລາຄາສູງຕໍ່ຂໍ້ລິເລີ່ມ FYIstival ຂອງ SBF, ພ້ອມທັງຢັ້ງຢືນວ່າ ຫວຽດນາມ ພວມແມ່ນສະຖານທີ່ລົງທຶນຂອງຫຼາຍກວ່າ 140 ປະເທດ  ແລະ ເຂດແຄວ້ນ. ສິງກະໂກ ແມ່ນນັກລົງທຶນໃຫຍ່ອັນດັບທີ 3 ຢູ່ ຫວຽດນາມ ແຕ່ ໄດ້ບືນຕົວຂຶ້ນ ແລະ ນຳໜ້າໃນເດືອນມິຖຸນາ ປີ 2021 ດ້ວຍຍອດເງິນລົງທຶນລວມທັງໝົດປະມານ 5,64 ຕື້ USD. ຫວຽດນາມ ແລະ ສິງກະໂປ ມີສາຍພົວພັນຮ່ວມມືດ້ານເສດຖະກິດຢ່າງແໜ້ນແຟ້ນ ດ້ວຍກອບນິຕິກຳທີ່ຄົບຖ້ວນ ແລະ ນັບມື້ນັບສົມບູນແບບ ເຊິ່ງລວມທັງ ຂໍ້ຕົກລົງ, ສັນຍາສອງຝ່າຍ ແລະ ໃນຂອບເຂດບັນດາສັນຍາການຄ້າຫຼາຍຝ່າຍ, ອັນໄດ້ສ້າງກົນໄກທີ່ສະດວກໃຫ້ບັນດາວິສາຫະກິດຊອກຫາໂອກາດລົງທຶນ, ຮ່ວມມືດຳເນີນທຸລະກິດ.

        ທ່ານເອກອັກຄະທູດ ສິງກະໂປ ປະຈໍາ ຫວຽດນາມ Jaya Ratnam ກໍຖືວ່າ ການສຶກສາບຳລຸງສ້າງ, Fintech, ກະເປົ່າເງິນເອເລັກໂຕນິກ, ການຄ້າເອເລັກໂຕນິກ… ແມ່ນບັນດາຂົງເຂດ ແລະ ອາຊີບທີ່ມີໂອກາດຄວາມສາມາດບົ່ມຊ້ອນຫຼາຍທີ່ສຸດ ສຳລັບບັນດາວິສາຫະກິດລົງທຶນຂອງ ສິງກະໂປ.