(vovworld) - ກອງປະຊຸມສະໄໝສາມັນເທື່ອທີ 5, ສະພາແຫ່ງຊາດ ຫວຽດນາມຊຸດທີ 13 ຖືກໄຂຂຶ້ນຢ່າງເປັນທາງການໃນຕອນເຊົ້າວັນທີ 20/5 ຢູ່ນະຄອນຫຼວງ ຮ່າໂນ້ຍ. ເຂົ້າຮ່ວມກອງປະຊຸມ, ມີການນຳພັກ, ລັດ, ລັດຖະບານ, ສະພາແຫ່ງຊາດ, ແນວໂຮມປະເທດຊາດ ຫວຽດນາມ, ບັນດານັກປະຕິວັດຜູ້ອາວຸໂສ, ຜູ້ຕາງໜ້າບັນດາຄະນະທູຕານຸທູດ ແລະ ບັນດາອົງການສາກົນ. ກ່ອນທີ່ໄຂກອງປະຊຸມ, ບັນດາສະມາຊິກສາພະແຫ່ງຊາດ ໄດ້ເຂົ້າຄຳນັບສຸສານປະທານ ໂຮ່ຈີມິນ.
ກ່າວຄຳເຫັນໄຂກອງປະຊຸມ, ທ່ານປະທານສະພາແຫ່ງຊາດ ຫງວຽນຊິງຮູ່ງ ໃຫ້ຮູ້ວ່າ:
“ທີ່ກອງປະຊຸມສະໄໝສາມັນຄັ້ງນີ້, ສະພາແຫ່ງຊາດຈະພິຈາລະນາ, ຕັດສິນບາງເນື້ອໃນສຳຄັນດັ່ງຕໍ່ໄປນີ້. ທີ່ໜຶ່ງແມ່ນ, ສືບຕໍ່ປະກອບຄຳເຫັນສ້າງຮ່າງລັດຖະທຳມະນູນປີ 1992 ສະບັບປັບປຸງໃຫ້ສົມບຸນແບບບົນພື້ນຖານຮັບເອົາຄຳເຫັນປະກອບຂອງປະຊາຊົນ. ທີ່ 2 ແມ່ນ, ພິຈາລະນາຮ່າງກົດໝາຍວ່າດ້ວຍທີ່ດິນ (ສະບັບປັບປຸງ). ນີ້ແມ່ນຮ່າງກົດໝາຍທີ່ສະທ້ອນໂດຍກົງເຖິງຊີວິດດ້ານເສດຖະກິດ - ສັງຄົມ, ຄວາມມີສະຖຽນລະພາບ, ການພັດທະນາແບບຍືນຍົງຂອງປະເທດຊາດ ແລະ ຊີວິດຂອງປະຊາຊົນ. ທີ່ 3, ຈັດຕັ້ງການຮັບເອົາການລົງຄະແນນສຽງ, ບ່ອນບັດໄວ້ວາງໃຈສຳລັບບັນດາຜູ້ດຳລົງຕຳແໜ່ງໂດຍສະພາແຫ່ງຊາດເລືອກຕັ້ງ ຫຼື ໃຫ້ສັດຕະຍາບັນ.”
ຈາກນັ້ນ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ສະເໜີບົດລາຍງານຂອງລັດຖະບານ ຕີລາຄາເພີ່ມເຕີມໝາກຜົນແຫ່ງການປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດປີ 2012, ເລື່ອງຜັນຂະຫຍາຍປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດຊຸມເດືອນຕົ້ນປີ 2013.
ທີ່ວາລະໄຂກອງປະຊຸມ, ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຮິ່ງດາມ ໄດ້ສະເໜີບົດລາຍງານສະຫລຸບຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ. ກຳມະການຄະນະປະຈຳສະພາແຫ່ງຊາດ, ຫົວໜ້າກຳມາທິການເສດຖະກິດຂອງ ສະພາແຫ່ງຊາດທ່ານ ຫງວຽນວັນເຢົ່າ ສະເໜີບົດລາຍງານກວດກາບົດລາຍງານຂອງລັດຖະບານຕີລາຄາເພີ່ມເຕີມໝາກຜົນການປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດປີ 2012, ເລື່ອງຜັນຂະຫຍາຍປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດຊຸມເດືອນຕົ້ນປີ 2013.
![ໄຂກອງປະຊຸມສະໄໝສາມັນເທື່ອທີ 5 ສະພາແຫ່ງຊາດ ຫວຽດນາມ ຊຸດທີ 13 - ảnh 2](https://photo-cms-vovworld.zadn.vn/w730/uploaded/vovworld/bcgmbuiq/2013_05_20/quoc%20hoi.jpg)
ພາບປະກອບ
ແລະກໍ່ໃນຕອນບ່າຍວັນດຽວກັນ, ທ່ານຫົວໜ້າກຳມາທິການກົດໝາຍຂອງສະພາແຫ່ງຊາດ, ກຳມະການຄະນະຮຽບຮຽງປັບປຸງລັດຖະທຳມະນູນປີ 1992 ຟານຈູງຫຼີ ໄດ້ສະເໜີບົດລາຍງານອະພິປາຍ, ຮັບເອົາຄຳເຫັນຂອງປະຊາຊົນ ແລະ ປັບປຸງຮ່າງລັດຖະທຳມະນູນປີ 1992. ນີ້ເປັນຄັ້ງທຳອິດເລື່ອງອະພິປາຍ, ຮັບເອົາ ຄຳເຫັນຖືກຄະນະຮຽບຮຽງປັບປຸງລັດຖະທຳມະນູນປີ 1992 ປະກາດຕໍ່ປະຊາຊົນທົ່ວປະເທດ. ກ່ຽວກັບຊື່ຂອງປະເທດ, ທ່ານ ຟານຈູງຫຼີ ຊີ້ແຈ້ງເລື່ອງຮັກສາຊື່ປະເທດແມ່ນ ສສ ຫວຽດນາມ ແມ່ນເພື່ອແນໃສ່ສືບຕໍ່ຢັ້ງຢືນຈຸດໝາຍເສັ້ນທາງສ້າງສາ ແລະ ພັດທະນາປະເທດກ້າວຂຶ້ນສູ່ສັງຄົມນິຍົມ. ກ່ຽວກັບບົດບາດນຳພາຂອງພັກກອມມູນິດ ຫວຽດນາມ, ທ່ານ ຟານຈູງຫຼີ ຢຶນຢັນວ່າ:
“ກ່ອນອື່ນໝົດຕ້ອງຢືນຢັນວ່າ: ເລື່ອງຮັກສາມາດຕາ 4 ກຳນົດບົດບາດຂອງພັກແມ່ນຈຳເປັນ. ຂໍ້ກຳນົດນີ້ຢັ້ງຢືນລັກສະນະປະຫວັດສາດ, ລັກສະນະຕ້ອງເປັນໄປ ພາວະວິໄສກ່ຽວກັບການນຳພາຂອງພັກຕໍ່ວິວັດການປະຕິວັດ, ສ້າງສາ ແລະ ປົກປັກຮັກສາປະເທດຊາດ. ຮ່າງລັດຖະທຳມະນູນໄດ້ເພີ່ມເຕີມການກຳນົດກ່ຽວກັບທາດແທ້ຂອງພັກຕາມຈິດໃຈໃໝ່ຂອງ ໂຄງການການເມືອງພັກກອມມູນິດຫວຽດນາມ ແມ່ນພັກກຳອຳນາດ, ນຳພາປະເທດຊາດ ແລະ ສັງຄົມ. ພັກນຳພາຜ່ານໂຄງການການເມືອງ, ຍຸດທະສາດ ບັນດາການກຳນົດທິດ ແລະ ນະໂຍບາຍແຜນນະໂຍບາຍໃຫຍ່ຂອງຕົນ. ແບບວິທີ, ເນື້ອໃນການນຳພາໄດ້ສະແດງຢ່າງມີໄຫວພິບ, ຕອບສະໜອງຕາມໜ້າທີ່ໃນແຕ່ລະໄລຍະ, ແຕ່ລະສະໄໝ.”
ກໍ່ໃນຕອນບ່າຍວັນດຽວກັນ, ສະພາແຫ່ງຊາດໄດ້ຮັບຟັງໃບຍືນສະເໜີສະພາແຫ່ງຊາດໃຫ້ສັດຕະຍາບັນສະຫລຸບງົບປະມານແຫ່ງລັດປີ 2011, ບັດລາຍງານກວດກາການສະຫລຸບງົບປະມານແຫ່ງລັດປີ 2011, ຮ່າງກົດໝາຍປັບປຸງ, ເພີ່ມເຕີມບາງຂໍ້ມາດຕາກົດໝາຍອາກອນມູນຄ່າເພີ່ມ, ຮ່າງກົດໝາຍສະບັບປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍອາກອນລາຍຮັບວິສາຫະກິດ ແລະ ບົດລາຍງານກວດກາຂອງຮ່າງກົດໝາຍ 2 ສະບັບດັ່ງກ່າວ.