ໄຂວາທີປາໄສຮ່ວມມືເສດຖະກິດເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ 2016 (MDEC-ເຮົ້າຢາງ2016)
ພິທີໄຂວາທີປາໄສຮ່ວມມືເສດຖະກິດເຂດ
ທົ່ງພຽງແມ່ນ້ຳຂອງທາງພາກໃຕ້ຫວຽດນາມ 2016
(vovworld) - ກ່າວຄຳເຫັນທີ່ພິທີໄຂວາທີປາໄສຮ່ວມມືເສດຖະກິດເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ 2016 (MDEC - ເຮົ້າຢາງ 2016) ເຊິ່ງດຳເນີນໃນຕອນຄ່ຳວັນທີ 11/07, ຢູ່ນະຄອນ ວິແທງ, ແຂວງ ເຮົ້າຢາງ, ທ່ານຮອງນາຍົກລັດຖະມົນຕີ, ຫົວໜ້າຄະນະຊີ້ນຳເຂດຕາເວັນຕົກພາກໃຕ້ ເວືອງດິ່ງເຫ້ວ ປາດຖະໜາວ່າ, ບັນດາວິສາຫະກິດ, ນັກອຸປະຖຳ ແລະ ທ້ອງຖິ່ນຕ່າງໆ ຈະຊອກຫາບັນດາກາລະໂອກາດທີ່ດີເພື່ອຮ່ວມມື; ບັນດາແຂວງ, ນະຄອນຕ້ອງມີບັນດານະໂຍບາຍ, ມາດຕະການໜູນຊ່ວຍຢ່າງແທດຈິງໃຫ້ນັກລົງທຶນ, ເໝາະສົມກັບນະໂຍບາຍລວມ ແລະ ເງື່ອນໄຂຕົວຈິງຂອງທ້ອງຖິ່ນ; ປະຕິບັດການປະຕິຮູບລະບຽບການບໍລິຫານເປັນຢ່າງດີ, ສ້າງຄວາມສະດວກທີ່ສຸດເພື່ອໃຫ້ບັນດາວິສາຫະກິດລົງທຶນ.
MDEC - ເຮົ້າຢາງ 2016 ດ້ວຍບັນດາເຫດການສຳຄັນທີ່ມີຊື່ວ່າ “ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ - ເປັນເຈົ້າການເຊື່ອມໂຍງ ແລະ ພັດທະນາແບບຍືນຍົງ”, ເພື່ອແນໃສ່ສົ່ງເສີມ ແລະ ດຶງດູດການລົງທຶນ; ໂຄສະນາ, ຍົກສູງຄວາມຮັບຮູ້ຂອງທຸກຂັ້ນ, ທຸກຂະແໜງການ ແລະ ປະຊາຊົນກ່ຽວກັບການເຊື່ອມໂຍງເຂົ້າກັບສາກົນ; ພ້ອມທັງສະເໝີບັນດາມາດຕະການແກ້ໄຂເພື່ອໃຫ້ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ພັດທະນາແບບຍືນຍົງ… ພາຍຫຼັງພິທີໄຂ, MDEC - ເຮົ້າຢາງ 2016 ສືບຕໍ່ດຳເນີນການເຄື່ອນໄຫວຕ່າງໆເພື່ອໂຄສະນາບັນດາໝູ່ບ້ານອາຊີບ, ຜະລິດຕະພັນທີ່ເປັນມູນເຊື້ອພິເສດສະເພາະຂອງທ້ອງຖິ່ນ ແລະ ບັນດາກອງປະຊຸມ, ກອງປະຊຸມສຳມະນາ.
ແລະກໍໃນຕອນບ່າຍວັນດຽວກັນ, ຢູ່ນະຄອນເກີນເທີ ໄດ້ດຳເນີນພິທີລົງນາມໃນສັນຍາ ແລະ ບັນດາເອກະສານນິຕິກຳທີ່ມີສ່ວນກ່ຽວຂ້ອງຂອງໂຄງການ “ພັດທະນານະຄອນເກີນເທີ ແລະ ເພີ່ມທະວີຄວາມສາມາດມືຂອງຕົວເມືອງ” ແລະ ໂຄງການ “ຕ້ານຄວາມທົນທານຂອງດິນຟ້າອາກາດ ແລະ ວິທີຫາເງິນລ້ຽງຊີບຢ່າງໝັ້ນຄົງຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ” ລະຫວ່າງທະນາຄານແຫ່ງລັດຫວຽດນາມ ແລະ ທະນາຄານໂລກ (WB). ກ່າວຄຳເຫັນຢູ່ທີີ່ນີ້, ທ່ານຮອງນາຍົກລັດຖະມົນຕີ ເວືອງດິ່ງເຫ້ວ ເຊື່ອໝັ້ນວ່າ, 2 ໂຄງການມີຍອດ ມູນຄ່າ 560 ລ້ານ USD ທີ່ໄດ້ລົງນາມໃນຄັ້ງນີ້ ຈະປະກອບສ່ວນໜູນຊ່ວຍເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ຮັບມືກັບການປ່ຽນແປງຂອງດິນຟ້າອາກາດຢ່າງຍາວນານ.