(vovworld) - ເຖິງວ່າສົງຄາມໄດ້ລ່ວງເລີຍໄປເປັນເວລາຫຼາຍປີແລ້ວກໍ່ຕາມ, ແຕ່ອະດີດນັກບິນ Nguyen Hong My, ເຊິ່ງແມ່ນນັກບິນຜູ້ທຳອິດຂອງກອງທັບອາກາດຫວຽດນາມທີ່ໄດ້ຍິງ ເຮືອບິນຂອງອາເມລິກາຕົກເມື່ອປີ 1972 ຍັງຄົງຈື່ຈຳອະດີດຕະການອັນພິລະອາດຫານຂອງກອງທັບອາກາດຫວຽດນາມໃນໄລຍະນັ້ນ. ບັນດາເລື່ອງລາວກ່ຽວກັບຄວາມອົງອາດກ້າຫານຂອງອະດີດນັກບິນຜູ້ນີ້ ແມ່ນຄວາມເອກອ້າງທະນົງໃຈຂອງກອງທັບອາກາດຫວຽດນາມ ແລະ ຄວາມນິຍົມນັບຖືຂອງກຳລັງກອງທັບອາກາດອາເມລິກາ. ທ່ານແມ່ນຜູ້ທີ່ດີເລີດ, ຄິດວ່າພຽງແຕ່ມີໃນ “ເທບນິຍາຍ” ເທົ່ານັ້ນ, ແຕ່ໃນຊີວິດປະຈຳວັນ, ທ່ານພັດເປັນຄົນທີ່ມີແບບແຜນດຳລົງຊີວິດລຽບງ່າຍທີ່ສຸດ.
ທ່ານ Nguyen Hong My ເກີດເມື່ອປີ 1946, ຢູ່ແຂວງເງ້ອານ. ປີ 1965, ເມື່ອກຳລັງຮຽນຢູ່ມະຫາວິທະຍາໄລເສດຖະກິດທີ່ ຮ່າໂນ້ຍ, ທ່ານໄດ້ຮັບຄັດເລືອກເປັນນັກບິນ ແລະ ທ່ານພ້ອມກັບຊາວໜຸ່ມທີ່ດີເດັ່ນອື່ນໆອີກ 120 ຄົນໄດ້ໄປຮຽນຂັບເຮືອບິນຢູ່ສະຫະພັນລັດເຊຍ (ສະຫະພາບໂຊວຽກເກົ່າ). ຕາມທຳມະດາແລ້ວ, ຊຸດຮຽນຈະຖືກແກ່ຍາວໃນເວລາ 7 ປີ, ແຕ່ຍ້ອນເວລານັ້ນ, ຫວຽດນາມມີຄວາມຕ້ອງການກຳລັງກອງທັບອາກາດທີ່ສຸດ, ດັ່ງນັ້ນຈຶ່ງລົດເວລາລົງ 3 ປີເທົ່ານັ້ນ. ແລະ ທ່ານແມ່ນໜຶ່ງໃນຈຳນວນ 19 ຄົນ ໄດ້ຮຽນຂັບເຮືອບິນ MIG 21
”ຂ້າພະເຈົ້າບໍ່ຄາດຄິດໄດ້ເລີຍວ່າ: ຕົນເອງໄດ້ຮັບຄັດເລືອກເປັນນັກບິນ. … ເວລານັ້ນ, ພວກຂ້າພະເຈົ້າມີຄວາມຫ້າວຫັນທີ່ສຸດ, ບໍ່ຄິດເຖິງສິດຜົນປະໂຫຍດສ່ວນຕົວ ພຽງແຕ່ພະຍາຍາມຮຽນໃຫ້ເກັ່ງ ເພື່ອໄດ້ກັບເມືອປະເທດໂດຍໄວ, ປະກອບສ່ວນສູ້ຮົບ, ຍິງເຮືອບິນຂອງສັດຕູເພື່ອປົກປັກຮັກສາປະເທດຊາດ. ໃນຄາວນັ້ນຄອບຄົວກໍ່ບໍ່ຮູ້ວ່າຂ້າພະເຈົ້າໄດ້ໄປຮຽນຢູ່ໂຊວຽດເກົ່າ. ເພາະວ່າເມື່ອຂຽນຈົດໝາຍຝາກມາຄອບຄົວພວກ ຂ້າພະເຂົ້າຍັງລະບຸສະຖານທີ່ບ່ອນຝາກເດີມແມ່ນຮ່າໂນ້ຍຄືເກົ່າ”
ປີ 1968, Nguyen Hong My ກັບເມືອຫວຽດນາມ. ຫຼັງຈາກນັ້ນ 1 ກວ່າເດືອນ, ທ່ານພ້ອມກັບເພື່ອນຮ່ວມກົມກອງຂອງຕົນໄດ້ຮັບໜ້າທີ່ປະຈຳການສູ້ຮົບ. ເຮືອບິນສູ້ຮົບອາດຈະບິນຂຶ້ນຢູ່ບໍ່ວ່າແຫ່ງໃດຄືສະໜາມບິນໂນ້ຍບ່າຍ, ວິງ, ແທງຮ໋ວາ, ກ໋ຽນອານ - ຫາຍຝ່ອງ…ຕົ້ນປີ 1972, ອາເມລິກາໄດ້ນຳເຮືອບິນຍຸດທະວິທີເກືອບ 1000 ລຳເຂົ້າໃນສະໜາມຮົບຢູ່ ຫວຽດນາມ, ໃນນັ້ນມີເຮືອບິນ B52 150 ລຳ ແລະ ກຳປັ່ນເດີ່ນບິນ 66 ລຳ. ໃນຈຸດເວລານັ້ນຫວຽດນາມມີເຮືອບິນ MIG ພຽງ 180 ລຳ ພ້ອມກັບລູກສອນໄຟໜ້າດິນ ແລະ ທະຫານ ຣາດາ ເທົ່ານັ້ນ.
”ເມື່ອເວົ້າເຖິງການສູ້ຮົບທາງອາກາດ, ອາເມລິກາໄດ້ຮັບການປະກອບອາວຸດທີ່ທັນສະໄໝ ແລະ ໄດ້ຮັບການຊ້ອມຮົບຢ່າງລະອຽດ. ແຕ່ພວກເຮົາມີທ່າສະດວກກວ່ານັ້ນແມ່ນໄດ້ສູ້ຮົບໃນເຂດນ່ານຟ້າຂອງຕົນ, ຢູ່ໜ້າດິນມີພໍ່ແມ່ປະຊາຊົນສະໜັບສະໜູນ, ດັ່ງນັ້ນຈຶ່ງບໍ່ຢ້ານກົວ”.
ວັນທີ 17/1/1972, ແມ່ນມື້ທຳອິດໃນຊີວິດເປັນນັກບິນສູ້ຮົບຂອງຕົນ, ທ່ານ Nguyen Hong My ໄດ້ພົບປະກັບເຮືອບິນຂອງສັດຕູ. ທ່ານພ້ອມກັບເພື່ອນຮ່ວມກົມກອງໄດ້ຍິງລູກສອນໄຟເຖິງ 8 ລູກ ແຕ່ພັດບໍ່ຖືກເປົ້າໝາຍ. ວັນທີ 19/1/1972, ທ່ານພ້ອມກັບເພື່ອນຮ່ວມກົມກອງສືບຕໍ່ບິນສູ້ຮົບ
”ມື້ນັ້ນມີເຮືອບິນຂອງອາເມລິກາຫຼາຍລຳ. ທຳອິດແມ່ນມີ 16 ລຳ, ແລ້ວເພີ່ມອີກ 8 ລຳ. ຍ້ອນມີເຮືອບິນຫຼາຍລຳຄືແນວນັ້ນພວກຂ້າພະເຈົ້າຕ້ອງແບ່ງກັນເພື່ອສູ້ຮົບ. ຂ້າພະເຈົ້າເຫັນເຮືອບິນ F4 ຢູ່ ຮ່ວາບິ່ງ ແຕ່ຕ້ອງບິນເຂົ້າເງ້ອ່ານ ຈຶ່ງຍິງຕົກ. ”
ພາຍຫຼັງຍິງຕົກເຮືອບິນອາເມລິກາຢູ່ເຂດນ່ານຟ້າ ເຫງ້ອ່ານ, ທ່ານ Nguyen Hong My ໄດ້ຮັບຫຼຽນກາລຸງໂຮ່. ໃນ 6 ປີສູ້ຮົບປ້ອງກັນເຂດນ່ານຟ້າຂອງຫວຽດນາມ, ທ່ານໄດ້ຍິງ ເຮືອບິນຂອງອາເມລິກາຕົກ 2 ລຳ. ວັນທີ 16/4/1972, ໃນການສູ້ຮົບທາງອາກາດ, ເຮືອບິນ MIG 21 ໂດຍທ່ານ Nguyen Hong My ຂັບ, ຖືກເຮືອບິນ F4 ໂດຍນັກບິນ Daniel Edwards Cherry ຂັບຍິງໃສ່ຢູ່ ຮ່ວາບິ່ງ. ເມື່ອເຮືອບິນຕົກ, ແຂນທັງສອງຂ້າງຂອງທ່ານຫັກ ຍ້ອນອຸປະກອນປ້ອງກັນຂອງເຮືອບິນຖືກເປ່ເພ… ເມື່ອອອກຈາກກອງທັບ, ທ່ານສືບຕໍ່ໄປຮຽນພາສາຕ່າງປະເທດ, ຮຽນເສດຖະກິດ, ສ້າງຄອບຄົວ ແລ້ວມີລູກ 2 ຄົນ.
ປີ 2007, ນາຍພົນກອງທັບອາກາດອາເມລິກາ Daniel Edwards Cherry ມາຢ້ຽມຢາມຫວຽດນາມ ເພື່ອຊອກຫານັກບິນຫວຽດນາມ ຜູ້ທີ່ຖືກເຮືອບິນຂອງທ່ານຍິງໃສ່ໃນບັ້ນຮົບທາງອາກາດລະຫວ່າງ MIG 21 ຂອງຫວຽດນາມ ກັບ F 4 , F 105 ລວມ 24 ລຳຂອງອາເມລິກາເມື່ອວັນທີ 19/1/1972. ພາຍຫຼັງໄດ້ພົບປະກັບທ່ານ Nguyen Hong My. ເດືອນ 4/2009, ນາຍພົນ Daniel Edwards Cherry ໄດ້ເຊີນນັກບິນ Nguyen Hong My ໄປອາເມລິກາ. ແລະ ຜູ້ວ່າການລັດ Kentucky ໄດ້ມອບກຽດຕິຍົດພັນເອກໃຫ້ແກ່ອະດີດນັກບິນ Nguyen Hong My ໂດຍການເປັນພິຍານຫຼັກຖານຂອງປະຊາຊົນລັດ Kentucky ນີ້ນັບພັນຄົນ. ໄປສະນີອາເມລິກາໄດ້ໃຊ້ຮູບຂອງທ່ານ Nguyen Hong My ເປັນສະແຕັມ ແລະ ສື່ມວນຊົນອາເມລິກາກໍ່ເຕື້ອງເຖິງຫຼາຍເທື່ອ.
ເຖິງວ່າສົງຄາມໄດ້ລ່ວງເລີຍໄປຫຼາຍປີແລ້ວກໍ່ຕາມ, ແຕ່ເມື່ອເຕື້ອງເຖິງຊຸມເດືອນປີແຫ່ງການສູ້ຮົບອັນດຸເດືອດນັ້ນ, ທ່ານຍັງຄົງຮູ້ສຶກເອກອ້າງທະນົງໃຈຕໍ່ອະດີດຕະການອັນພິລະອາດຫານຂອງຊາດ, ເຊິ່ງໄດ້ຕີເອົາຊະນະສັດຕູໃນເຂດນ່ານຟ້າຢູ່ພາກເໜືອຫວຽດນາມ.