(vovworld)- ວັດບາຍດີງ ຕັ້ງຢູ່ທາງທິດຕາເວັນຕົກຂອງເຂດປູຊະນີຍະສະຖານ ເມືອງຫລວງ ຮວາລື ຂຶ້ນກັບຕາແສງ ຢາຊີງ ເມືອງ ຢາຫວຽນ ແຂວງ ນີງບີງ ຫ່າງຈາກ ນະຄອນຫລວງ ຮ່າໂນ້ຍ ໄປທາງທິດໃຕ້ ປະມານ 95 ກິໂລແມັດ. ກຸ່ມວັດບາຍດີງ ແມ່ນສະຖານທີ່ທ່ອງທ່ຽວຈິດວິນຍານທີ່ດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ ເປັນຈຳນວນຫລວງຫລາຍ. ນີ້ກໍແມ່ນກຸ່ມວັດໄດ້ຮັບການຮັບຮູ້ວ່າບັນລຸຫລາຍສະຖິຕິຂອງຫວຽດນາມ ແລະ ພາກພື້ນ.
ວັດບາຍດີງ
ພາບ:undv2014vietnam.com
|
ກຸ່ມວັດບາຍດີງ ລວມມີ: ວັດບາຍດີງເກົ່າ ແລະ ວັດບາຍດີງໃຫມ່. ໃນຄຳວ່າ “ບາຍດີງ, “ບາຍ” ໝາຍຄວາມວ່ານົບໄຫວ້, ສ່ວນ “ດີງ” ໝາຍຄວາມວ່າ ຈອມພູ. ວັດ ບາຍດີງ ໄດ້ຮັບການກໍ່ສ້າງບົນເຂດດິນທາງທິດຕາເວັນຕົກ ກຳແພງ ຮວາລື ແລະ ໃກ້ກັບເມືອງຫລວງ ເກົ່າ ຮວາລື.
ວັດ ບາຍດີງເກົ່າ ຕັ້ງຢູ່ເທິງພູ ດີງ, ມີຄວາມສູງ 187 ແມັດ ແລະ ໄດ້ຮັບການກໍ່ສ້າງກ່ອນນີ້ກວ່າ 1000 ປີ. ຂຶ້ນຂັ້ນໄດຫີນກວ່າ 300 ຂັ້ນ, ຜ່ານປະຕູໂຂງແມ່ນຈະຮອດໃຈກາງວັດ ບາຍດີງເກົ່າ. ວັດແຫ່ງນີ້ແມ່ນມຸ່ງຫນ້າໄປສູ່ທາງທິດຕາເວັນຕົກ ແລະ ຖືກ ຕັ້ງໃກ້ກັບຍອດພູຂອງເຂດພູຜາປ່າໄມ້ທີ່ສະຫງົບງຽບ, ລວມມີຫ້ອງໂຖງຢູ່ໃຈກາງ, ເບື້ອງຂວາ ແມ່ນຖ້ຳ ຊາງ (hang Sáng) ບູຊາພະພຸດທະເຈົ້າ, ເບື້ອງຊ້າຍຖ້ຳ ໂຕຍ (hang tối) ບູຊາພະແມ່ ແລະ ເທວະດາ. ວັດແຫ່ງນີ້ໄດ້ຮັບການກໍ່ສ້າງຕາມສະຖາປັດຕະຍະກຳວັດທີ່ຕັ້ງຢູ່ໃນຖ້ຳ ຊື່ງຢູ່ຫວຽດນາມມີຫລາຍແຫ່ງ. ນາງ ໂດງອກແອງ, ຜູ້ນຳທ່ຽວໃຫ້ຮູ້ວ່າ:
“ຢູ່ເທິງປະຕູ ຖ້ຳຊາງ ມີແຖວຕົວຫນັງສືແກະຄວັດບົນຫນ້າຫີນເພື່ອສັນລະເສີນຄວາມງາມຢູ່ແຫ່ງນີ້. ເພດານຖ້ຳຄືດັ່ງຫລັງຄາແບບຖາວອນ. ຮ້ານບູຊາໃນຖ້ຳກໍໄດ້ຮັບການປະດັບປະດາຄືໃນວັດເກົ່າຫລາຍແຫ່ງຢູ່ຫວຽດນາມ.”
ພິເສດ, ຢູ່ຕອນທ້າຍຂອງຖ້ຳຊາງ ມີປະຕູທີ່ກວ້າງໃຫຍ່, ຖ້າທ່ານຢືນຢູ່ທີ່ນີ້ກໍສາມາດເຫັນຮ່ອມພູຂຽວທີ່ຫນ້າຈັບໃຈ.
ພາຍຫລັງຢ້ຽມຢາມ ວັດບາຍດີງເກົ່າແລ້ວ, ນັກທ່ອງທ່ຽວໄປຕາມທາງຊອຍມີຄວາມຍາວປະມານ 1 ກິໂລແມັດອ້ອມຮອບ ພູດີງ ແມ່ນຮອດບໍລິເວນ ວັດບາຍດີງໃຫມ່. ວັດແຫ່ງນີ້ຖືກຕັ້ງຢູ່ເນີນພູ ບາເຢົາ ໃຕ້ຕີນພູ ດີງ ຊື່ງແມ່ນຈອມພູສູງກວ່າໝູ່ ແລະ ໃຫຍ່ໂຕມະໂຫຖານກວ່າໝູ່ໃນເຂດນີ້. ເບື້ອງຫນ້າຂອງວັດບາຍດີງໃຫມ່ ແມ່ນບັນດາຈອມພູໃຫຍ່ໂຕມະໂຫຖານ ແລະ ຫນອງ ດາມທິ ແລະ ແມ່ນ້ຳ ຮວ່າງລອງ. ສິ່ງທີ່ສ້າງຄວາມປະທັບໃຈສຳລັບນັກທ່ອງທ່ຽວຫລາຍຄົນ ນັ້ນແມ່ນຮູບປັ້ນພະອໍລະຫັນ 500 ຮູບຖືກຕັ້ງຢູ່ ສອງຟາກລະບຽງ, ມີຄວາມຍາວປະມານ 1700 ແມັດ ແລະ ໄດ້ຮັບການກໍ່ສ້າງຄືດັ່ງເສັ້ນທາງພາໄປເຖິງພະພຸດທະເຈົ້າຂອງບັນດາພະອໍລະຫັນ. ນີ້ໄດ້ຮັບການຮັບຮູ້ວ່າແມ່ນເສັ້ນທາງພະອໍລະຫັນຍາວກວ່າໝູ່ຢູ່ ອາຊີ. ນາງ ໂດງອກແອງ ອະທິບາຍກວ່າ:
“ບັນດາຮູບປັ້ນພະອໍລະຫັນ ແມ່ນເຮັດດ້ວຍຫີນຂຽວພິເສດ ຜ່ານບັນດາສີມືອັນຄ່ອງແຄ້ວຂອງນັກສິລະປະການແກະຄວັດສະລັກຫີນ ຢູ່ນີງບີງ. ຮູບປັ້ນແຕ່ລະຮູບມີຄວາມສູງ 2-2,5 ແມັດ, ນ້ຳຫນັກ 2-2,5 ໂຕນ ແລະ ມີຮູບຊົງແຕກຕ່າງກັນ. ຮູບປັ້ນແຕ່ລະຮູບລ້ວນແຕ່ມີຊື່ຂອງພະອໍລະຫັນແຕ່ລະອົງເພື່ອໃຫ້ທຸກຄົນຮູ້ຈັກເຖິງ.”
ສິ່ງພິເສດຢູ່ວັດບາຍດີງໃຫມ່ ນັ້ນແມ່ນ ລະຄັງທອງຫນ່ວຍຫນຶ່ງ ມີນ້ຳຫນັກ 36 ໂຕນ ແລະ ໄດ້ຮັບການຮັບຮູ້ວ່າແມ່ນລະຄັງທອງຫນ່ວຍໃຫຍ່ກວ່າໝູ່ ຢູ່ ຫວຽດນາມ. ຢູ່ກອ້ງລະຄັງຫນ່ວຍນີ້ ແມ່ນຄ້ອງບ້າງມີນ້ຳຫນັກ 70ໂຕນ. ລະບຽງທີ່ຕັ້ງຮູບປັ້ນພະອໍລະຫັນ ສືບຕໍ່ພານັກທ່ອງທ່ຽວຂຶ້ນສູ່ຫໍບູຊາເຈົ້າແມ່ນກວນອີນ ແລະ ຫໍບູຊາສາດສະດາ. ຢູ່ ອາຄານສອງຫລັງນີ້ມີ ຮູບປັ້ນເຈົ້າແມ່ກວນອີນພັນມືພັນຕາ ຖືກຫລໍ່ດ້ວຍທອງ. ນີ້ແມ່ນຮູບປັ້ນພະແມ່ກວນອີນໃຫຍ່ກວ່າໝູ່ຢູ່ຫວຽດນາມ ແລະ ຮູບປັ້ນພະພຸດທະຮູບຫລໍ່ດ້ວຍທອງໃຫຍ່ກວ່າໝູ່ຢູ່ຫວຽດນາມ. ຢູ່ໂນນພູ ແມ່ນຫໍບູຊາພະພຸດ ຊື່ງລວມມີພະພຸດທະຮູບ 3 ຮູບ, ຫໍບູຊານີ້ແມ່ນອາຄານສູງ, ກວ້າງ, ໃຫຍ່ໂຕທີ່ສຸດຢູ່ວັດບາຍດີງ. ອ້າຍ ຫວູແອງກວນ, ມາຈາກ ນະຄອນ ດາລາດ ແບ່ງປັນວ່າ:
“ຜ່ານໂທລະພາບຂ້າພະເຈົ້າໄດ້ເຫັນບັນດາຮູບຫລໍ່ນີ້ໃຫຍ່ໂຕ. ແຕ່ເມື່ອມານີ້ເຫັນປະຈັກຕາ ຂ້າພະເຈົ້າບໍ່ຄິດວ່າແມ່ນໃຫຍ່ໂຕຄືແນວນັ້ນ. ພະພຸດທະຮູບ 3 ຮູບແມ່ນສະແດງໃຫ້ເຫັນອະດີດຕະການ, ປະຈຸບັນ ແລະ ອະນາຄົດ ລ້ວນແຕ່ຖືກຟອກຄຳ ຍິ່ງເຫັນວ່າສວຍງາມກວ່າ. ກິດຈະກຳນີ້ສົມກັບສະຖິຕິມີພະພຸດທະຮູບໃຫຍ່ກວ່າໝູ່ຢູ່ຫວຽດນາມ.”
ແຕ່ລະປີ, ເມື່ອຮອດວັນບຸນຕົ້ນຕໍຈັດຂຶ້ນໃນວັນທີ 6 ເດືອນຈຽງໄລ່ຕາມຈັນທະປະຕິທິນ, ກຸ່ມວັດບາຍດີງ ໄດ້ຕ້ອນຮັບນັກທ່ອງທ່ຽວມາຈາກທຸກສາລະທິດນັບໝື່ນໆຄົນມາຢ້ຽມຢາມ. ພຸດທະສາສະນີກະຊົນ ລ້າຍງອກງ່າ ແບ່ງປັນວ່າ:
“ປີໃດ ຂ້າພະເຈົ້າກໍມາຢ້ຽມຢາມ ວັດບາຍດີງ. ວັດແຫ່ງນີ້ແມ່ນສັກກະລະບູຊາທີ່ສຸດ. ຂ້າພະເຈົ້າມານີ້ເພື່ອພາວະນາໃຫ້ຄອບຄົວຍາມໃດກໍມີສຸຂະພາບແຂງແຮງ, ມີໂຊກມີໄຊ.”
ໂດຍນອນໃນລາຍການທ່ອງທ່ຽວທີ່ມີຊື່ສຽງຢູ່ ນີງບີງ, ເຂດປູຊະນີຍະສະຖານປະຫວັດສາດ ເມືອງຫລວງເກົ່າ ຮວາລື, ເຂດທ່ອງທ່ຽວ ຕາມກົກ ບີກດົ້ງ, ປ່າສະຫງວນແຫ່ງຊາດ ກຸກເຟືອງ…ກຸ່ມວັດ ບາຍດີງ ແມ່ນສະຖານທີ່ທ່ອງທ່ຽວປະຫວັດສາດ, ວັດທະນະທຳ, ຈິດວິນຍານດູດດື່ມ.