(vovworld)- ເວັບໄຊທ່ອງທ່ຽວສາກົນ Touropia(touropia.com) ຫາກໍຄັດເລືອກເຂດມໍລະດົກວັດທະນະທຳ ໝີເຊີນ ຢູ່ແຂວງ ກວ໋າງນາມ ຂອງຫວຽດນາມ ແມ່ນຫນຶ່ງໃນຈຳນວນສະຖານທີ່ທ່ອງທ່ຽວ 10 ແຫ່ງທີ່ດຶງດູດນັກທ່ອງທ່ຽວກວ່າໝູ່ຢູ່ຫວຽດນາມ. ຕາມເວັບໄຊ touropia.com ແລ້ວ, ໝີເຊີນແມ່ນເຂດປູຊະນີຍະສະຖານສະຖາປັດຕະຍະກຳທີ່ເປັນເອກະ ລັກສະເພາະ, ມີທີ່ຕັ້ງພິເສດ, ນັ້ນແມ່ນຖືກຕັ້ງຢູ່ຮ່ອມພູ ທີ່ປົກຄຸມໄປດ້ວຍສີຂຽວຂອງພູຜາປ່າໄມ້. ນີ້ແມ່ນສູນແຫ່ງການເຫລື້ອມໃສສາສະຫນາຂອງລາຊະອານາຈັກ ຈຳປາ ເດີມ. ນັກທ່ອງທ່ຽວສາມາດຄົ້ນຫາຄວາມງາມທີ່ແຕກຕ່າງກັນຂອງໝີເຊີນໃນຊ່ວງເວລາຕ່າງກັນຂອງມື້ຫນຶ່ງ.
|
ລະດູຮ້ອນຢູ່ໝີເຊີນ ອາກາດຮ້ອນເອົ້າທີ່ສຸດ ແຕ່ຈຳນວນນັກທ່ອງທ່ຽວມາຢ້ຽມຢາມ ໝີເຊີນ ບໍ່ຫລຸດລົງເທື່ອ. ເຖິງວ່າ ອາກາດຮ້ອນເອົ້າຄືແນວນັ້ນກໍຕາມ, ແຕ່ເມື່ອຍ່າງເຂົ້າເຂດ ວິຫານທາດຢູ່ ໝີເຊີນ, ທ່ານຈະຮູ້ສຶກເຢັນສະບາຍທີ່ສຸດ. ສຽງແມງຈັກຈັ່ນທ່າມກາງຄວາມສະຫງົບງຽບຢູ່ ໝີເຊີນໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ນັກທ່ອງທ່ຽວຜູ້ຫນຶ່ງມາຈາກ ເຢຍລະມັນໃຫ້ຮູ້ວ່າ:
“ເປັນຄັ້ງທຳອິດທີ່ຂ້າພະເຈົ້າມາຢ້ຽມຢາມ ໝີເຊີນ ແລະ ຮູ້ສຶກເພິ່ງພໍໃຈ ເພາະ ວ່າ ທິວທັດຢູ່ວິຫານທາດ ໝີເຊີນ ງາມຫລາຍ”
ໝີເຊີນແມ່ນເຂດປູຊະນີຍະສະຖານ ສາສະຫນາຮີນດູ ຂອງລາຊະອານາຈັກ ຈຳປາ ຊື່ງໄດ້ຮັບການກໍ່ສ້າງແຕ່ສັດຕະວັດທີ 4 ຮອດສັດຕະວັດທີ 13, ປະຈຸບັນຢູ່ທີ່ນີ້ ຍັງມີ ກິດຈະກຳສະຖາປັດຕະຍະກຳ 70 ແຫ່ງ ທີ່ກໍ່ສ້າງດ້ວຍດິນຈີ່. ຢູ່ທີ່ນີ້ບູຊາເທວະດາ Bhadresvara, ຊື່ງແມ່ນເຈົ້າຊີວິດທີ່ໄດ້ກໍ່ຕັ້ງລາຊະວົງແຫ່ງທຳອິດຢູ່ເຂດ Amaravati ໃນທ້າຍສັດຕະວັດທີ 4, ພ້ອມກັບເທວະດາ Siva ອັນໄດ້ກາຍເປັນການເຫລື້ອ ມໃສຕົ້ນຕໍໃນການບູຊາເທວະດາ, ເຈົ້າຊີວິດ ແລະ ປູຍ່າຕ່າຍາຍຂອງລາຊະວົງ. ເຂດທີ່ເປັນເອກະລັກສະເພາະກວ່າໝູ່ໃນສະຖາປັດຕະຍະກຳທາດຈຳປາ ນັ້ນ ແມ່ນບັນດາພາບຄວັດແກະສະຫລັກຢູ່ເທິງຝາຜະໜັງດິນຈີ່. ບັນດານັກສິລະປະການຊາວຈຳປາ ໄດ້ຄວັດແກະສະຫລັກບັນດາລວດລາຍໂດຍກົງເທິງຝາຜະຫນັງດິນຈີ່ ຢ່າງຄ່ອງແຄ້ວ. ນີ້ເປັນສິ່ງທີ່ສ້າງຄວາມດຶງດູດນັກທ່ອງທ່ຽວມາຢ້ຽມຊົມນັບມື້ນັບ ຫລາຍ ເພື່ອເຫັນປະຈັກຕາກິດຈະກຳມະຫັດສະຈັນຢູ່ແຫ່ງນີ້..
ປະຈຸບັນ ຮ່ອງຮອຍຂອງວິຫານທາດ 30 ແຫ່ງທີ່ຍັງເຫລືອຢູ່ ໝີເຊີນ ກໍສາມາດສ້າງເປັນຫໍພິພິດທະພັນສະຖາປັດຕະຍະກຳ ແລະ ປະຕິມາກຳ ກາງແຈ້ງ ອັນລ້ຳຄ່າ ກ່ຽວກັບພື້ນຖານວັດທະນະທຳ ຈຳປາ. ສິລະປະໃນການກໍ່ສ້າງ, ຄວັດແກະສະຫລັກ, ທັດສະນະຂອງຊາວ ຈຳປາ ກ່ຽວກັບຈັກກະວານ, ເທວະດາຟ້າແຖນ, ມະນຸດ... ເຮັດໃຫ້ວິຫານທາດ ໝີເຊີນ ກາຍເປັນແຫ່ງຫນຶ່ງດຽວຢູ່ ອາຊີຕາເວັນອອກສ່ຽງໃຕ້ ທີ່ມີຄວາມງາມພິເສດສະເພາະ. ສິ່ງທີ່ເລີກລັບອີກອັນຫນຶ່ງຢູ່ ໝີເຊີນ ນັ້ນແມ່ນ ສິລະປະ ຄວັດແກະສະຫລັກທີ່ລະອຽດຄ່ອງແຄ້ວເທິງດິນຈີ່. ຜ່ານການເວລາກໍຄືຖືກສົງຄາມທຳລາຍ, ແຕ່ຮ່ອງຮອຍຍັງເຫລືອຢູ່ເຂດວິຫານທາດ ໝີເຊີນ ຍັງສະແດງໃຫ້ເຫັນຄວາມງາມແບບເລີກລັບ, ເຊິ່ງໄດ້ດຶງດູດນັກທ່ອງທ່ຽວຫລາຍປະເທດໃນໂລກມາຢ້ຽມຢາມນັບມື້ ນັບຫລາຍ. ທ່ານ ດາດຈື, ຊາວເຜົ່າຈຳ ຢູ່ ນີງທ້ວນ ມີຄວາມຕືນຕັ້ນໃຈເມື່ອຢ້ຽມຢາມເຂດປູຊະນີຍະສະຖານ ໝີເຊີນ ໃຫ້ຮູ້ວ່າ:
“ຂ້າພະເຈົ້າໄດ້ຢ້ຽມຢາມເຂດວິຫານທາດໝີເຊີນ ທັງໝົດແລ້ວ. ຂ້າພະເຈົ້າເຫັນວ່າ ບັນດາກ້ອນດິນຈີ່, ສາລາ ແລະ ຮູບພາບທີ່ວາງສະແດງໃນຫໍພິພິດທະພັນ ໄດ້ສະແດງໃຫ້ເຫັນວັດທະນະທຳ ຈຳປາແມ່ນອຸດົມສົມບູນ, ເປັນເອກະລັກສະເພາະ ແລະເລີກລັບ.”
ພາບ:internet
|
ປີ 2013, ນັກທ່ອງທ່ຽວພາຍໃນ ແລະ ຕ່າງປະເທດ ມີໂອກາດໄດ້ຢ້ຽມຢາມເຂດທາດ G, ຊື່ງແມ່ນຫນຶ່ງໃນບັນດາກຸ່ມວິຫານທາດສຳຄັນຂອງເຂດມໍລະດົກວັດທະນະທຳ ໝີເຊີນ, ພາຍຫລັງ 14 ປີແຫ່ງການບູລະນະປະຕິສັງຂອນ. ໃນວິວັດການບູລະນະປະຕິສັງຂອນນັ້ນ, ບັນດາຜູ້ຊ່ຽວຊານໄດ້ຄົ້ນພົບ ແລະ ບູລະນະບັນດາວັດຖຸພັນທີ່ຖືກເປ່ເພ ແລະ ຖືກຝັງໃຕ້ດິນກວ່າ 60 ຢ່າງ. ທ່ານ Federico, ນັກວິສາວະກອນມາຈາກ ອີຕາລີ, ຜູ້ທີ່ໄດ້ເຂົ້າຮ່ວມວຽກງານບູລະນະປະຕິສັງຂອນເຂດທາດ G ໄລຍະແຕ່ປີ 2004-2005 ໃຫ້ຮູ້ວ່າ:
“ຂ້າພະເຈົ້າແມ່ນນັກວິສາວະກອນ, ກ່ອນນີ້ຂ້າພະເຈົ້າກໍໄດ້ຮຽນກ່ຽວກັບເຕັກນີກສະຖາປັດຕະຍະກຳຂອງ ຊາວ ຈຳປາ ແລະ ກ່ອນທີ່ເຂົ້າຮ່ວມວຽກງານບູລະນະປະຕິສັງຂອນທາດໝີເຊີນ, ພວກຂ້າພະເຈົ້າ ໄດ້ອ່ານປື້ມກ່ຽວກັບເຂດວິຫານທາດ. ເວລາບໍ່ທັນໄດ້ຮັບການບູລະນະປະຕິສັງຂອນ, ເຂດວິຫານທາດຖືກປົກຄຸມດ້ວຍຕົ້ນໄມ້ໃບຫຍ້າທີ່ຂຽວອຸ່ມທຸ່ມ. ແຕ່ພາຍຫລັງໄດ້ຮັບການບູລະນະປະຕິສັງຂອນແລ້ວ, ກິດຈະກຳນີ້ໄດ້ນຳເອົາຄວາມງາມແບບມະຫັດສະຈັນມາໃຫ້ເຂດນີ້.”
ໝີເຊີນ ແມ່ນແຫ່ງເຕົ້າໂຮມ ຮູບແບບສິລະປະສະຖາປັດຕະຍະກຳວິຫານທາດ ຈຳປາທັງໝົດທີ່ ຍັງຄົງຕົວຢູ່ເຂດດິນແດນພາກກາງຫວຽດນາມໃນປະຈຸບັນ. ເຖິງວ່າ ເຂດວິຫານທາດແຫ່ງນີ້ ບໍ່ໃຫຍ່ໂຕມະໂຫຖານຄື Angkor Wat ຂອງກຳປູເຈຍ, Borobudur ຂອງອິນໂດເນເຊຍ, Pagan ຂອງມ້ຽນມາ ກໍ່ ຕາມ ແຕ່ໝີເຊີນ ຍັງຄົງແມ່ນທີ່ ຕັ້ງສຳຄັນໃນພື້ນຖານສິລະປະສະຖາປັດຕະຍະກຳຂອງພາກພື້ນ ອາຊີຕາເວັນອອກສຽ່ງໃຕ້ດ້ວຍຄຸນຄ່າສິລະປະສາສະຫນາທີ່ເປັນເອກະ ລັກສະເພາະຂອງຊາວເຜົ່າ ຈຳປາ.