(vovworrld) - ໃນຊຸມປີມໍ່ໆມານີ້, ການພົວພັນຮ່ວມມືມິດຕະພາບໃນຂົງເຂດກວດສອບແຫ່ງລັດລະຫວ່າງສາມປະເທດ ຫວຽດນາມ, ລາວ ແລະ ກຳປູເຈຍ ນັບມື້ນັບເພີ່ມທະວີຢ່າງແທດຈິງ ແລະ ມີປະສິດທິຜົນ. ແຕ່ລະປີ, ອົງການກວດສອບແຫ່ງລັດຂອງທັງສາມປະເທດ ລ້ວນແຕ່ຈັດຕັ້ງກອງປະຊຸມສຳມະນາເພື່ອປຶກສາຫາລືກ່ຽວກັບພຶດຕິກຳຕົວຈິງ ແລະ ບົດຮຽນຂອງແຕ່ລະປະເທດໃນການເຄື່ອນໄຫວກວດສອບ. ຍົກສູງຄຸນນະພາບບົດລາຍງານຂອງອົງການກວດສອບສູງສຸດຂອງສາມປະເທດ ຫວຽດນາມ, ລາວ ແລະ ກຳປູເຈຍ ນັ້ນແມ່ນຫົວຂໍ້ຂອງກອງປະຊຸມສຳມະນາສາມ ຝ່າຍຄັ້ງທີ 4 ຊຶ່ງດຳເນີນໄປຢູ່ ແຂວງ ນີງບີ່ງ ປະເທດ ຫວຽດນາມ ຫວ່າງແລ້ວນີ້.
ກອງປະຊຸມສຳມະນາກວດສອບແຫ່ງລັດສາມປະເທດ ຫວຽດນາມ, ລາວ
ແລະ ກຳປູເຈຍ
ພາບ:internet
|
ໃນໄລຍະຜ່ານມາ, ບັນດາຮູບການ, ເນື້ອໃນການຮ່ວມມືລະຫວ່າງສາມປະເທດ ຫວຽດນາມ, ລາວ ແລະ ກຳປູເຈຍ ໃນຂົງເຂດກວດສອບແຫ່ງລັດໄດ້ຮັບການປະຕິບັດຢ່າງມີຫລາຍຮູບຫລາຍແບບ, ແທດຈິງ ແລະ ມີປະສິດທິຜົນກວ່າ. ເລື່ອງແບ່ງປັນບົດຮຽນກ່ຽວກັບການບຳລຸງສ້າງ, ຂົງເຂດກວດສອບໃຫມ່ ແລະ ວິຊາສະເພາະໃນການເຄື່ອນໄຫວກວດສອບແມ່ນມີຄວາມຈຳເປັນທີ່ສຸດ ເພື່ອໃຫ້ສາມອົງການກວດສອບແຫ່ງລັດ ຊ່ວຍເຫລືອເຊິ່ງກັນ ແລະ ກັນ ພ້ອມກັນພັດທະນາ. ດຣ ບົວສີ ຫລໍ່ວັນໄຊ, ປະທານອົງການກວດສອບແຫ່ງລັດ ສປປ ລາວ ໃຫ້ຮູ້ວ່າ:
ສຽງທ່ານ ບົວສີ ຫລໍ່ວັນໄຊ
ທີ່ກອງປະຊຸມສຳມະນາ, ບັນດາຜູ້ຊ່ຽວຊານພ້ອມກັນປຶກສາຫາລືກ່ຽວກັບພຶດຕິກຳຕົວຈິງ ແລະ ບັນດາບົດຮຽນຂອງແຕ່ລະປະເທດໃນການຈັດຕັ້ງສ້າງ, ກວດກາ, ຈຳຫນ່າຍບົດລາຍງານກວດສອບໃນການຈັດຕັ້ງປະຕິບັດການເຄື່ອນໄຫວກວດສອບ. ນອກນັ້ນ ບັນດາຜູ້ແທນກໍປຶກສາຫາລືກ່ຽວກັບບັນດາມາດຕະການເພື່ອຍົກສູງຄຸນນະພາບການກວດສອບ ແລະ ບົດລາຍງານກວດສອບ, ປ່ຽນໃຫມ່ວຽກງານພະນັກງານ, ບຳລຸງສ້າງພະນັກງານກວດສອບ, ພິເສດ ແມ່ນວິທີການ, ຂັ້ນຕອນກວດສອບຄຸນນະພາບການກວດສອບ, ບົດລາຍງານກວດສອບ, ສ້າງ ແລະ ປະກາດໃຊ້ບັນດາສຳເນົາເອກະສານ, ແບບຟອມບົດລາຍງານກວດສອບ. ທ່ານນາງ Som Kim Sua ປະທານອົງການກວດສອບລາຊະອານາຈັກ ກຳປູເຈຍ ຖືວ່າ:
“ເພື່ອຍົກສູງຄຸນນະພາບບົດລາຍງານການກວດສອບ ຕ້ອງສ້າງແຜນການກວດສອບຢ່າງຖືກຕ້ອງ, ສົມທົບກັບເລື່ອງກວດສອບຢ່າງຈະແຈ້ງ. ພະນັກງານກວດສອບ ຕ້ອງມີຄວາມຊຳນານງານ ພ້ອມກັບຄຸນສົມບັດດີ, ມີຄວາມສາມາດໃນການແກ້ໄຂບັນຫາເກີດຂຶ້ນໃນວິວັດການປະຕິບັດກວດສອບ, ພິເສດຕ້ອງມີລະບົບກວດກາພາຍໃນອົງການເພື່ອໃຫ້ທຸກວຽກງານມີຄວາມຊັດເຈນກວ່າ. ພ້ອມກັນນັ້ນ ຂໍ້ມູນຂ່າວສານທັງໝົດໃນບົດລາຍງານຕ້ອງສະແດງໃຫ້ເຫັນຄວາມດຸນດ່ຽງລະຫວ່າງຂໍ້ມູນຂ່າວສານທີ່ຕັ້ງຫນ້າ ແລະ ກ່ຽວກັບສິ່ງຫຍໍ້ທໍ້.”
ການນຳອົງການກວດສອບສາມປະເທດ ຫວຽດນາມ, ລາວ ແລະ ກຳປູເຈຍ
ພາບ: internet
|
ທີ່ກອງປະຊຸມສຳມະນາ, ບັນດາຜູ້ແທນກໍສະແດງໃຫ້ເຫັນຄວາມຈຳເປັນຕ້ອງເປີດເຜີຍບົດລາຍງານກວດສອບ ແລະ ໝາກຜົນການກວດສອບແຫ່ງລັດ. ທ່ານ Doan Xuan Tien, ຮອງຫົວຫນ້າອົງການກວດສອບແຫ່ງລັດ ຫວຽດນາມ ໃຫ້ຮູ້ວ່າ:
“ນັບແຕ່ປີ 2007 ມາຮອດປະຈຸບັນ, ແຕ່ລະປີ ອົງການກວດສອບແຫ່ງລັດ ລ້ວນແຕ່ຈັດຕັ້ງເປີດເຜີຍບົດລາຍງານກວດສອບປະຈຳປີ ດ້ວຍຂໍ້ມູນຂ່າວສານຢ່າງຄົບຖ້ວນ ຈາກບັນດາບົດລາຍງານການກວດສອບສ້າງຂຶ້ນ ແລະ ຈຳຫນ່າຍໃນປີ. ບັນດາຂໍ້ມູນຂ່າວສານໄດ້ຮັບການເປີດເຜີຍ ແລະ ສະຫນອງໃຫ້ແກ່ບັນດາອົງການທີ່ມີສິດອຳນາດຢ່າງທັນການ ໄດ້ນຳມາຊຶ່ງປະສິດທິຜົນ ເມື່ອບັນດາຫົວຫນ່ວຍຖືກກວດສອບຕ້ອງເອົາໃຈໃສ່ເຖິງການປັບປຸງບັນດາຂໍ້ຂາດຕົກບົກຜ່ອງຊຶ່ງອົງການກວດສອບແຫ່ງລັດໄດ້ຍົກອອກຕໍ່ຫາງສຽງ. ບັນດາໝາກຜົນຈາກບົດລາຍງານກວດສອບຂອງ ອົງການກວດສອບແຫ່ງລັດ ໄດ້ສ້າງຄວາມໄວ້ເນື້ອເຊື່ອໃຈຕໍ່ສະພາແຫ່ງຊາດ, ລັດຖະບານ ແລະ ປະຊາຊົນທຸກຊັ້ນວັນນະ.”
ກອງປະຊຸມສຳມະນາ “ການຮ່ວມມືຍົກສູງຄຸນນະພາບກວດສອບສາມປະເທດ ຫວຽດນາມ, ລາວ ແລະ ກຳປູເຈຍ ຄັ້ງນີ້ ມີຄວາມໝາຍສຳຄັນຍິ່ງ, ປະກອບສ່ວນ ເພີ່ມທະວີ ແລະ ຮັດແຫນ້ນນ້ຳໃຈສາມັກຄີມິດຕະພາບລະຫວ່າງປະຊາຊົນສາມປະເທດ ຫວຽດນາມ, ລາວ ແລະ ກຳປູເຈຍ ເວົ້າລວມ ແລະ ອົງການກວດສອບແຫ່ງລັດສາມປະເທດ ເວົ້າສະເພາະ. ໝາກຜົນຈາກກອງປະຊຸມສຳມະນາ ຈະສືບຕໍ່ຄົ້ນຄ້ວາເພື່ອໝູນໃຊ້ເຂົ້າໃນພຶດຕິກຳຕົວຈິງຂອງການເຄື່ອນໄຫວກວດສອບຂອງແຕ່ລະປະເທດ, ເພື່ອຕອບສະຫນອງຄວາມຮຽກຮ້ອງຕ້ອງການ
ຂອງສະພາແຫ່ງຊາດ, ລັດຖະບານ ແລະ ປະຊາຊົນສາມປະເທດໃຫ້ນັບມື້ນັບດີກວ່າເກົ່າ.