ອາທິດຜ່ານມາ, ພາກພາສາລາວ, ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວຫຼາຍສະບັບຈາກທ່ານຜູ້ຟັງລາວ. ໃນນັ້ນມີບາງຄຳເຫັນກ່ຽວກັບຂ່າວ, ບົດທີ່ອອກອາກາດໃນອາທິດ ແລະ ບາງຄຳຖາມເຊິ່ງທ່ານຜູ້ຟັງສົນໃຈ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີບາງຄຳເຫັນ ແລະ ຕອບຄຳຖາມເຊິ່ງທ່ານຜູ້ຟັງຝາກມາໃນອາທິດຜ່ານມາ.
ໃນອາທິດ, ທ່ານ ດາວັນ ໄຊປັນຍາ, ແຂວງ ເຊກອງ ໄດ້ຝາກ ຈົດໝາຍມາຍັງລາຍການດ້ວຍເນື້ອໃນວ່າ: ໃນລາຍການ “ສາລະຄະດີ” ອອກອາກາດເມື່ອວັນທີ 8/11 ຜ່ານມາມີບົດ “ໝູ່ບ້ານຜະລິດເຂົ້າເໝົ້າ ບາຊໍ” ຢູ່ແຂວງ ຈ່າວີງ. ຂ້າພະເຈົ້າຮູ້ສຶກແປກປະຫຼາດໃຈ, ຍ້ອນວ່າກ່ອນນີ້, ຂ້າພະເຈົ້າໄດ້ຮຽນຢູ່ ຮ່າໂນ້ຍ ແລະ ຄິດວ່າເຂົ້າເໝົ້າແມ່ນຜະລິດຕະພັນທີ່ເປັນເອກະລັກສະເພາະຂອງຮ່າໂນ້ຍ. ຂ້າພະເຈົ້າດີໃຈເມື່ອໄດ້ຮັບຂໍ້ມູນດັ່ງກ່າວ, ຫວັງວ່າຈະມີໂອກາດໄປທ່ຽວຢູ່ແຂວງພາກໃຕ້ນີ້, ເພື່ອໄດ້ຊີມເຂົ້າເໝົ້າຢູ່ທີ່ນີ້ ເພື່ອສາມາດປຽບທຽບໄດ້ວ່າເຂົ້າເໝົ້າຢູ່ ຈ່າວີງ ມີຄວາມແຕກຕ່າງກັບເຂົ້າເໝົ້າຢູ່ ຮ່າໂນ້ຍ ຄືແນວໃດ.
ພວກເຮົາຂໍຂອບໃຈທ່ານ ດາວັນ ໄຊປັນຍາ ທີ່ໄດ້ຕິດຕາມລາຍການຂອງພວກເຮົາມາໂດຍຕະຫຼອດ. ຖ້າຜູ້ຟັງທ່ານໃດສົນໃຈເຖິງບົດດັ່ງກ່າວສາມາດອ່ານ ແລະ ຟັງຄືນໃນແວບໄຊ vovworld.vn.
ທ່ານບູນທອງ, ແຂວງ ສະຫວັນນະເຂດ, ໄດ້ຝາກອີແມວມາຍັງລາຍການໂດຍຖາມວ່າ: ອາທິດຜ່ານມາ, ຂ້າພະເຈົ້າໄດ້ຮັບຟັງຂ່າວ ກ່ຽວກັບເລື່ອງ ຫວຽດນາມ ຈັດຕັ້ງ “ວັນກົດໝາຍ ຫວຽດນາມ” 9/11. ໂດຍແມ່ນຜູ້ເຮັດວຽກງານໃນຂະແໜງນີ້ຂ້າພະເຈົ້າຢາກຮູ້ຕື່ມກ່ຽວກັບວັນນີ້?
ຕາມຂໍ້ກຳນົດໃນມາດຕາ 8 ກົດໝາຍວ່າດ້ວຍການເຜີຍແຜ່, ສຶກສາກົດໝາຍແລ້ວ, ວັນທີ 9/11 ປະຈຳປີ ແມ່ນວັນກົດໝາຍ ປະເທດ ສສ. ຫວຽດນາມ. ວັນກົດໝາຍໄດ້ຮັບການຈັດຕັ້ງເພື່ອແນໃສ່ເຊີດຊູລັດຖະທຳມະນູນ, ກົດໝາຍ, ສຶກສາສະຕິເຄົາລົບກົດໝາຍໃຫ້ທຸກໆຄົນ. ປີ 2013, ແມ່ນປີທຳອິດທີ່ຈັດຕັ້ງວັນກົດໝາຍ ໄດ້ດຶງດູດຄວາມສົນໃຈ, ການຕອບສະໜອງຂອງທົ່ວສັງຄົມ, ປະກອບສ່ວນຍົກສູງສະຕິຄວາມຮູ້ຂອງພະນັກງານ, ລັດຖະກອນ, ຜູ້ອອກແຮງງານ ແລະ ປະຊາຊົນກ່ຽວກັບຈຸດປະສົງ, ຄວາມໝາຍຂອງວັນກົດໝາຍ, ສະຕິການປະຕິບັດລັດຖະທຳມະນູນ (ສະບັບປັບປຸງ), ລັດຖະທຳມະນູນຂອງໄລຍະຍູ້ແຮງການຫັນເປັນປະເທດເປັນອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນຂອງປະເທດຊາດ. ດັ່ງນັ້ນ, ເລື່ອງຈັດຕັ້ງວັນກົດໝາຍປີ 2014 ຕ້ອງໄດ້ຮັບການຕິດພັນກັບເລື່ອງຕັ້ງໜ້າເສີມຂະຫຍາຍຜົນສັກສິດ, ປະສິດທິຜົນຂອງລັດຖະທຳມະນູນ, ນຳບັນດາຂໍ້ຕົກລົງຂອງລັດຖະທຳມະນູນເຂົ້າສູ່ຊີວິດຕົວຈິງ.
ໝູ່ບ້ານ ເຍີດເຕີນ ຍາມລະດູບານໃໝ່ວຽນມາ
ເພື່ອນ ພອນສະຫວັນ, ແຂວງ ວຽງຈັນ ໄດ້ຝາກ ອີແມວໃຫ້ລາຍການໂດຍໃຫ້ຮູ້ວ່າ: ເວລາຜ່ານມາ, ຂ້າພະເຈົ້າໄດ້ຮັບດອກໄມ້ສົດໂດຍເພື່ອນ ຫວຽດນາມ ມອບໃຫ້, ພ້ອມກັບແຖວໜັງສືທີ່ວ່າ “ດອກໄມ້ສົດ ດ່າລາດ”. ຂ້າພະເຈົ້າມັກດອກໄມ້ທີ່ສຸດ ແລະ ເຫັນວ່າຢູ່ປະເທດລາວ ກໍ່ນຳເຂົ້າດອກໄມ້ຫຼາຍຊະນິດຈາກບັນດາເຂດ, ພາກຂອງ ຫວຽດນາມ. ຜ່ານລາຍການພາກພາສາລາວຂ້າພະເຈົ້າຢາກຮູ້ວ່າ ຢູ່ ຫວຽດນາມ ມີຈັກໝູ່ບ້ານປູກດອກໄມ້ທີ່ມີຊື່ສຽງ?
ເພື່ອນ ພອນສະຫວັນ ທີ່ຮັກແພງ, ຢູ່ ຫວຽດນາມ ມີຫຼາຍໝູ່ບ້ານປູກດອກໄມ້ທີ່ມີຊື່ສຽງ, ໃນນັ້ນຕ້ອງເວົ້າເຖິງບາງໝູ່ບ້ານດັ່ງຕໍໄປນີ້:
ໝູ່ບ້ານ ງອກຮ່າ, ຢູ່ ຮ່າໂນ້ຍ ແມ່ນໝູ່ບ້ານປູກດອກໄມ້ທີ່ມີຊື່ສຽງທີ່ສຸດຢູ່ ຫວຽດນາມ. ໃນຊຸມປີ 1970, ໝູ່ບ້ານນີ້ຍັງຄົງແມ່ນບ່ອນປູກດອກໄມ້ສົດເພື່ອສະໜອງໃຫ້ນະຄອນ ຮ່າໂນ້ຍ. ມາຮອດປະຈຸບັນ, ຈຳນວນຄອບຄົວຢູ່ໝູ່ບ້ານ ງອກຮ່າ ຍັງປູກດອກໄມມີຫຼາຍ, ແຕ່ຮູບພາບໝູ່ບ້ານແຫ່ງນີ້ ຍັງຄົງຕົວໃນບົດກະວີ, ບົດເພງຕະຫຼອດໄປ.
ໝູ່ບ້ານ ໄຕຕື້ວ, ຢູ່ ຮ່າໂນ້ຍ ໂດ່ງດັງຍ້ອນແມ່ນບ່ອນສະໜອງດອກໄມ້ສົດໃຫ້ຍະຄອນຫຼວງ ຮ່າໂນ້ຍ ແລະ ບັນດາແຂວງ ໃກ້ຄຽງ. ດອກໄມ້ຕົ້ນຕໍທີ່ເຄີຍປູກຢູ່ ໝູ່ບ້ານແຫ່ງນີ້ມີ: ດອກກຸຫລາບ, ດອກເປັນຈະມາດ, ດອກຂົນຕາ, ດອກລີລີ, ດອກເຂືອບ້າ…
ຮອດວັນທີ 20/12 ໄລ່ຕາມຈັນທະປະຕິທິນແຕ່ລະປີ, ດອກຄາຍ ຢູ່ໝູ່ບ້ານ ເຍີດເຕີນ ຢູ່ແຄມໜອງ ໂຮ່ໄຕ, ເມືອງ ໄຕໂຮ່, ນະຄອນຫຼວງ ຮ່າໂນ້ຍ ກໍ່ເບັງບານອອກດ້ວຍສີສົດໃສ, ເປັນສັນຍານບົ່ງບອກວ່າລະດູບານໃໝ່, ປີໃໝ່ໃກ້ຈະວຽນມາແລ້ວ. ດອກຄາຍຢູ່ ເຍີດເຕີນ ກໍ່ເປັນສັນຍາລັກຂອງ ຮ່າໂນ້ຍເຊິ່ງຂາດບໍ່ໄດ້ໃນໂອກາດບຸນປີໃໝ່ປະຈຳຊາດ.
ໝູ່ບ້ານ ຫ້າຫລູງ, ປະຈຸບັນແມ່ນໝູ່ບ້ານ ດັ່ງຫາຍ, ຂຶ້ນກັບເມືອງ ຫາຍອານ, ນະຄອນ ຫາຍຟ່ອງ, ໂດ່ງດັງຍ້ອນອາຊີບປູກດອກໄມ້ທີ່ມີມາກ່ອນນີ້ນັບຮ້ອຍປີ. ໝູ່ບ້ານນີ້ເຄີຍປູກດອກກຸຫລາບ, ດອກເປັນຈະມາດ, ດອກໄລເຢີນ…
ໝູ່ບ້ານ ທ໋າຍຟຽນ, ຫ່າງຈາກໃຈກາງນະຄອນ ດ່າລາດ 7 ກມ. ເມື່ອທຽບໃສ່ບັນດາເຂດອື່ນໆຢູ່ນະຄອນພູພຽງນີ້, ທ໋າຍຟຽນ ມີເງື່ອນໄຂທຳມະຊາດ ເອື້ອອຳນວຍຄວາມສະດວກເພື່ອປູກດອກໄມ້. ປະຈຸບັນ, ໝູ່ບ້ານນີ້ໄດ້ປູກດອກໄມ້ຫຼາຍຊະນິດທີ່ມີແນວພັນມາຈາກ ຝຣັ່ງ, ຍີ່ປຸ່ນ, ອິນໂດເນເຊຍ, ໂຮນລັງ…
ນອກຈາກນັ້ນ, ຢູ່ ດ່າລາດ ຍັງມີໝູ່ບ້ານດອກໄມ້ ຮ່າດົງ, ໄດ້ຮັບການສ້າງຕັ້ງແຕ່ປີ 1940 ໂດຍ 35 ຄອບຄົວທີ່ມາຈາກ ຮ່າໂນ້ຍ. ໝູ່ບ້ານແຫ່ງນີ້ໄດ້ຮັບຖືວ່າແມ່ນໝູ່ບ້ານປູກດອກໄມ້ທຳອິດຢູ່ ດ່າລາດ. ນີ້ກໍ່ແມ່ນບ່ອນດຶງດູດແຂກທ່ອງທ່ຽວມາຢ້ຽມຢາມເປັນຈຳນວນຫຼວງຫຼາຍ.
ໝູ່ບ້ານ ຊາແດກ, ແຂວງ ດົ່ງທາບ ໄດ້ຮັບຖືວ່າແມ່ນສູນຂອງດອກໄມ້ປະດັບຂະໜາດໃຫຫຍ່ສຸດຂອງ ຫວຽດນາມ.
ດ້ວຍອາຍຸເກືອບ 6 ທົດສະວັດ, ບ້ານ ເຟືອກດິ້ງ, ຕາແສງ ບິ່ງຮ່ວາເຟືອກ, ເມືອງ ລອງໂຮ່, ແຂວງ ຫວີງລອງ ແມ່ນບ່ອນປູກດອກເໝີຍໂດ່ງດັງທີ່ສຸດຂອງທົ່ວປະເທດ. ໝູ່ບ້ານນີ້ມີປະມານ 360 ຄອບຄົວ ແຕ່ມີເຖິງ 330 ຄອບຄົວປູກດອກເໝີຍ.
ລາຍການໂອ້ລົມກັບເພື່ອນລາວຂອງພວກເຮົາຂໍສິ້ນສຸດລົງພຽງເທົ່ານີ້, ຖ້າຫາກຜູ້ຟັງໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.825.6631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.