ແມ່ຍິງຊາວເຜົ່າຜູ້ໄທ ໃນຊຸດອາພອນປະຈຳເຜົ່າ

ເພື່ອນ ເຂັມເພັດ ທີ່ຮັກແພງ! ຖ້າຫາກວ່າ ການຟ້ອນ ລຳວົງ ແລະ ເຕັ້ນບັດສະລົບ ແມ່ນການຟ້ອນທີ່ເປັນມູນເຊື້ອຂອງ ລາວ, ສ່ວນສຳລັບພໍ່ແມ່ປະຊາຊົນເຜົ່າຜູ້ໄທ ຫວຽດນາມ ແລ້ວ, ນັ້ນແມ່ນການຟ້ອນແຊ ແລະ ເຕັ້ນຊາບ. ນີ້ແມ່ນການຟ້ອນ ແລະ ເຕັ້ນທີ່ຂາດບໍ່ໄດ້ໃນວັນບຸນ ຫຼືວ່າງານພົບປະແລກປ່ຽນຂອງປະຊາຊົນເຜົ່າຜູ້ໄທ. ປັດຈຸບັນ, ການຟ້ອນ ແລະ ເຕັ້ນດັ່ງກ່າວຍັງໄດ້ນຳເຂົ້າໃນລາຍການ ແລະ ການບໍລິການທ່ອງທ່ຽວເຂດຊຸມຊົນອີກດ້ວຍ. ຂອບໃຈເພື່ອນ ເຂັມເພັດ ໄດ້ຊົມພາບສາລະຄະດີ ແລະ ສົ່ງຈົດໝາຍມາແບ່ງປັນຄວາມຮູ້ສຶກ ແລະ ຄວາມຊົງຈຳທີ່ດີງາມນັ້ນໃຫ້ແກ່ພວກຂ້າພະເຈົ້າ.  ແລະ ຫວັງວ່າ ນີ້ກໍເປັນໜ້າທົດລອງເຂົ້າຮ່ວມ ເມື່ອທ່ານຜູ້ຟັງມາຢ້ຽມຢາມບັນດາແຂວງເຂດເຕິຍບັກ ຫວຽດນາມ.

ນອກຈາກນັ້ນແລ້ວ, ເພື່ອນເຂັມເພັດ ຍັງຖາມວ່າ: “ນອກຈາກຟ້ອນແຊ ແລ້ວ ຍັງມີປະເພດສິລະປະໃດແດ່ຂອງ ຫວຽດນາມ ໄດ້ຮັບການຮັບຮອງຈາກອົງການ UNESCO ວ່າ ເປັນມໍລະດົກວັດທະນະທຳບໍ່ເປັນວັດຖຸຂອງມວນມະນຸດ”.?

ຂັບກວານຫໍ້ ບັກນິງ (ພາບ: truyenhinhdulich.vn)

ໄລ່ມາຮອດປັດຈຸບັນ, ນັບທັງຟ້ອນແຊ ຂອງຊົນເຜົ່າຜູ້ໄທ, ອົງການ UNESCO ໄດ້ຮັບຮອງເອົາ 14 ມໍລະດົກບໍ່ເປັນວັດຖຸຂອງ ຫວຽດນາມ ເຂົ້າໃນບັນຊີມໍລະດົກວັດທະນະທຳບໍ່ເປັນວັດຖຸຂອງມວນມະນຸດ, ລວມມີ: ດົນຕີພະລາດຊະວັງ-ລາດຊະວົງ ຫງວຽນ; ວັດທະນະທຳກອງ - ຄ້ອງໄຕງວຽນ; ຂັບກວານຫໍ້ ບັກນິງ; ຂັບກາຈູ່; ງານບຸນຢອງ ຢູ່ວິຫານຝູ່ດົ໋ງ ແລະ ວິຫານຊອັກ; ຂັບຊວານ ຝູທໍ້, ການເຫຼື້ອມໃສບູຊາເຈົ້າຊີວິດຮຸ່ງ ຢູ່ ຝູທໍ້; ສິລະປະຂັບເດີ່ນກາຕ່າຍຕື໋ ພາກໃຕ້; ຂັບວີ, ຢ້ຳຢູ່ ເງະຕິງ; ພິທີກຳ ແລະ ການດຶງເຊືອກ; ການເຫຼື້ອມໃສບູຊາພະແມ່ ຕາມຝູ  ຂອງຄົນຫວຽດ; ສິລະປະຂັບບ່າຍຈ່ອຍ ຢູ່ເຂດພາກກາງ; ຂັບແທນຂອງຊົນເຜົ່າໄຕ່, ນຸ່ງ, ຜູ້ໄທ ແລະ ຫຼ້າສຸດນີ້ແມ່ນ ສິລະປະຟ້ອນແຊ ຂອງເຜົ່າຜູ້ໄທ.

    ຕໍ່ໄປແມ່ນຈົດໝາຍຂອງເພື່ອນ ເກສອນ ຢູ່ ແຂວງຈຳປາສັກ. ເພື່ອນ ເກສອນ ມີຄວາມສົນໃຈເຖິງຮູບແບບໂຮງໝໍອັດສະລິຍະຢູ່ແຂວງ ນິງທ້ວນ. ເພື່ອນຂຽນວ່າ: “ໃນຊຸມປີມໍ່ໆມານີ້, ຂະແໜງສາທາລະນະສຸກຂອງ ຫວຽດນາມ ມີການພັດທະນາຫຼາຍ. ຂ້າພະເຈົ້າມີຄວາມຮູ້ສຶກດີໃຈ ເມື່ອອ່ານຂ່າວວ່າ ຫວຽດນາມ ກຳລັງຮ່ວມມືຜັນຂະຫຍາຍການສ້າງໂຮງໝໍອັດສະລິຍະຢູ່ ແຂວງ ນິງທ້ວນ ເພາະວ່າ ປັດຈຸບັນ ມີຄົນ ລາວ ຫຼາຍຄົນ ມັກໄປກວດ ແລະ ປິ່ນປົວພະຍາດຢູ່ ຫວຽດນາມ.  ຂ້າພະເຈົ້າຢາກຮູ້ແຈ້ງກວ່າ ກ່ຽວກັບຮູບແບບໂຮງໝໍອັດສະລິຍະແຫ່ງນີ້. ຫວັງວ່າ ທາງບັນນາທິການລາຍການພາສາ ລາວ ຈະແນະນຳໃຫ້ຂ້າພະເຈົ້າຮູ້ຕື່ມອີກແດ່.”

ແນະນຳກ່ຽວກັບຮູບແບບໂຮງໝໍອັດສະລິຍະ (ພາບ: thanhnien.vn)

        ເພື່ອນ ເກສອນ ທີ່ຮັກແພງ! ຄືດັ່ງທີ່ທ່ານຮັບຮູ້ ຫວ່າງມໍ່ໆມານີ້, ກຸ່ມບໍລິສັດ Advantech ຫວຽດນາມ ແລະ ກຸ່ມບໍລິສັດ Intel ຂອງ ອາເມລິກາ ໄດ້ລົງນາມໃນການຮ່ວມມືຍຸດທະສາດກັບ ໂຮງໝໍຫຼາຍຂະແໜງ ຖາຍຮວ່າ  ຜັນຂະຫຍາຍການກໍ່ສ້າງໂຮງໝໍອັດສະລິຍະແບບຄົບວົງຈອນ. ຮູບແບບໂຮງໝໍອັດສະລິຍະແຫ່ງນີ້ໄດ້ຫັນເປັນດີຈີຕອນຢ່າງຮອບດ້ານ. ເມື່ອມາກວດ ແລະ ປິ່ນປົວຢູ່ໂຮງໝໍແຫ່ງນີ້, ເອກະສານຂອງຄົນເຈັບຈະໄດ້ຫັນເປັນດີຈີຕອນ ຊ່ວຍປະຢັດເວລາ, ຄ່າໃຊ້ຈ່າຍໃຫ້ແກ່ຄົນເຈັບ ແລະ ເພີ່ມສະມັດຕະພາບ ກໍຄືປະສິດທິຜົນໃນການປິ່ນປົວ. ຄົນເຈັບຈະໄດ້ຊົມໃຊ້ການບໍລິການແບບອັດສະລິຍະ, ເຊັ່ນ: ນຳໃຊ້ບັດອັດສະລິຍະ “Smart Card” ເພື່ອເຂົ້າລະບົບ ແລະ ນຳໃຊ້ທຸກການບໍລິການທີ່ໄດ້ປະມວນໄວ້ໃນລະບົບຂອງໂຮງໝໍອັດສະລິຍະ, ເປັນຕົ້ນແມ່ນ ລະບົບກວດຄົນເຂົ້າອອກໂຮງໝໍ (ACS); ລະບົບລຽນແຖວອັດສະລິຍະ (iQ); ລະບົບຫ້ອງຜ່າຕັດອັດສະລິຍະແບບປະມວນ (AVAS) ຕະຫຼອດຮອດມາດຕະການຢູ່ເຂດນອນປິ່ນປົວອັດສະລິຍະລະດັບຊັ້ນນຳ (iWard); ມາດຕະການແພດໝໍ ແລະ ນາງພະຍາບານໄປວີສິດ (visit) ຄົນເຈັບ (AMIS); ກວດ, ປິ່ນປົວຄົນເຈັບ ແລະ ບົ່ງມະຕິພະຍາດຈາກທາງໄກ (Telehealth)…

ເນື້ອໃນດັ່ງກ່າວກໍໄດ້ປິດທ້າຍລາຍການໂອ້ລົມກັບເພື່ອນລາວໃນມື້ນີ້. ຂໍຂອບໃຈທ່ານຜູ້ຟັງທຸກໆທ່ານທີ່ໃຫ້ກຽດຕິດຕາມຮັບຟັງ. ຖ້າຫາກທ່ານຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການ ຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນບ່າຈ້ຽວ, ຮ່າໂນ້ຍ. ຫຼືໂທລະສັບມາໂດຍກົງກໍ່ໄດ້ຕາມເບີໂທ 0084.243.825.6631 ຫຼືອີເມວlaovov5@gmail.com. ທ່ານຜູ້ຟັງ, ຜູ້ອ່ານກໍ່ສາມາດໃຫ້ຄຳຕິຊົມໃນເວັບໄຊ vovworld.vn ຂອງພວກເຮົາໄດ້.