(ພາບປະກອບ)
|
ໃນຈຸດເວລານີ້, ຫວຽດນາມພວມດຳເນີນການສະຫຼຸບການປະຕິບັດມະຕິ ສູນກາງພັກຄັ້ງທີ 5 ຊຸດທີ່ 8 ກ່ຽວກັບ “ ການກໍ່ສ້າງ ແລະ ພັດທະນາພື້ນຖານວັດທະນະທຳຫວຽດນາມທີ່ກ້າວໜ້າ, ເຂັ້ມຂົ້ນໄປດ້ວຍສີສັນຊາດ ”. ໂດຍໄດ້ຮັບການຜັນຂະຫຍາຍນັບແຕ່ປີ 1998 ມາຮອດປະຈຸບັນ, ການປະຕິບັດມະຕິດັ່ງກ່າວໄດ້ຊ່ວຍໃຫ້ຫວຽດນາມສາມາດຮັກສາສີສັນວັດທະນະທຳຂອງຊາດ ແລະ ຮັບເອົາບັນດາຄຸນຄ່າທີ່ຍອດຍິ່ງດ້ານວັດທະນະທຳຂອງໂລກ.
ບັນດານັກຄຸ້ມຄອງວັດທະນະທຳຫວຽດນາມລ້ວນແຕ່ເປັນເອກະພາບກັນໃຫ້ ຂໍ້ສັງເກດວ່າ ຜ່ານ 15 ປີແຫ່ງການປະຕິບັດມະຕິ ສູນກາງພັກຄັ້ງທີ 5 ຊຸດທີ່ 8, ການຮັບຮູ້ກ່ຽວກັບທີ່ຕັ້ງບົດບາດດ້ານວັດທະນະທຳໃນສັງຄົມໄດ້ຮັບການຍົກສູງຂຶ້ນຢ່າງເຫັນໄດ້ຊັດ. ແຫຼ່ງກຳລັງດ້ານວັດທະນະທຳ ຊຶ່ງກ່ອນອື່ນໝົດແມ່ນແຫຼ່ງກຳລັງຂອງມະນຸດ ແມ່ນນັບມື້ໄດ້ຮັບການເສີມຂະຫຍາຍ, ພັດທະນາຢ່່າງ ຮອບດ້ານ. ດ້ວຍທິດນຳທີ່ວ່າ “ ມະນຸດ ທັງແມ່ນເຈົ້າຂອງການປະດິດຄິດສ້າງ ດ້ານວັດທະນະທຳ, ທັງແມ່ນຈຸດໝາຍຂອງການພັດທະນາວັດທະນະທຳ, ຂະແໜງວັດທະນະທຳໄດ້ສ້າງວິຖີຊີວິດທີ່ດີງາມໃຫ້ແກ່ຊາວຫວຽດນາມ. ທ່ານຮອງສາດສະດາຈານ, ດຣ ຫງວຽນຈີ້ເບັນ, ຫົວໜ້າສະຖາບັນວັດທະນະທຳສິລະປະຫວຽດນາມໃຫ້ຮູ້ວ່າ :
“ 15 ປີ ທີ່ຜ່ານມາ, ວັດທະນະທຳ ສິລະປະ ໄດ້ປະກອບສ່ວນເພີ່ມພູນຄຸນສ້າງດ້ານບຸກຄະລິກກະພາບມະນຸດຫວຽດນາມ, ຊ່ວຍມະນຸດມຸ່ງໄປສູ່ຄວາມເປັນທຳ, ສຸດຈະລິດ ແລະ ຄວາມງາມ. ປະຈຸບັນ, ຜະລິດຕະພັນດ້ານວັດທະນະທຳແມ່ນມີຫຼາຍຮູບຫຼາຍສີ. ປະຊາຊົນມີໂອກາດໄດ້ສຳຜັດກັບ ຜະລິດຕະພັນດ້ານວັດທະນະທຳ, ໄດ້ຮັບເອົາສິ່ງຍອດຍິ່ງດ້ານວັດທະນະທຳຢູ່ທຸກແຫ່ງ, ໃນບັນດາໂຮງລະຄອນ, ໂຮງມະໂຫລະສົບ ຕະຫຼອດຮອດເທບວີດີໂອ, ແຜ່ນຊີດີ. ບັນດາຜູ້ເຂົ້າຮ່ວມການຜະລິດບັນດາ ຜະລິດຕະພັນດ້ານວັດທະນະທຳກໍນັບມື້ນັບຫຼາຍຂຶ້ນ, ກ່ອນນີ້, ມີພຽງແຕ່ລັດເທົ່ານັ້ນ, ປະຈຸບັນມີທັງພາກເອກະຊົນ ຊຶ່ງເຫັນໄດ້ຊັດກ່ວາມູ່ແມ່ນໃນຂົງເຂດຮູບເງົາ ແລະ ພິມຈຳໜ່າຍ ”
15 ປີທີ່ຜ່ານມາ ກໍແມ່ນໄລຍະທາງຢັ້ງຢືນຄຸນຄ່າບັນດາມໍລະດົກວັດທະນະທຳຫວຽດນາມ ຂະນະທີ່ຫວຽດນາມມີ 15 ມໍລະດົກວັດທະນະທຳໄດ້ຮັບການຮັບຮອງຕື່ມອີກຈາກອົງການວັດທະນະທຳ, ວິທະຍາສາດ ແລະສຶກສາແຫ່ງສະຫະປະຊາຊາດ UNESCO , ອັນໄດ້ຍົກຍອດຈຳນວນ ມໍລະດົກວັດທະນະທຳ ຂອງຫວຽດນາມ ທີ່ໄດ້ຮັບການຮັບຮອງຈາກອົງການ UNESCO ນັ້ນຂຶ້ນເປັນ 17 ມໍລະດົກວັດທະນະທຳ, ຢືນຢັນອັນດັບທີ 2 ໃນກຸ່ມອາຊຽນ. 15 ປີທີ່ຜ່ານມາ ກໍແມ່ນໄລຍະເພີ່ມທະວີຢ່າງກະໂດດຂັ້ນຂອງບັນດາງານບຸນ. ມີເກືອບ 8000 ງານບຸນໃນທົ່ວປະເທດ ໄດ້ສະແດງໃຫ້ເຫັນວ່າ ການດຳເນີນຊີວິດວັດທະນະທຳທີ່ມີຊີວິດຊີວາຂອງປະຊາຊົນທຸກຊັ້ນວັນນະ. ພິເສດໃນຂະບວນການ“ ທົ່ວປວງຊົນສາມັກຄີສ້າງຊີວິດວັດທະນະທຳ” ກໍແມ່ນໜຶ່ງໃນບັນດາຂີດໝາຍແຫ່ງການປະຕິບັດ ມະຕິ ສູນກາງພັກຄັ້ງທີ 5 ຊຸດທີ່ 8. ຈາກຈຳນວນຄອບຄົວວັດທະນະທຳກວ່າ 8 ລ້ານຄອບຄົວໃນປີ 2000, ຮອດປີ 2012, ທົ່ວປະເທດໄດ້ມີ ຄອບຄົວວັດທະນະທຳເຖິງກວ່າ 16 ລ້ານຄອບຄົວ. ຈຳນວນໝູ່ບ້ານບັນລຸມາດຕະຖານວັດທະນະທຳຈາກຕົວເລກ ກ່ວາ 17.000 ໝູ່ບ້ານໃນປີ 1998 ໄດ້ເພີ່ມຂຶ້ນທົບ 3 ເທົ່າດ້ວຍກ່ວາ 58.000 ໝູ່ບ້ານໃນປີ 2012. ກົດໝາຍສະບັບປັບປຸງເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍມໍລະດົກ ໄດ້ຮັບການປະກາດໃຊ້, ອັນໄດ້ປະກອບສ່ວນຊຸກຍູ້ດ້ານວັດທະນະທຳຂະຫຍາຍຕົວ ແລະ ເປີດກ້ວາງການເຊື່ອມໂຍງເຂົ້າກັບສາກົນ. ແລະ ກໍຍ້ອນມີກົດໝາຍໃໝ່ນີ້, ຫຼາຍປະເພດສະລະປະພື້ນເມືອງຂອງຫວຽດນາມໄດ້ຮັບການຟື້ນຟູໃຫ້ຫຼຸດພົ້ນອອກຈາກໄພອັນຕະລາຍຖືກສູນຫາຍໄປຄື : ຂັບກ່ອມລູກ, ຂັບສຳ ຫຼື ວັດທະນະທຳຄ້ອງ ໄຕງວຽນ...
ທ່ານ ຫງວຽນເທ້ຮຸ່ງ ຫົວໜ້າກົມໆມໍລະດົກວັດທະນະທຳ, ກະຊວງວັດທະນະທຳ, ກິລາ ແລະທ່ອງທ່ຽວຫວຽດນາມໃຫ້ຮູ້ວ່າ :
“ 15 ປີທີ່ຜ່ານມາ, ພວກເຮົາສາມາດສຳຫຼວດກວດກາປູຊະນີຍະສະຖານໄດ້ 40.000 ແຫ່ງ, ຈັດອັນດັບໃຫ້ປູຊະນີຍະສະຖານລະດັບຊາດເກືອບ 3.200 ແຫ່ງ, ປູຊະນີຍະສະຖານລະດັບຊາດພິເສດ 34 ແຫ່ງ. ມາຮອດປະຈຸບັນ, ຫວຽດນາມ ສ້າງຕັ້ງສູນຂໍ້ມູນກ່ຽວກັບມໍລະດົກວັດທະນະທຳບໍ່ມີຮູບຮ່າງໄດ້ 7 ແຫ່ງໃນຂອບເຂດທົ່ວປະເທດ. ສຳລັບຂົງເຂດພິພິທະພັນ, ປະຈຸບັນພວກເຮົາມີຫໍພິພິທະພັນ 138 ແຫ່ງ, ໃນນັ້ນ ມີ 17 ແຫ່ງແມ່ນຂອງເອກະຊົນ ”
ຍັງມີຜົນງານອີກອັນໜຶ່ງກໍໄດ້ຮັບການຮັບຮູ້, ນັ້ນແມ່ນມີກຸ່ມຫໍວັດທະນະທຳ, ຫິພິພິທະພັນ, ຫໍສະໝຸດຫຼາຍກຸ່ມໄດ້ຮັບການກໍ່ສ້າງດ້ວຍຂອບຂະໜາດໃຫຍ່ ແລະ ສວຍງາມ. ປະຈຸບັນ, ທົ່ວປະເທດມີ 70 ກຸ່ມຫໍວັດທະນະທຳ, ຫິພິພິທະພັນ, ຫໍສະໝຸດຂັ້ນແຂວງ, ສ່ວນຂັ້ນເມືອງມີກ່ວາ 540 ກຸ່ມຫໍວັດທະນະທຳ, ຫິພິພິທະພັນ, ຫໍສະໝຸດ, ສູນກິລາ ແລະ ກ່ວາ 4.500 ກຸ່ມຫໍວັດທະນະທຳ, ຫິພິພິທະພັນ, ຫໍສະໝຸດ, ສູນກິລາຂັ້ນຕາແສງ. ກ່ຽວກັບຂົງເຂດຮ່ວມມືວັດທະນະທຳສາກົນ, ທ່ານ ຫງວຽນວັນຕິງ ຫົວໜ້າກົມຮ່ວມມືສາກົນ, ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ໃຫ້ຮູ້ວ່າ :
“ ໃນປະຈຸບັນ, ຫວຽດນາມມີການພົວພັນຮ່ວມມືດ້ານວັດທະນະທຳກັບປະມານ 170 ປະເທດໃນໂລກ, ຫວຽດນາມໄດ້ເຊັນສັນຍາສາກົນປະມານ 200 ສະບັບກັບປະເທດຕ່າງໆກ່ຽວກັບຂົງເຂດຮ່ວມມືວັດທະນະທຳ. ມີ 7 ປະເທດໄດ້ເປີດ ສູນວັດທະນະທຳຢູ່ຫວຽດນາມ, ສ່ວນຢູ່ຕ່າງປະເທດ, ຫວຽດນາມມີສູນວັດທະນະທຳ 2 ແຫ່ງຢູ່ຝະລັ່ງ ແລະ ລາວ. ໃນໄລຍະທີ່ຈະມາເຖິງນີ້, ຫວຽດນາມຈະມີສູນວັດທະນະທຳຕື່ມອີກ 4 ແຫ່ງຕັ້ງຢູ່ຕ່່າງປະເທດ. ຜ່ານການພົວພັນແລກປ່ຽນວັດທະນະທຳສາກົນ, ລະດັບຄວາມຮູ້ດ້ານວິຊາສະເພາະຂອງຖັນແຖວຜູ້ເຮັດວຽກງານດ້ານວັດທະນະທຳໄດ້ຮັບການຍົກສູງຂຶ້ນອີກບາດກ້າວ ໜຶ່ງ ”
ຫວຽດນາມແມ່ນປະເທດປະກອບດ້ວຍ 54 ເຜົ່າ. ບັນດາເຜົ່າຫວຽດນາມລ້ວນແຕ່ມີມູນເຊື້ອວັດທະນະທຳມາແຕ່ດົນນານ, ຊຶ່ງສະແດງອອກຜ່ານສຽງເວົ້າ, ຕົວໜັງສື, ຊຸດອາພອນ, ການເຫຼື້ອມໄສ, ງານບຸນ, ການດຳເນີນຊີວິດວັດທະນະທຳເຂດຊຸມຊົນ.....ມະຕິ ສູນກາງພັກຄັ້ງທີ 5 ຊຸດທີ່ 8 ໄດ້ຢືນຢັນວ່າ ພື້ນຖານວັດທະນະທຳຫວຽດນາມແມ່ນພື້ນຖານວັດທະນະທຳທີ່ອຸດົມສົມບູນ, ຫຼາຍຮູບຫຼາຍສີ, ເຂັ້ມຂົ້ນໄປດ້ວຍ ສີສັນຊາດ ແລະ ເປັນເອກະພາບກັນໃນຄວາມມີ ຫຼາຍຮູບຫຼາຍສີ. ຍ້ອນເຫດນີ້ເອງ, ມະຕິ ສູນກາງພັກຄັ້ງທີ 5 ຊຸດທີ່ 8 ກໍສາມາດຕອບສະໜອງຄວາມຮຽກຮ້ອງຕ້ອງການໃນຂົງເຂດຊີວິດວັດທະນະທຳ, ຈິດໃຈໃຫ້ແກ່ຊາວຫວຽດນາມ, ມຸ່ງໄປສູ່ລະດັບສາກົນໃນໄລຍະເຊື່ອມໂຍງເຂົ້າກັບສາກົນ .