(vovworld)- ຜ່ານການຜັນໄປຂອງປະຫວັດສາດ, ພາຍຫລັງກວ່າ 500 ປີທີ່ຖືກສູນເສຍໄປ, ໝູ່ບ້ານ ເຄື່ອງປັ້ນດິນເຜົາ ຈູເດົ້າ ຢູ່ ເມືອງ ນາມແຊກ ແຂວງ ຫາຍເຢືອງ ໄດ້ຮັບການຟື້ນຕົວ ແລະ ພັດທະນາ. ປະຈຸບັນ ໝູ່ບ້ານ ເຄື່ອງປັ້ນດິນເຜົາຈູເດົ້າ ໄດ້ກາຍເປັນສະຖານທີ່ທ່ອງທ່ຽວໝູ່ບ້ານອາຊີບດຶງດູດນັກທ່ອງທ່ຽວມາຢ້ຽມຢາມ ແລະ ຊື້ຜະລິດຕະພັນ ເຄື່ອງປັ້ນດິນເຜົາ ເປັນຈຳນວນຫລວງຫລາຍ. ບົດຂຽນຂອງນັກຂ່າວຫວີງຟອງ ທີ່ມີຫົວຂໍ້ວ່າ: ເຄື່ອງປັ້ນດິນເຜົາ ຈູເດົ້າສິ່ງຍອດຍິ່ງຂອງວັດທະນະທຳຫວຽດນາມ
ເຄື່ອງປັ້ນດິນເຜົາ ຈູເດົ້າ
ພາບ:quehuong
|
ເຄື່ອງປັ້ນດິນເຜົາ ຈູເດົ້າ ພັດທະນາຢ່າງແຮງທີ່ສຸດໃນຕະຫລອດສະໄຫມລາດຊະວົງ ລີ - ເຈີນ -ເລ -ມາກ, ແຕ່ສັດຕະວັດທີ 14 ຮອດສັດຕະວັດທີ 17, ຫລັງຈາກນັ້ນ ຍ້ອນຖືກຜົນສະທ້ອນຈາກສົງຄາມ ສະນັ້ນ ອາຊີບຜະລິດ ເຄື່ອງປັ້ນດິນເຜົາ ຈູເດົ້າຖືກສູນຫາຍໄປເກືອບທັງໝົດ. ເລື່ອງຟື້ນຕົວຂອງໝູ່ບ້ານຜະລິດເຄື່ອງປັ້ນດິນເຜົາ ຈູເດົ້າ ແມ່ນເລີ່ມມາຈາກຈົດໝາຍສະບັບຫນຶ່ງຂອງທ່ານ Makoto Anabuki, ເລຂາຜູ້ທີ່ຫນຶ່ງ ສະຖານທູດ ຍີ່ປຸ່ນ ປະຈຳຫວຽດນາມ ສົ່ງເຖິງທ່ານ ໂງຢູຍດົງ, ເລຂາຄະນະພັກແຂວງ ຫາຍຮືງ (ປະຈຸບັນແມ່ນ ແຂວງ ຫາຍເຢືອງ ແລະ ແຂວງ ຮືງອຽນ) ເມື່ອປີ 1980. ໃນຈົດໝາຍມີຕອນຂຽນວ່າ:ໃນການໄປປະຕິບັດງານຢູ່ຕວກກີ, ທ່ານໄດ້ມີໂອກາດໄດ້ໄປຢ້ຽມຢາມຫໍພິພິທະພັນ Topkapi Saray ຢູ່ ນະຄອນຫລວງ Istanbul ແລະ ໄດ້ຮັບຊົມໂຖດອກໄມ້ເກົ່າແກ່ ສູງ 54 cm ຂອງ ຫວຽດນາມ. ຢູ່ໂຖດອກໄມ້ນັ້ນໄດ້ແຕ້ມຕົວຫນັງສືວ່າ: ປີ 1450, ຊ່າງຜະລິດເຄື່ອງປັ້ນດິນເຜົາມີນາມສະກຸນ ບູ່ຍ, ຊາວ ນາມແຊກ(Nam Sach). ທ່ານ ຫງວຽນຫືວຫຽບ, ຮອງຜູ້ອຳນວຍການບໍລິສັດຫຸ້ນສ່ວນ ເຄື່ອງປັ້ນດິນເຜົາ ຈູເດົ້າ ໃຫ້ຮູ້ວ່າ: ຈົດໝາຍສະບັບນັ້ນໄດ້ກາຍເປັນກຳລັງຫນູນເພື່ອຊອກຫາ ເຄື່ອງປັ້ນດິນເຜົາ ຈູເດົ້າ. ປີ 1983, ວິວັດການຊອກຫາຮ່ອງຮອຍຂອງປະເພດ ເຄື່ອງປັ້ນດິນເຜົາບູຮານຢູ່ ຈູເດົ້າ, ນາມແຊກ ໄດ້ເລີ່ມປະຕິບັດດ້ວຍການຊອກຄົ້ນຢູ່ວັດຖຸບູຮານຢູ່ບໍລິເວນທ້ອງຖິ່ນ. ຮອດປີ 2003, ບັນດານັກວິທະຍາສາດຫວຽດນາມ ຊອກຄົ້ນໄດ້ ວັດຖຸພັນເຄື່ອງປັ້ນດິນເຜົາຈູເດົ້າ 400.000 ຢ່າງ ໃນກຳປັ່ນລຳຫນຶ່ງຖືກຈົ່ມນ້ຳຢູ່ ກູລາວຈາມ ແຂວງ ກວ໋າງນາມ, ເຮັດໃຫ້ໂລກມີຄວາມສົນໃຈເຖິງບັນດາຄຸນຄ່າວັດທະນະທຳທີ່ເປັນເອກະລັກສະເພາະຂອງເຄື່ອງປັ້ນດິນເຜົາປະເພດນີ້. ມາຮອດປະຈຸບັນ, ບັນດານັກຮຽນຮູ້ຄົ້ນຄ້ວາກ່ຽວກັບສິລະປະກຳເຄື່ອງປັ້ນດິນເຜົາລ້ວນແຕ່ຮັບຮູ້ວ່າ ເຄື່ອງປັ້ນດິນເຜົາ ຈູເດົ້າແມ່ນປະເພດເຄື່ອງປັ້ນດິນເຜົາທີ່ສວຍງາມຢູ່ໃນໂລກໃນສັດຕະວັດທີ 14-17. ຮອດປີ 2001, ບໍລິສັດໃຫຍ່ການຄ້າ ຮ່າໂນ້ຍ ໄດ້ເລີ່ມຕົ້ນຄົ້ນຄ້ວາ, ຟື້ນຕົວເຄື່ອງປັ້ນດິນເຜົາເຄືອບ, ເຕັກນິກການຜະລິດ, ຮູບແບບຜະລິດຕະພັນ, ຈາກນັ້ນ ກໍ່ສ້າງໝູ່ບ້ານອາຊີບຜະລິດເຄື່ອງປັ້ນດິນເຜົາຈູເດົ້າຄືນໃຫມ່. ທ່ານ ຫງວຽນຫືວຫຽບ, ຮອງຜູ້ອຳນວຍການບໍລິສັດຫຸ້ນສ່ວນ ເຄື່ອງປັ້ນດິນເຜົາ ຈູເດົ້າ ໃຫ້ຮູ້ວ່າ:
“ຜ່ານການຄົ້ນຄ້ວາວິທະຍາສາດ ຊອກໄດ້ວິທີເຄືອບຂອງ ເຄື່ອງປັ້ນດິນເຜົາຈູເດົ້າ. ກ່ອນນີ້ ຄົນລຸ້ນກອ່ນ ບໍ່ນຳໃຊ້ເຄມີໃນການຜະລິດເຄືອບເຄື່ອງປັ້ນດິນເຜົາ ພຽງແຕ່ເອົາສິ່ງທີ່ມີຢູ່ແລ້ວໃນທຳມະຊາດ. ປະຈຸບັນ ພວກຂ້າພະເຈົ້າເອົາເຂົ້າແກບຂອງເຂົ້າຫນຽວເພື່ອນຳໃຊ້ໃນການຜະລິດເຄືອບ. ນ້ຳມືກແມ່ນນຳໃຊ້ສິ່ງທີ່ມີໃນທຳມະຊາດ. ສະນັ້ນ ເຄື່ອງປັ້ນດິນເຜົາຈູເດົ້າບໍ່ນຳໃຊ້ເຄມີເພື່ອຜະລິດ ແລະ ຍັງຮັກສາການເຄືອບບູຮານໃນເມື່ອກ່ອນໄວ້ໄດ້.”
ນັກສິລະປະການແຕ້ມລວດລາຍໃສ່ເຄື່ອງປັ້ນດິນເຜົາ
|
ເຄື່ອງປັ້ນດິນເຜົາ ຈູເດົ້າ ໄດ້ຮັບຖືວ່າແມ່ນເຄື່ອງປັ້ນດິນເຜົາແຫ່ງສາສະຫນາ ຍ້ອນບັນດາລວດລາຍລະອຽດລະອໍໃນບັນດາຜະລິດຕະພັນລ້ວນແຕ່ມີບັນດາຄຸນຄ່າວັດທະນະທຳສາສະຫນາພຸດ ແລະ ຂົງຈຶ້ພິເສດບັນດາຜະລິດຕະພັນລ້ວນແຕ່ສະແດງໃຫ້ເຫັນຄວາມງາມແບບທຳມະດາສາມັນຂອງຊາວຫວຽດນາມ, ເປັນສັນຍາລັກຂອງພື້ນຖານອະລິຍະທຳເຂດທົ່ງພຽງແມ່ນ້ຳແດງ. ບັນດາລວດລາຍທີ່ປະດັບປະດາໃສ່ຜະລິດຕະພັນເຄື່ອງປັ້ນດິນເຜົາຈູເດົ້າ ເຮັດໃຫ້ຜູ້ຊົມເຫັນໄດ້ສີສັນວັດທະນະທຳຂອງຊາວຫວຽດນາມ.
ຜະລິດຕະພັນ ເຄື່ອງປັ້ນດິນເຜົາ ຈູເດົ້າ ແຕ່ກອ່ນມາຮອດປະຈຸບັນ ພຽງແຕ່ເຮັດດ້ວຍສີມືອັນຄ່ອງແຄ້ວຂອງບັນດານັກສິລະປະການ, ບັນດາຊ່າງຜະລິດ ເຄື່ອງປັ້ນດິນເຜົາ ຈາກຂັ້ນຕອນປັ້ນ, ຫລໍ່ ຕະຫລອດຮອດການແຕ້ມລວດລາຍ. ຍ້ອນເຫດນັ້ນ ຈຶ່ງເຮັດໃຫ້ ເຄື່ອງປັ້ນດິນເຜົາ ຈູເດົ້າ ມີຄວາມແຕກຕ່າງກັບ ເຄື່ອງປັ້ນດິນເຜົາ ປະເພດອື່ນ. ນັກສິລະປະການ ເຈີນທິງ່ານ, ຊື່ງແມ່ນຫນຶ່ງໃນບັນດາຜູ້ທຳອິດໄດ້ຮັບການບຳລຸງສ້າງເມື່ອໝູ່ບ້ານອາຊີບຜະລິດເຄື່ອງປັ້ນດິນເຜົາຈູເດົ້າໄດ້ຮັບການຟື້ນຕົວ ໃຫ້ຮູ້ວ່າ:
“ໝູ່ບ້ານອາຊີບແຕ່ລະແຫ່ງ ລ້ວນແຕ່ມີຈຸດທີ່ເປັນເອກະລັກສະເພາະ ແຕ່ໝູ່ບ້ານອາຊີບ ເຄື່ອງປັ້ນດິນເຜົາ ຈູເດົ້າ ແມ່ນລົງເລິກບັນດາລວດລາຍທີ່ຕິດພັນກັບການຜະລິດກະສິກຳ, ຊີວິດປະຈຳວັນຂອງປູ່ຍ່າຕາຍາຍໃນເມື່ອກ່ອນ. ຮຽນອາຊີບ ພິເສດແມ່ນອາຊີບແຕ້ມລວດລາຍບໍ່ງ່າຍຄືດັ່ງອາຊີບອື່ນ. ເພື່ອກາຍເປັນນາຍຊ່າງເກັ່ງຕ້ອງເສຍເວລານັບຫນຶ່ງປີ ແລະ ຕ້ອງສຸດຈິດສຸດໃຈກັບອາຊີບ.”
ພ້ອມກັບການຟື້ນຕົວອາຊີບຜະລິດ ເຄື່ອງປັ້ນດິນເຜົາ, ບໍລິສັດຫຸ້ນສ່ວນ ເຄື່ອງປັ້ນດິນເຜົາ ຈູເດົ້າ ໄດ້ພ້ອມກັບວິສາຫະກິດ, ປະຊາຊົນ ເລີ່ມຕົ້ນເອົາໃຈໃສ່ພັດທະນາການທ່ອງທ່ຽວໝູ່ບ້ານອາຊີບ. ຈາກການກໍ່ສ້າງຫ້ອງວາງສະແດງກວ້າງນັບພັນໆຕາລາງແມັດ ເພື່ອແນະນຳບັນດາຜະລິດຕະພັນເຄື່ອງປັ້ນດິນເຜົາບູຮານຄືນໃຫມ່ຕະຫລອດຮອດການກໍ່ສ້າງສວນ ເຄື່ອງປັ້ນດິນເຜົາ, ຫໍບູຊາຜູ້ກໍ່ຕັ້ງອາຊີບ ເຄື່ອງປັ້ນດິນເຜົາ. ທ່ານ ຫງວຽນຫືວຫຽບ, ຮອງຜູ້ອຳນວຍການບໍລິສັດຫຸ້ນສ່ວນ ເຄື່ອງປັ້ນດິນເຜົາ ຈູເດົ້າ ໃຫ້ຮູ້ວ່າ:
“ການກຳນົດທິດພັດທະນາປະເພດ ເຄື່ອງປັ້ນດິນເຜົາຈູເດົ້າໃຫ້ກາຍເປັນປະເພດ ເຄື່ອງປັ້ນດິນເຜົາສິລະປະກຳມີຄຸນນະພາບສູງຂອງຫວຽດນາມ ແລະ ໂລກ, ສະນັ້ນ ບັນດາຜະລິດຕະພັນຕ້ອງສະອາດ, ບໍ່ກໍ່ມົນລະພິດ ແລະ ມີດ້ານສິລະປະກຳສູງ. ພວກຂ້າພະເຈົ້າຈະສ້າງເຂດອາຊີບ, ໝູ່ບ້ານອາຊີບແຫ່ງຫນຶ່ງເພື່ອໃຫ້ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຊົມ, ທັງນີ້ກໍພັດທະນາການທ່ອງທ່ຽວ. ປະຈຸບັນ ນອກຈາກການຜະລິດແລ້ວ, ພວກຂ້າພະເຈົ້າກໍມີຄວາມເອົາໃຈໃສ່ເປັນພິເສດເຖິງທັດສະນີຍະພາບ, ສິ່ງແວດລ້ອມ ເພື່ອຮັບໃຊ້ການທ່ອງທ່ຽວ.”
ປະຈຸບັນ ມີ ຫໍພິພິທະພັນ 46 ແຫ່ງ ຢູ່ 32 ປະເທດໃນໂລກ ແລະ ພາກພື້ນ ພວມວາງສະແດງ ເຄື່ອງປັ້ນດິນເຜົາບູຮານ ຈູເດົ້າ. ຜູ້ຊົມໃຊ້ຂອງ 20 ປະເທດໃນໂລກໄດ້ນຳໃຊ້ຜະລິດຕະພັນຂອງໝູ່ບ້ານ ເຄື່ອງປັ້ນດິນເຜົາ ຈູເດົ້າ. ເຄື່ອງປັ້ນດິນເຜົາ ຈູເດົ້າ ໄດ້ກາຍເປັນຄວາມເອກອ້າງທະນົງໃຈຂອງສິລະປະ ການຜະລິດເຄື່ອງປັ້ນດິນເຜົາ ຫວຽດນາມ.