(vovworld) - ບຸນປີໃໝ່ປະຈຳຊາດ (ບຸນເຕັດ) ປີມະເສງ 2013, ຄົນງານໄດ້ພັກການ 9 ມື້, ແຕ່ລະຄົນກໍ່ມີວິທີຕ້ອນຮັບບຸນເຕັດທີ່ແຕກຕ່າງກັນ. ສ່ວນຫຼາຍແມ່ນກັບເມືອບ້ານເກີດເມືອງນອນຕ້ອນຮັບບຸນເຕັດພ້ອມກັບຄອບຄົວ, ແຕ່ກໍ່ມີຫລາຍຄົນເລືອກເຟັ້ນລາຍການທ່ອງທ່ຽວເພື່ອພັກຜ່ອນຢ່ອນອາລົມ ພາຍຫລັງເຮັດວຽກຢ່າງອິດເມື່ອຍໃນໜຶ່ງປີທີ່ຜ່ານມາ. ປີນີ້ຍ້ອນໄດ້ພັກການເປັນເວລາຫລາຍມື້, ສະນັ້ນ, ນັກທ່ອງທ່ຽວສ່ວນຫລາຍເຄີຍເລືອກເຟັ້ນລາຍການທ່ອງທ່ຽວຕົ້ນລະດູບານໃຫມ່ໃນເວລາແຕ່ 3 ວັນເຖິງ 1 ສັບປະດາ. ນອກຈາກລາຍການທ່ອງທ່ຽວຢູ່ພາກກາງແລ້ວ, ບັນດາລາຍການທ່ອງທ່ຽວຢູ່ພາກເຫນືອກໍແມ່ນສະຖານເລືອກເຟັ້ນຂອງນັກທ່ອງທ່ຽວຫລາຍຄົນ.
ຮູບພາບກ່ຽວກັບ ດາລາດ
ພາບ:internet
|
ບຸນເຕັດປີນີ້, ບັນດາບໍລິສັດທ່ອງທ່ຽວໄດ້ສ້າງນັບຮ້ອຍຮູບການທ່ອງທ່ຽວເພື່ອໃຫ້ນັກທ່ອງທ່ຽວເລືອກເຟັ້ນ. ບັນດາລາຍການທ່ອງທ່ຽວພາຍໃນປະເທດເຊິ່ງນັກທ່ອງທ່ຽວໄດ້ເລືອກເຟັ້ນຫລາຍສຸດຍັງຄົງແມ່ນຫາດຊາຍທະເລຢູ່ພາກກາງຄື: ຍາຈາງ, ຟານທຽດ, ກົນດ໋າວ, ຟູກວກ. ເພື່ອຫລີກລ້ຽງອາກາດທີ່ຫນາວຈັດຢູ່ພາກເໜືອ ນັກທ່ອງທ່ຽວຈະໄປອາບນ້ຳທະເລທີ່ສະອາດຂຽວງາມ ຫລືຕາກແດດ, ດຳນ້ຳເພື່ອຮັບຊົມຫີນປະກາລັງ ແລະ ຮັບປະທານອາຫານພິເສດສະເພາະດ້ວຍບັນດາເຍື່ອງອາຫານທະເລທີ່ແຊບນົວຂອງພາກກາງຫວຽດນາມ. ບຸນເຕັດປີນີ້, ດາລາດ ຊຶ່ງແມ່ນນະຄອນຢູ່ເຂດພູພຽງ ກໍແມ່ນສະຖານທີ່ນັກທ່ອງທ່ຽວນິຍົມກວ່າໝູ່. ໂດຍໄດ້ຮັບການຂະຫນານນາມວ່າ ແມ່ນນະຄອນແຫ່ງດອກໄມ້, ນະຄອນແຫ່ງນ້ຳໝອກ ຫລື ນະຄອນລະດູບານໃຫມ່, ຍາມໃດ ດາລາດກໍເປັນສະຖານທີ່ດຶງດູດນັກທ່ອງທ່ຽວທີ່ມາຈາກທຸກສາລະທິດມາຢ້ຽມຢາມເປັນຈຳນວນຫລວງຫລາຍ ບໍ່ພຽງແຕ່ຍ້ອນທິວທັດທຳມະຊາດທີ່ສວຍສົດງົດງາມດັ່ງໃນຝັນ, ອາກາດປອດໂປ່ງເຢັນສະບາຍເທົ່ານັ້ນ ຫາກ ດາລາດ ຍັງມີທັດສະນີຍະພາບຫລາຍແຫ່ງທີ່ຕິດພັນກັບເທບນິຍາຍແຫ່ງຄວາມຮັກອີກດ້ວຍ. ທ່ານນາງ ຫງວຽນທິງວຽນ, ຮອງຫົວຫນ້າພະແນກວັດທະນະທຳກິລາ ແລະ ທ່ອງທ່ຽວ ແຂວງ ເລີມດົ່ງ ໃຫ້ຮູ້ວ່າ: ໂອກາດບຸນເຕັດ ຈຳນວນນັກທ່ອງທ່ຽວມາຢ້ຽມຢາມ ດາລາດ ຫລາຍພໍສົມຄວນ, ພິເສດແມ່ນພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດ.
“ຊາວ ຫວຽດນາມ ອາໄສຢູ່ຕ່າງປະເທດ ມາຢ້ຽມຢາມ ດາລາດ ຍ້ອນເຂົາເຈົ້າເຫັນວ່າ ທິວທັດທຳມະຊາດຢູ່ ດາລາດ ສວຍງາມ, ອາກາດປອດໂປ່ງເຢັນສະບາຍ. ນອກນັ້ນ ແລະ ປະຊາຊົນຢູ່ທີ່ນີ້ກໍ່ມີຄວາມຮັກແພງແຂກຄົນຫຼາຍ. ໃນໂອກາດບຸນເຕັດ, ການນຳແຂວງ ໄດ້ຈັດຕັ້ງງານພົບປະສັງສັນກັບພໍ່ແມ່ປະຊາຊົນຊາວ ຫວຽດນາ ອາໄສຢູ່ຕ່າງປະເທດ ແລະ ທາງແຂວງຍັງສ້າງຕັ້ງສະມາຄົມຊາວຫວຽດນາມ ອາໄສຢູ່ຕ່າງປະເທດ ຮັກຊາດຢູ່ ເລິມດົ່ງ ອີກດ້ວຍ.”
ມາຢ້ຽມຢາມ ດາລາດ ເປັນຄັ້ງທີ 2, ຄັ້ງກ່ອນແມ່ນກົງກັບລະດູຮ້ອນ ສ່ວນຄັ້ງນີ້ແມ່ນບຸນເຕັດຂອງຊາວຫວຽດນາມ, ອ້າຍ Stefan ນັກທ່ອງທ່ຽວມາຈາກ ຍີ່ປຸ່ນ ຮູ້ສຶກປະທັບໃຈຫລາຍເມື່ອໄດ້ຮັບຊົມດອກໄມ້ນາໆຊະນິດຢູ່ ດາລາ ພວມເບ່ັງບານສີສັນຫລາກຫລາຍທີ່ສວຍງາມ. ນອກນັ້ນ ທິວທັດທຳມະຊາດ, ກໍຄືຄວາມຮັກແພງແຂກຄົນຂອງປະຊາຊົນ ດາລາດ ກໍສ້າງຄວາມດຶງດູດໃຈຫລາຍ.
“ຊາວ ດາລາດ ແມ່ນຜູ້ຮັກແພງແຂກຄົນ ແລະ ສະຫນິດສະຫນົມ. ບັນດາເຍື່ອງອາຫານຢູ່ທີ່ນີ້ກໍແຊບຫລາຍ. ອາກາດປອດໂປ່ງເຢັນສະບາຍ. ບັນຍາກາດໃນຍາມຄຳ່ຄືນແມ່ນຟົດຟື້ນທີ່ສຸດ.”
ປີນີ້ ຈຳນວນນັກທ່ອງທ່ຽວຈົດທະບຽນໄປທ່ອງທ່ຽວຢູ່ພາກເຫນືອ ເພີ່ມຂຶ້ນຫລາຍເມື່ອທຽບໃສ່ປີກ່ອນ. ບຸນເຕັດປີນີ້, ບໍລິສັດທ່ອງທ່ຽວ Vietravel ໄດ້ສ້າງ300 ລາຍການທ່ອງທ່ຽວ ພາຍໃນ ແລະຕ່າງປະເທດ. ສະເພາະ ນັກທ່ອງທ່ຽວຈົດທະບຽນໄປຢ້ຽມຢາມ ພາກເຫນືອ ຫວຽດນາມ ກວມເຖິງ 50%. ນາງ ທູເຮືອງ ພະນັກງານ maketing, ສັງກັດບໍລິສັດທ່ອງທ່ຽວຫຸ້ນສ່ວນສາກົນແຄນຊິງ, ຮ່າໂນ້ຍ ໃຫ້ຮູ້ວ່າ: ປີນີ້ ຈຳນວນນັກທ່ອງທ່ຽວຈົດທະບຽນໄປຢ້ຽມຢາມ ຊາປາ, ຮ້າລອງ ເພີ່ມຂຶ້ນເມື່ອທຽບໃສ່ປີ 2012.
“ຈຳນວນນັກທ່ອງທ່ຽວເຂົ້າຮ່ວມລາຍການທ່ອງທ່ຽວ ຮ້າລອງ ປີນີ້ແມ່ນຫລາຍກວ່າ ເພາະວ່າ ຮ້າລອງ ຫາກໍໄດ້ຮັບຮອງແມ່ນຫນຶ່ງໃນຈຳນວນ 7 ສິ່ງມະຫັດສະຈັນໃຫມ່ ຂອງໂລກ. ບໍລິສັດພວກຂ້າພະເຈົ້າຈັດຕັ້ງລາຍການທ່ອງທ່ຽວ ຮ້າລອງ ໃນທຸກມື້ ແລະ ຕະຫລອດບຸນເຕັດ. ລາຄາບໍລິການສຳລັບລາຍການທ່ອງທ່ຽວ ໃນໂອກາດບຸນເຕັດກໍ່ບໍ່ເພີ່ມຂຶ້ນ. ນັກທ່ອງທ່ຽວມາຈາກ ເຢຍລະມັນ, ລັດເຊຍ, ອາເມລິກາ ເມື່ອມາຢ້ຽມຢາມ ຫວຽດນາມ ລ້ວນແຕ່ໄປຢ້ຽມຢາມ ຮ້າລອງ. ພວກຂ້າພະເຈົ້າມີກຳປັ່ນບັນລຸມາດຕະຖານ 3 ດາວ, ສວຍງາມ ແລະ ທັນສະໄຫມ ເພື່ອຮັບໃຊ້ນັກທ່ອງທ່ຽວ. ເມື່ອຢ້ຽມຢາມ ຮ້າລອງ, ນັກທ່ອງທ່ຽວຈະໄດ້ຮັບຊົມຖ້ຳ, ໝູ່ບ້ານຊາວປະມົງ, ພາຍເຮືອ, ຕືກປາ.”
ນາງ ທູເຮືອງ ຍັງໃຫ້ຮູ້ຕື່ມອີກວ່າ, ເມື່ອອອກຈາກ ຮ້າລອງ, ນັກທ່ອງທ່ຽວໄປຄົ້ນຫາ ຊາປາ ແຂວງ ລາວກາຍ.
“ລາຍການທ່ອງທ່ຽວໄປຢ້ຽມຢາມ ຊາປາ ສ່ວນຫລາຍແມ່ນ 3 ຄືນ 2 ວັນ ຫລື 4 ຄືນ 5 ວັນ. ຊາປາ ກໍແມ່ນສະຖານທີ່ທ່ອງທ່ຽວອັນດູດດື່ມ ເພາະວ່າ ມາຢ້ຽມຢາມແຫ່ງນີ້ ນັກທ່ອງທ່ຽວໄດ້ເຂົ້າຮ່ວມການດຳລົງຊີວິດຂອງປະຊາຊົນ. ສະນັ້ນ ນັກທ່ອງທ່ຽວຈຶ່ງໄປຢ້ຽມຢາມ ຊາປາ ໃນໂອກາດບຸນເຕັດເປັນຈຳນວນຫລວງຫລາຍ. ”
ຊາປາ
ພາບ:internet
|
ນອກຈາກ ຊາປາ ແລ້ວ, ບັນດາສະຖານທີ່ທ່ອງທ່ຽວພາກເຫນືອ ພວມໄດ້ຮັບການເລຶອກເຟັ້ນຈາກນັກທ່ອງທ່ຽວຫລາຍຄົນ ນັ້ນແມ່ນ ມົກເຈົາ ຢູ່່ແຂວງ ເຊີນລາ, ພູຫລວງ ຢູ່ແຂວງ ແທງຮວາ, ເຂດປອດໄພ ຢູ່ແຂວງ ຕວຽນກວາງ, ຫນອງ ບາເບ໋ ແຂວງ ບັກກ້ານ ດ້ວຍໄລຍະທາງໄປມາແມ່ນເໝາະສົມ, ສາມາດໄປທ່ອງທ່ຽວໃນເວລາ 3 - 4 ມື້ໄດ້.