ກອງປະຊຸມຄັ້ງທີ 10, ຄະນະບໍລິຫານງານສູນກາງພັກຊຸດທີ XIII ກຳນົດສັງກາດບຸກບືນຂອງຊາດເລີ່ມແຕ່ ກອງປະຊຸມໃຫຍ່ຜູ້ແທນທົ່ວປະເທດຂອງພັກຄອມມຸນິດ ຫວຽດນາມ (ພາບ: VOV, VTC, Chinhphu,vn, Quochoi.vn, Thanh Nien..)

1.  ກະກຽມທ່ວງທ່າແລະກຳລັງ, ຕັດສິນໃຈນຳປະເທດຊາດກ້າວເຂົ້າສູ່ງສັງກາດບຸກບືນ

ບັນດາຜົນງານທີ່ບັນລຸໄດ້ພາຍຫຼັງ 40 ປີແຫ່ງການປ່ຽນແປງໃໝ່ພາຍໃຕ້ການນຳພາຂອງພັກໄດ້ຊ່ວຍໃຫ້ຫວຽດນາມສ້າງໄດ້ທ່ວງທ່າແລະກຳລັງແຮງແກ່ການພັດທະນາຢ່າງກະໂດດຂັ້ນໃນໄລຍະຕໍ່ໜ້າ. ທ່ານເລຂາທິການໃຫຍ່ ໂຕເລິມຢັ້ງຢືນວ່ານີ້ແມ່ນຈຸດເວລາ “ເຕົ້າໂຮມ” ທັງທ່າໄດ້ປຽບ, ກຳລັງແຮງເພື່ອນຳປະເທດກ້າວເຂົ້າສູ່ສັງກາດໃໝ່, ສັງກາດບຸກບືນຂອງຊາດຖັດຈາກສັງກາດເອກະລາດ, ເສລີພາບ, ສ້າງສັງຄົມນິຍົມແລະສັງກາດປ່ຽນແປງໃໝ່.

ກອງປະຊຸມຄັ້ງທີ 10, ຄະນະບໍລິຫານງານສູນກາງພັກຄອມມູນິດຫວຽດນາມຊຸດທີ XIII  ກຳນົດວ່າສັງກາດບຸກບືນຂອງຊາດຫວຽດນາມຈະເລີ່ມຈາກກອງປະຊຸມໃຫຍ່ຜູ້ແທນທົ່ວປະເທດຂອງພັກຄອມມູນິດຫວຽດນາມຊຸດທີ XIV. ເພື່ອບັນລຸໄດ້ເປົ້າໝາຍດັ່ງກ່າວ, ນັບແຕ່ນີ້ເປັນຕົ້ນໄປ, ທົ່ວພັກ, ທົ່ວປວງຊົນທັງຊາດຕ້ອງສຸມໃສ່ 3 ບຸກທະລຸຍຸດທະສາດນັ້ນແມ່ນປະຕິຮູບລະບອບລະບຽບການ, ສ້າງກົງຈັດລັດໃຫ້ກະທັດລັດແລະຍົກສູງຄຸນນະພາບແຫຼ່ງຊັບພະຍາກອນມະນຸດ, ທັງຄຸ້ມຄອງຢ່າງແໜ້ນແຟ້ນ, ທັງສ້າງສາພັດທະນາ, ພ້ອມດຽວກັນນັ້ນ, ກໍ່ປຸກລຸກຈິດໃຈອັນສະຫງ່າຂອງຊາດ, ຈິດໃຈເປັນເຈົ້າຕົນເອງ, ມີຄວາມໝັ້ນໃຈຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພີ່ງຕົນເອງຢ່າງເຂັ້ມແຂງ, ສົມທົບກຳລັງແຮງແຫ່ງຊາດກັບກຳລັງແຮງຂອງຍຸກສະໄໝຢ່າງແໜ້ນແຟ້ນ, ນຳປະເທດຊາດພັດທະນາຢ່າງຮອບດ້ານ, ເຂັ້ມແຂງ, ບຸກທະລຸແລະກ້າວໄກ.

2.  ທ່ານເລຂາທິການໃຫຍ່ ຫງວຽນຝູຈ້ອງເຖິງແກ່ມໍລະນະກຳ

ວັນທີ 19 ກໍລະກົດ 2024, ທ່ານເລຂາທິການໃຫຍ່ ຫງວຽນຝູຈ້ອງ ເຖິງແກ່ມໍລະນະກຳພາຍຫຼັງເຈັບໜັກມາເປັນໄລຍະໜຶ່ງນັ້ນໄດ້ເຮັດໃຫ້ທົ່ວພັກ, ທົ່ວປວງຊົນທັງຊາດແລະເພື່ອນມິດສາກົນຮູ້ສຶກໂສກເສົ້າເສຍດາຍ. ໃນບົດສະດຸດີກ່າວໃນພິທີໄວ້ອາໄລທ່ານເລຂາທິການໃຫຍ່ ຫງວຽນຝູຈ້ອງຊີ້ແຈ້ງວ່າ: “ໂດຍລຸລ່ວງໃນແນວຄິດຂອງສະຫາຍຫງວຽນຝູຈ້ອງຍາມໃດກໍແມ່ນປະຊາຊົນ, ແມ່ນມະນຸດ, ແມ່ນການສຸດຈິດສຸດໃຈຮັບໃຊ້ປະຊາຊົນ, ສ້າງຊາວຫວຽດນາມ ໃໝ່ສັງຄົມນິຍົມແລະປັບປຸງຄວາມສາມັກຄີເອກະພາບຢ່າງບໍ່ຢຸດຢັ້ງ, ກ່ອນອື່ນໝົດແມ່ນຄວາມສາມັກຄີເປັນເອກະພາບພາຍໃນພັກ, ມະຫາສາມັກຄີທົ່ວປວງຊົນທັງຊາດແລະຄວາມສາມັກຄີສາກົນອັນບໍລິສຸດຜຸດຜ່ອງ”.

ທັງຊີວິດແລະພາລະກິດຂອງທ່ານເລຂາທິການໃຫຍ່ ຫງວຽນຝູຈ້ອງໄດ້ສະແດງໃຫ້ເຫັນຄວາມຢຶດໝັ້ນໃນການຕໍ່ສູ້ຢ່າງບໍ່ຮູ້ຢຸດຮູ້ຢ່ອນຂອງນັກຄອມມູນິດຜູ້ຈົງຮັກພັກດີ, ດຳລົງຊີວິດແບບປະຢັດມັດທະຍັດ, ເຫັນແກ່ຜົນປະໂຫຍດສ່ວນລວມເໜືອກວ່າຜົນປະໂຫຍດສ່ວນຕົວແລະເປັນແບບຢ່າງທີ່ດີກ່ຽວກັບການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈີມິນ. ບັນດາຄຸນຄ່າເຊິ່ງທ່ານເລຂາທິການໃຫຍ່ ຫງວຽນຝູຈ້ອງປະໄວ້ກ່ຽວກັບລະບົບການເມືອງອັນໝັ້ນແກ່ນ, ມີຄວາມເຊື່ອໝັ້ນອັນໝັ້ນໜຽວຕໍ່ກຳລັງແຮງແຫ່ງຄວາມສາມັກຄີທົ່ວປວງຊົນທັງຊາດ ຈະເປັນມໍລະດົກອັນລ້ຳຄ່າຂອງພັກ,ລັດແລະປະຊາຊົນຫວຽດນາມຕະຫຼອດໄປ.

3.  ການປະຕິວັດສ້າງກົງຈັກລັດໃຫ້ກະທັດລັດ - ບາດລ້ຽວໃນການບໍລິຫານປະເທດຊາດ

ຜ່ານ 7 ປີແຫ່ງການປະຕິບັດມະຕິເລກທີ 18 -NQ/TWລົງວັນທີ 25 ຕຸລາ 2017 ຂອງຄະນະບໍລິຫານງານສູນກາງພັກຊຸດທີ XII ກ່ຽວກັບການປ່ຽນແປງໃໝ່, ສັບຊ້ອນການຈັດຕັ້ງກົງຈັກຂອງລະບົບການເມືອງ, ໄລ່ມາຮອດປັດຈຸບັນ, ຫວຽດນາມ ສາມາດບັນລຸໄດ້ໝາກຜົນສຳຄັນຈຳນວນໜຶ່ງ. ເຖິງຢ່າງໃດກໍຕາມ, ການຈັດຕັ້ງກົງຈັກຍັງມີຊ້ຳຊ້ອນ, ມີຫຼາຍຊັ້ນຂັ້ນ, ຫຼາຍຫົວໜ່ວຍຕາງໜ້າ; ປະສິດທິພາບ, ປະສິດທິຜົນການເຄື່ອນໄຫວຍັງບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການ, ໜ້າທີ່. ຮອດວັນທີ 25 ພະຈິກ, ຢູ່ກອງປະຊຸມຄະນະບໍລິຫານງານສູນກາງພັກຊຸດທີ XIII, ທ່ານເລຂາທິການໃຫຍ່ ໂຕເລິມຮຽກຮ້ອງໃຫ້ຄະນະພັກທຸກຂັ້ນ, ອົງການຈັດຕັ້ງພັກ, ສຳນັກງານ, ກົມກອງ, ທຸກຂັ້ນ, ທຸກຂະແໜງການ, ກ່ອນອື່ນໝົດແມ່ນພະນັກງານການນຳ, ຜູ້ເປັນຫົວໜ້າຕ້ອງເປັນແບບຢ່າງ, ເປັນເຈົ້າການ, ປະຕິບັດໜ້າທີ່ທີ່ໄດ້ຮັບການມອບໝາຍຢ່າງເດັດດ່ຽວຂ້ຽວຂາດຕາມເນື້ອໃນຈິດໃຈ “ທັງແລ່ນທັງຈັດແຖວ”;  “ສູນກາງບໍ່ລໍຖ້າຂັ້ນແຂວງ, ຂັ້ນແຂວງບໍ່ລໍຖ້າຂັ້ນເມືອງ, ຂັ້ນເມືອງບໍ່ລໍຖ້າຂັ້ນຮາກຖານ”; ຕັດສິນໃຈປະຕິບັດສຳເລັດການສະຫຼຸບການປະຕິບັດມະຕິສະບັບເລກທີ 18 -NQ/TWແລະລາຍງານຕໍ່ຄະນະບໍລິຫານງານສູນກາງພັກກ່ຽວກັບແບບວິທີສັບຊ້ອນ, ສ້າງກົງຈັກການຈັດຕັ້ງຂອງລະບົບການເມືອງໃຫ້ສົມບູນແບບໃນໄຕມາດ ທີ 1 ປີ 2025.

ການສັບຊ້ອນ, ຈັດຕັ້ງກົງຈັກລັດໃຫ້ກະທັດລັດແມ່ນການປະຕິວັດທີ່ຮຽກຮ້ອງໃຫ້ມີຄວາມກ້າຫານ, ການເສຍສະຫຼະຂອງພະນັກງານ, ລັດຖະກອນພາລະກອນ, ຮຽກຮ້ອງຕ້ອງປະຕິບັດຢ່າງພາວະວິໄສ, ທ່ຽງທຳ, ມີວິທະຍາສາດເພື່ອກະກຽມນຳປະເທດຊາດກ້າວເຂົ້າສູ່ສັງກາດໃໝ່.

4.  ເສດຖະກິດຫວຽດນາມເຕີບໂຕຢ່າງເຂັ້ມແຂງ, GDP ບັນລຸປະມານ 7 %

ເສດຖະກິດຫວຽດນາມຍັງຮັກສາທ່ວງທ່າຟື້ນຕົວຢ່າງຕັ້ງໜ້າໃນປີ 2024. ການເຕີບໂຕ GDP ຄາດວ່າບັນລຸປະມານ 7%, ໄພເງິນເຟີ້ໄດ້ຮັບການຄວບຄຸມຕ່ຳກວ່າ 4%, ບັນລຸເປົ້າໝາຍທີ່ໄດ້ວາງອອກ. ວົງເງິນນຳເຂົ້າສົ່ງອອກບັນລຸລະດັບສະຖິຕິ 800 ຕື້ USD, ການສົ່ງອອກເກີນດຸນບັນລຸເກືອບ 23 ຕື້ USD, ເຊິ່ງເປັນລະດັບສູງສຸດນັບແຕ່ກ່ອນມາຮອດປັດຈຸບັນ. ໃນສະພາບການເສດຖະກິດໂລກມີການຜັນແປຫຼາຍຢ່າງ, ການເຕີບໂຕນີ້ບໍ່ພຽງແຕ່ແມ່ນພື້ນຖານແກ່ການພັດທະນາໃນປີ 2025 ເທົ່ານັ້ນຫາກຍັງແມ່ນທ່າອຽງພັດທະນາທີ່ວ່ອງໄວຂອງພື້ນຖານເສດຖະກິດຫວຽດນາມອີກດ້ວຍ.

5.  ບູລະນະບັນດານາມຕຳແໜ່ງການນຳພັກແລະລັດ, ສືບຕໍ່ປະຕິບັດເນື້ອໃນຈິດໃຈ “ບໍ່ມີເຂດຫ້າມ” ໃນການປະຕິບັດລະບຽບວິໄນພະນັກງານຜູ້ທີ່ລະເມີດ

ປີ 2024, ວຽກງານບູລະນະບຸກຄະລາກອນຂັ້ນສູງຂອງພັກແລະລັດໄດ້ຮັບການດຳເນີນດ້ວຍຄວາມເປັນເອກະພາບສູງ, ມຸ່ງໄປເຖິງຈຸດປະສົງຍົກສູງປະສິດທິຜົນການນຳພາແລະການຄຸ້ມຄອງລັດ, ຮັບປະກັນການພັດທະນາເປັນປົກກະຕິ. ກອງປະຊຸມຄະນະບໍລິຫານງານສູນກາງພັກຄອມມູນິດຫວຽດນາມ ຊຸດທີ XIII ໄດ້ເຄົາລົບເຊີດຊູ,ດ້ວຍຈຳນວນບັດສະໜັບສະໜູນ 100% ເລືອກຕັ້ງສະຫາຍໂຕເລິມ, ກຳມະການກົມການເມືອງ, ປະທານປະເທດຮັບດຳລົງຕຳແໜ່ງເປັນເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ. ສະພາແຫ່ງຊາດຊຸດທີ XV ກໍ່ໄດ້ເລືອກຕັ້ງທ່ານປະທານສະພາແຫ່ງຊາດເຈິ່ນແທັງເໝິນແລະທ່ານປະທານປະເທດເລືອງເກື່ອງ, ພ້ອມດຽວກັນນັ້ນແມ່ນການບູລະນະບັນດາຕຳແໜ່ງການນຳຢູ່ສະພາແຫ່ງຊາດ, ລັດຖະບານແລະບັນດາອົງການຕຸລາການ.

ວຽກງານກໍ່ສ້າງ, ປັບປຸງພັກແລະຕໍ່ສູ້ປ້ອງກັນ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້ ສືບຕໍ່ແມ່ນຈຸດສຸມໃນປີ 2024. ມີພະນັກງານຂັ້ນສູງຂອງພັກ, ລັດຫຼາຍສະຫາຍຖືກລົງວິໄນ, ດຳເນີນຄະດີອາຍານັ້ນໄດ້ຊີ້ໃຫ້ເຫັນແຜນນະໂຍບາຍ “ບໍ່ມີເຂດຫ້າມ, ບໍ່ມີກໍລະນີພິເສດ”, ສະແດງໃຫ້ເຫັນຄວາມຕັດສິນໃຈໃນການສ້າງລະບົບການເມືອງທີ່ປອດໃສ, ໝັ້ນຄົງເຂັ້ມແຂງ.

6.  ພະຍຸລູກທີ 3 ກໍ່ຜົນເສຍຫາຍຢ່າງໜັກໜ່ວງກ່ຽວກັບຊີວິດອິນຊີແລະຊັບສິນຢູ່ເຂດພາກເໜືອຫວຽດນາມ

ພະຍຸລູກທີ 3, ພະຍຸYagiແມ່ນພະຍຸທີ່ມີຄວາມແຮງທີ່ສຸດໃນຮອບເວລາ 30 ປີຜ່ານມາຢູ່ເຂດທະເລຕາເວັນອອກ, ພັດຖະຫຼົ່ມເຂົ້າພາກເໜືອຫວຽດນາມໃນວັນທີ 7 ກັນຍາ 2024 ດ້ວຍແຮງລົມຂຶ້ນເຖິງລະດັບ 17, ອັນໄດ້ກໍ່ຜົນເສຍຫາຍຢ່າງໜັກໜ່ວງທີ່ສຸດ. ພະຍຸແລະຜົນກະທົບຫຼັງພະຍຸໄດ້ເຮັດໃຫ້ຝົນຕົກໜັກ, ນ້ຳຖ້ວມໄຫຼຊຸແລະດິນເຊາະເຈື່ອນເປັນວົງກວ້າງ, ເຮັດໃຫ້ 323 ຄົນເສຍຊີວິດ,  22 ຄົນຫາຍສາບສູນແລະ 1.978 ຄົນຖືກບາດເຈັບ, ຜົນເສຍຫາຍດ້ານເສດຖະກິດຄາດວ່າຄິດເປັນເງິນກວ່າ 81.700 ຕື້ດົ່ງ. ລັດຖະບານໄດ້ເປັນເຈົ້າການຊີ້ນຳ, ມີການຮັບມືໂດຍໄວ, ຈາກໄກແລະທັນການ, ປ້ອງກັນພະຍຸຢ່າງຂ້ຽວຂາດ; ດ້ວຍການປະກາດໃຊ້ບັນດາມະຕິສຸກເສີນເພື່ອແນໃສ່ແກ້ໄຂຜົນຮ້າຍຢ້ອນຫຼັງ, ຮັບປະກັນການສ້າງພື້ນຖານໂຄງລ່າງຄືນໃໝ່ ແລະນຳຊີວິດການເປັນຢູ່ຂອງປະຊາຊົນກັບຄືນເປັນປົກກະຕິໂດຍໄວ.

ໃນໄພພິບັດທຳມະຊາດ, ນ້ຳໃຈ “ອຸ້ມຊູຊ່ວຍເຫຼືອກັນ” ຂອງຊາດຫວຽດນາມໄດ້ຮັບການປຸກລຸກຢ່າງແຮງ. ບັນດາການເຄື່ອນໄຫວເພື່ອການກຸສົນໄດ້ດຳເນີນໃນທົ່ວປະເທດ, ຊ່ວຍໃຫ້ປະຊາຊົນຜູ້ປະສົບເຄາະຮ້າຍຜ່ານຜ່າຄວາມຫຍຸ້ງຍາກ, ກັບຄືນສູ່ການດຳລົງຊີວິດທີ່ເປັນປົກກະຕິ.

7.  ບຸກທະລຸກ່ຽວກັບພື້ນຖານໂຄງລ່າງຄົມມະນາຄົມແລະພະລັງງານຈາກບັນດາໂຄງການຍຸດທະສາດ

ປີ 2024, ບັນດາໂຄງການຍຸດທະສາດກ່ຽວກັບຄົມມະນາຄົມແລະພະລັງງານໄດ້ ແລະພວມສ້າງກຳລັງໜູນພັດທະນາເສດຖະກິດ, ຮັບປະກັນພະລັງງານແບບຍືນຍົງ, ຢັ້ງຢືນວິໄສທັດຍຸດທະສາດແກ່ການພັດທະນາແບບຍືນຍົງຂອງປະເທດຊາດ. ໄລ່ມາຮອດປັດຈຸບັນ, ເສັ້ນທາງຄວາມໄວສູງຍາວກວ່າ 2.000 ກິໂລແມັດໄດ້ນຳເຂົ້າໃຊ້ງານແລະສູ້ຊົນກໍ່ສ້າງເສັ້ນທາງຄວາມໄວສູງ 3.000 ກິໂລແມັດສຳເລັດໃນປີ 2025. ໂຄງການສາຍສົ່ງໄຟຟ້າ 500 Kvຕາຂ່າຍ 3 ກວ໋າງແຈກ - ໂຝໂນ໊ຍໄດ້ກໍ່ສ້າງສຳເລັດ.

ໃນກອງປະຊຸມສະໄໝສາມັນຄັ້ງທີ 8, ສະພາແຫ່ງຊາດຫວຽດນາມຊຸດທີ XV ໄດ້ຮັບຮອງເອົາມະຕິວ່າດ້ວຍແຜນນະໂຍບາຍການລົງທຶນໂຄງການເສັ້ນທາງລົດໄຟຄວາມໄວສູງເໜືອ - ໃຕ້, ວາງເປົ້າໝາຍກໍ່ສ້າງສຳເລັດໂດຍພື້ນຖານໃນປີ 2035. ສະພາແຫ່ງຊາດກໍໄດ້ລົງມະຕິເລີ່ມກໍ່ສ້າງໂຄງການໄຟຟ້ານິວເຄຼຍນິງທ້ວນຄືນໃໝ່, ແນໃສ່ຮັບປະກັນຄວາມໝັ້ນຄົງດ້ານພະລັງງານແລະມຸ່ງໄປເຖິງຈຸດປະສົງຫຼຸດການປ່ອຍອາຍພິດລົງເປັນ 0 ໃນປີ 2050. ສຳລັບໂຄງການສະໜາມບິນ ລອງແທ່ງ, ສະພາແຫ່ງຊາດໄດ້ຕົກລົງເຫັນດີໄລຍະທີ1ລົງທຶນກໍ່ສ້າງລານບິນຂຶ້ນລົງສອງເລນ ຢູ່ທາງທິດເໜືອແລະອາຄານສາກົນ ພ້ອມກັບບັນດາລາຍການອື່ນໆ ດ້ວຍຄວາມສາມາດບັນຈຸຜູ້ໂດຍສານ 25 ລ້ານຄົນຕໍ່ປີແລະສິນຄ້າ 1,2 ລ້ານໂຕນຕໍ່ປີ.

8.  ປ່ຽນແປງໃໝ່ຈິນຕະນາການນິຕິບັນຍັດແລະບັນດານະໂຍບາຍຊີ້ຂາດບຸກທະລຸ

ສະພາແຫ່ງຊາດຊຸດທີ XV ໄດ້ສ້າງຂີດໝາຍອັນພົ້ນເດັ່ນໃນປີ 2024 ດ້ວຍຫຼາຍນະໂຍບາຍຊີ້ນຳປ່ຽນແປງໃໝ່ຈິນຕະນາການນິຕິບັນຍັດ ແລະແກ້ໄຂບັນດາບັນຫາສຳຄັນຂອງຊາດ. ດ້ວຍກອງປະຊຸມສະໄໝສາມັນ 2 ຄັ້ງແລະກອງປະຊຸມວິສາມັນ 2 ຄັ້ງໃນປີ 2024, ສະພາແຫ່ງຊາດຊຸດທີ XVໄດ້ພິຈາລະນາແລະຕັດສິນຫຼາຍບັນດາສຳຄັນກ່ຽວຂ້ອງເຖິງວຽກງານນິຕິບັນຍັດ, ຕິດຕາມກວດກາສູງສຸດແລະຕົກລົງບັນດາບັນຫາສຳຄັນຂອງປະເທດຊາດ.

ກົດໝາຍ 18 ສະບັບແລະມະຕິ 21 ສະບັບໄດ້ຮັບການຮັບຮອງເອົາລວມມີບັນດາຂໍ້ຕົກລົງບຸກທະລຸຄືອະນຸມັດໃຫ້ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍເຮືອນຢູ່ ແລະກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບມີຜົນບັງຄັບໃຊ້ໄວກວ່າ 5 ເດືອນ, ແຕ່ວັນທີ 1 ສິງຫາ 2024. ກົດໝາຍສະບັບເພີ່ມເຕີມ, ປັບປຸງຕ່າງໆທີ່ສຳຄັນລວມມີ: ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍການລົງທຶນພາກລັດແລະກົດໝາຍວ່າດ້ວຍການວາງແຜນຜັງໄດ້ຮັບການຮັບຮອງເອົາເພື່ອແນໃສ່ແກ້ໄຂຈຸດອຸດຕັນກ່ຽວກັບລະບອບລະບຽບການຊຸກຍູ້ການຈັດແບ່ງຂັ້ນແລະປົດປ່ອຍກຳລັງການຜະລິດ. ດ້ວຍຈິດໃຈປ່ຽນແປງໃໝ່, ເດັດດ່ຽວລົບລ້າງຈິນຕະນາການ “ບໍ່ຄຸ້ມຄອງໄດ້ແມ່ນຈະຫ້າມ”, ສະພາແຫ່ງຊາດໄດ້ສ້າງກອບນິຕິກຳໃຫ້ແກ່ບັນດາຂົງເຂດໃໝ່, ສົ່ງເສີມການປະດິດຄິດສ້າງແລະແກ້ໄຂແຫຼ່ງກຳລັງໃຫ້ລຸລ່ວງ, ສ້າງພື້ນຖານໃຫ້ແກ່ການພັດທະນາແບບຍືນຍົງຂອງປະເທດຊາດໃນສັງກາດໃໝ່.

9.  ທົ່ວປະເທດຮ່ວມແຮງຮ່ວມໃຈລົບລ້າງເຮືອນຢູ່ຊົ່ວຄາວ, ເຮືອນຮົ່ວໂຊມ

ວັນທີ 5 ຕຸລາ 2024, ລັດຖະບານແລະຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມໄດ້ຈັດຕັ້ງລາຍການປຸກລະດົມລົບລ້າງເຮືອນຢູ່ຊົ່ວຄາວ, ເຮືອນຮົ່ວໂຊມໃນຂອບເຂດທົ່ວປະເທດດ້ວຍຫົວຂໍ້ “ຊາຍຄາອົບອຸ່ນໃຫ້ແກ່ພໍ່ແມ່ພີ່ນ້ອງຂອງຂ້ອຍ”. ທ່ານນາຍົກລັດຖະມົນຕີຫວຽດນາມຟ້າມມິງຈິງ ຮຽກຮ້ອງໃຫ້ພໍ່ແມ່ປະຊາຊົນທົ່ວປະເທດຮ່ວມແຮງຮ່ວມໃຈປະກອບສ່ວນປະຕິບັດເປົ້າໝາຍລົບລ້າງເຮືອນຢູ່ຊົ່ວຄາວ, ເຮືອນຮົ່ວໂຊມ 153.000 ຫຼັງໃນທົ່ວປະເທດໃຫ້ສຳເລັດກ່ອນວັນທີ 31 ທັນວາ 2025.

ທ່ານນາຍົກລັດຖະມົນຕີຮຽກຮ້ອງໃຫ້ບັນດາກະຊວງ, ຂະແໜງການ, ຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງເຕົ້າໂຮມການນຳ, ຊີ້ນຳ, ເສີມຂະຫຍາຍບົດບາດແລະ ຕິດພັນຄວາມຮັບຜິດຊອບຂອງຜູ້ນຳໜ້າໃນການຍົກສູງຄຸນນະພາບ, ປະສິດທິຜົນບັນດາແຫຼ່ງກຳລັງເພື່ອປະຕິບັດວຽກງານໜູນຊ່ວຍເຮືອນຢູ່ໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ, ຄອບຄົວທຸກຍາກ, ໃກ້ຂັ້ນທຸກຍາກ, ສ້າງແຜນການລະອຽດເພື່ອຈັດຕັ້ງ, ຜັນຂະຫຍາຍເປົ້າໝາຍດັ່ງກ່າວໃຫ້ມີປະສິດທິຜົນ.

ປີ 2024 ແມ່ນປີທີ່ຕະຫຼາດອະສັງຫາລິມະຊັບ ແລະ ຄຳ ມີການເໜັງຕິງຫຼາຍຢ່າງ (ພາບ: VOV, VTC, Chinhphu,vn, Quochoi.vn, Thanh Nien)

10.           ຕະຫຼາດອະສັງຫາລິມະຊັບແລະຄຳມີການເໜັງຕິງຫຼາຍ

ປີ 2024, ແມ່ນປີທີ່ເຕັມໄປດ້ວຍການເໜັງຕິງໃນຕະຫຼາດອະສັງຫາລິມະຊັບ ແລະຄຳຢູ່ ຫວຽດນາມ. ລາຄາເຮືອນຢູ່ໄດ້ເພີ່ມຂຶ້ນສູງກວ່າລະດັບລາຍຮັບຂອງປະຊາຊົນ, ອັນໄດ້ເຮັດໃຫ້ເກີດການຂາດຄວາມດຸ່ນດ່ຽງລະຫວ່າງມູນຄ່າຊັບສິນແລະຄວາມສາມາດໃນການໃຊ້ຈ່າຍຢ່າງເຫັນໄດ້ຊັດ.

ຕະຫຼາດຄຳກໍໄດ້ຮັບການຮັບຮູ້ວ່າຂຶ້ນລາຄາຍ້ອນຖືກຜົນກະທົບຈາກຕະຫຼາດຄຳໂລກ. ບັນດາການຜັນແປດັ່ງກ່າວຮຽກຮ້ອງຕ້ອງມີນະໂຍບາຍຄວບຄຸມຢ່າງມີປະສິດທິຜົນກວ່າ, ມຸ່ງໄປເຖິງການຈຳກັດການກັກຕຸນ, ສົ່ງເສີມການລົງທຶນໄລຍະຍາວແລະ ຮັບປະກັນໃຫ້ຕະຫຼາດພັດທະນາຢ່າງກົມກຽວກັບຜົນປະໂຫຍດຂອງປະຊາຊົນ ແລະພື້ນຖານເສດຖະກິດ./.