ທ່ານນາງ ຫງວຽນທິກິມເງິນ ໄດ້ກາຍເປັນປະທານຄົນໃໝ່ຂອງສະພາແຫ່ງຊາດຫວຽດນາມ ພາຍຫຼັງປ່ອນບັດຢູ່ຫໍປະຊຸມເມື່ອຕອນເຊົ້າວັນທີ 31/3. ພ້ອມກັນນັ້ນ, ທ່ານນາງກໍແມ່ນແມ່ຍິງຄົນທຳອິດທີ່ດຳລົງຕຳແໜ່ງນີ້ໃນປະຫວັດສາດກວ່າ 70 ປີແຫ່ງການສ້າງຕັ້ງສະພາແຫ່ງຊາດຫວຽດນາມ. ເຫດການນີ້ສືບຕໍ່ເພີ່ມກຳລັງແຮງໃຫ້ແກ່ກິດຈະການປ່ຽນແປງໃໝ່ຂອງສະພາແຫ່ງຊາດຫວຽດນາມ, ທັງເປັນການຢັ້ງຢືນສິດສະເໝີພາບລະຫວ່າງຍິ່ງ-ຊາຍ .
ທ່ານນາງ ຫງວຽນທິກິມເງິນ ແມ່ນປະທານສະພາແຫ່ງຊາດຍິງຄົນທຳອິດໃນປະຫວັດສາດແຫ່ງການສ້າງ ຕັ້ງ ແລະ ຂະຫຍາຍຕົວຂອງສະພາແຫ່ງຊາດຫວຽດນາມ (quochoi) |
ທ່ານນາງ ຫງວຽນທິກິມເງິນ ແມ່ນປະທານສະພາແຫ່ງຊາດຍິງຄົນທຳອິດໃນປະຫວັດສາດແຫ່ງການສ້າງຕັ້ງ ແລະ ຂະຫຍາຍຕົວຂອງສະພາແຫ່ງຊາດຫວຽດນາມ ຊຶ່ງແມ່ນໜຶ່ງໃນຈຳນວນ 4 ຕຳແໜ່ງທີ່ສຳຄັນກວ່າໝູ່ໃນກົງຈັກນຳພາປະເທດຊາດ. ໃນຈຸດເວລາທຳອິດທີ່ສາບານຕົວເຂົ້າດຳລົງຕຳແໜ່ງ, ທ່ານນາງປະທານສະພາແຫ່ງຊາດຄົນໃໝ່ໄດ້ມີຄຳສາບານຕົວດ້ວຍຄວາມກະຕືລືລົ້ນ, ຫວັງຈົ່ງຮັກພັກດີກັບປະເທດຊາດ, ປະຊາຊົນ ແລະ ລັດຖະທຳມະນູນຢ່າງເດັດຂາດ.
ຫາງສຽງເຫັນດີເຫັນພ້ອມ
ເລື່ອງ ສະພາແຫ່ງຊາດຫວຽດນາມມີປະທານຄົນໃໝ່ເປັນແມ່ຍິງ ແມ່ນໄດ້ຮັບການຕີລາຄາສູງຈາກສະມາຊິກສະພາແຫ່ງຊາດ. ທ່ານນາງ ກາວທິຊວນ ກຳມະການຜູ້ປະຈຳການສະພາຊົນເຜົ່າຂອງ ສະພາແຫ່ງຊາດຫວຽດນາມໄດ້ສະແດງຄວາມພາກພູມໃຈຕໍ່ເຫດການນີ້. ຕາມທ່ານນາງແລ້ວ, ສິ່ງນີ້ໄດ້ສະແດງໃຫ້ເຫັນການປ່ຽນແປງໃໝ່ຂອງພັກ, ລັດໃນວຽກງານພະນັກງານ. ທ່ານນາງ ສ.ສ.ຊ ກາວທິຊວນປາດຖະໜາວ່າປະທານສະພາແຫ່ງຊາດຄົນໃໝ່ຈະມີຂໍ້ລິເລີ່ມຫຼາຍຂໍ້ເພື່ອຊ່ວຍ ສະພາແຫ່ງຊາດຫວຽດນາມປ່ຽນແປງໃໝ່, ມີບາດກ້າວບຸກທະລຸໃນການເຄື່ອນໄຫວ, ຕອບສະໜອງຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງທັງຫຼາຍ. ທ່ານ ເຢືອງຈຸງກ໋ວກ ສ.ສ.ຊ ແຂວງດົງນາຍ ຢືນຢັນວ່າ ໃນປະຫວັດສາດ, ຫວຽດນາມໄດ້ມີແມ່ຍິງຫຼາຍຄົນທີ່ເປັນຜູ້ນຳພາເຊັ່ນ: 2 ພະນາງຈຶງ, ພະນາງຈ້ຽວ. ທ່ານ ເຢືອງຈຸງກ໋ວກ ຫວັງວ່າ ໄປຄຽງຄູ່ກັບເລື່ອງພ້ອມກັບສະພາແຫ່ງຊາດຜ່ານຜ່າບັນດາຄວາມຫຍຸ້ງຍາກ, ສິ່ງທ້າທາຍຢ່າງໃຫຍ່ຫຼວງຕໍ່ເສດຖະກິດ ແລະ ການເຊື່ອມໂຍງເຂົ້າກັບສາກົນນັ້ນ, ທ່ານນາງປະທານສະພາແຫ່ງຊາດຫວຽດນາມຈະສ້າງຂີດໝາຍທີ່ແຂງແຮງ, ເດັດດຽວໃນໜ້າທີ່ປົກປັກຮັກສາອະທິປະໄຕແຫ່ງຊາດ. ທ່ານ ໂດ້ວັນເດືອງ ສ.ສ.ຊ ນະຄອນໂຮ່ຈິມິນ ປາດຖະໜາວ່າ :
“ ຄຳສາບານຕົວຂອງປະທານສະພາແຫ່ງຊາດແມ່ນມີຄວາມໝາຍທີ່ສຸດ. ຂ້າພະເຈົ້າຫວັງຢ່າງຍິ່ງວ່າ ປະທານສະພາແຫ່ງຊາດຍິງຂອງຫວຽດນາມຈະມີການປະກອບສ່ວນຢ່າງໃຫຍ່ຫຼວງເພື່ອນຳພາສະພາແຫ່ງຊາດໃຫ້ກາຍເປັນອົງການຕົວແທນສູງສຸດຂອງປະຊາຊົນ, ອົງການທີ່ມີສິດອຳນາດແຫ່ງລັດສູງສຸດ ”
ຂ່າວຄາວກ່ຽວກັບເລື່ອງຫວຽດນາມມີປະທານສະພາແຫ່ງຊາດຍິງຄົນທຳອິດ ໄດ້ຖືກບັນດາສຳນັກຂ່າວສານຕ່າງປະເທດໃຫ້ຂ່າວຢ່າງຫຼວງຫຼາຍ, ໃນນັ້ນ ລ້ວນແຕ່ສະຫງວນຄຳຕີລາຄາອັນດີງາມໃຫ້ແກ່ທ່ານນາງ ຫງວຽນທິກິມເງິນ . ຂ່າວສານ AFP ໄດ້ມີບົດໂດຍຂຽນວ່າ : ຫວຽດນາມເປັນຄັ້ງທຳອິດໄດ້ເລືອກເຟັ້ນເອົາແມ່ຍິ່ງຄົນໜຶ່ງເຂົ້າດຳລົງຕຳແໜ່ງເປັນປະທານ ສະພາແຫ່ງຊາດທີ່ສາມາດແບກຫາບໜ້າທີ່, ແລະ ແມ່ນໜຶ່ງໃນ 4 ຕຳແໜ່ງສູງສຸດຂອງປະເທດຊາດ. ສ່ວນສຳນັກຂ່າວສານ CNA ຂອງສິງກະໂປໄດ້ໃຫ້ຂ່າວວ່າ ທ່ານນາງ ຫງວຽນທິກິມເງິນ ແມ່ນຜູ້ນຳທີ່ສົມກັບອິດທິພົນຊື່ສຽງ. ໃນຂະນະນັ້ນ, ຕາມນັກຂ່າວ VOV ປະຈຳຝະລັ່ງ, ໜັງສືພິມ Liberation ໄດ້ຊີ້ແຈ້ງກ່ຽວກັບອັດຕາການສະໜັບສະໜູນ 95,5% ທີ່ສະຫງວນໃຫ້ແກ່ທ່ານນາງ ຫງວຽນທິກິມເງິນ. ບົດໜັງສືພິມຢືນຢັນວ່າ ເຖິງວ່າ ສ.ສ.ຊສ່ວນຫຼາຍຢູ່ຫວຽດນາມແມ່ນເພດຊາຍກໍຕາມ, ແຕ່ທ່ານນາງ ຫງວຽນທິກິມເງິນໄດ້ຮັບ 472 ບັດສະໜັບສະໜູນໃນຈຳນວນທັງໝົດ 481 ບັດໃນກອງປະຊຸມສະໄໝສາມັນສະພາແຫ່ງຊາດຫວຽດນາມຊຸດທີ 13. ສ່ວນໜັງສືພິມນິວຢອກທາມ ຂອງອາເມລິກາ ໃຫ້ຂ່າວວ່າ : ເລື່ອງທ່ານນາງ ຫງວຽນທິກິມເງິນໄດ້ຮັບເລືອກຕັ້ງເປັນປະທານສະພາແຫ່ງຊາດ ກໍຍ້ອນທ່ານນາງມີລະດັບວິຊາສະເພາະ, ກໍຄືມີຄວາມເກັ່ງກ້າສາມາດໃນການນຳພາ ກໍຄືມີຄວາມສຸພາບຮຽບຮ້ອຍ ແລະ ມີສະເໜ່.
ຢັ້ງຢືນສິດສະເໝີພາບລະຫວ່າງຍິງ-ຊາຍ
ເລື່ອງທ່ານນາງ ຫງວຽນທິກິມເງິນໄດ້ຮັບເລືອກຕັ້ງເປັນປະທານສະພາແຫ່ງຊາດແມ່ນບາດກ້າວທີ່ສຳຄັນໃນກິດຈະການປະຕິບັດສິດສະເໝີພາບລະຫວ່າງຍິງ-ຊາຍ, ຊຶ່ງແມ່ນພາລະກິດໄດ້ເລີ່ມຕົ້ນຈາກການປະຕິວັດເດືອນສິງຫາປີ 1945 ຂະນະທີ່ທ່ານປະທານໂຮ່ຈິມິນ ຢືນຢັນກ່ຽວກັບການກໍ່ສ້າງສັງຄົມ, ໃນນັ້ນມີ ສິດສະເໝີພາບລະຫວ່າງຍິງ-ຊາຍ. ທ່ານ ເລຍືຕຽນ ສ.ສ.ຊ ແຂວງກວາງຈິ ຕີລາຄາວ່າ ເປັນຄັ້ງທຳອິດທີ່ ສະພາແຫ່ງຊາດຫວຽດນາມມີປະທານເປັນແມ່ຍິງ. ສິ່ງນີ້ແມ່ນການຢັ້ງຢືນແຜນນະໂຍບາຍເຊີດຊູບົດບາດຂອງແມ່ຍິງໃນການນຳພາ ແລະ ຄຸ້ມຄອງປະເທດຊາດ. ທ່ານນາງ ບຸຍທິອານ ສ.ສ.ຊ ນະຄອນຮ່າໂນ້ຍໃຫ້ຮູ້ວ່າ : (ເທບ) : “ ສິ່ງນີ້ ສະແດງໃຫ້ເຫັນບາດກ້າວທີ່ຍາວໄກກ່ຽວກັບສິດສະເໝີພາບລະຫວ່າງຍິງ-ຊາຍຢູ່ຫວຽດນາມ. ສຳລັບແມ່ຍິງພວກຂ້າພະເຈົ້າ, ບໍ່ພຽງແຕ່ສຳລັບຫວຽດນາມເທົ່ານັ້ນ, ຫາກຍັງນັບທັງພາກພື້ນອີກດ້ວຍ. ສິ່ງນີ້ແມ່ນຄວາມເອກອ້າງທະນົງໃຈເມື່ອທ່ານນາງ ຫງວຽນທິກິມເງິນໄດ້ຮັບເລືອກຕັ້ງເປັນປະທານ ສະພາແຫ່ງຊາດຫວຽດນາມ ”
ເຫັນແຈ້ງບົດບາດ, ໜ້າທີ່ຮັບຜິດຊອບຂອງຕົນ, ພາຍຫຼັງສາບານຕົວເຂົ້າດຳລົງຕຳແໜ່ງຢ່າງເປັນທາງການ, ທ່ານນາງ ຫງວຽນທິກິມເງິນ ໄດ້ຢືນຢັນອີກເທື່ອໜຶ່ງຕໍ່ໜ້າສະພາແຫ່ງຊາດວ່າ:
“ ຂ້າພະເຈົ້າຂໍຈົດຈຳຄຳສາບານຕົວຂອງຕົນຕໍ່ໜ້າ ສະພາແຫ່ງຊາດເພື່ອປະຕິບັດໜ້າທີ່, ສິດອຳນາດຂອງປະທານສະພາແຫ່ງຊາດຢ່າງຖືກຕ້ອງຕາມລະບຽບກົດໝາຍ, ຂ້າພະເຈົ້າຈະພ້ອມກັບຄະນະປະຈຳ ສະພາແຫ່ງຊາດຫວຽດນາມນຳພາການປະຕິບັດໜ້າທີ່ຂອງອົງການຕົວແທນສູງສຸດຂອງປະເທດ, ອົງການທີ່ມີສິດອຳນາດລັດສູງສຸດຂອງປະເທດ ສ.ສ ຫວຽດນາມ ”
ດ້ວຍຖານະຕຳແໜ່ງເປັນຜູ້ນຳອົງການທີ່ມີສິດອຳນາດລັດສູງສຸດຂອງປະເທດ ສ.ສ ຫວຽດນາມນັ້ນ, ຫວັງວ່າທ່ານນາງ ຫງວຽນທິກິມເງິນ ຈະນຳພາ ແລະ ບໍລິຫານສະພາແຫ່ງຊາດຫວຽດນາມເຮັດຫຼ້ອນໜ້າທີ່ຊຶ່ງພັກ, ລັດ ແລະ ປະຊາຊົນມອບໝາຍໃຫ້ເປັນຢ່າງດີ.