(vovworld)-
ການເຈລະຈາຄັ້ງຫຼ້າສຸດຈັດຂຶ້ນເມື່ອວັນທີ 6/4 ລະຫວ່າງປາແລດສະຕິນ ແລະ ອິດສະຣາແອນ ເພື່ອແນໃສ່ກູ້ເອົາວິວັດທະນາການສັນຕິພາບ ໂດຍອາເມລິກາ ເປັນກາງໄດ້ອັດລົງແຕ່ບໍ່ບັນລຸໄດ້ບາດກ້າວບຸກທະລຸໃດໆ. ການເຈລະຈາຄັ້ງທີ 2 ປະລາໄຊໃນຮອບເວລາ 1 ອາທິດພ້ອມກັບບັນດາການກະທຳທີ່ເຮັດໃຫ້ເພີ່ມຄວາມເຄັ່ງຕຶງຂອງທັງ ປາແລດສະຕິນ ແລະ ອິດສະຣາແອນ ເຮັດໃຫ້ຂໍ້ຕົກລົງທີ່ຈະລົງລາຍເຊັນໃນວັນທີ 29/4 ຍາກທີ່ຈະບັນລຸໄດ້.
ການພົບປະສາມຝ່າຍເມື່ອວັນທີ 6/4 ໄດ້ແກ່ຍາວພຽງ 2,3 ຊົ່ວໂມງເທົ່ານັ້ນ ໂດຍມີການເຂົ້າຮ່ວມຂອງທ່ານລັດຖະມົນຕີກະຊວງຍຸດຕິທຳ ອິດສະຣາແອນ Tzipi Livni, ທ່ານ Isaac Molcho, ທູດພິເສດຂອງທ່ານນາຍົກລັດຖະມົນຕີ ອິດສະຣາແອນ Benjamin Netanyahu, ຫົວໜ້າຄະນະເຈລະຈາປາແລດສະຕິນ Saeb Erekat, ຜູ້ອຳນວຍການອົງການສືບລາຊະການລັບປາແລດສະຕິນ Majd Freij ພ້ອມກັບທ່ານ Martin Indyk ທູດພິເສດຂອງອາເມລິກາ ກ່ຽວກັບຕາເວັນອອກກາງ.
ການພົບປະດຳເນີນໄປໃນສະພາບວິວັດທະນາການສັນຕິພາບຢູ່ຕາເວັນອອກກາງໄດ້ຖືກເລີ່ມດຳເນີນແຕ່ເດືອນ 4/2013 ດ້ວຍຈຸດໝາຍບັນລຸຂໍ້ຕົກລົງແມ່ ຊ້າສຸດແມ່ນໃນວັນທີ 29/4/2014. ແຕ່ເຖິງຢ່າງໃດກໍ່ຕາມ, ບັນດາການກະທຳກໍ່ຄວາມເຄັ່ງຕຶງໃນມໍ່ໆມານີ້ລະຫວ່າງປາແລດສະຕິນ ແລະ ອິດສະຣາແອນ ໄດ້ຍູ້ວິວັດທະນາການນີ້ຕົກເຂົ້າສູ່ໄພລົ້ມເຫຼວ.
ທ່ານນາຍົກລັດຖະມົນຕີ Netanyahu
(ພາບ: Reuters)
ຄວາມບໍ່ລົງລອຍກັນທີ່ເລິກເຊິ່ງ
ແທນໃຫ້ໝາກຜົນອັນຕັ້ງໜ້າ, ຫາງສຽງພຽງແຕ່ໄດ້ຮັບຟັງບັນດາຄຳຕຳນິຕິຕຽນຊື່ງກັນ ແລະ ກັນພ້ອມກັບບັນດາການຄາດຄະເນຕາມທາງທີ່ບໍ່ດີ.ເຈົ້າໜ້າທີ່ ປາແລດສະຕິນ ທ່ານ 1 ໃຫ້ຮູ້ວ່າ: ວິກິດການຍັງສືບຕໍ່ເກີດຂຶ້ນ. ໃນການພົບປະເມື່ອວັນທີ 6/4, ອິດສະຣາແອນ ຍັງນາບຂູ່ປາແລດສະຕິນ. ໃນຂະນະນັ້ນ, ຝ່າຍອິດສະຣາແອນ ກ່າວເຕືອນວ່າ, ວິວັດທະນາການສັນຕິພາບຢູ່ຕາເວັນອອກກາງ ພວມຕົກເຂົ້າສູ່ສະພາບຊຸດໂຊມ. ອິດສະຣາແອນ ກະກຽມກັບຄືນສູ່ສະພາບການພົວພັນກັບ ປາແລດສະຕິນ ຄືກັບກ່ອນວິວັດການເຈລະຈາເລີ່ມດຳເນີນກ່ອນນີ້ 9 ເດືອນ.
ສາຍເຫດພາໃຫ້ການພົວພັນລະຫວ່າງສອງຝ່າຍບໍ່ມີທາງອອກແມ່ນເລີ່ມຈາກເລື່ອງ ອິດສະຣາແອນ ຍົກອອກເງື່ອນໄຂປ່ອຍຕົວນັກໂທດ ປາແລດສະຕິນ ເປັນອິດສະຫຼະຄັ້ງສຸດທ້າຍພຽງແຕ່ 26 ຄົນໃນວັນທີ 29/3 ເທົ່ານັ້ນ, ຖ້າຫາກວ່າ ປາແລດສະຕິນ ຕົກລົງຕໍ່ກຳນົດເວລາເຈລະຈາພາຍຫຼັງການກຳນົດເວລາເມື່ອວັນທີ 29/4 ຈະມາເຖິງ.
ບໍ່ພຽງແຕ່ເທົ່ານັ້ນ, ອິດສະຣາແອນ ຍັງປະກາດຈະກໍ່ສ້າງເຮືອນໃໝ່ 700 ຫຼັງຢູ່ຊານນະຄອນ Gilo ຢູ່ Jeruxalem ອີກດ້ວຍ.
ການກະທຳຂອງ ອິດສະຣາແອນ ຄືດັ່ງຢາດນ້ຳລົ້ນຈອກ, ເຮັດໃຫ້ປາແລດສະຕິນ ຕົກລົງຍື່ນໃບຄຳຮ້ອງທາງການຂໍເຂົ້າຮ່ວມສົນທິສັນຍາ, ສັນຍາສາກົນ 15 ສະບັບດ້ວຍຖານະລັດ ປາແລດສະຕິນເອກະລາດ.
ຄວາມບໍ່ລົງລອຍກັນລະຫວ່າງສອງຝ່າຍນັບມື້ນັບເພີ່ມຂຶ້ນໃນຂະນະທີ່ ປາແລດສະຕິນ ຍົກອອກບັນຊີລາຍຊື່ບັນດາເງື່ອນໄຂຕັດສິນຊີ້ຂາດເພື່ອເຊື່ອມຕໍ່ການເຈລະຈາຄື: ເລື່ອງ ອິດສະຣາແອນ ຮັບຮອງການສ້າງ ຕັ້ງລັດ ປາແລດສະຕິນ ເອກະລາດ ຢ່າງເປັນທາງການລຽບຕາມເສັ້ນຊາຍແດນກ່ອນປີ 1967 ດ້ວຍ Jeruxalem ຕາເວັນອອກແມ່ນນະຄອນຫຼວງ, ປ່ອຍຕົວນັກໂທດ ປາແລດສະຕິນ 1200 ຄົນ ເປັນອິດສະຫຼະ. ຢຸດຕິການປິດລ້ອມເຂດກາຊາ… ທ່ານ Saeb Erekat ຫົວໜ້າຄະນະເຈລະຈາປາແລດສະຕິນ ຍັງນາບຂູ່ວ່າ, ປາແລດສະຕິນ ຈະນຳ ອິດສະຣາແອນ ຂຶ້ນສານສາກົນເພື່ອດຳເນີນຄະດີກ່ຽວກັບບັນດາໂທດກຳສົມຄາມ ຖ້າຫາກວ່າຄວາມເຄັ່ງຕຶງປິນຂັ້ນໄດ.
ບັນດາມືປືນຮາມາດ
(ພາບ: rontpagemag.com)
ບໍ່ມີມາດຕະການດີໃຫ້ແກ່ສັນຕິພາບຢູ່ຕາເວັນອອກກາງ
ຕໍ່ໜ້າສະພາບການທີ່ບໍ່ມີສັນຍານດີດັ່ງກ່າວ, ທ່ານ John Kerry ລັດຖະມົນຕີການຕ່າງປະເທດອາເມລິກາ ເຄີຍກ່າວເຕືອນວ່າອາເມລິກາ ຕ້ອງມີການຈຳກັດວັນເວລາ ແລະ ກຳລັງເຫື່ອແຮງສະຫງວນໃຫ້ແກ່ວິວັດທະນາການສັນຕິພາບຢູ່ຕາເວັນອອກກາງ, ສະນັ້ນ, ອິດສະຣາແອນ ແລະ ປາແລດສະຕິນ ຕ້ອງລະງັບໃຈ. ທ່ານ John Kerry ຍັງສະແດງໃຫ້ເຫັນທ່າທີບໍ່ພໍໃຈດ້ວຍການຍົກເລິກການໄປຢ້ຽມຢາມ Jeruxalem ແລະ Ramallah ຊື່ງໄດ້ຂຶ້ນແຜນການນັບແຕ່ກ່ອນແລ້ວ. ແຕ່ເຖິງຢ່າງໃດກໍ່ຕາມ, ເບິ່ງລວມແລ້ວ, ມາຮອດຈຸດເວລານີ້, ອາເມລິກາຍັງບໍ່ທັນຍົກອອກມາດຕະການໃດໆທີ່ສາມາດເປັນໄປໄດ້ ເພື່ອກູ້ເອົາການເຈລະຈາສັນຕິພາບຢູ່ຕາເວັນອອກກາງ, ນອກເໜືອຈາກບັນດາຄຳຖະແຫຼງເທົ່ານັ້ນ.
ວັນທີ 7/4, ທ່ານປະທານາທິບໍດີ ປາແລດສະຕິນ Mahmoud Abbas ຮຽກຮ້ອງຈັດຕັ້ງການປະຊຸມດ່ວນໂດຍມີການເຂົ້າຮ່ວມຂອງບັນດາທ່ານລັດຖະມົນຕີການຕ່າງປະເທດສະຫະພັນອາຣັບ (AL) ເພື່ອປຶກສາຫາລືກ້ຽວກັບວິກິດການໃນການການເຈລາຈະລະຫວ່າງ ອິດສະຣາແອນ-ປາແລດສະຕິນ. ຄາດວ່າ, ທ່ານ Mahmoud Abbas ກໍ່ຈະຮຽກຮ້ອງ AL ສະໜັບສະໜູນ ປາແລດສະຕິນ ທາງດ້ານການເມືອງ ແລະ ການເງິນ.
ວິວັດທະນາການເຈລະຈາສັນຕິພາບລະຫວ່າງອິດສະຣາແອນ ແລະ ປາແລດສະຕິນ ທີ່ເລີ່ມດຳເນີນຄືນໃໝ່ກ່ອນນີ້ກ່ວາ 8 ເດືອນພວມຕົກເຂົ້າສູ່ສະພາບການລົ້ມເຫຼວ. ຖ້າເປັນຄືແນວນັ້ນ, ວິວັດທະນາການສັນຕິພາບຢູ່ຕາເວັນອອກກາງຈະກັບຄືນສູ່ສະພາບເດີມ, ສິ່ງນີ້ກໍ່ມີຄວາມໝາຍເຊັ່ນດຽວກັນກັບການປະທະກັນທີ່ແກ່ຍາວໃນເວລາ 66 ປີລະຫວ່າງ ອິດສະຣາແອນ ແລະ ປາແລດສະຕິນ ຍັງຄົງບໍ່ມີມາດຕະການແກ້ໄຂໄດ້ເທື່ອ./.