(vovworld)- ຫວຽດນາມ ພວມປະເຊີນຫນ້າກັບໄພແຫ້ງແລ້ງ, ນ້ຳເຄັມຊືມເຂົ້າເຂດທົ່ງພຽງຢ່າງແຮງ ນັບແຕ່ສີບປີມານີ້. ປະກົດການ El Nino ດ້ວຍຄວາມແຮງສູງ ບໍ່ພຽງແຕ່ເຮັດໃຫ້ອູນຫະພູມເພີ່ມຂຶ້ນສູງ, ຂາດແຄນນ້ຳຝົນ, ສົ່ງຜົນສະທ້ອນເຖິງການຜະລິດກະສິກຳ ແລະຊີວິດການເປັນຢູ່ຂອງປະຊາຊົນເທົ່ານັ້ນ ຫາກຍັງປົກຄຸມໄປທົ່ວເຂດທີ່ກວ້າງໃຫຍ່ ຈາກທິດໃຕ້ພາກກາງ, ເຂດໄຕງວຽນ ຈົນເຖິງທິດຕາເວັນອອກພາກໃຕ້ ແລະ ເຂດທົ່ງພຽງແມ່ນ້ຳຂອງພາກໃຕ້ຫວຽດນາມ. ປະຈຸບັນ ລັດຖະບານ ແລະ ບັນດາທ້ອງຖິ່ນ ພວມມານະພະຍາຍາມເພື່ອຈຳກັດຄວາມເສຍຫາຍຍ້ອນອາກາດຮ້າຍແຮງດັ່ງກ່າວໃຫ້ຢູ່ໃນລະດັບຕ່ຳສຸດ ແລະ ຖືວ່າ ນີ້ແມ່ນຫນ້າທີ່ບຸລິມະສິດຕົ້ນຕໍ.
ແກ້ໄຂສະພາບໄພແຫ້ງແລ້ງຢູ່ພາກໃຕ້
ພາບປະກອບ:daidoanket
|
ປະຈຸບັນ, ສະພາບແຫ້ງແລ້ງ, ນ້ຳເຄັມຊືມເຂົ້າເຂດທົ່ງພຽງຢ່າງແຮງ. ຢູ່ ເຂດທິດໃຕ້ພາກກາງ, ປີ 2016 ຄາດວ່າມີ ທົ່ງນາ 40.000 ເຮັກຕາ ຕ້ອງຢຸດຕິການຜະລິດ ແລະ ປະຊາຊົນ 50.000 ຄົນຈະຖືກຂາດແຄນນ້ຳສະອາດ. ເຂດທົ່ງພຽງແມ່ນ້ຳຂອງ ຖືກນ້ຳເຄັມຊືມເຂົ້າດ້ວຍລະດັບສູງກວ່າລະດັບສະເລ່ຍປະຈຳປີ ແລະ ເຂົ້າເລິກເຂດດິນຕໍ່ແຜ່ນ 90 ກິໂລແມັດ. ຄາດວ່າ ເດືອນ 5,6 ຈະມາເຖິງ ສະພາບໄພແຫ້ງແລ້ງ ແລະ ນ້ຳເຄັມຊືມເຂົ້າຈະເກີດຂຶ້ນຢ່າງຮ້າຍແຮງກວ່າ ແລະ ຢູ່ ແຂວງ ແທງຮວາ, ເຫງ້ອານ, ກວ໋າງບີງ, ກວ໋າງຈີ້…ອາດຈະເກີດໄພແຫ້ງແລ້ງ ຍ້ອນ El Nino. ທ່ານ ລັດຖະມົນຕີ ວ່າການກະຊວງກະສິກຳ ແລະ ພັດທະນາຊົນນະບົດ ຫວຽດນາມ ກາວດືກຟາດ ໃຫ້ຮູ້ວ່າ:
“ບັນດາເຂດຖືກ ນ້ຳເຄັມຊືມເຂົ້າ ກວມກວ່າເຄິ່ງຫນຶ່ງເນື້ອທີ່ຂອງເຂດທົ່ງພຽງແມ່ນ້ຳຂອງ, ໃນນັ້ນ ສ່ວນຫລາຍແມ່ນຢູ່ທິດໃຕ້ແຂວງ ກຽນຢາງ,ທົ່ວແຂວງ ກາເມົາ, ບາກລຽວ, ຊອກຈັງ, ຈາວີງ, ເບນແຈ ແລະ ¾ ແຂວງ ເຫົ້າຢາງ. ແຕ່ສິ່ງທີ່ເປັນຫ່ວງກັງວົນກວ່າໝູ່ ແມ່ນໃນເດືອນ 3 ຫາເດືອນ 6 ແມ່ນອາກາດຮ້ອນກວ່າໝູ່ໃນປີ.”
ການຊີ້ນຳຢ່າງຂ້ຽວຂາດຈາກສູນກາງ
ຕໍ່ຫນ້າຖືກຜົນສະທ້ອນຢ່າງແຮງຈາກປະກົດການ El Nino, ລັດຖະບານ ໄດ້ກຳນົດ ການຕ້ານໄພແຫ້ງແລ້ງປີ 2016 ຕ້ອງຕິດພັນກັບວິໄສທັດຍາວນານ. ວັນທີ 4/2/2016, ນາຍົກລັດຖະມົນຕີ ໄດ້ປະກາດໃຊ້ຄຳສັ່ງກ່ຽວກັບບັນດາມາດຕະການຮີບດ່ວນເພື່ອປ້ອງກັນ, ຕ້ານໄພແຫ້ງແລ້ງ ແລະ ນ້ຳເຄັມຊືມເຂົ້າເຂດທົ່ງພຽງ. ພາຍຫລັງບຸນປີໃຫມ່ປະຈຳຊາດ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ລົງກວດກາ, ຊີ້ນຳວຽກງານປ້ອງກັນ, ຕ້ານ ນ້ຳເຄັມຊືມ
ເຂົ້າເຂດທົ່ງພຽງແມ່ນ້ຳຂອງ, ໄພແຫ້ງແລ້ງຢູ່ທິດໃຕ້ພາກກາງ ແລະ ເຂດໄຕງວຽນ. ຫວ່າງແລ້ວນີ້, ທີ່ກອງປະຊຸມນັດສາມັນປະຈຳເດືອນ 2/2016, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີ ບັນດາກະຊວງ, ຂະແຫນງການກ່ຽວຂ້ອງ ແລະ ທ້ອງຖິ່ນ ຕ້ອງຕິດຕາມການຜັນແປຂອງອາກາດຢ່າງໃກ້ຊິດຕິດແທດ ແລະ ຫນູນຊ່ວຍປະຊາຊົນຢູ່ເຂດປະສົບໄພຢ່າງທັນການ. ກ່ຽວກັບໄລຍະຍາວ, ທ່ານ ຫງວຽນຄັກດີ້ງ, ຫົວຫນ້າຫ້ອງວ່າການລັດຖະບານ ໃຫ້ຮູ້ວ່າ:
“ຈະດັດປັບອົງປະກອບການປູກຝັງຢ່າງແຮງ ດ້ວຍວິໄສທັດຍາວນານ ບໍ່ພຽງແຕ່ໃນປີນີ້ເທົ່ານັ້ນ ຫາກແກ່ຍາວໃນຫລາຍປີ ຕາມທິດຫັນປ່ຽນລະດູການ, ຫັນປ່ຽນອົງປະກອບການປູກຝັງ, ສັດລ້ຽງໃຫ້ເໝາະສົມກັບເງື່ອນໄຂແຫລ່ງນ້ຳ ແລະ ໃຫ້ມີປະສິດທິຜົນ. ກະຊວງກະສິກຳ ແລະ ພັດທະນາຊົນນະບົດ ສະເຫນີທ່ານນາຍົກລັດຖະມົນຕີ ເປີດກວ້າງການຄູນຄັນຄູ, ຂຸດຫນອງ, ກະກຽມນ້ຳສະອາດໃຫ້ປະຊາຊົນໃນໄລຍະ 2016-2020 ດ້ວຍຈຳນວນເງິນ 55.000 ຕື້ດົງ.”
ທ້ອງຖິ່ນເປັນເຈົ້າການໃນການຮັບມືກັບໄພທຳມະຊາດ
ຕໍ່ຫນ້າບັນດາຜົນຮ້າຍຢ່າງແຮງຈາກສະພາບ ນ້ຳເຄັມຊືມເຂົ້າເຂດທົ່ງພຽງນັບມື້ນັບສູງ, ແຂວງ ກາເມົາ ໄດ້ຊີ້ນຳວຽກງານຄູນຄັນຄູເພື່ອສະກັດກັ້ນນ້ຳເຄັມໄວກວ່າຫນຶ່ງເດືອນ ເມື່ອທຽບໃສ່ໄລຍະດຽວກັນ. ທ່ານ ຫງວຽນຕຽນຫາຍ, ປະທານຄະນະກຳມະການປະຊາຊົນ ແຂວງ ກາເມົາ ໃຫ້ຮູ້ວ່າ: ແຂວງ ກາເມົາ ເພີ່ມທະວີວຽກງານໂຄສະນາເຜີຍແຜ່ການປ້ອງກັນ, ຕ້ານໄພແຫ້ງແລ້ງ, ນ້ຳເຄັມຊືມເຂົ້າເຂດທົ່ງພຽງ ໃຫ້ແກ່ປະຊາຊົນ ພ້ອມທັງຈັດຕັ້ງການຝຶກອົມຮົມ, ແນະນຳໃຫ້ປະຊາຊົນຖ່າຍທອດເຕັກໂນໂລຊີ, ເຕັກນິກໃນການປູກເຂົ້າ, ລ້ຽງກຸ້ງໃຫ້ເໝາະສົມກັບສະພາບການຂອງດິນຟ້າອາກາດ.
ທ່ານ ຫງວຽນຟອງກວາງ, ຮອງຫົວຫນ້າຄະນະປະຈຳ ຄະນະຊີ້ນຳເຂດຕາເວັນຕົກພາກໃຕ້ ຖືວ່າ: ການຕ້ານໄພແຫ້ງແລ້ງ, ນ້ຳເຄັມຊືມເຂົ້າເຂດທົ່ງພຽງ ປະຈຸບັນແມ່ນບັນຫາຄວາມເປັນຕາຍ.
“ຄູນຄັນຄູເພື່ອສະສົມນ້ຳຈືດ, ສະກັດກັ້ນ ນ້ຳເຄັມຊືມເຂົ້າເຂດຜະລິດເປັນຈຸດສຸມ ລວມມີບັນດາແຂວງຄື: ອານຢາງ, ກຽນຢາງ, ເກີນເທີ…ກ່ຽວກັບໄລຍະຍາວ, ສະເຫນີລັດຖະບານ ຈົ່ງເຮັດວຽກກັບປະເທດບ້ານໃກ້ເຮືອນຄຽງຈຳນວນຫນຶ່ງຢູ່ເຂດອະນຸພາກພື້ນແມ່ນ້ຳຂອງ ກ່ຽວກັບບັນຫາ ນ້ຳເຄັມຊືມເຂົ້າ, ຄູນຄັນຄູ. ນີ້ແມ່ນບັນຫາລະດັບຊາດ.”
ໄລຍະຈຸດສຸມຂອງໄພແຫ້ງແລ້ງ ແລະ ນ້ຳເຄັມຊືມເຂົ້າເຂດທົ່ງພຽງແມ່ນເກີດຂຶ້ນໃນຊຸມເດືອນຈະມາເຖິງ. ເລື່ອງລັດຖະບານ ແລະ ບັນດາທ້ອງຖິ່ນຈະປະຕິບັດການ ຮັບມືກັບໄພທຳມະຊາດຮ້າຍແຮງດັ່ງກ່າວຢ່າງຂ້ຽວຂາດ ພ້ອມທັງເປັນເຈົ້າການຮັບມືໃນໄລຍະຍາວ ຈະຊ່ວຍໃຫ້ຫວຽດນາມ ຈຳກັດບັນດາຄວາມເສຍຫາຍຍ້ອນການປ່ຽນແປງຂອງດິນຟ້າອາກາດກໍ່ຂຶ້ນໃຫ້ຢູ່ໃນລະດັບຕ່ຳສຸດ.