(vovworld) - ປີນີ້ ສະຫະປະຊາຊາດ (ສປຊ) ແລະ ບັນດາປະເທດສະມາຊິກລະນຶກ 30 ປີແຫ່ງວັນສົນທິສັນຍາກົດໝາຍວ່າດ້ວຍທະເລປີ 1982 ຂອງ ສປຊ (UNCLOS 1982). ນັບແຕ່ໄດ້ຮັບການປະກາດໃຊ້ມາຮອດປະຈຸບັນ, UNCLOS 1982 ນັບມື້ນັບໄດ້ຮັບການປັບປຸງໃຫ້ສົມບູນແບບ ເໝາະສົມກັບຄວາມຕ້ອງການຂອງສະພາບ ຕົວຈິງ. ໃນສະພາບການທີມະນຸດນັບມື້ນັບມຸ່ງໄປເຖິງມະຫາສະມຸດ, ຄວາມຕ້ອງການຂຸດຄົ້ນຜົນປະໂຫຍດຈາກຊັບພະຍາກອນທະເລມີຄວາມຈຳເປັນທີ່ສຸດ, ດັ່ງນັ້ນການພິພາດທີ່ເກີດຂຶ້ນລະຫວ່າງປະເທດຕ່າງໆແມ່ນຍາກທີ່ຈະຫລີກລ້ຽງໄດ້, UNCLOS 1982 ໄດ້ກາຍເປັນເອກະສານນິຕິກຳທີ່ສຳຄັນ, ແລະໄດ້ຮັບຖືວ່າ ແມ່ນກົດບັດຂອງໂລກກ່ຽວກັບທະເລ ແລະ ມະຫາສະມຸດ. ສຳລັບ ຫວຽດນາມ, ນັບແຕ່ເມື່ອໃຫ້ສັດຕະຍາບັນຫລືໃນຕະຫລອດຂະບວນວິວັດແຫ່ງການເຂົ້າຮ່ວມສົນທິສັນຍາ, ຍາມໃດ ຫວຽດນາມກໍມີທັດສະນະເຄົາລົບ ແລະ ປະຕິບັດຕາມເນື້ອໃນຈິດໃຈຂອງສົນທິສັນຍາໃນການແກ້ໄຂການພິພາດບົນທະເລຢ່າງສະເຫມີຕົ້ນສະເຫມີປາຍ.
ແກ້ໄຂການພິພາດຢູ່ທະເລໂດຍສັນຕິວິທີ ທັງແມ່ນພັນທະຂອງບັນດາປະເທດສະມາຊິກຂອງ ສປຊ |
ສົນທິສັນຍາກົດໝາຍວ່າດ້ວຍທະເລປີ 1982 ລວມມີ: 320 ຂໍ້ມາດຕາ ແລະ 9 ເອກະສານຊ້ອນທ້າຍ, ກຳນົດຢ່າງຮອບດ້ານກົດລະບຽບນິຕິກຳຂອງບັນດາເຂດທະເລທີ່ຂຶ້ນກັບອະທິປະໄຕ ແລະ ສິດອະທິປະໄຕຂອງບັນດາປະເທດແຄມທະເລກໍຄືກົດລະບຽບນິຕິກຳຂອງເຂດທະເລສາກົນ ແລະ ພື້ນທະເລສາກົນ. ພ້ອມກັນນັ້ນ, ສົນທິສັນຍາກໍກຳນົດສ້າງຕັ້ງກົນໄກສາກົນທີ່ສຳຄັນຫລາຍສະບັບທີ່ກ່ຽວຂ້ອງເຖິງການເຄື່ອນໄຫວຢູ່ທະເລ ແລະ ມະຫາສະຫມຸດ ຄື: ສານສາກົນກ່ຽວກັບກົດໝາຍວ່າດ້ວຍທະເລ, ອົງການສິດອຳນາດສາກົນກ່ຽວກັບພື້ນມະຫາສະໝຸດ, ຄະນະກຳມະການເຂດຂັ້ນໄຫວ່ທະວີບ. ພິເສດ, ກ່ຽວຂ້ອງເຖິງການພິພາດທີ່ອາດຈະເກີດຂຶ້ນລະຫວ່າງບັນດາປະເທດສະມາຊິກ, ສົນທິສັນຍາກົດໝາຍວ່າດ້ວຍທະເລປີ 1982 ຮຽກຮ້ອງໃຫ້ບັນດາປະເທດສະມາຊິກແກ້ໄຂທຸກການພິພາດທີ່ກ່ຽວຂ້ອງເຖິງການອະທິບາຍຫລືນຳໃຊ້ສົນທິສັນຍາໂດຍສັນຕິວິທີຕາມກຳນົດຂອງກົດບັດ ສປຊ. ມາຮອດປະຈຸບັນ, ມີ 162 ປະເທດສະມາຊິກ ຢູ່ ອາຊີ, ອາຟຼິກາ, ເອີລົບ, ທະວີບອາເມລິກາ ແລະ ທະວີບໂອເຊອານີເຂົ້າຮ່ວມສົນທິສັນຍາ.
ໂດຍແມ່ນປະເທດແຄມທະເລ, ນັບແຕ່ຊຸມມື້ທຳອິດ, ຫວຽດນາມ ໄດ້ຕັ້ງຫນ້າເຂົ້າຮ່ວມວິວັດທະນາການເຈລະຈາກ່ຽວກັບແຜນຮ່າງ UNCLOS 1982. ພາຍຫລັງ UNCLOS 1982 ໄດ້ຮັບການຮັບຮອງເອົາ, ຫວຽດນາມ ແມ່ນຫນຶ່ງໃນບັນດາປະເທດທຳອິດເຊັນສົນທິສັນຍາ ແລະ ວັນທີ 23/6/1994, ສະພາແຫ່ງຊາດ ຫວຽດນາມ ໄດ້ຕົກລົງໃຫ້ສັດຕະຍາບັນເອກະສານນິຕິກຳທີ່ສຳຄັນນີ້. ເມື່ອອະທິບາຍໃຫ້ແກ່ການລົງນາມໃນ UNCLOS 1982, ທ່ານ Le Hoai Trung ຮອງລັດຖະມົນຕີການຕ່າງປະເທດ ຫວຽດນາມ, ເອກອັກຄະລັດຖະທູດ, ຫົວຫນ້າຄະນະຜູ້ຕາງຫນ້າຂອງຫວຽດນາມ ປະຈຳ ສປຊ ຖືວ່າ:
“ ສປຊ ແມ່ນເວທີປາໄສທົ່ວໂລກ, ແມ່ນເວທີປາໄສໃຫຍ່ສຸດ ໂດຍມີການເຂົ້າຮ່ວມຂອງບັນດາປະເທດເກືອບທັງໝົດຢູ່ໃນໂລກ ແລະ ສປຊ ເຄື່ອນໄຫວໃນທຸກຂົງເຂດຂອງຊີວິດສາກົນ, ມີຜົນກະທົບເຖິງຊີວິດສາກົນ ແລະ ຂອງແຕ່ລະປະເທດ. ບັນດາບັນຫາຊຶ່ງ ຫວຽດນາມ ພວມສົນໃຈເພື່ອແກ້ໄຂການພິພາດໂດຍສັນຕິວິທີ, ສປຊ ກໍແມ່ນເວທີປາໄສສຳຄັນເພື່ອປະຕິບັດຄວາມຮຽກຮ້ອງຕ້ອງການຂອງຕົນ. ເນື້ອໃນຈິດໃຈຂອງສົນທິສັນຍາກົດໝາຍວ່າດ້ວຍທະເລປີ 1982 ເໝາະສົມກັບ ຫວຽດນາມ, ນັ້ນແມ່ນ ຍາມໃດຫວຽດນາມ ກໍເຊີດຊູແຜນນະໂຍບາຍແກ້ໄຂການພິພາດໂດຍສັນຕິວິທີ.”
ດ້ວຍແຜນນະໂຍບາຍຢ່າງສະເໝີຕົ້ນສະເໝີປາຍ, ໃນຕະຫລອດ 18 ປີ ທີ່ເປັນສະມາຊິກຂອງສົນທິສັນຍາດັ່ງກ່າວ, ຫວຽດນາມ ໄດ້ຕັ້ງຫນ້າເຂົ້າຮ່ວມທຸກການເຄື່ອນໄຫວໃນຂອບເຂດບັນດາກົນໄກສາກົນຕາມສົນທິສັນຍາ. ຫວຽດນາມ ໄດ້ຮັບເລືອກເປັນຮອງປະທານສະມັດຊາໃຫຍ່ອົງການມີສິດອຳນາດສາກົນກ່ຽວກັບພື້ນທະເລ ແລະ ສະມາຊິກຂອງສະພາອົງການສິດອຳນາດ. ໃນບັນດາເວທີປາໄສທີ່ກ່ຽວຂ້ອງ, ຍາມໃດ ຫວຽດນາມກໍຢືນຢັນວ່າ: ໃນການຂຸດຄົ້ນທະເລ, ບັນດາປະເທດຕ້ອງປະຕິບັດຕາມຂໍ້ກຳນົດໃນສົນທິສັນຍາ, ປະຕິບັດສິດ ແລະ ພັນທະຕາມສົນທິສັນຍາຢ່າງຄົບຖ້ວນ. ຫວຽດນາມ ກໍໄດ້ຢືນຢັນເປັນຫລາຍຄັ້ງວ່າ: ໂດຍແມ່ນປະເທດແຄມທະເລ, ຫວຽດນາມ ຜັນຂະຫຍາຍການເຄື່ອນໄຫວຂຸດຄົ້ນບັນດາເຂດທະເລທີ່ຂຶ້ນກັບອະທິປະໄຕ ແລະ ສິດອະທິດປະໄຕຂອງຕົນເພື່ອສ້າງສາ ແລະ ພັດທະນາປະເທດຊາດ. ໃນຂະນະດຳເນີນການເຄື່ອນໄຫວຢູ່ທະເລຕາເວັນອອກ, ຍາມໃດ ຫວຽດນາມ ກໍປະຕິບັດຕາມຂໍ້ກຳນົດຂອງສົນທິສັນຍາ, ເຄົາລົບສິດຂອງບັນດາປະເທດອື່ນ ຢ່າງຖືກຕ້ອງກັບບັນດາຂໍ້ກຳນົດຂອງສົນທິສັນຍາ. ພ້ອມກັນນັ້ນ ຫວຽດນາມ ກໍສະເຫນີໃຫ້ບັນດາປະເທດແຄມທະເລຕາເວັນອອກ ແລະ ບັນດາປະເທດອື່ນໆ ຈົ່ງເຄົາລົບສິດຜົນປະໂຫຍດອັນຊອບທຳຂອງຫວຽດນາມ ຢູ່ ທະເລຕາເວັນອອກ. ສຳລັບກໍລະນີລະເມີດສິດອະທິປະໄຕຂອງ ຫວຽດນາມ ທີ່ມີຕໍ່ໄຫລ່ທະວີບ ແລະ ເຂດເສດຖະກິດພິເສດຂອງຕົນຢ່າງຮ້າຍແຮງ, ຫວຽດນາມ ເດັດດ່ຽວຕໍ່ສູ້ຜ່ານການເຈລະຈາທາງການທູດຂັ້ນຕ່າງໆເພື່ອປົກປັກຮັກສາສິດອະທິປະໄຕຂອງຕົນ.
ໂດຍອີງໃສ່ບັນດາຂໍ້ກຳນົດຂອງ UNCLOS 1982, ມາຮອດປະຈຸບັນ ຫວຽດນາມ ກໍດຳເນີນການເຈລະຈາກັບບັນດາປະເທດບ້ານໃກ້ເຮືອນຄຽງກ່ຽວກັບການແກ້ໄຂການພິພາດຈຳນວນຫນຶ່ງກ່ຽວກັບເຂດເສດຖະກິດພິເສດ ແລະ ໄຫລ່ທະວີບ. ທ່ານ Le Hoai Trung ຮອງລັດຖະມົນຕີການຕ່າງປະເທດ ຫວຽດນາມ ໃຫ້ຮູ້ວ່າ:
“ຫວຽດນາມ ຊີ້ແຈງທັດສະນະ, ຄວາມມານະພະຍາຍາມຂອງຕົນໃນເລື່ອງ ພ້ອມກັບບັນດາປະເທດປະຕິບັດກົດໝາຍສາກົນຢ່າງເຂັ້ມງວດ, ແກ້ໄຂການພິພາດ, ການຂີດຂັ້ນຊາຍແດນທາງທະເລ, ກຳນົດເຂດຊອ້ນກັນ, ສະແດງໃຫ້ເຫັນນະໂຍບາຍຂອງ ຫວຽດນາມ ແມ່ນມີເຈດຕະນາດີ ແລະ ປະຕິບັດກົດໝາຍສາກົນ, ສົນທິສັນຍາກົດໝາຍວ່າດ້ວຍທະເລຂອງ ສປຊ ຢ່າງເຂັ້ມງວດ, ປະຕິບັດບັນດາຂໍ້ຕົກລົງທີ່ບັນລຸໄດ້ໃນບັນຫາຮ່ວມມືກໍຄືແກ້ໄຂບັນດາການພິພາດບົນທະເລ. ຫວຽດນາມ ກໍປາດຖະຫນາຢາກໃຫ້ທຸກປະເທດພ້ອມກັນແກ້ໄຂຄວາມແຕກຕ່າງກັນທີ່ຍັງຄົງຄ້າງໂດຍສັນຕິວິທີ ບົນພື້ນຖານທາງດ້ານກົດໝາຍ, ໃນນັ້ນ ມີສົນທິສັນຍາກົດໝາຍວ່າດ້ວຍທະເລຂອງ ສປຊ ປີ 1982”
ແກ້ໄຂການພິພາດຢູ່ທະເລໂດຍສັນຕິວິທີ ທັງແມ່ນພັນທະຂອງບັນດາປະເທດສະມາຊິກຂອງ ສປຊ ຕາມການກຳນົດຂອງກົດບັດ ທັງແມ່ນພັນທະຕາມສົນທິສັນຍາກົດໝາຍວ່າດ້ວຍທະເລປີ 1982. ດ້ວຍຈິດໃຈດັ່ງກ່າວ, ຫວຽດນາມ ໄດ້, ພວມ ແລະ ຈະສືບຕໍ່ເຄື່ອນໄຫວຕາມແຜນນະໂຍບາຍປະຕິບັດບັນດາຂໍ້ກຳນົດຂອງສົນທິສັນຍາກົດໝາຍວ່າດ້ວຍທະເລປີ 1982 ພ້ອມທັງ ຮຽກຮ້ອງໃຫ້ບັນດາປະເທດອື່ນ ຈົ່ງປະຕິບັດພັນທະນີ້. ຫລັກໝັ້ນດັ່ງກ່າວຂອງ ຫວຽດນາມ ພວມໄດ້ຮັບການສະຫນັບສະຫນູນຢ່າງກວ້າງຂວາງຈາກປະຊາຄົມໂລກ.