(vovworld)- ລັດຖະທຳມະນູນປີ 2013 ແລະ ຂໍ້ຕົກລົງເລກທີ 217 ຂອງກົມການເມືອງ ກ່ຽວກັບ“ຂໍ້ກຳນົດການຕິດຕາມກວດກາ, ໄຈ້ແຍກຕີລາຄາສັງຄົມຂອງແນວໂຮມປະເທດຊາດຫວຽດນາມ ແລະ ອົງການຈັດຕັ້ງການເມືອງສັງຄົມ” ໄດ້ຢືນຢັນເຖິງບົດບາດເປັນເຈົ້າຂອງປະຊາຊົນໃນຊີວິດສັງຄົມຫວຽດນາມ. ເລື່ອງຜັນຂະຫຍາຍແຜນນະໂຍບາຍນີ້ ໄດ້ສ້າງເງື່ອນໄຂເສີມຂະຫຍາຍສະຕິພູມປັນຍາຂອງທົ່ວປວງຊົນຢ່າງແຂງແຮງ ໃນການປະຕິບັດຂໍ້ກຳນົດຕິດຕາມກວດກາ, ໄຈ້ແຍກຕີລາຄາສັງຄົມ. ໃນບັນດາມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ແລະ ຄັ້ງທີ 11, ພັກກອມມູນິດຫວຽດນາມ ລ້ວນແຕ່ເຊີດຊູບົດບາດຕິດຕາມກວດກາ ແລະໄຈ້ແຍກຕີລາຄາສັງຄົມຂອງແນວໂຮມປະເທດຊາດ ຫວຽດນາມ. ເພື່ອໃຫ້ບົດບາດດັ່ງກ່າວເຂົ້າສູ່ຊີວິດຕົວຈິງ, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ມານະພະຍາຍາມຜັນຂະຫຍາຍການເຄື່ອນໄຫວຕິດຕາມກວດກາ, ໄຈ້ແຍກຕີລາຄາຫລາຍບັນຫາສັງຄົມຢູ່ທ້ອງຖິ່ນ.
ທ່ານ ຫງວຽນທ້ຽນເຍີນ, ປະທານຄະນະກຳມະການ
ສູນກາງແນວໂຮມປະເທດຊາດຫວຽດນາມ
photo:internet
|
ຕິດຕາມກວດກາກໍ່ສ້າງອຳນາດການປົກຄອງຂັ້ນຮາກຖານ
ນັບແຕ່ເມື່ອຜັນຂະຫຍາຍການປະຕິບັດຂໍ້ກຳນົດ“ແນວໂຮມປະເທດຊາດ ຕິດຕາມກວດກາພະນັກງານ, ລັດຖະກອນ, ສະມາຊິກພັກ ຢູ່ເຂດຊຸມຊົນ”, ຕາແສງ ຟອງຟູ ເມືອງ ບີງແຈງ, ນະຄອນ ໂຮ່ຈິມີນ ໄດ້ພົບເຫັນ, ຢັ້ງຢືນ ແລະ ລົງວິໄນ ພະນັກງານ, ລັດຖະກອນ, ສະມາຊິກພັກ 25 ຄົນ ດ້ວຍຮູບການໃຫ້ຢຸດວຽກງານ, ຍົກຍ້າຍໄປເຮັດວຽກງານອື່ນ, ກ່າວເຕືອນ, ຕຳນິຕໍ່ຫນ້າໝູ່ປະຊາຊົນ. ການປະຕິບັດວິໄນພະນັກງານທີ່ມີການກະທຳຜິດຢູ່ທ້ອງຖິ່ນຢ່າງເດັດດຽວ ບໍ່ພຽງແຕ່ເຮັດໃຫ້ປະຊາຊົນ ມີຄວາມໄວ້ເນື້ອເຊື່ອໃຈ ເທົ່ານັ້ນ ຫາກຍັງສະແດງໃຫ້ເຫັນບົດບາດ ຕິດຕາມກວດກາ ແລະ ໄຈ້ແຍກຕີລາຄາຂອງແນວໂຮມປະເທດຊາດຢ່າງເລິກເຊິ່ງອີກດ້ວຍ, ປະກອບສ່ວນກໍ່ສ້າງ, ປັບປຸງພັກ, ປັບປຸງກົງຈັກອຳນາດການປົກຄອງ. ທ່ານນາງ ຮີ່ງທິອຸດ, ປະທານແນວໂຮມປະເທດຊາດ ຕາແສງ ຟອງຟູ ເມືອງ ບີງແຈງ ໃຫ້ຮູ້ວ່າ:
“ກ່ອນນີ້ ລາຍການ ຕິດຕາມກວດກາຍັງເວົ້າແບບລວມໆ ສະນັ້ນ ລະບົບແນວໂຮມປະເທດຊາດກໍຄືການຕິດຕາມກວດກາລວມມີຫລາຍເນື້ອໃນ, ບໍ່ມີຈຸດສຸມ, ບໍ່ສະແດງໃຫ້ເຫັນບົດບາດ, ຄວາມຮັບຜິດຊອບຢ່າງຈະແຈ້ງ, ສະນັ້ນ ປະສິດທິຜົນການ ຕິດຕາມກວດກາ, ໄຈ້ແຍກຕີລາຄາຍັງຈຳກັດຢູ່. ນັບແຕ່ປີ 2013, ແນວໂຮມປະເທດຊາດ ຕາແສງ ຟອງຟູ ໄດ້ມານະພະຍາຍາມປ່ຽນໃຫມ່ຮູບການ ຕິດຕາມກວດກາ ແລະ ໄຈ້ແຍກຕີລາຄາສັງຄົມ ດ້ວຍວິທີ ນຳເຂົ້າລາຍການເຄື່ອນໄຫວ ເນື້ອໃນຕິດຕາມກວດກາ ໃນຫລາຍຂົງເຂດ ຢ່າງຄົບຖ້ວນ. ຈາກນັ້ນ ການໄຈ້ແຍກຕີລາຄາສັງຄົມມີປະສິດທິຜົນກວ່າເກົ່າ.”
ປະຕິບັດການຕິດຕາມກວດກາລົງທຶນວົງຄະນາຍາດ, ນະໂຍບາຍສຳລັບຜູ້ມີຄຸນງາມຄວາມດີຕໍ່ການປະຕິວັດ
ກ່ອນທີ່ກົມການເມືອງປະກາດໃຊ້ຂໍ້ຕົກລົງເລກທີ 217, ມີຫລາຍທ້ອງຖິ່ນໄດ້ປະຕິບັດຂໍ້ກຳນົດ ຕິດຕາມກວດກາລົງທຶນວົງຄະນາຍາດ ຕາມຂໍ້ຕົກລົງເລກທີ 80 ຂອງນາຍົກລັດຖະມົນຕີ. ຕາມນັ້ນແລ້ວ, ໃນທ່ົວປະເທດ, ແຕ່ລະເຂດຊຸມຊົນ ໄດ້ສ້າງຕັ້ງຄະນະກວດກາປະຊາຊົນ ເພື່ອຕິດຕາມກວດກາວົງຄະນາຍາດ ແລະ ບັນດາລາຍການ ຕິດຕາມກວດກາ ແມ່ນສຸມໃສ່ບັນດາກິດຈະກຳສະຫວັດດີການຂອງທ້ອງຖິ່ນ. ນັບແຕ່ປີ 2013 ເປັນຕົ້ນໄປ, ແນວໂຮມປະເທດຊາດຫວຽດນາມ ໄດ້ຜັນຂະຫຍາຍລາຍການ ຕິດຕາມກວດກາ ບັນດາແຜນນະໂຍບາຍ, ນະໂຍບາຍສຳລັບຜູ້ມີຄຸນງາມຄວາມດີຕໍ່ການປະຕິວັດ. ທ່ານ ຫງວຽນທ້ຽນເຍີນ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ:
“ລັດຖະທຳມະນູນໄດ້ກຳນົດຄວາມຮັບຜິດຊອບ ແລະ ສິດອຳນາດຂອງແນວໂຮມປະເທດຊາດກ່ຽວກັບການ ຕິດຕາມກວດກາ, ໄຈ້ແຍກຕີລາຄາ, ແຕ່ພວກເຮົາບໍ່ທັນມີກົດໝາຍວ່າດ້ວຍການ ຕິດຕາມກວດກາ ແລະ ໄຈ້ແຍກຕີລາຄາ, ບໍ່ທັນມີລັດຖະບັນຍັດການ ຕິດຕາມກວດກາ ແລະ ໄຈ້ແຍກຕີລາຄາ ພວກເຮົາອາດຈະປະຕິບັດໄດ້ຫລືບໍ່, ພວກຂ້າພະເຈົ້າກຳນົດຜ່ານການຕິດຕາມກວດການະໂຍບາຍສຳລັບຜູ້ມີຄຸນງາມຄວາມດີ. ເຖິງວ່າ ບໍ່ທັນມີກົດໝາຍ ແຕ່ຖ້າຫາກລັດຖະບານ ແລະ ບັນດາອົງການກ່ຽວຂ້ອງເຫັນວ່າ ຈຳເປັນຕ້ອງປະຕິບັດວຽກນັ້ນ ແລະ ຮຽກຮ້ອງແນວໂຮມປະເທດຊາດເຂົ້າຮ່ວມ ແລະ ສະເຫນີທຸກຂັ້ນ ຕອ້ງສົ່ງຂໍ້ມູນຂ່າວສານໃຫ້ແກ່ແນວໂຮມປະເທດຊາດ.”
ເພີ່ມທະວີການ ຕິດຕາມກວດກາ, ໄຈ້ແຍກຕີລາຄາເພື່ອເຕົ້າໂຮມພູມປັນຍາປະຊາຊົນ
ລັດຖະທຳມະນູນປີ 2013 ແລະ ຂໍ້ຕົກລົງເລກທີ 217 ຂອງກົມການເມືອງ ໄດ້ເນັ້ນຫນັກເຖິງບົດບາດຂອງແນວໂຮມປະເທດຊາດຫວຽດນາມ ເພື່ອເຕົ້າໂຮມ, ເສີມຂະຫຍາຍພູມປັນຍາຂອງປະຊາຊົນ ຜ່ານການປະຕິບັດຂໍ້ກຳນົດ ຕິດຕາມກວດກາ ແລະ ໄຈ້ແຍກຕີລາຄາສັງຄົມ. ທ່ານ ດັ້ງວັນຄວາ, ກຳມະການຄະນະກຳມະການແນວໂຮມປະເທດຊາດນະຄອນ ໂຮ່ຈິມີນ ຢືນຢັນວ່າ:
“ໃນການປະຕິບັດພາລະບົດບາດ ຕິດຕາມກວດກາ ແລະ ໄຈ້ແຍກຕີລາຄາ, ຫນຶ່ງໃນບັນດາບັນຫາສົນໃຈ ນັ້ນແມ່ນເຮັດແນວໃດປຸກລຸກປະຊາຊົນ ເຂົ້າຮ່ວມຢ່າງດ້ວຍຄວາມຈິງໃຈ ແລະ ຈິດໃຈສ້າງສັນ, ຈາກນັ້ນ ການ ຕິດຕາມກວດກາ ແລະ ໄຈ້ແຍກຕີລາຄາຈຶ່ງໄດ້ຮັບການຍົກສູງຂຶ້ນໄດ້.”
ຕາມຂໍ້ກຳນົດການຕິດຕາມກວດກາ ແລະ ໄຈ້ແຍກຕີລາຄາສັງຄົມຂອງແນວໂຮມປະເທດຊາດຫວຽດນາມ, ແຕ່ລະປີ ໂດຍອີງໃສ່ສະພາບຕົວຈິງ, ແນວໂຮມປະເທດຊາດຫວຽດນາມ ມີຄວາມຮັບຜິດຊອບສ້າງແຜນການ ຕິດຕາມກວດກາ, ລາຍງານຕໍ່ຄະນະພັກ ແລະ ອຳນາດການປົກຄອງໃນຂັ້ນດຽວທີ່ກ່ອນຜັນຂະຫຍາຍ. ເມື່ອມີຄວາມຈຳເປັນ, ແນວໂຮມປະເທດຊາດຫວຽດນາມ ສາມາດຜັນຂະຫຍາຍການຕິດຕາມກວດການອກແຜນການທີ່ໄດ້ກຳນົດ. ແນວໂຮມປະເທດຊາດຫວຽດນາມ ກໍໄດ້ຜັນຂະຫຍາຍການ ຕິດຕາມກວດກາ ແລະ ໄຈ້ແຍກຕີລາຄາຢ່າງມີປະສິດທິຜົນເທື່ອລະກ້າວ ປະກອບສວນກໍ່ສ້າງພັກ ແລະ ອຳນາດການປົກຄອງຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ.