(vovworld)-ໂດຍໄດ້ຮັບຄຳເຊີນຂອງທ່ານປະທານປະເທດຫວຽດນາມ ເຈືອງເຕີນຊາງ, ປະທານາທິບໍດີ ສ.ຮຸງກາຣີ Ader Janos ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ສ. ຮຸງກາຣີ ໄດ້ດຳເນີນການຢ້ຽມຢາມທາງລັດຖະກິດຫວຽດນາມ ແຕ່ວັນທີ 27-28/11/2014. ການຢ້ຽມຢາມຂອງປະທານາທິບໍດີ ຮຸງກາຣີ ແມ່ນເພື່ອປັບປຸງການພົວພັນຮ່ວມມືມິດຕະພາບທີ່ເປັນມູນເຊື້ອລະຫວ່າງຫວຽດນາມ ແລະ ຮຸງກາຣີ ອີກບາດກ້າວຫນຶ່ງ, ແລກປ່ຽນຫລາຍມາດຕະການເພີ່ມທະວີການຮ່ວມມືໃນທຸກຂົງເຂດລະຫວ່າງສອງປະເທດໃນໄລຍະຈະມາເຖິງ.
ທ່ານປະທານປະເທດເຈືອງເຕີນຊາງ ແລະ
ປະທານາທິບໍດີ ຮຸງກາຣີ Ader Janos
ພາບ:baomoi.com
|
ໂດຍຕັ້ງຢູ່ເອີລົບ ກາງ, GDP ຂອງຮຸງກາຣີ ບັນລຸປະມານ 197 ຕື້ USD/ປີ, ລາຍຮັບສະເລ່ຍໃສ່ຫົວຄົນແມ່ນເກືອບ 20.000 USD. ໃນຊຸມປີ 60, ຮຸງກາຣີ ໄດ້ຊອກວິທີເພື່ອຫັນພື້ນຖານເສດຖະກິດເປັນເສລີ ແລະ ປີ 1990 ໄດ້ຫັນເປັນພື້ນຖານເສດຖະກິດການຕະຫລາດ. ແຕ່ປີ 1997, ພື້ນຖານເສດຖະກິດໄດ້ພັດທະນາຢ່າງໝັ້ນທ່ຽງ, GDP ເພີ່ມຂຶ້ນ 4-5%/ປີ. ກ່ຽວກັບການພົວພັນຕ່າງປະເທດ, ປະຈຸບັນ ຮຸງກາຣີ ສືບຕໍ່ບຸລິມະສິດເຊື່ອມໂຍງເຂົ້າກັບສະຫະພາບເອີລົບຢ່າງເລິກເຊິ່ງ, ປັບປຸງການພົວພັນກັບບັນດາປະເທດບ້ານໃກ້ເຮືອນຄຽງ ແລະ ພາກພື້ນ, ບຸລິມະສິດການພົວພັນກັບຕ່າງປະເທດກ່ຽວກັບດ້ານພະລັງງານ, ຟື້ນຟູ ແລະ ຊຸກຍູ້ການພົວພັນກັບບັນດາຄູ່ຮ່ວມມືທີ່ເປັນມູນເຊື້ອຢູ່ ອາຊີຕາເວັນອອກສຽງໃຕ້, ໃນນັ້ນ ຫວຽດນາມ ແມ່ນຫນຶ່ງໃນບັນດາບຸລິມະສິດຢູ່ ອາຊີຕາເວັນອອກສຽງໃຕ້ຂອງຮຸງກາຣີ ໃນປະຈຸບັນ, ຮຸງກາຣີ ກໍຖືເປັນສຳຄັນການພັດທະນາກັບ ອາຊີ, ເປັນຕົ້ນແມ່ນບັນດາພື້ນຖານເສດຖະກິດຫາກໍພົ້ນເດັ່ນຂຶ້ນ, ຖືເລື່ອງເປີດກວ້າງການຮ່ວມມືກັບຫວຽດນາມ ມີບົດບາດສຳຄັນໃນການປະຕິບັດຍຸດທະສາດມຸ່ງໄປສູ່ທິດຕາເວັນອອກຂອງຕົນ.
ການພົວພັນຮ່ວມມືທີ່ເປັນມູນເຊື້ອໃນກວ່າ 6 ທົດສະວັດຜ່ານມາ
ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງ ຫວຽດນາມແລະ ຮຸງກາຣີ ໄດ້ມີມາເປັນເວລາເກືອບ 65 ປີ. ຮຸງກາຣີ ໄດ້ສະຫງວນໃຫ້ແກ່ຫວຽດນາມການສະຫນັບສະຫນູນ ແລະ ການຊ່ວຍເຫລືອອັນລ້ຳຄ່າໃນພາລະກິດປົກປັກຮັກສາ ແລະ ສ້າງສາປະເທດຊາດ. ໃນຂະບວນການ “ຫວຽດນາມ, ພວກຂ້າພະເຈົ້າຮຽງບ່າຮຽງໄລ່ກັບພວກເພື່ອນ”, ຮຸງກາຣີ ໄດ້ຈັດຕັ້ງການບໍລິຈາກເລືອດ ແລະ ບໍລິຈາກວັດຖຸ ເປັນຫລາຍຄັ້ງເພື່ອຊ່ວຍເຫລືອ ຫວຽດນາມ. ຮຸງກາຣີ ກໍແມ່ນສະມາຊິກເຂົ້າຮ່ວມ ຄະນະກຳມະການສາກົນ ຕິດຕາມ ແລະ ກວດກາປະຕິບັດສັນຍາ ປາຣີ ກ່ຽວກັບຫວຽດນາມ, ບຳລຸງສ້າງພະນັກງານວິທະຍາສາດເຕັກນິກໃຫ້ແກ່ຫວຽດນາມ ເກືອບ 3.500 ຄົນ ໃຫ້ແກ່ຫວຽດນາມແລະ ລົບ ບ້ວງຫນີ້ສິນ ແຕ່ກ່ອນປີ 1973. ພາຍຫລັງ ຮຸງກາຣີ ປ່ຽນແປງລະບອບການເມືອງ, ໃນຊຸມປີຕົ້ນສັດຕະວັດທີ 1990, ການພົວພັນລະຫວ່າງສອງປະເທດ ເຖິງວ່າຖືກຫລຸດລົງກໍຕາມ ແຕ່ປີ 1992, ການພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອນັ້ນຄ່ອຍໆໄດ້ຮັບການຟື້ນຟູ.
ການຮ່ວມມືທາງດ້ານເສດຖະກິດ, ການຄ້າ ລະຫວ່າງສອງປະເທດ ມີຄວາມຄືບຫນ້າ, ວົງເງິນການຄ້າສອງສົ້ນປີ 2013 ບັນລຸ 148 ລ້ານ USD. ໄລ່ມາຮອດເດືອນ 8/2014, ວົງເງິນການຄ້າສອງສົ້ນບັນລຸ 113,5 ລ້ານ USD. ບັນດາປະເພດສິນຄ້າສົ່ງອອກຂອງຫວຽດນາມ ແມ່ນ: ອຸປະກອນ, ໄຟຟ້າ, ເຄື່ອງເຟີນີເຈີ, ສິນໃນນ້ຳ…. ແລະ ນຳເຂົ້າບັນດາປະເພດສິນຄ້າຄື: ການຢາ, ເຄື່ອງອາໄລ່, ເຄມີ, ຫົວອາຫານສັດ… ປະຈຸບັນ ຮຸງກາຣີ ມີ 12 ໂຄງການ FDI ຢູ່ຫວຽດນາມຍັງມີຜົນສັກສິດ ດ້ວຍຍອດຈຳນວນທຶນຈົດທະບຽນແມ່ນ 47,3 ລ້ານ USD.
ກ່ຽວກັບການຮ່ວມມືພັດທະນາ, ຮຸງກາຣີ ຖືຫວຽດນາມແມ່ນຄູ່ຮ່ວມມືບຸລິມະສິດໃນນະໂຍບາຍຫນູນຊ່ວຍການພັດທະນາຢ່າງເປັນທາງການ (ODA) ຂອງຕົນ. ແຕ່ປີ 2004, ໂຄງການ ODA ໄດ້ເລີ່ມຜັນຂະຫຍາຍ ດ້ວຍໂຄງການລ້ຽງປານ້ຳຈືດ ແລະ ຄະນະຜູ້ແທນຈຳນວນຫນຶ່ງຂອງຫວຽດນາມ ໄປຍັງ ຮຸງກາຣີ ເພື່ອແລກປ່ຽນບົດຮຽນ. ປີ 2005 ຮຸງກາຣີ ຊ່ວຍເຫລືອລ້າໃຫ້ແກ່ຫວຽດນາມຈຳນວນເງິນ 600.000 USD, ປີ 2006 ແມ່ນ 110.000 USD. ແຫລ່ງທຶນໝັ້ນໝາຍ ODA ຂອງ ຮຸງກາຣີ ທີ່ສະຫງວນໃຫ້ແກ່ຫວຽດນາມ ເພີ່ມຂຶ້ນໃນແຕ່ລະປີ. ສອງປະເທດກໍໄດ້ລົງນາມໃນສັນຍາກ່ຽວກັບການຮ່ວມມືວັດທະນະທຳເມື່ອເດືອນ 3/2013, ສ້າງພື້ນຖານເພີ່ມທະວີການຮ່ວມມືໃນຂົງເຂດນີ້. ການສຶກສາບຳລຸງສ້າງກໍແມ່ນຂົງເຂດຮ່ວມມືທີ່ເປັນມູນເຊື້ອລະຫວ່າງສອງປະເທດ. ຝ່າຍ ຮຸງກາຣີ ໄດ້ຊ່ວຍບຳລຸງສ້າງຜູ້ຊ່ຽວຊານ, ພະນັກງານເຕັກນິກ, ສະຫນອງທຶນສຶກສາໃຫ້ແກ່ນັກສຶກສາຫວຽດນາມ. ຄຽງຄູ່ກັນນັ້ນ ຮຸງກາຣີ ຕີລາຄາສູງ ແລະ ສ້າງເງື່ອນໄຂໃຫ້ແກ່ປະຊາຄົມຊາວຫວຽດນາມ ອາໄສຢູ່ ຮຸງກາຣີ ເຊື່ອມຕົວເຂົ້າກັບປະຊາຊົນ ຮຸງກາຣີ ແລະ ແມ່ນຂົວຕໍ່ມິດຕະພາບໃນການພົວພັນສອງປະເທດ, ປະຊາຄົມຊາວຫວຽດນາມ ອາໄສຢູ່ ຮຸງກາຣີ ປະຈຸບັນ ມີປະມານ ກວ່າ 4.000 ຄົນ.
ການຢ້ຽມຢາມສ້າງກຳລັງຫນູນຊຸກຍູ້ການພົວພັນຫວຽດນາມ- ຮຸງກາຣີ
ຜ່ານການທົດສອບຂອງໄລຍະເວລາ, ການພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ຮຸງກາຣີ ໃນຊຸມປີຜ່ານມາໄດ້ພັດທະນາຢ່າງຈົບງາມ, ພິເສດແມ່ນການພົວພັນດ້ານການເມືອງ ຜ່ານການແລກປ່ຽນຄະນະຜູ້ແທນຂັ້ນສູງຫລາຍຄະນະ. ໃນໄລຍະມໍ່ໆມານີ້ແມ່ນການຢ້ຽມຢາມທາງລັດຖະກິດເຖິງ ຮຸງກາຣີ ຂອງທ່ານປະທານປະເທດ ເຈືອງເຕີນຊາງ. ການຢ້ຽມຢາມ ໄດ້ເປີດກາລະໂອກາດຮ່ວມມືຫລາຍຢ່າງໃຫ້ແກ່ສອງປະເທດໃນຫລາຍຂົງເຂດ. ໃນນະໂຍບາຍມຸ່ງໄປສູ່ທິດຕາເວັນອອກຂອງຕົນ, ຮຸງກາຣີ ຕີລາຄາສູງ ແລະ ເອົາໃຈໃສ່ເປັນພິເສດເຖິງການເພີ່ມທະວີການພົວພັນກັບຫວຽດນາມ.
ເຖິງວ່າ ການພົວພັນຮ່ວມມືມິດຕະພາບທີ່ເປັນມູນເຊື້ອ ລະຫວ່າຫວຽດນາມ ແລະ ຮຸງກາຣີ ພັດທະນາຢ່າງຈົບງາມໃນຊຸມປີມໍ່ໆມານີ້, ແຕ່ເມື່ອທຽບໃສ່ຄວາມສາມາດບົ່ມຊ້ອນຂອງສອງປະເທດ, ບັນດາໝາກຜົນບັນລຸໄດ້ຍັງຈຳກັດຢູ່. ສະນັ້ນ ການເປີດກວ້າງທຸກຂົງເຂດຮ່ວມມື, ນຳມາເຊິ່ງຜົນປະໂຫຍດໃຫ້ແກ່ທັງສອງຝ່າຍ ແມ່ນຄວາມປາດຖະຫນາຂອງບັນດາການນຳຂັ້ນສູງຫວຽດນາມ ແລະ ຮຸງກາຣີ. ການຢ້ຽມຢາມຫວຽດນາມ ຂອງທ່ານປະທານາທິບໍດີ ຮຸງກາຣີ Ader Janos ໄດ້ຮັບຄວາມຫວັງວ່າຈະຊຸກຍູ້ເລື່ອງຜັນຂະຫຍາຍປະສິດທິຜົນບັນດາໂຄງການຮ່ວມມືລະຫວ່າງສອງປະເທດ, ພ້ອມທັງສົ່ງເສີມວິສາຫະກິດສອງປະເທດສຳພັດ, ຊອກຮູ້ຄວາມສາມາດບົ່ມຊ້ອນ, ຄວາມຕ້ອງການຂອງກັນ ແລະ ແລກປ່ຽນບັນດາບັນຫາສາກົນ ແລະ ພາກພື້ນ ຊື່ງຕ່າງຝ່າຍມີຄວາມສົນໃຈ.