(vovworld) - ໂດຍສືບທອດ ແລະ ເສີມຂະຫຍາຍມູນເຊື້ອຮັກຊາດ, ພິລະອາດຫານບໍ່ຍອມຈຳນົນຂອງຊາດ, ບັນດາບົດຮຽນກ່ຽວກັບການປົກປັກຮັກສາປະເທດຊາດຂອງລຸ້ນກ່ອນ, ດ້ວຍຄວາມມານະພະຍາຍາມກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ, ຍົກສູງກຳລັງແຮງສັງລວມ ແລະ ອິດທິພົນຊື່ສຽງຂອງປະເທດຊາດ, ເສີມຂະຫຍາຍກຳລັງແຮງແຫ່ງຄວາມສາມັກຄີທົ່ວປວງຊົນທັງຊາດ, ຖືຜົນປະໂຫຍດອງຊາດເປັນຄາດໝາຍສູງສຸດ, ປະຊາຊົນຫວຽດນາມ ຈະຮັກສາສະພາບແວດລ້ອມສັນຕິພາບ, ສະຖຽນລະພາບຢ່າງໝັ້ນຄົງ ເພື່ອພັດທະນາປະເທດຊາດ. ນັ້ນແມ່ນເນື້ອໃນບົດຂຽນຂອງທ່ານປະທານປະເທດ ເຈືອງເຕິ໋ນຊາງ, ເນື່ອງໃນໂອກາດສະເຫຼີມສະຫຼອງ 69 ປີ ແຫ່ງວັນການປະຕິວັດເດືອນ 8 ແລະ ວັນຊາດທີ 2/9, 45 ປີ ແຫ່ງວັນປະຕິບັດພິໃນກຳຂອງປະທານໂຮ່ຈີມິນ. ວິທະຍຸກະຈາຍສຽງຫວຽດນາມ ຂໍຄັດສະເໜີບາງເນື້ອໃນສຳຄັນໄນບົດຂຽນດັ່ງກ່າວ,
ເລີ່ມຕົ້ນບົດຂຽນ, ທ່ານປະທານປະເທດ ເຈືອງເຕິ໋ນຊາງ ໄດ້ຫວນຄືນ 69 ປີ ກ່ອນ, ໃນລະດູໃບໄມ້ຫຼົ່ນ 1945, ປະຊາຊົນຫວຽດນາມ, ພາຍໃຕ້ຄັນທຸງຂອງພັກກອມມູນິດຫວຽດນາມ, ໄດ້ສ້າງເປັນການປະຕິວັດເດືອນ 8 ທີ່ຍິ່ງໃຫຍ່ໃນປະຫວັດສາດຂອງຫວຽດນາມ; ທັບມ້າງຕ່ອງໂສ້ຂອງລະບອບລ່າເມືອງຂຶ້ນ, ສັກດີນາ, ຢືດເອົາພື້ນຖານເອກະລາດແຫ່ງຊາດ; ສະຖາປະນາປະເທດສາທາລະນະລັດ ປະຊາທິປະໄຕ ຫວຽດນາມ. ວັນທີ 2-9-1945, ທ່ານປະທານປະເທດ ໂຮ່ຈີມິນ ໄດ້ອ່ານບົດຖະແຫຼງປະກາດເອກະລາດ, ເສລີພາບກັບທົ່ວໂລກ. ເກືອບ 70 ປີຜ່ານມາ, ປະຊາຊົນຫວຽດນາມ ໄດ້ຜ່ານຜ່າຄວາມຫຍຸ້ງຍາກ, ການທ້າທາຍບໍ່ຈັກວ່າເທົ່າໃດເພື່ອກໍ່ສ້າງ ແລະ ພັດທະນາປະເທດຊາດ, ຍົກສູງລະດັບຄອງຊີບຂອງປະຊາຊົນ. ພ້ອມກັນນັ້ນ, ປະຊາຊົນກໍ່ຕ້ອງເສຍສະຫຼະເລືອກເນື້ອບໍ່ຈັກວ່າເທ່ົາໃດເພື່ອຕີເອົາຊະນະສັດຕູຜູ້ຮຸກຮານ, ປົກປັກຮັກສາພື້ນຖານເອກະລາດ, ເສລີພາບ, ສິດອຳນາດ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ.
ໜ້າທີ່ສ້າງສາ ແລະ ປົກປັກຮັກສາປະເທດຊາດໃນປະຈຸບັນ
ຕາມທ່ານປະທານປະເທດແລ້ວ, ໃນສະພາບໂລກາພິວັດທີ່ພວມຜັນແປໄປຢ່າງແຮງນັ້ນ, ດ້ວຍການພົວພັນຢ່າງສັບສົນ, ທັງຮ່ວມມື, ທັງແກ່ງແຍ້ງ, ທັງມີການຕໍ່ສູ້ຢ່າງຂ້ຽວຂາດລະຫວ່າງປະເທດຕ່າງໆ ກໍ່ຄືລະຫວ່າງບັນດາພື້ນຖານການເມືອງ, ເສດຖະກິດ ແລະ ວັດທະນະທຳທີ່ແຕ່ກຕ່າງກັນນັ້ນ, ການຈະເລີນຮຸ່ງແຮງ, ຄວາມເປັນຕາຍຂອງແຕ່ລະປະເທດ, ແຕ່ລະຊາດ, ບໍ່ພຽງແຕ່ແມ່ນເລື່ອງສະເພາະຂອງແຕ່ລະປະເທດ, ແຕ່ລະຊາດເທົ່ານັ້ນ. ສິ່ງດັ່ງກ້າວທັງສ້າງກາລະໂອກາດ ແລະ ການທ້າທາຍໃຫ້ທຸກປະເທດ, ພິເສດແມ່ນສຳລັບບັນດາປະເທດນ້ອຍໃນການປົກປັກຮັກສາຜົນປະໂຫຍດ, ເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ. ໃນສະຖານະການນັ້ນ, ພິເສດແມ່ນຕໍ່ໜ້າສະພາບຜັນແປຢ່າງສັບສົນຢູ່ພາກພື້ນ ແລະ ຢູ່ໂລກໃນຊຸ່ມປີມໍ່ໆມານີ້. ຍິ່ງກວ່າເວລາໃດໝົດ, ມັນຮຽກຮ້ອງໃຫ້ປະເທດຫວຽດນາມ ຕ້ອງພັດທະນາຢ່າງໄວ, ໝັ້ນຄົງ, ຍົກສູງກຳລັງແຮງສັງລວມ, ກຳລັງພາຍໃນປະເທດໃນທຸກດ້ານ; ພ້ອມກັນນັ້ນຍາມໃດກໍ່ຕ້ອງຍົກສູງສະຕິລະວັງຕົວ, ເດັດດຽວປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດໃນບໍ່ວ່າສະພາບການໃດ. ທ່ານປະທານປະເທດ ເຈືອງເຕິ໋ນຊາງ ຢືນຢັນວ່າ, ນັ້ນແມ່ນພັນທະສັກກະລະບູຊາ ແລະ ສູງສົ່ງຂອງລຸ້ນປະຈຸບັນທີ່ມີຕໍ່ບັນພະບຸລຸດ, ລຸ້ນພໍ່ລຸ້ນອ້າຍ ແລະ ລຸ້ນລູກລຸ້ນຫຼານໃນພາຍພາກໜ້າ.
ກຳລັງແຮງຊະນະເລີດຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ
ທ່ານປະທານປະເທດ ເຈືອງເຕິ໋ນຊາງ ຊີ້ແຈ້ງວ່າ, ໜ້າທີ່ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮຽກຮ້ອງໃຫ້ມີການມອງກວ້າງເຫັນໄກ, ມີຄຸນນະທາດຢ່າງໝັ້ນຄົງ, ມີຄວາມເດັດດຽວກ່ຽວກັບຫຼັກການ ມີສະຕິລະມັດລະວັງ, ມີໄຫວພິກ, ມີຄວາມຄ່ອງແຄ້ວໃນຍຸດທະນະໂຍບາຍ. ດັ່ງນັ້ນບັນດາບົດຮຽນໃນການປົກປັກຮັກສາປະເທດຊາດຂອງລຸ້ນພໍ່, ລຸ້ນອ້າຍ ແມ່ນລຳ້ຄ່າທີ່ສຸດສຳລັບລຸ້ນປະຈຸບັນ. ພິເສດຄືດັ່ງປະທານໂຮ່ຈີມິນໄດ້ເວົ້າແລ້ວວ່າ: “ກົກຮາກໝັ້ນຄົງ, ຕົ້ນໄມ້ຈຶ່ງຍືນຍົງ. ສ້າງໄຊຊະນະບົນພື້ນຖານປະຊາຊົນ“. ຍ້ອນເຫດນັ້ນຢາກມີກຳລັງແຮງຢ່າງພຽງພໍເພື່ອຜ່ານຜ່າສິ່ງກີດຂວາງ, ການທ້າທາຍບົນເສັ້ນທາງປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງປະເທດຊາດ, ການພົວພັນສາຍເລືອດເນື້ອ, ຄວາມເປັນຕາຍລະຫວ່າງພັກ ແລະ ປະຊາຊົນຕ້ອງໄດ້ຮັບຄວາມເອົາໃຈໃສ່ກວ່າອີກ ດ້ວຍລະດັບສູງໃໝ່ ແລະ ຄຸນນະພາບໃໝ່.
ກໍ່ສ້າງພັກໃຫ້ທັດທຽມກັບໜ້າທີ່ນຳພາປະເທດຊາດ
ເດືອນ 9/2014 ແມ່ນ 45 ປີເຕັມທີ່ທົ່ວພັກ, ທົ່ວປວງຊົນ ແລະ ທົ່ວກອງທັບຫວຽດນາມ ປະຕິບັດພິໃນກຳຂອງປະທານໂຮ່ຈີມິນ. ໃນບົດຂຽນຂອງຕົນ, ທ່ານປະທານປະເທດ ເຈືອງເຕິ໋ນຊາງ ໄດ້ເນັ້ນໜັກວ່າ, ໜ້າທີ່ສືບຕໍ່ຮຳ່ຮຽນ ແລະ ປະຕິບັດຕາມຄຳສັ່ງສອນໃນພິໃນກຳຂອງປະທານໂຮ່ຈີມິນນັ້ນແມ່ນ: ວຽກງານຕ້ອງປະຕິບັດກ່ອນແມ່ນປັບປຸງພັກ, ເຮັດໃຫ້ສະມາຊີກພັກແຕ່ລະຄົນ, ໜ່ວຍພັກແຕ່ລະໜ່ວຍຕ້ອງອອກແຮງເຮັດຫຼ້ອນໜ້າທີ່ເຊິ່ງພັກໄດ້ມອບໝາຍໃຫ້, ຮັບໃຊ້ປະຊາຊົນຢ່າງສຸດອົກສຸດໃຈ“. “ຮັກສາພັກເຮົາໃຫ້ປອດໄສ, ສົມເປັນຜູ້ນຳ, ຜູ້ຮັບໃຊ້ຂອງປະຊາຊົນ“. ຕາມນັ້ນແລ້ວ, ຄະນະພັກ, ອົງການພັກທຸກຂັ້ນ, ພະນັກງານ, ສະມາຊິກພັກແຕ່ລະຄົນຄວນສືບຕໍ່ປະຕິບັດມະຕິກອງປະຊຸມໃຫຍ່ສູນກາງຄັ້ງທີ 4 ຊຸດທີ 11 ກ່ຽວກັບ “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປະຈຸບັນ“, ຕິດພັນກັບການປະຕິບັດຄຳສັ່ງເລກທີ 03 ທີ່ລົງວັນທີ 14/5/2011, ຂອງກົມການເມືອງກ່ຽວກັບການສືບຕໍ່ຍູ້ແຮງການຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ. ເດັດດຽວຍູ້ຄວາມຊຸດໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດໃຫ້ຖອຍໄປ, ຕ້ານອາດຍາສິດ, ການສໍ້ລາດບັງຫຼວງ, ການຟຸມເຟືອຍ…. ໃນໝູ່ພະນັກງານ, ສະມາຊິກພັກ, ລັດຖະກອນ, ພາລະກອນພາກສ່ວນໜຶ່ງບໍ່ແມ່ນໜ້ອຍ; ອີງໃສ່ປະຊາຊົນເພື່ອກໍ່ສ້າງພັກ, ຕິດຕາມກວດກາຄະນະພັກ, ອົງການຈັດຕັ້ງພັກທຸກຂັ້ນ, ເພື່ອຕີລາຄາພະນັກງານ, ສະມາຊິກພັກ. ບົນພື້ນຖານນັ້ນ, ຜັນຂະຫຍາຍການປະຕິບັດລັດຖະທຳມະນູນສະບັບປັບປຸງ, ເຊິ່ງສະພາແຫ່ງຊາດຫາກໍ່ຮັບຮອງເອົາ, ກໍ່ສ້າງ, ປັບປຸງລັດຫວຽດນາມ ໃຫ້ເປັນລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ.
ສຸດທ້າຍ, ທ່ານປະທານປະເທດ ເຈືອງເຕິ໋ນຊາງ ຢືນຢັນວ່າ ເສີມຂະຫຍາຍນຳ້ໃຈ ແລະ ມູນເຊື້ອອັນສະຫງ່າລາສືຂອງການປະຕິວັດເດືອນ 8 ທີ່ຍິ່ງໃຫຍ່, ສືບຕໍ່ຮຳ່ຮຽນແລະປະຕິບັດພິໃນກຳຂອງປະທານໂຮ່ຈີມິນ, ທົ່ວປວງຊົນຕ້ອງສາມັກຄືເປັນຈິດໜຶ່ງໃຈດຽວ, ກໍ່ສ້າງປະເທດຫວຽດນາມ “ໃຫ້ໃຫຍ່ໂຕ, ໂອໂຖງ ແລະ ສວຍງາມກວ່າ“ ນັ້ນແມ່ນການວັດແທກຄວາມຮັກຊາດຂອງຊາວຫວຽດນາມແຕ່ລະຄົນໃນປະຈຸບັນ.