(vovworld) – ກາເຟ ດ່າລາດ ແມ່ນເຄື່ອງດື່ມທີ່ມີຊື່ສຽງ, ເຊິ່ງໄດ້ດຶງດູດນັກທ່ອງທ່ຽວເມື່ອມາຢ້ຽມຢາມດ່າລາດ. ຮ້ານກາເຟຢູ່ດ່າລາດ ມີຫຼາຍຮູບແບບທີ່ແຕກຕ່າງກັນ, ມີທັງຮ້ານຮັບໃຊ້ຄົນຮັ່ງມີ, ຮ້ານຮັບໃຊ້ສາມັນຊົນ ແລະ ຮ້ານສະຫງວນໃຫ້ແກ່ໝູ່ເພືອນ…
ຮ້ານກາເຟ-ດົນຕີ ຢຽມເຊືອ
(ພາບ: ອິນເຕີແນດ)
ຮອດເວລາ 21 ໂມງຂອງທຸກວັນ, ຮ້ານກາເຟ-ດົນຕີ ຢຽມເຊືອ (Diem Xua) ທີ່ຫ່າງຈາກໃຈກາງນະຄອນດ່າລາດ ບໍ່ໄກ, ໄດ້ສ້າງຄວາມດຶງດູດນັກທ່ອງທ່ຽວດ້ວຍສຽງກີຕາ ທີ່ມີຄວາມລິ້ງເຄີຍສຳລັບຜູ້ນິຍົມດົນຕີຂອງ ຈິ້ງກົງເຊີນ. ພວກເຮົາມາຮ້ານກາເຟນີ້ໃນຍາມຝົນຕົກ, ທັງດື່ມກາເຟໃນແສງທຽນບໍ່ແຈ້ງຊັດ ທັງໄດ້ຮັບຟັງສຽງກີຕາ ພ້ອມກັບບົດເພງຢຽມເຊືອ ເຊຶ່ງແມ່ນບົດເພງຂອງນັກດົນຕີທີ່ລືຊື່ ຈິ້ງກົງເຊີນ
ສຽງເພງຂອງເອື້ອຍ ແຄ໋ງເຕີມ, ເຈົ້າຂອງຮ້ານກາເຟ ໄດ້ເຮັດໃຫ້ນັກທ່ອງທ່ຽວຮູ້ສຶກສະຫວາດສະເຫວີຍໄປນຳ. ສຽງເພງທັງລຶ້ງເຄີຍ, ທັງແປກປະຫຼາດ. ຍ້ອນສຽງເພງຂອງເອື້ອຍຄ້າຍຄືກັນກັບນັກຮ້ອງ ແຄ໋ງລີ, ຜູ້ຄົນທັງຫຼາຍຈຶ່ງເອີ້ນເອື້ອຍວ່າ ແຄ໋ງລີ ຂອງດ່າລາດ. ເມື່ອພົບປະກັບພວກຂ້າພະເຈົ້າ, ເອື້ອຍ ແຄ໋ງເຕິມ ໃຫ້ຮູ້ວ່າ:
“ຂ້າພະເຈົ້າ ແລະ ນັກຮ້ອງ ແຄ໋ງລີ ພຽງແຕ່ຮ່ວມສາຍເລືອດຂອງຊາວຫວຽດນາມເທົ່ານັ້ນ. ນັບແຕ່ເວລາຍັງນ້ອຍ ຂ້າພະເຈົ້າໄດ້ນິຍົມກັບດົນຕີຂອງ ຈິ້ງກົງເຊີນ ແລ້ວ. ມາຮອດປະຈຸບັນ, ເຖິງວ່າອາຍຸ 60 ປີແລ້ວກໍ່ຕາມ, ແຕ່ຂ້າພະເຈົ້າຍັງຄົງນິຍົມດົນຕີຂອງລາວຢູ່“.
ຮ້ານກາເຟ-ດົນຕີ ຢຽມເຊືອ
(ພາບ: ອິນເຕີແນດ)
ແຂກທີ່ມາຮ້ານກາເຟແຫ່ງນີ້ມີຫຼາຍລຸ້ນຄົນ, ໃນນັ້ນ 2/3 ແມ່ນລຸ້ນໜຸ່ມ. ດັ່ງນັ້ນຢູ່ທີ່ນີ້ບໍ່ມີການຈຳແນກກ່ຽວກັບເກນອາຍຸ, ຫາກເຂົາເຈົ້າທັງໝົດລ້ວນແຕ່ມີຄວາມນິຍົມດຽວກັນນັ້ນແມ່ນຢາກຮັບຟັງດົນຕີຂອງ ຈິ້ງກົງເຊີນ ເທົ່ານັ້ນ. ອ້າຍ ຫວໍເຟືອງວຽນ, ນັກທ່ອງທ່ຽວມາຈາກຟານຮາງ, ແບ່ງປັນວ່າ:
“ຂ້າພະເຈົ້າມາແຫ່ງນີ້ເປັນເທື່ອທີ 2 ແລ້ວ, ເມື່ອມາຮອດດ່າລາດ ຂ້າພະເຈົ້າຕ້ອງແວ່ຢາມຮ້ານນີ້ໃນທັນທີ ເພື່ອຮັງຟັງດົນຕີຂອງ ຈິ້ງກົງເຊີນ. ສຽງດົນຕີຢູ່ຮ້ານນີ້ມ່ວນຫຼາຍ, ການສະແດງກໍ່ງ່າຍດາຍ ແລະ ຈິງໃຈ. ສຳລັບຂ້າພະເຈົ້າແລ້ວ, ເຄື່ອງດື່ມແມ່ນສຳຮອງ, ສິ່ງສຳຄັນນັ້ນແມ່ນເພື່ອຮັບຟັງດົນຕີຂອງ ຈິ້ງກົງເຊີນ. ພາຍຫຼັງໄດ້ຮັບຟັງດົນຕີຢູ່ຮ້ານນີ້ແລ້ວ, ຂ້າພະເຈົ້າຮູ້ສຶກສະຫວາດສະເຫວີຍກວ່າ“.
ອອກຈາກຮ້ານກາເຟຢຽມເຊືອ, ພວກຂ້າພະເຈົ້າສືບຕໍ່ແວ່ຢາມຮ້ານກາເຟ ກຸງດ່ານເຊືອ (ສຽງດົນຕີໃນເມື່ອກ່ອນ), ຕັ້ງຢູ່ຖະໜົນ 3/2 ຢູ່ໃຈກາງນະຄອນ. ເຖິງວ່ານີ້ແມ່ນຮ້ານນ້ອຍກໍ່ຕາມ, ແຕ່ບໍ່ອຶກກະທຶກຄຶກໂຄມ. ໂດຍຕ່າງກັບຮ້ານຢຽມເຊືອ ພຽງແຕ່ເລືອກເອົາດົນຕີຂອງ ຈິ້ງກົງເຊີນ ເພື່ອສະແດງ. ຮ້ານ ກຸງດ່ານເຊືຍ ພັດສະແດງດົນຕີ, ບົດເພງຂອງນັກດົນຕີຫຼາຍຄົນຄື: ຟ້າມຢູຍ, ໂງທູ້ຍມຽນ, ກຸງຕ໋ຽນ, ດ່ວານຈວນ, ຕື໋ລິງ ຫຼືບັນດາບົດເພງທີ່ຍ້ອງຍໍສັນລະເສີນດິນແດງແຫ່ງດອກໄມ້ນັບພັນຊະນິດ.
ຮ້ານກາເຟ ກຸງດ່ານເຊືອ
(ພາບ: ອິນເຕີແນດ)
ເອື້ອຍ ຮົ່ງ, ເຈົ້າຂອງຮ້ານ, ທັງເປັນນັກຮ້ອງ, MC ຂອງຮ້ານໃຫ້ຮູ້ວ່າ, ຍ້ອນເມົາມົວກັບດົນຕີ, ເອື້ອຍຈຶ່ງເປີດຮ້ານກາເຟນີ້ ດ້ວຍຄວາມຫວັງຢາກໄດ້ຂັບຮ້ອງ ແລະ ໄດ້ຟັງຜູ້ອື່ນຂັບຮ້ອງ.
“ແຂກມາຮ້ານນີ້ສ່ວນຫຼາຍແມ່ນຢາກຮັບຟັງດົນຕີເຄິ່ງຄລາສສິກ, ງ່າຍດາຍແຕ່ເລິກເຊິ່ງ. ຂ້າພະເຈົ້າບໍ່ໄດ້ຮຽນດົນຕີ, ອາຊີບຕົ້ນຕໍ່ແມ່ນຄູສອນພາສາອັງກິດນັບແຕ່ປີ 1981, ແຕ່ຍ້ອນນິຍົມດົນຕີຈຶ່ງເປີດຮ້ານ ເພື່ອມີໂອກາດໄດ້ຂັບຮ້ອງ ແລະ ພົບປະແລກປ່ຽນກັບແຂກ”.
ຮ້ານກາເຟ Reinny
(ພາບ: ອິນເຕີແນດ)
ດ່າລາດ ດ້ວຍຮ້ານກາເຟຫຼາຍຮ້ານຄື: ຕິ້ງລັ້ງ (ສະຫງົບງຽບ), Why Not, Reinny… ແຕ່ເວລາຖືກຈຳກັດ, ພວກຂ້າພະເຈົ້າຈຶ່ງບໍ່ສາມາດແວ່ຢາມໄດ້. ລາອອກຈາກດ່າລາດ ໃນຄວາມເສຍດາຍ ແລະ ຄິດໃນໃຈວ່າຈະກັບມາຢ້ຽມຢາມອີກຄັ້ງໃໝ່. ເພາະວ່າຢູ່ທີ່ນີ້ບໍ່ພຽງແຕ່ມີດອກໄມ້ຕົ້ນແປກທີ່ງາມດັ່ງໃນຝັນເທົ່ານັ້ນ, ຫາກບັນດາຮ້ານກາເຟຢູ່ດ່າລາດ ກໍ່ແມ່ນໜຶ່ງໃນບັນດາຜະລິດຕະພັນທີ່ເປັນເອກະລັກສະເພາະ, ທີ່ສ້າງຄວາມດຶງດູດໃຫ້ແກ່ນັກທ່ອງທ່ຽວຫຼາຍຄົນເມື່ອມາຢ້ຽມຢາມ “ນະຄອນແຫ່ງດອກໄມ້ນັບພັນຊະນິດ”