(vovworld) – ຢູ່ເຂດພູດອຍເຊີນລາ, ຮູບແບບເສດຖະກິດລວມໝູ່ ໄດ້ ແລະ ພວມເສີມຂະຫຍາຍປະສິດທິຜົນໃນໂຄງການກໍ່ສ້າງຊົນນະບົດໃໝ່. ການເຄື່ອນໄຫວຂອງສະຫະກອນສະໜອງການບໍລິການໜູນຊ່ວຍເສດຖະກິດຄອບຄົວ, ສ້າງການແລກປ່ຽນສິນຄ້າ ແລະ ຮັບໃຊ້ຄວາມຕ້ອງການໃນການດຳເນີນຊີວິດ, ຍົກສູງຊີວິດການເປັນຢູ່ຂອງປະຊາຊົນ. ການເຄື່ອນໄຫວເຫຼົ່ານັ້ນ ໄດ້ປະກອບສ່ວນສ້າງຂະແໜງອາຊີບຕື່ມອີກໃຫ້ແຕ່ລະບ້ານ, ສ້າງເງື່ອນໄຂຊຸກຍູ້ໂຄງການກໍ່ສ້າງຊົນນະບົດໃໝ່.
(ພາບປະກອບ: ອິນເຕີແນດ)
ໂດຍແມ່ນທ້ອງຖີ່ນທີ່ແຂວງເຊີນລາ ເລືອກເປັນແຫ່ງປະຕິບັດທົດລອງໂຄງການກໍ່ສ້າງຊົນນະບົດໃໝ່, ຕາແສງຈ່ຽງບານ, ເມືອງມາຍເຊີນ, ໄດ້ປະຕິບັດສຳເລັດໂດຍພື້ນຖານ 9/19 ມາດຖານແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່. ປະຈຸບັນ, ຕາແສງມີສະຫະກອນ 2 ແຫ່ງ ທີ່ຜະລິດ, ເກັບຊື້ປູງແຕ່ງກ່າເຟ, ດ້ວຍ ສະມາຊິກສະຫະກອນ 40 ກວ່າຄົນ. ໃນເບື້ອງຕົນ, ຮູບແບບສະຫະກອນນີ້ໄດ້ສ້າງວຽກເຮັດງານທຳຢ່າງເປັນປົກກະຕິ ແລະ ລາຍຮັບໃຫ້ນັບຮ້ອຍຄອບຄົວປູກກ່າເຟໃນເຂດ. ທ່ານ ຟ້າມວັນແຄ໋ງ, ປະທານຄະນະກຳມະການປະຊາຊົນຕາແສງຈ່ຽງບານ, ໃຫ້ຮູ້ວ່າໃນປີ 2013, ທາງຕາແສງຈະສ້າງຕັ້ງໜ່ວຍສະຫະກອນຕື່ມອີກ, ເຊິ່ງຕົ້ນຕໍ່ແມ່ນບັນດາຂົງເຂດເຄື່ອນໄຫວດຳເນີນທຸລະກິດບໍລິການສັງລວມ, ເກັບຊື້, ປຸງແຕ່ງຜະລິດຕະພັນກະເສດ. ທ່ານ ຟ້າມວັນແຄ໋ງ ໃຫ້ຮູ້ວ່າ:
“ທາງຕາແສງຍາມໃດກໍ່ເອົາໃຈໃສ່ ແລະ ຊ່ວຍເຫຼືອ, ສ້າງເງື່ອນໄຂສະດວກທີ່ສຸດໃຫ້ບັນດາສະຫະກອນເຄື່ອນໄຫວ… ພິເສດແມ່ນສ້າງເງື່ອນໄຂໃຫ້ບັນດາສະຫະກອນກໍ່ສ້າງກິດຈະກຳໂຄງລ່າງຄື: ກໍ່ສ້າງທາງເບຕົງ, ຫຼືສ້າງເງື່ອນໄຂໜູນຊ່ວຍບ້ານ ແລະ ຄອບຄົວຕ່າງໆທີ່ປະສົບກັບຄວາມຫຍຸ້ງຍາກພິເສດ ເພື່ອພ້ອມກັນປະກອບສ່ວນກໍ່ສ້າງຊົນນະບົດໃໝ່”.
ຫຼາຍຄອບຄົວຊາວກະສີກອນໄດ້ຊື້ຈັກໄຖນາເພື່ອພັດທະນາການຜະລິດ
(ພາບ: ອິນເຕີແນດ)
ອ້າຍ ຫ່າຢູຍເຖືອງ, ຕາແສງຈ່ຽງຊົມ, ນະຄອນເຊີນລາ, ນັບແຕ່ປີ 2005 ໄດ້ລົງທຶນ 200 ລ້ານກວ່າດົ່ງ ເພື່ອພັດທະນາອາຊີບປູກດອກກຸຫຼາບ. ເພື່ອສ້າງຄວາມສະດວກໃຫ້ແກ່ການດຳເນີນທຸລະກິດ, ປີ 2011, ອ້າຍໄດ້ສ້າງຕັ້ງສະຫະກອນ. ມາຮອດປະຈຸບັນ, ສະຫະກອນ ຫ່າຢູຍເຖືອງ ໄດ້ມີເນື້ອທີ່ປູກດອກກຸຫຼາບ 17 ເຮັກຕາ. ອ້າຍ ຫ່າຢູຍເຖືອງ ໃຫ້ຮູ້ວ່າ, ແຕ່ລະເດືອນລາຍຮັບທີ່ໄດ້ຮັບຈາກການປູກດອກໄມ້ແມ່ນເກືອບ 2 ຕຶ້ ດົ່ງ, ຫາກຳໄລໄດ້ເກືອບ 600 ລ້ານດົ່ງ. ສິ່ງທີ່ໜ້າເວົ້າເຖິງນັ້ນແມ່ນ, ສະຫະກອນຂອງອ້າຍໄດ້ສ້າງວຽກເຮັດງານທຳເປັນປະຈຳໃຫ້ຜູ້ອອກແຮງງານໃນທ້ອງຖີ່ນ 20 ກວ່າຄົນ, ດ້ວຍລາຍຮັບກວ່າ 3 ລ້ານດົ່ງ/ເດືອນ/ຄົນ. ພ້ອມທັງຊ່ວຍໃຫ້ຊາວກະສີກອນປ່ຽນໃໝ່ຮູບການຜະລິດເກົ່າ, ຫັນໄປສູ່ການປູກຕົ້ນໄມ້ອຸດສາຫະກຳທີ່ມີປະສິດທິຜົນ. ປະຈຸບັນ, ອ້າຍພວມກະກຽມຜັນຂະຫຍາຍໂຄງການປູກດອກໄມ້ຄຸນນະພາບສູງ ເຊິ່ງເລີ່ມມີຢູ່ນະຄອນເຊີນລາ. ອ້າຍ ຫ່າຢູຍເຖືອງ, ໃຫ້ຮູ້ວ່າ:
“ດອກໄມ້ຂອງຂ້າພະເຈົ້າ, ສ່ວນຫຼາຍແມ່ນນຳໄປຂາຍຢູ່ຮ່າໂນ້ຍ, ຫາຍຝ່ອງ ແລະ ບັນດາແຂວງຢູ່ໃກ້ຄຽງ. ຂ້າພະເຈົ້າຫວັງວ່າ, ໃນຕໍ່ໜ້າ, ທາງນະຄອນຈະມອບໃຫ້ຂ້າພະເຈົ້າປະຕິບັດໂຄງການປູກດອກໄມ້ດ້ວຍການນຳໃຊ້ເຕັກໂນໂລຢີສູງ. ສ່ວນໃນປີນີ້, ຂ້າພະເຈົ້າຈະປູກດອກລີນລີ 5000 ຕົ້ນໃຕ້ມຸງ. ຖ້າຫາກໂຄງການນີ້ໄດ້ຮັບການຜັນຂະຫຍາຍ ມັນຈະຍົກປະສິດທິຜົນດ້ານເສດຖະກິດໃນເນື້ອທີ່ 1 ເຮັກຕາຂຶ້ນ ຈາກ 800 ລ້ານ ຂຶ້ນເຖິງ 1 ຕຶ້ ດົ່ງເຮັກຕາ, ສ້າງວຽກເຮັດງານທຳແບບຍືນຍົງໃຫ້ປະຊາຊົນ”.
(ພາບປະກອບ: ອິນເຕີແນດ)
ມາຮອດປະຈຸບັນ, ແຂວງເຊີນລາໄດ້ມີ 150 ໜ່ວຍສະຫະກອນ ແລະ 125 ສະຫະກອນພວມເຄື່ອນໄຫວ ດ້ວຍສະມາຊິກສະຫະກອນ ແລະ ຜູ້ອອກແຮງງານທັງໝົດແມ່ນ 23 000 ກວ່າຄົນ. ຍອດຈຳນວນທຶນ ແລະ ມູນຄ່າຊັບສົມບັດແມ່ນ 300 ຕຶ້ກວ່າດົ່ງ. ໃນແຕ່ລະປີ, ອັດຕາສະຫະກອນທີ່ບັນລຸຜົນງານສູງໃນການຜະລິດ ດຳເນີນທຸລະກິດແມ່ນກວມ 40%.
ສະເພາະໃນປີ 2012, ລາຍຮັບຂອງບັນດາສະຫະກອນນີ້ບັນລຸ 150 ຕື້ກວ່າດົ່ງ, ສ້າງກຳໄລໄດ້ 20 ຕືຶ້ກວ່າດົ່ງ. ປະກອບເຂົ້າງົບປະມານແຫ່ງລັດເກືອບ 400 ຕືຶ້ດົ່ງ. ໂດຍແມ່ນອົງການເສດຖະກິດໜູນຊ່ວຍ ແລະ ພັດທະນາປະຊາຄົມ ຕິດພັນກັບເຂດຊຸມຊົນ, ບັນດາສະຫະກອນຢູ່ແຂວງເຊີນລາ ໄດ້ຕອບສະໜອງຄວາມຕ້ອງການຮັບໃຊ້ການຜະລິດ ດຳເນີນທຸລະກິດ, ເຂົ້າຮ່ວມແກ້ໄຂຫຼາຍບັນຫາສັງຄົມຂອງທ້ອງຖີ່ນ. ພິເສດ, ໃນການຜັນຂະຫຍາຍໂຄງການກໍ່ສ້າງຊົນນະບົດໃໝ່, ບັນດາສະຫະກອນໄດ້ຍູ້ແຮງການປະຕິບັດ 2 ຂະບວນການແຂ່ງຂັນ “ປ່ຽນໃໝ່, ຍົກສູງປະສິດທິຜົນບັນດາສະຫະກອນ” ແລະ “ສະຫະກອນນຳໜ້າໃນການລົບລ້າງຄວາມອຶດຫິວຫຼຸດຜ່ອນຄວາມທຸກຍາກ - ກໍ່ສ້າງຊົນນະບົດໃໝ່”. ກ່ຽວກັບບັນດາມາດຕະການ ເພື່ອເຮັດໃຫ້ນັບມື້ນັບມີຫຼາຍສະຫະກອນເຄື່ອນໄຫວຢ່າງມີປະສິດທິຜົນ. ທ່ານ ຫງວຽນຫື້ວຕັງ, ປະທານສະຫະພັນສະຫະກອນແຂວງເຊີນລາ, ໃຫ້ຮູ້ວ່າ:
“ໃນຕໍ່ໜ້າ, ປີ 2013 ສະຫະພັນສະຫະກອນແຂວງຈະສົມທົບກັບບັນດາຂະແໜງການທີ່ກ່ຽວຂ້ອງຢ່າງແໜ້ນແຟ້ນ ເພື່ອເປັນເສນາທິການໃຫ້ແຂວງປະກາດໃຊ້ບັນດາກົນໄກນະໂຍບາຍສົ່ງເສີມ, ພັດທະນາສະຫະກອນຕາມຂໍ້ກຳນົດຂອງພັກ, ລັດ. ທີສອງແມ່ນເປັນເສນາທິການ ສະເໜີຕໍ່ແຂວງບັນດາມາດຕະການແກ້ໄຂຄວາມຫຍຸ້ງຍາກໃຫ້ບັນດາສະຫະກອນ ແລະ ວິສາຫະກິດສະມາຊິກຢ່າງທັນການ. ເຮັດວຽກງານໃຫ້ຄຳປຶກສາ, ແນະນຳ, ໜູນຊ່ວຍ, ບຳລຸງສ້າງ, ອົບຮົມວິຊາຊີບໃຫ້ແກ່ຖັນແຖວພະນັກງານຄຸ້ມຄອງສະຫະກອນເປັນຢ່າງດີ. ພິເສດແມ່ນຍູ້ແຮງການປະຕິບັດ 2 ຂະບວນການແຂ່ງຂັນກັນປ່ຽນໃໝ່, ຍົກສູງປະສິດທິຜົນບັນດາສະຫະກອນ ໃນການລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ກໍ່ສ້າງຊົນນະບົດໃໝ່”.
ຕາມມາດຖານແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່, ແຕ່ລະຕາແສງຕ້ອງບັນລຸມາດຖານ ຢ່າງໜ້ອຍສຸດກໍ່ມີ 1 ໜ່ວຍສະຫະກອນ ແລະ 1 ສະຫະກອນເຄື່ອນໄຫວຢ່າງມີປະສິດທິຜົນ. ສຳລັບແຂວງເຊີນລາ, ເລື່ອງສ້າງເງື່ອນໄຂຊຸກຍູ້ບັນດາສະຫະກອນເຄື່ອນໄຫວຢ່າງມີປະສິດທິຜົນ ບໍ່ພຽງແຕ່ເພື່ອຈຸດໝາຍແກ້ໄຂວຽກເຮັດງານທຳ, ລົບລ້າງຄວາມອຶດຫິວຫຼຸດຜ່ອນຄວາມທຸກຍາກເທົ່ານັ້ນ, ຫາກຍັງປະກອບສ່ວນເສີມຂະຫຍາຍລັກສະນະປະຊາຄົມ ເພື່ອຍູ້ໄວຄວາມຄືບໜ້າໃນການກໍ່ສ້າງຊົນນະບົດໃໝ່.