(vovworld) - ໃນຊຸມປີມໍ່ໆມານີ້, ສະພາບການເສດຖະກິດໂລກ ແລະ ພາຍໃນປະເທດ ປະສົບກັບຄວາມຫຍຸ້ງຍາກຫລາຍຢ່າງ, ແຕ່ແຂວງ ກວ໋າງນີງ ນອນໃນເຂດເສດຖະກິດຈຸດສຸມຢູ່ເຂດທົ່ງພຽງທາງພາກເຫນືອຫວຽດນາມ ຍັງຄົງແມ່ນຫນຶ່ງໃນບັນດາທອ້ງຖິ່ນດຶງດູດຫລາຍໂຄງການລົງທຶນ ພ້ອມທັງບືນຕົວຂຶ້ນນຳຫນ້າບັນດາແຂວງພາກເຫນືອ ກ່ຽວກັບການປັບປຸງດັດຊະນີຄວາມສາມາດແກ້ງແຍ້ງ(PCI).
ກອງປະຊຸມສົ່ງເສີມການລົງທຶນຂອງແຂວງ ກວ໋າງນີງ
ພາບ:baomoi.com.vn
|
ເພື່ອຍູ້ແຮງການດຶງດູດການລົງທຶນ, ຍົກສູງກຳລັງຄວາມສາມາດແກ້ງແຍ້ງ, ໃນກວ່າ 2 ປີຜ່ານມາ, ແຂວງ ກວ໋າງນີງ ໄດ້ມານະພະຍາຍາມຊອກຫາການປ່ຽນໃຫມ່, ມີຫົວຄິດປະດິດສ້າງໃນຄວາມຄິດ, ການກະທຳເພື່ອສ້າງສະພາບແວດລ້ອມແຫ່ງການລົງທຶນ, ດຳເນີນທຸລະກິດໃຫ້ດີກວ່າ. ສິ່ງດັ່ງກ່າວໄດ້ນຳມາເຊິ່ງບັນດາໝາກຜົນໃນເບື້ອງຕົ້ນທີ່ມີຄວາມໝາຍທີ່ສຸດ. ແຂວງ ກວ໋າງນີງ ແມ່ນຫນຶ່ງໃນບັນດາທ້ອງຖິ່ນບັນລຸການດຶງດູດເງິນລົງທຶນຫລາຍພໍສົມຄວນ ດ້ວຍ130 ວິສາຫະກິດເຂົ້າມາຊອກຫາກາລະໂອກາດການລົງທຶນ, ໃນນັ້ນມີບໍລິສັດລົງທຶນໃຫຍ່ຫລາຍແຫ່ງທີ່ມີຄວາມສາມາດບົ່ມຊ້ອນຄື: ກຸ່ມບໍລິສັດ Las Vegas Sands ສະຫະລັດອາເມລິກາ, Texthong ປະເທດຈີນ, ບໍລິສັດໃຫຍ່ທ່າອາກາດສະຍານ ສເກົາຫລີ, Amata ໄທ, Vingroup… ແຂວງ ກວ໋າງນີງ ກໍໄດ້ຫັນວຽກງານສົ່ງເສີມການລົງທຶນໃຫ້ປະກົດຜົນເປັນຈິງ ດ້ວຍການອອກຫນັງສືອະນຸຍາດໃຫມ່ ແລະ ດັດປັບການລົງທຶນໃຫ້ແກ່ 39 ໂຄງການ FDI ດ້ວຍຍອດຈຳນວນທຶນບັນລຸກວ່າ 1 ຕື້ USD ແລະ 205 ໂຄງການພາຍໃນປະເທດ ດ້ວຍຍອດຈຳນວນທຶນເກືອບ 114 ຕື້ດົ່ງ(ເທົ່າກັບ 5,4ຕື້ USD). ຄຽງຄູ່ກັບບັນດາຄວາມມານະພະຍາຍາມດຶງດູດການລົງທຶນ, ດັດຊະນີກຳລັງຄວາມສາມາດແກ້ງແຍ້ງຂັ້ນແຂວງ ຂອງກວ໋າງນີງ ໃນໄລຍະຜ່ານມາກໍໄດ້ຮັບການປັບປຸງຢ່າງແຮງ. ຕາມການສຳຫລວດຂອງຫ້ອງການການຄ້າ ແລະ ອຸດສາຫະກຳ ຫວຽດນາມ(VCCI) ແລ້ວ, ປີ 2013 ແຂວງ ກວ໋າງນີງ ຢືນອັນດັບ 4 ໃນທົ່ວປະເທດ, ເພີ່ມຂຶ້ນ 16 ຂັ້ນເມື່ອທຽບໃສ່ປີ 2012 ແລະ ຢືນອັນດັບ 4 ໃນ ຈຳນວນ 7 ແຂວງ ມີຄຸນນະພາບບໍລິຫານເສດຖະກິດດີເດັ່ນ, ບັນດາຂົງເຂດກ່ຽວກັບການກໍ່ສ້າງພື້ນຖານໂຄງລ່າງ, ການປະຕິຮູບດ້ານບໍລິຫານກໍໄດ້ຮັບການປັບປຸງພໍສົມຄວນ. ທ່ານ ຫວູຕຽນໂລກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ ໃຫ້ຮູ້ວ່າ:
“ດັດຊະນີ PCI ສະແດງໃຫ້ເຫັນຄວາມໂປ່ງໃສ, ສຸດຈິດສຸດໃຈ ຮ່ວມກັບວິສາຫະກິດ. ແຂວງ ກວ໋າງນີງ ໄດ້ເລືອກເຟັ້ນທິດທາງສຳຄັນ ນັ້ນແມ່ນ ປີນີ້ແມ່ນປີຮ່ວມມືກັບວິສາຫະກິດ ແລະ ຜັນຂະຫຍາຍການປ່ຽນແປງບັນດາຮູບແບບໃຫມ່ເພື່ອສາມາດຫນູນຊ່ວຍໃຫ້ແກ່ນັກລົງທຶນ. ຂ້າພະເຈົ້າຄິດວ່າ ດ້ວຍການຮ່ວມແຮງຮ່ວມໃຈຄືແນວນັ້ນ, ແຂວງ ກວ໋າງນິງ ສາມາດຍົກອັນດັບຂອງຕົນໃນຕາຕະລາງຈັດອັນດັບ PCI”
ທີ່ກອງປະຊຸມສ່ົງເສີມການລົງທຶນ ແລະ ຍົກສູງກຳລັງຄວາມສາມາດແກ້ງແຍ້ງທີ່ຫາກໍດຳເນີນໄປຢູ່ແຂວງ ກວ໋າງນີງ, ທ່ານ ຫງວຽນວັນດອກ, ປະທານຄະນະກຳມະການປະຊາຊົນແຂວງ ກວ໋າງນີງ ໃຫ້ຮູ້ວ່າ: ແຕ່ປີ 2012 ມາຮອດປະຈຸບັນ, ແຂວງ ກວ໋າງນີງ ປະຕິບັດ 5 ແຜນກຳນົດທີ່ເປັນຈຸດສຸມ ນັ້ນແມ່ນ: ແຜນກຳນົດກໍ່ສ້າງເຂດ, ແຂວງ, ແຜນສັງລວມກ່ຽວກັບການພັດທະນາການທ່ອງທ່ຽວ, ແຜນກຳນົດພັດທະນາແຫລ່ງຊັບພະຍາກອນມະນຸດ, ແຜນກຳນົດປົກປັກຮັກສາສິ່ງແວດລ້ອມ. ປະຈຸບັນ, ແຂວງ ກວ໋າງນີງ ໄດ້ສຳເລັດແຜນສັງລວມກ່ຽວກັບການພັດທະນາເສດຖະກິດສັງຄົມຂອງແຂວງຮອດປີ 2020, ວິໄສທັດຮອດປີ 2030 ຊື່ງໄດ້ຮັບການອະນຸມັດຈາກທ່ານນາຍົກລັດຖະມົນຕີ. ນີ້ແມ່ນພື້ນຖານເພ່ືອໃຫ້ແຂວງ ກວ໋າງນີງ ມີບັນດາບາດກ້າວທີ່ໝັ້ນຄົງໃນວຽກງານສົ່ງເສີມການລົງທຶນ. ເພື່ອປະຕິບັດຈຸດໝາຍນີ້ໃຫ້ໄດ້, ແຂວງ ກວ໋າງນີງ ພວມຜັນຂະຫຍາຍບັນດາມາດຕະການມີລັກສະນະຍຸດທະສາດ ເພື່ອນຳແຂວງ ກວ໋າງນີງ ກາຍເປັນຈຸດນັດພົບທີ່ສະຫນິດສະຫນົມ, ສະຖຽນລະພາບ ແລະ ດູດດື່ມສຳລັບບັນດານັກລົງທຶນ. ທ່ານ ຫງວຽນວັນດອກ, ປະທານຄະນະກຳມະການປະຊາຊົນແຂວງ ກວ໋າງນີງ ຊີ້ແຈ້ງວ່າ:
“ໃນໄລຍະຈະມາເຖິງ ແຂວງ ກວ໋າງນີງ ສຸມໃສ່ 3 ເນື້ອໃນໃຫຍ່ ນັ້ນແມ່ນ 3 ຂອດບຸກທະລຸ: ທີຫນຶ່ງແມ່ນ ການພັດທະນາເຂດຕົວເມືອງ, ກໍ່ສ້າງພື້ນຖານໂຄງລ່າງ, ໃນນັ້ນ ສຳຄັນກວ່າໝູ່ແມ່ນພື້ນຖານໂຄງລ່າງ; ທີສອງ ພວກຂ້າພະເຈົ້າສຸມໃສ່ປະຕິຮູບດ້ານບໍລິຫານ.ສະນັ້ນ ພວກຂ້າພະເຈົ້າ ໄດ້ຊີ້ນຳສ້າງຕັ້ງສູນບໍລິຫານຢູ່ໃນແຂວງ ກໍຄືຢູ່ທ້ອງຖິ່ນຕ່າງໆ. ທີສາມ ການລົງທຶນຕ້ອງຮັບປະກັນ, ເຮັດແນວໃດເພື່ອຕອບສະຫນອງຄວາມຕ້ອງການຂອງບັນດານັກລົງທຶນກ່ຽວກັບແຫລ່ງຊັບພະຍາກອນມະນຸດ ການຄຸ້ມຄອງກໍຄືລະດັບຄວາມຮູ້.”
ອີກບັນຫາຫນຶ່ງທີ່ສຳຄັນ, ນັ້ນແມ່ນ ແຂວງກວ໋າງນີງ ສືບຕໍ່ປ່ຽນໃຫມ່, ຍູ້ແຮງການປະຕິຮູບດ້ານບໍລິຫານ, ກໍ່ສ້າງອຳນາດການປົກຄອງເອເລັກໂຕນິກ ດ້ວຍຈຸດໝາຍສ້າງບາດກ້າວບຸກທະລຸໃນການປະຕິຮູບດ້ານບໍລິຫານ, ສ້າງຄວາມໂປ່ງໃສ, ເປີດເຜີຍ,ປະຊາທິປະໄຕແລະ ມີຄວາມຮັບຜິດຊອບ” ໃນການເຄື່ອນໄຫວຂອງບັນດາສູນບໍລິຫານທີ່ຂຶ້ນກັບຄະນະກຳມະການປະຊາຊົນແຂວງ. ສະນັ້ນ, ໃນໄລຍະຈະມາເຖິງ, ແຂວງ ກວ໋າງນີງ ຈະນຳໃຊ້ບັນດາຮູບແບບການຄຸ້ມຄອງ“ຊີ້ນ ລັດຊີ້ນຳ - ເອກະຊົນບໍລິຫານ”; “ລັດລົງທຶນ-ເອກະຊົນຄຸ້ມຄອງ” ໃນການກໍ່ສ້າງ, ນຳບັນດາລະບອບດ້ານເສດຖະກິດ, ວັດທະນະທຳ, ການສຶກສາເຂົ້າເຄື່ອນໄຫວ, ຮັບໃຊ້ສາທາລະນະ ແລະ ເປີດກວ້າງການລະດົມບັນດາແຫລ່ງຊັບພະຍາກອນມະນຸດໃນສັງຄົມ ເພື່ອລົງທຶນພັດທະນາ. ນີ້ແມ່ນບັນດາປັດໄຈພື້ນຖານເພື່ອໃຫ້ແຂວງ ກວ໋າງນີງ ສືບຕໍ່ປັບປຸງສະພາບແວດລ້ອມແຫ່ງການລົງທຶນ ແລະ ຍົກສູງກຳລັງຄວາມສາມາດແກ້ງແຍ້ງ, ສ້າງພື້ນຖານໃຫ້ແກ່ການພັດທະນາຢ່າງແຮງໃນອະນາຄົດ.