(vovworld)- ໃນໄລຍະຜ່ານມາ, ບັນດາແຂວງ, ນະຄອນ ຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໄດ້ຍູ້ແຮງການຮ່ວມສຳພັນລະຫວ່າງເຂດເພື່ອພ້ອມກັນພັດທະນາຢ່າງບໍ່ຢຸດຢັ້ງຜ່ານເວທີປາໄສຮ່ວມມືເສດຖະກິດເຂດທົ່ງພຽງແມ່ນ້ຳຂອງ( MDEC) ຊື່ງຖືກຈັດຕັ້ງປະຈຳປີ. ເວທີປາໄສຮ່ວມມືເສດຖະກິດເຂດທົ່ງພຽງແມ່ນ້ຳຂອງປີນີ້ ຖືກຈັດຂຶ້ນຢູ່ແຂວງ ຊອກຈັງ ແຕ່ວັນທີ 5-7/11/2014 ດ້ວຍຫົວຂໍ້ວ່າ: “ສ້າງໂຄງປະກອບກະສິກຳຄືນໃຫມ່- ກໍ່ສ້າງຊົນນະບົດໃຫມ່ຢູ່ເຂດທົ່ງພຽງແມ່ນ້ຳຂອງ”
ລະດູເກັບກ່ຽວຢູ່ເຂດທົ່ງພຽງແມ່ນ້ຳຂອງ
ພາບ:cantho.gov.vn
|
ເຂດທົ່ງພຽງແມ່ນ້ຳຂອງ ລວມມີ 12 ແຂວງ ແລະ ນະຄອນ, ທີ່ຕັ້ງຢູ່ທາງທິດໃຕ້ ແລະ ທາງທິດຕາເວັນຕົກສຽງໃຕ້ຂອງ ຫວຽດນາມ, ມີເນື້ອທີ່ກວ່າ 39.700 ຕາກິໂລແມັດ, ແມ່ນເຂດທົ່ງພຽງທີ່ກ້ວາງໃຫຍ່ ແລະ ດິນອຸດົມສົມບູນ. ນີ້ແມ່ນເຂດຜະລິດທັນຍາຫານຈຸດສຸມ, ມີລັກສະນະຕັດສິນຊີ້ຂາດສຳລັບຫວຽດນາມ, ພ້ອມທັງມີຫລາຍເງື່ອນໄຂສະດວກເພື່ອພັດທະນາການລ້ຽງສັດຕາມຂອບຂະຫນາດໃຫຍ່, ເປັນຕົ້ນແມ່ນການລ້ຽງປູກສິນໃນນ້ຳຢູ່ແຄມທະເລ, ຢູ່ແມ່ນ້ຳ, ພັດທະນາບັນດາເຂດຜະລິດສະເພາະຕົ້ນໄມ້ກິນໝາກທີ່ມີຄຸນນະພາບສູງ. ໃນຊຸມປີຜ່ານມາ, ເຂດທົ່ງພຽງແມ່ນ້ຳຂອງ ໄດ້ປະກອບສ່ວນຢ່າງໃຫຍ່ຫລວງເຂົ້າໃນມູນຄ່າການສົ່ງອອກຜະລິດຕະພັນກະເສດ, ສິນໃນນ້ຳຂອງຫວຽດນາມ. ເພື່ອເສີມຂະຫຍາຍຄວາມສາມາດບົ່ມຊ້ອນ ແລະ ທ່າແຮງຂອງເຂດທົ່ງພຽງແມ່ນ້ຳຂອງ, ລັດຖະບານຫວຽດນາມ ໄດ້ມີຂໍ້ຕົກລົງສ້າງຕັ້ງເຂດເສດຖະກິດຈຸດສຸມທົ່ງພຽງແມ່ນ້ຳຂອງ. ໃນເຂດທົ່ງພຽງແມ່ນນຳ້ຂອງມີ 4 ແຂວງ, ນະຄອນຂຶ້ນກັບສູນກາງ ນັ້ນແມ່ນ: ນະຄອນເກີນເທີ, ແຂວງ ອານຢາງ, ແຂວງ ກຽນຢາງ ແລະ ແຂວງ ກາເມົາ. ບັນດາແຂວງເຫລົ່ານີ້ ໄດ້ສວມບົດບາດເປັນສູນສ້າງການຮ່ວມສຳພັນເພື່ອຊຸກຍູ້ການພັດທະນາເສດຖະກິດສັງຄົມ ແລະ ປະກອບສ່ວນຍູ້ແຮງການພົວພັນແລກປ່ຽນສິນຄ້າລະຫວ່າງບັນດາແຂວງໃນເຂດກັບທາງທິດຕາເວັນອອກສຽງໃຕ້, ເຂດໄຕງວຽນ ແລະ ເປີດກວ້າງຕະຫລາດເຖິງບັນດາປະເທດໃນພາກພື້ນຄື: ກຳປູເຈຍ, ໄທ, ມຽນມາ.. ດ້ວຍຈຸດໝາຍນີ້, ເວທີປາໄສຮ່ວມມືເສດຖະກິດເຂດທົ່ງພຽງແມ່ນ້ຳຂອງ ປີນີ້ ຖືກຈັດຂຶ້ນຢູ່ແຂວງ ຊອກຈັງ ດ້ວຍຫົວຂໍ້ວ່າ: “ສ້າງໂຄງປະກອບພື້ນຖານກະສິກຳຄືນໃຫມ່- ກໍ່ສ້າງຊົນນະບົດໃຫມ່” ແມ່ນໂອກາດເພື່ອໃຫ້ບັນດາກະຊວງ, ຂະແຫນງການ, ທ້ອງຖິ່ນ ພ້ອມກັນຍົກອອກບັນດາມາດຕະການແກ້ໄຂຄວາມຫຍຸ້ງຍາກກ່ຽວຂ້ອງເຖິງບັນດານະໂຍບາຍພັດທະນາກະສິກຳຊົນນະບົດແບບຍືນຍົງ. ທ່ານ ກາວດຶກຟາດ, ລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມ ຊີ້ແຈ້ງວ່າ:
“ຄວນສ້າງສະພາບແວດລ້ອມທີ່ສະດວກກວ່າໃຫ້ແກ່ບັນດາວິສາຫະກິດ ບໍ່ພຽງແຕ່ສົ່ງເສີມການລົງທຶນໃຫມ່ ກ່ອນອື່ນໝົດແມ່ນຊ່ວຍໃຫ້ບັນດາວິສາຫະກິດພວມເຄື່ອນໄຫວໃນຂົງເຂດກະສິກຳສາມາດເຄື່ອນໄຫວຢ່າງມີປະສິດທິຜົນກວ່າ, ໝັ້ນຄົງ ແລະ ນັບມື້ນັບເຕີບໃຫຍ່. ທັງໝົດແມ່ນມຸ່ງໄປເຖິງການພັດທະນາແບບຍືນຍົງຂອງບັນດາວິສາຫະກິດ ແລະ ຂອງພື້ນຖານກະສິກຳ.”
ການລ້ຽງປູກສິນໃນນ້ຳຢູ່ເຂດທົ່ງພຽງແມ່ນ້ຳຂອງ
ພາບ:TTXVN
|
ເນື້ອໃນຕົ້ນຕໍຂອງເວທີປາໄສຄັ້ງນີ້ ແມ່ນນຳບັນດາມາດຕະການປະຕິບັດແຜນຮ່າງສ້າງໂຄງປະກອບກະສິກຳຄືນໃຫມ່ຢ່າງມີປະສິດທິຜົນ, ຄົ້ນຄວ້າ, ສະເຫນີສ້າງບັນດາມາດຕະການ, ກົນໄກ, ນະໂຍບາຍຊຸກຍູ້ການຫັນປ່ຽນໂຄງປະກອບກະສິກຳໃຫ້ສົມບູນແບບ, ກໍ່ສ້າງຊົນນະບົດໃຫມ່ຢູ່ເຂດທົ່ງພຽງແມ່ນ້ຳຂອງ. ຄຽງຄູ່ກັນນັ້ນ, ການຍູ້ແຮງວຽກງານສົ່ງເສີມການຄ້າ, ການລົງທຶນ, ການໂຄສະນາພາບພົດ, ຄວາມສາມາດບົ່ມຊ້ອນ, ທ່າແຮງຂອງເຂດເຖິງບັນດາວິສາຫະກິດ, ນັກລົງທຶນພາຍໃນ ແລະ ຕ່າງປະເທດ. ເວທີປາໄສກໍປຶກສາຫາລືບັນດາມາດຕະການເພື່ອເພີ່ມທະວີການຮ່ວມມື ແລະ ຮ່ວມສຳພັນລະຫວ່າງບັນດາແຂວງ, ນະຄອນ ໃນເຂດ; ການຮ່ວມມື ແລະ ຮ່ວມສຳພັນລະຫວ່າງເຂດກັບບັນດາກະຊວງ, ຂະແຫນງການ, ບັນດາທ້ອງຖິ່ນພາຍໃນປະເທດ; ການຮ່ວມສຳພັນລະຫວ່າງເຂດທົ່ງພຽງແມ່ນ້ຳຂອງກັບບັນດາອົງການຈັດຕັ້ງສາກົນ, ບັນດາປະເທດ ແລະ ເຂດແຄ້ວນ.. ເພື່ອຍູ້ແຮງການພັດທະນາເສດຖະກິດສັງຄົມ ແລະ ການຕ່າງປະເທດ, ເສີມຂະຫຍາຍຄວາມສາມາດບົ່ມຊ້ອນ, ເສດຖະກິດອັນໃຫຍ່ຫລວງຂອງທົ່ວເຂດທົ່ງພຽງແມ່ນ້ຳຂອງ. ດ້ານອື່ນ, ເວທີປາໄສເສດຖະກິດເຂດທົ່ງພຽງແມ່ນ້ຳຂອງ ກໍແມ່ນໂອກາດເພື່ອລະດົມບັນດາແຫລ່ງກຳລັງເຂົ້າໃນການປະຕິບັດວຽກງານຮັບປະກັນຊີວິດສັງຄົມ, ກໍ່ສ້າງກິດຈະກຳສະຫວັດດີການສັງຄົມໃຫ້ແກ່ເຂດທົ່ງພຽງແມ່ນ້ຳຂອງ. ທ່ານ ຫງວຽນຟອງກວາງ, ຮອງຫົວຫນ້າຄະນະປະຈຳຄະນະຊີ້ນຳທາງທິດຕາເວັນຕົກພາກໃຕ້ຫວຽດນາມ ຊີ້ແຈ້ງວ່າ:
“MDEC ຊອກຈັງ ຄັ້ງນີ້ ມີຄວາມໝາຍຢ່າງແທດຈິງ. ມາຮອດປະຈຸບັນພວກເຮົາພວມສຸມໃສ່ຂົນຂວາຍກ່ຽວກັບການຮັບປະກັນຊີວິດສັງຄົມ, ລະດົມແຫລ່ງກຳລັງກ່ຽວກັບການສົ່ງເສີມການລົງທຶນ. ສະເພາະ ແຂວງ ຊອກຈັງ ໄດ້ລົງທຶນກໍ່ສ້າງໂຮງໝໍແຫ່ງຫນຶ່ງລວມມູນຄ່າ 120 ຕື້ດົງ. ການຈັດຕັ້ງ MDEC ປີນີ້ ແມ່ນມີປະສິດທິຜົນ, ແທດຈິງ.”
ຈຸດໝາຍແຫ່ງການພັດທະນາຂອງເຂດທົ່ງພຽງແມ່ນ້ຳຂອງ ໄດ້ຮັບການກຳນົດຈາກລັດຖະບານວ່າ ແມ່ນກໍ່ສ້າງເຂດເສດຖະກິດທົ່ງພຽງແມ່ນ້ຳຂອງໃຫ້ກາຍເປັນເຂດພັດທະນາຢ່າງຂະຫຍັນຂັນເຄື່ອນ, ມີໂຄງປະກອບເສດຖະກິດກະສິກຳສຳພັດກັບທິດທັນສະໄຫມ ດ້ວຍການຍູ້ແຮງການເຊື່ອມໂຍງເຂົ້າກັບເສດຖະກິດໂລກ. ໃນນັ້ນ ລະດັບຈະເລີນເຕີບໂຕ GDP ສະເລ່ຍໄລຍະ 2011-2020 ບັນລຸ 1,25ເທົ່າ ເມື່ອທຽບໃສ່ GDP ຂອງທັງປະເທດ. ເວທີປາໄສການຮ່ວມມືເສດຖະກິດເຂດທົ່ງພຽງແມ່ນ້ຳຂອງຄັ້ງນີ້ ກໍແມ່ນກາລະໂອກາດເພື່ອໃຫ້ບັນດາກະຊວງ, ຂະແຫນງການແລະ ທ້ອງຖິ່ນຕ່າງໆ ສຳຫລວດກວດຄືນບັນດາມາດຕະການເພີ່ມທະວີການຮ່ວມມື, ປະກອບສ່ວນຢ່າງແທດຈິງ, ມີປະສິດທິຜົນເຂົ້າໃນການພັດທະນາເສດຖະກິດສັງຄົມຢູ່ ເຂດທີ່ຍັງມີຄວາມສາມາດບົ່ມຊ້ອນຫລາຍຢ່າງ.