(vovworld)- ຮອບເຈລະຈາສັນຍາຄູ່ຮ່ວມມືເຂດປາຊີຟີກ(TPP) ພວມກ້າວເຂົ້າສູ່ໄລຍະສຸດທ້າຍ. ມີຜູ້ຊ່ຽວຊານຫລາຍທ່ານຖືວ່າ: ເມື່ອເຂົ້າຮ່ວມ TPP, ການສົ່ງອອກຂອງຫວຽດນາມ ຈະໄດ້ຮັບຜົນປະໂຫຍດຫລາຍຢ່າງ, ເປັນຕົ້ນແມ່ນເຄື່ອງຕຳ່ແຜ່ນຕັດຫຍິບ. ເຖິງຢ່າງໃດກໍຕາມ, ຄຽງຄູ່ກັບກາລະໂອກາດແມ່ນສິ່ງທ້າທາຍ, ຮຽກຮ້ອງໃຫ້ບັນດາວິສາຫະກິດ,ໃນນັ້ນ ມີບັນດາວິສາຫະກິດຕຳ່ແຜ່ນຕັດຫຍິບ ຕ້ອງຕັ້ງຫນ້າກະກຽມ ເພື່ອຕອບສະຫນອງບັນດາຄຳຮຽກຮ້ອງຕ້ອງການຂອງ TPP ແລະ ພ້ອມແລ້ວຮັບເອົາກາລະໂອກາດ ຊື່ງ TPP ນຳມາໃຫ້.
TPP ແມ່ນສັນຍາລວມມີຫລາຍຂົງເຂດ, ກວມກວ່າ 40% GDP ແລະ 1/3 ມູນຄ່າການຄ້າທົ່ວໂລກ. ໃນຈຳນວນ 12 ປະເທດເຂົ້າຮ່ວມການເຈລະຈາ TPP ມີບັນດາປະເທດຊື່ງແມ່ນຕະຫລາດສົ່ງອອກໃຫຍ່ ແລະ ສຳຄັນ ຂອງຫວຽດນາມຄື: ອາເມລິກາ, ຍີ່ປຸ່ນ. ຕາມສັນຍານີ້, ສະເພາະເຄື່ອງຕຳ່ແຜ່ນຕັດຫຍິບຂອງຫວຽດນາມ ສົ່ງໄປຂາຍຢູ່ ອາເມລິກາ ປະຈຸບັນ ກວມເອົາ 55% ປະລິມານສິນຄ້າສົ່ງອອກຂອງທົ່ວຂະແຫນງຈະໄດ້ຊົມໃຊ້ອັດຕາພາສີ 0%. ປະຈຸບັນ ອັດຕາພາສີເຄື່ອງຕຳ່ແຜ່ນຕັດຫຍິບຂອງຫວຽດນາມສົ່ງໄປຂາຍຢູ່ ອາເມລິກາ ແມ່ນ 17,5%. ເປັນອັນວ່າ TPP ຈະສ້າງກາລະໂອກາດໃຫຍ່ ແລະ ກຳລັງຫນູນສຳຄັນໃຫ້ແກ່ການພັດທະນາຂອງຂະແຫນງຕຳ່ແຜ່ນຕັດຫຍີບຫວຽນາມ ໃນໄລຍະຈະມາເຖິງ. ເຖິງຢ່າງໃດກໍຕາມ, ຄຽງຄູ່ກັບກາລະໂອກາດ, ບັນດາວິສາຫະກິດຫຽດນາມພວມຢືນຢູ່ຕໍ່ຫນ້າສິ່ງທ້າທາຍໃຫຍ່, ເປັນຕົ້ນ ແມ່ນການຕອບສະຫນອງບັນດາມາດຕະຖານຂອງ TPP. ຫນຶ່ງໃນບັນດາຫລັກການພື້ນຖານເພື່ອໄດ້ຊົມໃຊ້ອັດຕາພາສີບຸລິມະສິດ ເມື່ອເຄື່ອງຕຳ່ແຜ່ນຕັດຫຍິບສົ່ງອອກໄປຍັງບັນດາປະເທດເຂົ້າຮ່ວມ TPP ນັ້ນແມ່ນ ນຳໃຊ້ວັດຖຸດິບທີ່ ຜະລິດຢູ່ປະເທດປະຈຳຖິ່ນ ຫລື ນຳໃຊ້ວັດຖຸດິບຂອງບັນດາປະເທດສະມາຊິກເຂົ້າຮ່ວມສັນຍາ. ເພື່ອຕອບສະຫນອງຄວາມຮຽກຮ້ອງດັ່ງກ່າວ, ບັນດາວິສາຫະກິດຕຳ່ແຜ່ນຕັດຫຍິບ ຫວຽດນາມ ພວມມານະພະຍາຍາມເພີ່ມອັດຕານຳໃຊ້ ວັດຖຸດິບ ຜະລິດພາຍໃນປະເທດ, ເປັນຕົ້ນແມ່ນລົງທຶນພັດທະນາແຫລ່ງວັດຖຸດິບພາຍໃນປະເທດ ເພື່ອຊົມໃຊ້ບຸລິມະສິດນີ້. ທ່ານ ເລຕຽນເຈື່ອງ, ຮອງຜູ້ອຳນວຍການໃຫຍ່ ກຸ່ມບໍລິສັດຕຳ່ແຜ່ນຕັດຫຍິບ ຫວຽດນາມ (Vinatex) ໃຫ້ຮູ້ວ່າ:
“ວິວັດການກະກຽມຂອງຂະແຫນງຕຳ່ແຜ່ນຕັດຫຍິບໃນຫລາຍປີຜ່ານມາ ດ້ວຍສະພາບເຊື່ອມໂຍງເຂົ້າກັບສາກົນ ພວມໄປຕາມທ່າອ່ຽງຊັດເຈນ, ນັ້ນແມ່ນ ຫວຽດນາມ ສຸມໃສ່ປັບປຸງມູນຄ່າເພີ່ມພາຍໃນປະເທດ, ເພີ່ມລະດັບເປັນເຈົ້າການໃນທຸກຂັ້ນຕອນ, ພິເສດ ແມ່ນຂອດອອກແບບ ແລະ ຂອດກະກຽມແຫລ່ງວັດຖຸດິບ. ວິວັດການນີ້ພວມດຳເນີນໄປໃນສີບໆປີຜ່ານມາ, ນັບແຕ່ເມື່ອລັດຖະບານຫວຽດນາມ ກະກຽມການເຈລະຈາສັນຍາ FTA ສອງຝ່າຍ ກັບ ອາເມລິກາ, WTO ແລະ ປະຈຸບັນ ແມ່ນສັນຍາຄູ່ຮ່ວມມືເຂດປາຊີຟີກ.”
ປີ 2014, ຂະແຫນງຕຳ່ແຜ່ນຕັດຫຍິບ ຫວຽດນາມ ວາງຈຸດໝາຍລະດັບຈະເລີນເຕີບໂຕ ບັນລຸກວ່າ 10%
photo:internet
|
ບັນດາວິສາຫະກິດ ປະຕິບັດ ບັນດາບາດກ້າວກະກຽມນີ້ ເພື່ອຍົກສູງມູນຄ່າເພີ່ມຂອງຂະແຫນງຕຳ່ແຜ່ນຕັດຫຍິບ, ຈາກສະພາບນຳໃຊ້ວັດຖຸດິບ ຜະລິດພາຍໃນປະເທດແຕ່ 25-30%, ປະຈຸບັນ ແມ່ນເກືອບ 50%. ຫນຶ່ງໃນບັນດາວຽກງານສຳຄັນຊື່ງຂະແຫນງຕຳ່ແຜ່ນຕັດຫຍິບ ເອົາໃຈໃສ່ທີ່ສຸດ, ນັ້ນແມ່ນ ຕອບສະຫນອງຫລັກການນຳໃຊ້ເສັ້ນຝ້າຍ ຕາມເນື້ອໃນການເຈລະຈາຂອງ TPP. ນີ້ແມ່ນວຽກງານຫຍຸ້ງຍາກທີ່ສຸດ, ແຕ່ Vinatex ຍັງຄົງຕັດສິນໃຈປະຕິບັດ, ເຖິງວ່າ ຈຳນວນເງິນລົງທຶນເຂົ້າບັນດາໂຄງການຜະລິດວັດຖຸດິບແມ່ນຫລາຍພໍສົມຄວນ. ທ່ານ ເລຕຽນເຈື່ອງ ໃຫ້ຮູ້ຕື່ມອີກວ່າ:
“ສັນຍາການຄ້າ TPP, ມາຮອດຈຸດເວລານີ້ ແນ່ນອນ ວ່າ ຫລັກການນຳໃຊ້ເສັ້ນຝາ້ຍແມ່ນສິ່ງທີ່ສຳຄັນ. ຖ້າຫາກບໍ່ມີການກະກຽມວັດຖຸດິບເປັນຢ່າງດີ ການ ຍາກຈະໄດ້ຊົມໃຊ້ບຸລິມະສິດພາສີ. ສະນັ້ນ ພວກຂ້າພະເຈົ້າສຸມໃສ່ລົງທຶນ 12 ໂຄງການຜະລິດເສັ້ນຝ້າຍ ແລະ 9 ໂຄງການຕຳ່ແຜ່ນ. ຈຳນວນເງິນລົງທຶນໃຫ້ໂຄງການຜະລິດເສັ້ນຝ້າຍກໍຫລາຍກວ່າເມື່ອທຽບໃສ່ໂຄງການຕຳ່ແຜ່ນ. ”
ຄຽງຄູ່ກັບການຍູ້ແຮງບັນດາໂຄງການຕອບສະຫນອງຄວາມຕ້ອງການກ່ຽວກັບວັດຖຸດິບ, ກຸ່ມບໍລິສັດຕຳ່ແຜ່ນຕັດຫຍິບ ຫວຽດນາມ ແລະ ບັນດາອົງການກ່ຽວຂ້ອງ ພວມເພີ່ມທະວີການເຄື່ອນໄຫວຊ່ວຍບັນດາວິສາຫະກິດຍົກສູງຄວາມຮັບຮູ້, ເປັນຕົ້ນຄວາມສາມາດແກ້ງແຍ້ງຂອງບັນດານັກລົງທຶນຕ່າງປະເທດ ໃນການລົງທຶນ ຕອບສະຫນອງແຫລ່ງວັດຖຸດິບ ເມື່ອຫວຽດນາມ ເຂົ້າຮ່ວມ TPP. ທ່ານ ເດົ້າແອງຕວນ, ຫົວຫນ້າຄະນະກົດໝາຍ, ຫ້ອງການການຄ້າ ແລະ ອຸດສາຫະກຳ ຫວຽດນາມ (VCCI) ຖືວ່າ:
“ເປັນທີ່ຈະແຈ້ງແລ້ວວ່າ ບັນດາຂໍ້ມູນຂ່າວສານກ່ຽວກັບການເຈລະຈາ TPP, ບັນດາຫລັກການນຳໃຊ້ວັດຖຸດິບນັບແຕ່ເສັ້ນຝ້າຍເປັນຕົ້ນໄປ ພວມໄດ້ຮັບຄວາມສົນໃຈຈາກບັນດານັກລົງທຶນຕ່າງປະເທດ.
ດັ່ງນັ້ນບັນດາວິສາຫະກິດຫວຽດນາມເອົາໃຈໃສ່ເຖິງບັນຫານີ້ກວ່າ, ນັບທັງລະດັບຄວາມໄວ, ການຄາດຄະເນຂອງກຸ່ມວິສາຫະກິດ, ເປັນຕົ້ນແມ່ນບັນດາວິສາຫະກິດຂະຫນາດກາງ ແລະ ນອ້ຍ.”
ປີ 2014, ຂະແຫນງຕຳ່ແຜ່ນຕັດຫຍິບ ຫວຽດນາມ ວາງຈຸດໝາຍລະດັບຈະເລີນເຕີບໂຕ ບັນລຸກວ່າ 10%, ວົງເງິນສົ່ງອອກບັນລຸ 23 ຕື້ USD. ສະຫະສະມາຄົມຕຳ່ແຜ່ນຕັດຫຍິບ ຫວຽດນາມ ຖືວ່າ: ຕະຫລາດສ່ົງອອກເຄື່ອງຕຳ່ແຜ່ນຕັດຫຍິບ ປີ 2014 ມີຄວາມສະດວກຫລາຍຢ່າງ, ເມື່ອບັນດາຕະຫລາດສົ່ງອອກຕົ້ນຕໍຂອງຫວຽດນາມ ຄື: ອາເມລິກາ, ອີຢູ, ຍີ່ປຸ່ນ, ສເກົາຫລີ … ຄາດຄະເນວ່າ ຈະບັນລຸການເຕີບໂຕສູງກວ່າ. ການເຈລະຈາສັນຍາຄູ່ຮ່ວມມືເຂດປາຊີຟີກ (TPP) ສຳເລັດຜົນ ຈະນຳມາເຊິ່ງກາລະໂອກາດຫລາຍຢ່າງໃຫ້ແກ່ວິສາຫະກິດສົ່ງອອກເຄື່ອງຕຳ່ແຜ່ນຕັດຫຍິບ ຫວຽດນາມ.